Romanos 6:12 - Chayahuita (Shahui)

¹² Ama oshanëma huaꞌanëntatë pochin nitatënquëmaꞌ camayápainquëmaso nohuantocosohuëꞌ. Yaꞌipi co noyahuëꞌ yonquiramasopita naniantatomaꞌ, noyasáchin yonquicoꞌ.

Romanos 6:12 ပူးပေါင်းရင်းမြစ်များ

Génesis 4:7

Noya ninan naporini, noya cancanchitonhuëꞌ. Nipirinhuëꞌ, co nohuantëranhuëꞌ noya nicacaso niꞌquëhuarëꞌ, co noyahuëꞌ nisápaso marëꞌ oshanën minsëarinquën. Ina nipirinhuëꞌ, noya nipatan, nanitëran ina minsëcasoꞌ,” itërin.

Salmos 119:133

Nani shaꞌhuitëranco catahuaancosoꞌ. Ama co noyahuëꞌ cancantërahuëso canaincosohuëꞌ.

Salmos 19:13

“Quiyaora noya nisarai,” topatoira, co natantochináchinhuëꞌ cancantarai. Piyapinëncoi niꞌtoi, ina pochin cancantohuatoi, inquitocoi. Inapotohuatancoi, co tëhuëcaꞌhuaiso yaꞌhuëtarincoihuëꞌ. Panca oshahuanaꞌhuaiso nipirinhuëꞌ, chaꞌësarai.

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

Romanos 2:8

Nipirinhuëꞌ, canpoara nohuantërëhuasoráchin nipatëhuaꞌ, noꞌhuiarinpoaꞌ. Noꞌtëquën anitotopirinpoahuëꞌ co natëhuatëhuahuëꞌ, anaꞌintarinpoaꞌ. Co noyahuëꞌ nipatëhuaꞌ, chiníquën anaꞌintarinpoaꞌ.

Romanos 5:21

Oshahuanëhuaꞌ niꞌton, chiminpatëhuaꞌ, parisitomiatacasoꞌ yaꞌhuëpirinhuëꞌ. Yosësoꞌ inaora nohuanton, nosoroatonpoaꞌ, catahuarinpoaꞌ. Sinioro Quisocristo anoyacancantohuachinpoaꞌ, nanpimiatarihuaꞌ.

Romanos 6:14

Inapohuatamaꞌ, co huachi oshanëma huaꞌanëntatë pochin nitarinquëmahuëꞌ. Co yaꞌipi pënëntërinsoꞌ natëpiramahuëꞌ, inaora nohuanton, Yosë anoyacancantërinquëmaꞌ. Nosoroatënquëmaꞌ, catahuarinquëmaꞌ noya nicacamaso marëꞌ.

Romanos 6:16

Insosona natëhuatëhuaꞌ, inasoꞌ huaꞌanëntarinpoaꞌ. ¡Nani nitotëramaꞌ ipora! Oshanënpoa natëhuatëhuaꞌ, ina huaꞌanëntarinpoaꞌ. Camaihuachinpoara, co noyahuëꞌ ninëhuaꞌ. Oshanënpoaꞌ co aꞌpoasëhuahuëꞌ chiminpatëhuaꞌ, parisitopiquë paꞌsarëhuaꞌ. Nipirinhuëꞌ, Yosë natëhuatëhuaꞌ, noya nicarihuaꞌ.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

Romanos 8:13

Co noyahuëꞌ ninëhuasopita co aꞌpoasëhuahuëꞌ, chiminpatëhuaꞌ parisitomiatacasoꞌ yaꞌhuërin. Nipirinhuëꞌ, co noyahuëꞌ ninëhuasopita tëpatë pochin nitohuatëhuaꞌ, nanpimiatarihuaꞌ. Ispirito Santo catahuarinpoaꞌ co noyahuëꞌ ninëhuasopita tëpatë pochin nitacaso marëꞌ.

2 Corintios 4:11

Quisocristo nanamën aꞌchinaiso marëꞌ yatëparinacoi. Quiyaora co nanitopiraihuëꞌ, nani tahuëri ina achinicancanincoi ina pochachin yonquicaꞌhuaiso marëꞌ. Ipora huantaꞌ nanpitoi, Quisocristo pochin cancantarai.

2 Corintios 5:4

Iporasoꞌ isoroꞌpaquë yaꞌhuatëhuaꞌ, co chinirëhuahuëꞌ, sëtërëhuaꞌ, naporëhuaꞌ. Napopirëhuahuëꞌ, co chiminacasoꞌ nohuantërëhuahuëꞌ. Nasha nonënpoaꞌ tëhuënchinsoꞌ naꞌcon nohuantërëhuaꞌ. Isoroꞌpaquë taꞌhuantopirëhuahuëꞌ, Yosëꞌpaꞌ noya noya nanpimiatarihuaꞌ.

