Romanos 7:4 - Chayahuita (Shahui)

⁴ Inapochachin iyaroꞌsaꞌ, canpoantaꞌ Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi iráca pënëntërinsoꞌ huaꞌanëntiinpoasoꞌ yaꞌhuërinhuëꞌ. Quisocristo chinpitacasoꞌ yaꞌhuërin. Inaso chiminaponahuëꞌ, nani nanpiantarin. Ina imamiatohuatëhuaꞌ, noya nicarihuaꞌ aꞌnapitantaꞌ Yosë noya yonquicaiso marëꞌ.

Romanos 7:4 ပူးပေါင်းရင်းမြစ်များ

Isaías 54:5

Nininquëmasoꞌ, saꞌatatë pochin nitarinquëmaꞌ. Inasoꞌ nininën, Sinioro yaꞌipi nanitaparinsoꞌ. Inasoꞌ Yosë, noyasáchin ninin niꞌton, Israirori chinotërin. Ina nichaꞌërinquëmaꞌ. Yaꞌipi isoroꞌpaꞌ huaꞌanëntaton napotarinquëma niꞌton, yaꞌipi inapita naniantaramaꞌ.

Mateo 26:26

Coshatasoiꞌ, pan masahuaton Yosë nontërin. “Yosparinquën, Sinioro” itahuaton, sëꞌpanin. Ina quëran caꞌtanoꞌsanënpita quëtërin. —Caꞌcoꞌ iyaroꞌsaꞌ. Ca nonëhuë pochin isoꞌ, itërin.

Marcos 4:20

Aꞌnaquënso nipirinhuëꞌ noyaroꞌpaquë paꞌsarayarinso pochin nipi. Yosë nanamën noya natanpi. Natanahuatonaꞌ, cancanëna quëran natëpi. Sharoꞌsaꞌ nisha nisha nitërinso pochin natëtopi. Aꞌnaquën yaꞌpirin cara shonca, cara shonca nitërinso pochin noyamiachin imapi. Aꞌnaquëontaꞌ saota shonca, saota shonca nitërinso pochin noya imapi. Aꞌnaquënsoꞌ pasa, pasa nitërinso pochin yaꞌipi cancanëna quëran imatonaꞌ, noya noya imapi huachi,” itërin.

Juan 15:8

Opa naꞌcon nitërinso pochin canpitantaꞌ noya noya nicoꞌ. Ina quëran aꞌnapitantaꞌ nicatënënquëmaꞌ, Yosë yonquiaponaꞌ. Naporahuatomaꞌ, noya noya imasaramaco.

Juan 3:29

Niꞌcoꞌ. Quëmapi saꞌapachina, amiconëontaꞌ noya cancantërin. Noya nipayapi niꞌton, naporinsoꞌ natantaton, nóya cancantërin. Inapochachin cantaꞌ ninahuë. Naꞌcon piyapiꞌsaꞌ Quisoso imasapi niꞌton, nóya cancantërahuë.

Juan 6:51

Ca nanpirin cosharo pochinco. Inápa quëran oꞌmato, noya noya ananpiaranquëmaꞌ. Ca nonëhuë chachin quëtarahuë yaꞌipi piyapiꞌsa marëꞌ. Coshatëramaso pochin nitohuatamaco, yaꞌcoancantaranquëmaꞌ, nanpimiatarama huachi, itërin.

Romanos 6:11

Inapochachin canpitantaꞌ ama huachi oshahuanacamasoꞌ yonquicosohuëꞌ. Quisocristo imaramaꞌ niꞌton, Yosëíchin natëcoꞌ.

Romanos 6:14

Inapohuatamaꞌ, co huachi oshanëma huaꞌanëntatë pochin nitarinquëmahuëꞌ. Co yaꞌipi pënëntërinsoꞌ natëpiramahuëꞌ, inaora nohuanton, Yosë anoyacancantërinquëmaꞌ. Nosoroatënquëmaꞌ, catahuarinquëmaꞌ noya nicacamaso marëꞌ.

Romanos 6:2

¡Co naporinhuëꞌ! Quisocristo imapatëhuaꞌ, chiminëhuaso pochin cancantatëhuaꞌ, co huachi oshahuanacasoꞌ paꞌyatarihuahuëꞌ.

