Romanos 6:23 - Chayahuita (Shahui)

²³ Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

Romanos 6:23 ပူးပေါင်းရင်းမြစ်များ

Génesis 2:17

Anitotacaso nara nitërinsoíchin, co nohuantërahuë capamasoꞌ. Inaso caꞌpatan, noya nininso nitotaponahuëꞌ, co noyahuëꞌ nininsonta nitotaran. Ama ina nitërinso caꞌquësohuëꞌ. Ina caꞌpatan, tëhuënchachin chiminaran,” itërin.

Génesis 3:19

Paꞌpi chiníquën sacatahuarëꞌ coshataran. Napoin quëran chiminaran huachi. Noꞌpa quëran ninanquën niꞌton, noꞌpa chachin niantamaso yaꞌhuërin, itërin.

Ezequiel 18:20

Insosona oshahuaninsoꞌ, inaora chachin chiminacaso yaꞌhuërin. Co paꞌpin oshanën marëꞌ huiꞌnin anaꞌintacaso yaꞌhuërinhuëꞌ. Inapochachin huiꞌnin oshanën marëntaꞌ, co paꞌpin anaꞌintacaso yaꞌhuërinhuëꞌ. Noya nipisopitasoꞌ, noya nipiso marëꞌ noꞌtëquën acanapo. Co noyahuëꞌ ninaꞌpintaꞌ, co noyahuëꞌ nininso marëꞌ noꞌtëquën anaꞌintaꞌhuaso yaꞌhuërin,” itërinco.

Ezequiel 18:4

Yaꞌipi piyapiroꞌsa cari huaꞌanëntërahuë. Mashoroꞌsanta huiꞌninarë chachin huaꞌanëntërahuë. Insosona co noyahuëꞌ nicaton oshahuanpachin, inasoꞌ chiminapon.

Mateo 25:46

Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.

Juan 10:28

Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ.

Juan 17:2

Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ.

Juan 3:36

Huiꞌnin natëpisopitasoꞌ, Yosë nohuitatonaꞌ nanpimiatapi. Co natëpisopitasohuëꞌ, co ina pochin nanpimiatapihuëꞌ. Nani Yosëri yonquirin anaꞌintacaso marëꞌ. Aꞌna tahuëri anaꞌintomiatarin, parisitopiquë aꞌpararin huachi.

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 4:36

Piyapiꞌsaꞌ aꞌchintohuatamaꞌ, Yosëꞌpaꞌ canaaramaꞌ. Noya noya nanpimiataramaꞌ. Catoꞌ piyapi sacatërinso pochin nisaramaꞌ. “Aꞌnasoꞌ yaꞌpirin shaꞌnin. Cayahuachina, aꞌnarintaꞌ manin,” topi. Napohuachina, catoꞌ aꞌchinaꞌpiroꞌsa chachin nóya cancantapi.

Juan 5:24

Noꞌtëquën itaranquëmaꞌ. Yosë chachin aꞌpaimarinco. Noya natanpatamaco, cancanëma quëran huarëꞌ ina imapatamaꞌ, nanpimiataramaꞌ. Co onporontaꞌ anaꞌintaranquëmahuëꞌ. Chiminpatamaꞌ, co parisitomiataramahuëꞌ. Nani Yosë nohuitaramaꞌ niꞌton, nanpimiataramaꞌ.

Juan 6:27

Cosharomia aꞌnaroáchin chanatërin. Ama inasáchin nohuantocosohuëꞌ. Cosharo pochin nininsoꞌ yaꞌhuërin. Cancanëma marëꞌ quëtaranquëmaꞌ. Ina co onporontaꞌ chanatarinhuëꞌ. Yaꞌhuëtohuachinquëmaꞌ, Yosë nohuitatomaꞌ nanpimiatarama. Ina naꞌcon naꞌcon yonquicoꞌ. Yosë quëran quëmapico niꞌto, quëtaranquëmaꞌ. Ina marëꞌ Tata Yosë acorinco. Ina nohuanton, nani maꞌsha nanitaparahuë nohuitamacoso marëꞌ, itërin.

Juan 6:40

“Quëmasoꞌ tëhuënchachin Yosë huiꞌninquën,” itatomaco imapatamaco, Yosë nohuitatomaꞌ nanpimiatarama huachi. Ayaroꞌ tahuëri ananpitaantaranquëmaꞌ. Ina Yosë nohuantërin, itërin Quisosori.

Juan 6:68

—Co Sinioro aꞌpoarainquënhuëꞌ. Co aꞌna yaꞌhuërinhuëꞌ imacaꞌhuaisoꞌ. Quëma nóya aꞌchintarancoi Yosë nohuitatoi nanpimiataꞌhuaiso marëꞌ.

Romanos 1:32

“Co noyahuëꞌ nipisopita chiminpachinara, anaꞌintacasoꞌ yaꞌhuërin,” tënin Yosë. Ina nitotaponaraihuëꞌ, inachachin niantapi. Naporahuatonaꞌ, aꞌnapitantaꞌ co noyahuëꞌ nipachinara, paꞌyatopi.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Romanos 5:12

Atanꞌton co noyahuëꞌ nicaton, oshahuanin. Ina marëꞌ chiminacasoꞌ yaꞌhuërin. Ina quëran yaꞌipinpoaꞌ co noyahuëꞌ nicatëhuaꞌ, chiminëhuaꞌ.