Gálatas 5:16

Ispirito Santo natëcoꞌ catahuainquëmaꞌ, tënahuë. Ina catahuahuachinquëmaꞌ, co noyahuëꞌ yonquiramasoꞌ naniantaramaꞌ. Inapita naniantatomaꞌ, nóya nisaramaꞌ.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Efesios 2:3

Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Deuteronomio 7:2

Sinioro nohuanton inapita nacionoꞌsa canahuatamaꞌ, ataꞌhuantamaso yaꞌhuërin. Co nosoroamaso yaꞌhuërinhuëꞌ. Naporahuaton ama inapitarëꞌquëma maꞌsha marëꞌ tëranta anoyatocosohuëꞌ.

1 Tesalonicenses 4:5

Aꞌnaquën co Yosë nohuitatonahuëꞌ, ichihuëꞌëcaisoachin yonquiatonaꞌ, aꞌnaroáchin mapi. Ama inapita pochin cancantocosohuëꞌ. Tëhuënchachin nosoroatomaꞌ, macoꞌ.

2 Timoteo 2:22

Aꞌnaquën huiꞌnapiꞌsasoꞌ nisha nisha yonquiatonaꞌ, paꞌsápi. Ama ina pochin yonquiquësohuëꞌ. Noyasáchin nicacasoꞌ yonquiquëꞌ. Yaꞌipi cancanën quëran Quisocristo natëquëꞌ. Yaꞌipi piyapi nosoroquëꞌ. Yaꞌipi imarëhuaso capininpoaꞌ noya niniꞌtëhuaꞌ, yaꞌhuaꞌahuaꞌ. Noyápiachin cancantatëhuaꞌ, Sinioro nontërëhuaꞌ catahuainpoaso marëꞌ.

Tito 2:12

Nosoroatonpoaꞌ, pënëninpoaꞌ yaꞌipi co noyahuëꞌ yonquirëhuasopita naniantacaso marëꞌ. Ama maꞌsharáchin nohuantahuasohuëꞌ. Co monshihuanacasoꞌ yaꞌhuërinhuëꞌ. Sano yaꞌhuatëhuaꞌ, nóya yonquiaꞌahuaꞌ. Yosë yonquirinsoráchin imahuaꞌ. Nani tahuëri Yosë chinotatëhuaꞌ, noyasáchin niahuaꞌ. Ina marëꞌ pënëninpoaꞌ.

Tito 3:3

Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

1 Pedro 1:14

Huaꞌhuaroꞌsaꞌ noya nipachinara, paꞌpinaꞌ natëpi. Inapochachin canpitantaꞌ Yosëíchin natëcoꞌ. Iráca co Yosë nanamën nitotatomarahuëꞌ, co yonquiramahuëꞌ. Yanoꞌpihuatamara, noꞌpiramaꞌ. Co noyahuëꞌ yonquihuatamara, co noyahuëꞌ ninamaꞌ. Iporaso nipirinhuëꞌ ama inapocosohuëꞌ.

1 Pedro 2:11

Nosororanquëmaꞌ iyaroꞌsaꞌ niꞌton, pënënaranquëmaꞌ. Quisocristo imatomaꞌ, co isoroꞌpaquë yaꞌhuëmiataramahuëꞌ. Yosëꞌpaꞌ yaꞌhuëmiataramasoꞌ. Napoaton ama maꞌsha isoroꞌpaquë yaꞌhuërinsopitaráchin yonquicosohuëꞌ. Isoroꞌpaquë noꞌpiápi, monshihuanapi, taparosáchin nonatonaꞌ, capa cancantapi. Ama ina pochin cancantocosohuëꞌ. Ina pochin cancantohuatamaꞌ, sopai minsëarinquëmaꞌ, co Yosë pochin cancantaramahuëꞌ.

Judas 1:16

Yosësoꞌ noya nosoropirinpoahuëꞌ, inapitasoꞌ maꞌsha onpohuachinara, ina noꞌhuipi. Co sano cancantopihuëꞌ. Maꞌsona tërantaꞌ yonquihuachinara, nipi. Co noyahuëꞌ cancantatonaꞌ, napopi. “Quiyasoꞌ noya noya nitotërai,” taꞌtonaꞌ, chiníquën nonconpi. Co piyapi nosoroaponaraihuëꞌ, noyasha nontopi. Inahuara canacaiso marëꞌ napotopi.

Judas 1:18

“Ayaroꞌ tahuëri naniriahuachin, co noyahuëꞌ quëmapiꞌsaꞌ yaꞌhuërapi. Yosë nanamën tëhuaapi. Co noyahuëꞌ cancantatonaꞌ, aꞌnaratipita nisapi,” itërinpoaꞌ.

Jueces 2:3

Napoaton iporasoꞌ shaꞌhuitaranquëmaꞌ: Nisha nisha piyapiroꞌsa iporahuanta yaꞌhuëapisoꞌ, co huachi aquëtë aꞌpaarahuëꞌ. Inahuaꞌ, mamanshinënaꞌ, inapita anishacancantarinënquëmaꞌ,” itërin.