Romanos 6:22

Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

Romanos 7:6

Iráca nisha nisha pënëntërinsoꞌ yaꞌhuërin natëcasoꞌ, Moisësëri ninshitërinsoꞌ. “Co yaꞌipiya natëhuatëhuahuëꞌ, co onporontaꞌ chaꞌësarëhuahuëꞌ,” topi. Apinaꞌpi tashinan pëiquë yaꞌhuërinso pochin nipirëhuahuëꞌ. Iporasoꞌ co huachi Moisësë pënëntërinsoꞌ yonquiarëhuahuëꞌ. Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi huaꞌanëntiinpoasoꞌ yaꞌhuërinhuëꞌ. Ispirito Santo catahuarinpoaꞌ cancanënpoa quëran huarëꞌ Yosë natëcasoꞌ. Nasha cancan quëtërinpoaꞌ. Napoaton noya nisarëhuaꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 10:16

Niyontonpatëhuara, Quisocristo chimininsoꞌ yonquirëhuaꞌ. “Quiya marëꞌ Sinioro huënainën paꞌnin niꞌton, ‘Yosparinquën’ tënai,” itatëhuaꞌ, huënainën pochin nininsoꞌ oꞌorëhuaꞌ. Cancanënpoa quëran huarëꞌ yonquiatëhuaꞌ, oꞌopatëhuaꞌ, huënainën napopináchin yonquirëhuaꞌ. Ina quëran cosharoꞌ ina nonën pochin nininsoꞌ sëꞌpanahuatëhuaꞌ, caꞌnëhuaꞌ. “Tëhuënchachin canpoa marëꞌ Quisocristo nonën ohuanpi,” taꞌtëhuaꞌ, napopináchin yonquirëhuaꞌ.

2 Corintios 11:2

Yosë nohuanton, naꞌcon nosororanquëmaꞌ. Nosoroatënquëmaꞌ, aꞌpitëranquëmaꞌ. Co nohuantërahuëꞌ nisha cancantacamasoꞌ. Nanon soꞌyarinso pochin ninin. Niꞌcoꞌ. Quëmapiri mapachina, soꞌináchin yonquicasoꞌ yaꞌhuërin. Inapochachin carinquëmantaꞌ aꞌchintëranquëmaꞌ Quisocristoíchin yonquicamaso marëꞌ.

Gálatas 3:13

Co nanitërëhuahuëꞌ noꞌtëquën natëcasoꞌ niꞌton, anaꞌintinpoasoꞌ yaꞌhuërin. Quisocristoso nipirinhuëꞌ nichaꞌërinpoaꞌ. Canpoaꞌ yaꞌhuërënamënpoaꞌ chiminin. Ina, Yosëri anaꞌintërin. Quiricanën quëran naporin: “Piyapi paꞌpi co noyahuëꞌ nipachina, naraquë achinpirahuatëꞌ, chiníquën anaꞌintërëꞌ. Nani Yosëri aꞌporin,” tënin quiricanënquë. Canpoasoꞌ anaꞌintinpoasoꞌ yaꞌhuëpirinhuëꞌ, naraquë chachin Quisocristo apatanantohuachinara, oshanënpoa marëꞌ parisitërin. Inaquë parisitaton, nichaꞌërinpoaꞌ.

Gálatas 5:18

Cancanënpoaquë Ispirito Santo nontërinpoaꞌ maꞌsona noya nicacasoꞌ. Ina natëhuatëhuaꞌ, co huachi iráca pënëntërinsoꞌ camairinpoahuëꞌ. Ispirito Santo nohuantërinso chachin yonquiarihuaꞌ.

Efesios 2:15

Quisocristo nasha nanan quëtërinpoaꞌ. Co huachi iráca pënëntërinsoꞌ yonquicasoꞌ yaꞌhuërinhuëꞌ. Yaꞌipinpoaꞌ Quisocristo imapatëhuaꞌ, nasha huëntonquë ayaꞌconinpoaꞌ. Quisocristo huëntonënquë yaꞌconatëhuaꞌ, co huachi nisha chinotërëhuahuëꞌ. Nisha nisha piyapinpoaꞌ nirihuarahuëꞌ, noya niniꞌtëhuaꞌ yaꞌhuërëhuaꞌ.

Filipenses 1:11

Quisocristo catahuahuachinquëmaꞌ, noyasáchin nisaramaꞌ. Ina quëran aꞌnapitantaꞌ nicatënquëmaꞌ, Yosë yonquiapi. “Ma noya Yosëri catahuarin niꞌton, noya nipi. Ma noyacha Yosëso paya,” tosapi.