Romanos 5:17

Aꞌna yaꞌpiíchin tëhuërin niꞌton, yaꞌipi piyapinpoaꞌ chiminacasoꞌ yaꞌhuërin. Aquëtë huarëꞌ Yosësoꞌ, inaora nohuanton nosoroatonpoa Quisocristo quëran nichaꞌërinpoaꞌ niꞌton, inarëꞌquënpoaꞌ nanpimiatatëhuaꞌ huaꞌanëntarihuaꞌ.

Romanos 5:21

Oshahuanëhuaꞌ niꞌton, chiminpatëhuaꞌ, parisitomiatacasoꞌ yaꞌhuëpirinhuëꞌ. Yosësoꞌ inaora nohuanton, nosoroatonpoaꞌ, catahuarinpoaꞌ. Sinioro Quisocristo anoyacancantohuachinpoaꞌ, nanpimiatarihuaꞌ.

Romanos 6:16

Insosona natëhuatëhuaꞌ, inasoꞌ huaꞌanëntarinpoaꞌ. ¡Nani nitotëramaꞌ ipora! Oshanënpoa natëhuatëhuaꞌ, ina huaꞌanëntarinpoaꞌ. Camaihuachinpoara, co noyahuëꞌ ninëhuaꞌ. Oshanënpoaꞌ co aꞌpoasëhuahuëꞌ chiminpatëhuaꞌ, parisitopiquë paꞌsarëhuaꞌ. Nipirinhuëꞌ, Yosë natëhuatëhuaꞌ, noya nicarihuaꞌ.

Romanos 6:21

Inapohuatamara, ¿maꞌtaꞌ ina marëꞌ canaramaꞌ? Co ina marëꞌ canamiataramahuëꞌ. Topinan quëran yaꞌhuëramaꞌ. Ina pochin cancantohuatamaꞌ, chiminpatamaꞌ, parisitopiquë paꞌsaramaꞌ. Iráca ina pochin nipiramahuëꞌ, iporaso ina marëꞌ tapanamaꞌ.

Romanos 8:13

Co noyahuëꞌ ninëhuasopita co aꞌpoasëhuahuëꞌ, chiminpatëhuaꞌ parisitomiatacasoꞌ yaꞌhuërin. Nipirinhuëꞌ, co noyahuëꞌ ninëhuasopita tëpatë pochin nitohuatëhuaꞌ, nanpimiatarihuaꞌ. Ispirito Santo catahuarinpoaꞌ co noyahuëꞌ ninëhuasopita tëpatë pochin nitacaso marëꞌ.

Romanos 8:38

Yosë nosoromiatërinpoaꞌ. Nanpihuatëhuara, nosororinpoaꞌ. Chiminpatëhuantaꞌ, co patarinpoahuëꞌ. Anquëniroꞌsaꞌ, sopairoꞌsaꞌ, tanan huaꞌyanoꞌsaꞌ, inapita co nanitopihuëꞌ Yosë quëran osërëinpoasoꞌ. Ipora tahuëriꞌsaꞌ maꞌsha onpotopirinënpoahuëꞌ, co patarinpoahuëꞌ. Aꞌna tahuërintaꞌ maꞌsha onpotohuachinënpoaꞌ, co Yosë naniantarinpoahuëꞌ.

Romanos 8:39

Maꞌsha inápaquë yaꞌhuërinsopita, acoporoquë yaꞌhuërinsopita inapita co nanitopihuëꞌ Yosë quëran osërëinpoasoꞌ. ¡Co insontaꞌ nanitërinhuëꞌ Yosë ananiantinpoasoꞌ! Quisocristo huaꞌanëntërinpoaꞌ. Ina imarëhuaꞌ niꞌton, Yosë nosoromiatërinpoaꞌ.

Romanos 8:6

Co noyahuëꞌ nicacasoráchin paꞌyatohuatëhuara, chimipi pochin niconëhuaꞌ. Co Yosë nohuitërëhuahuëꞌ. Nipirinhuëꞌ, Ispirito Santo paꞌyatatëhuaꞌ natëhuatëhuaꞌ, Yosë nohuitatëhuaꞌ, nanpimiatarihuaꞌ. Noya yonquiatëhuaꞌ, sano cancantarihuaꞌ.

Gálatas 3:10

Moisësë iráca pënëntërinsoꞌ yaimapatamaꞌ, anaꞌintinquëmasoꞌ yaꞌhuërin. Co yaꞌipi natëramahuëꞌ niꞌton, Yosë anaꞌintarinquëmaꞌ. Iráca quiricanën quëran naporin: “Co yaꞌipimiáchin natëhuatamacohuëꞌ, chiníquën anaꞌintaranquëmaꞌ. Parisitopiquë aꞌparanquëmaꞌ,” tënin.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Santiago 1:15

Ipora huantaꞌ piꞌpian co noyahuëꞌ yonquirëhuaꞌ. Co aꞌnaroáchin naniantohuatëhuahuëꞌ, co noyahuëꞌ nisarëhuaꞌ. Naporahuatëhuaꞌ, oshahuanarëhuaꞌ. Oshahuanpatëhuaꞌ, chiminpatëhuaꞌ parisitomiatarëhuaꞌ. Niꞌcoꞌ. Sanapi huaꞌhuanpachina, oshaquëran oshaquëran huaꞌhuin nanihuachina, huairin. Inapochachin co noyahuëꞌ yonquihuatëhuaꞌ, oshaquëran oshaquëran co noyahuëꞌ nisarëhuaꞌ. Ina marëꞌ oshahuanarëhuaꞌ.

1 Juan 2:25

Quisocristo chachin shaꞌhuitërinpoaꞌ: “Imamiatohuatamaco, Yosë nohuitatomaꞌ, nanpimiataramaꞌ,” itërinpoaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.