Filipenses 4:17

Ina marëꞌ noya cancantërahuë. Co coriqui quëtëramacoso marëáchin noya cancantërahuëꞌ. Catahuaramacoso marëꞌ Yosëꞌpaꞌ canaaramaꞌ niꞌton, noya noya cancantërahuë.

Colosenses 1:10

Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

Colosenses 1:22

Iporaso nipirinhuëꞌ nanan anoyatërinquëmaꞌ. Quisocristo isoroꞌpaquë oꞌmaton, piyapi chachin nasitimarin. Corosëquë chiminin nanan anoyatinpoaso marëꞌ. Nanan anoyatatonpoaꞌ, anoyacancantërinpoaꞌ. Noyápiachin cancan quëtërinpoaꞌ. Oꞌmantahuachin, co anaꞌintarinpoahuëꞌ. Noya cancantacaso marëꞌ nanan anoyatërinpoaꞌ.

Colosenses 1:6

Noya nanan chachin yaꞌipi parti aꞌchinapi. Aꞌna parti aꞌna parti piyapiꞌsaꞌ natëtatonaꞌ, noya imasapi. Canpitantaꞌ noya imasaramaꞌ. Yaꞌnan natantapomaꞌ, natëramaꞌ. “Yosë nosoroatonpoaꞌ, inaora nohuanton, nichaꞌësarinpoaꞌ,” itërinënquëmaꞌ. Napotohuachinënquëmara, “Noꞌtëquën shaꞌhuitërinpoaꞌ,” taꞌtomaꞌ, natëramaꞌ.

Colosenses 2:14

Iráca Moisësë pënëntërin nani maꞌsha natëcaso marëꞌ. Co inquënpoa tërantaꞌ nanitaparëhuahuëꞌ yaꞌipi natëcasoꞌ niꞌton, oshahuanëhuaꞌ. Ina marëꞌ anaꞌintinpoaso nipirinhuëꞌ, Quisocristo corosëquë chiminaton, nichaꞌërinpoaꞌ niꞌton, Yosë noya niꞌninpoaꞌ.

Colosenses 2:20

Iráca Quisocristo chiminin. Canpitantaꞌ ina imapatamaꞌ, inarëꞌquëmaꞌ chiminamaso pochin ninamaꞌ niꞌton, co huachi aꞌnapita pochin nisha nisha chiníquën nanantopisopita imaramahuëꞌ. Inapitasoꞌ inahuara yonquinëna quëran nisha aꞌchinpi. “Nani maꞌsha natëhuatoi, chaꞌësarai,” taꞌtonaꞌ, “Ama ina caꞌcosohuë. Ama piꞌnicosohuëꞌ. Ama sëꞌhuayátëracosohuëꞌ,” itarinënquëmaꞌ. ¿Maꞌmarëtaꞌ ipora huantaꞌ ina natëcamasoꞌ yonquiramaꞌ? tënahuë yonquiato.

Hebreos 10:10

Quisocristo piyapi chachin nasitimarahuaton, oshanënpoa marëꞌ chiminin. Yosë nohuanton, aꞌnaroíchin chiminin. Canpoantaꞌ ina imapatëhuaꞌ, oshanënpoaꞌ inquitërinpoaꞌ. Noyápiachin cancan quëtërinpoa huachi.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

Apocalipsis 19:7

Huëcoꞌ capa cancantahuaꞌ. Noya cancantahuaꞌ. Inasáchin noya noya niꞌton, natëahuaꞌ. Nani ora nanirin Carniroaꞌhua saꞌarinso pochin nicacasoꞌ. Imapisopitarëꞌ yaꞌhuëmiatarin. Niꞌcoꞌ. Sanapi yasoꞌyahuachina, noyápiachin nitaparin. Inapochachin imapisopita nitapacancanpi.

Apocalipsis 21:9

Ina quëran aꞌnaraꞌ anquëni huëcapairinco, anaꞌintacaso marëꞌ minëꞌ quëtopisoꞌ. Huëꞌsahuaton, itërinco: “Huëquëꞌ, nasha ninanoꞌ aꞌnochinquën. Inaquë Carniroaꞌhuari huayoninsopita yaꞌhuaponaꞌ. Sanapi soꞌyacaso marëꞌ nitaparinso pochin noyápiachin ninin,” itërinco.