Romanos 5:1 - Chayahuita (Shahui)

¹ “Sinioro Quisocristoíchin nichaꞌësarinpoaꞌ,” taꞌtëhuaꞌ, imarëhuaꞌ. Oshanënpoaꞌ inquitërinpoaꞌ niꞌton, Yosë noya niꞌninpoaꞌ. Co inimiconënpita pochin niꞌninpoahuëꞌ.

Romanos 5:1 ပူးပေါင်းရင်းမြစ်များ

Salmos 122:6

Quirosarinquë sano yaꞌhuëcaiso marëꞌ Yosë nontocoꞌ. Quirosarin paꞌyatërëhuasopitasoꞌ, noya yaꞌhuëaꞌahuaꞌ.

Isaías 32:17

Noyasáchin nicatonaꞌ, sano yaꞌhuëaponaꞌ. “Sinioro catahuarincoi,” tëcatonaꞌ, noya yaꞌhuëmiataponaꞌ.

Isaías 54:13

Yaꞌipi inaquë yaꞌhuëcaiso nipisopita cari aꞌchintarahuë. Yaꞌipi inaquë yaꞌhuëpisopitasoꞌ, noya yaꞌhuëatona sano yaꞌhuëaponaꞌ.

Isaías 55:12

Canpitaso quëparinëma quëran, noya cancantatoma huënantaramaꞌ. Yaꞌhuëramaso noꞌpaquë chachin sano cancan quëran huënantaramaꞌ. Motopiroꞌsaꞌ, motopiaꞌhuaroꞌsaꞌ, inapitanta piyapi pochin capa cancantatona cantaponaꞌ. Yaꞌipi nararoꞌsanta piyapi pochin pincaroponaꞌ.

Habacuc 2:4

Iso nanan inaquë ninshitëquëꞌ: ‘Papironiaroꞌsasoꞌ paꞌpi nocantopi. Canpitaso nipirinhuëꞌ sano piyapinquëma niꞌtomaꞌ: “Caora co nanitërahuëꞌ. Sinioroíchin catahuarinco chaꞌëcaꞌhuasoꞌ,” tënamaso marëꞌ nichaꞌësaranquëma nanpiaramaꞌ,’ tëquë ninshitaton.

Lucas 19:42

“Huaꞌquiꞌ pënënpiranquëmahuëꞌ, co yanatanamacohuëꞌ. Ipora tërantaꞌ noꞌtëquën yonquiramaꞌ naporini, noya cancanchitomahuëꞌ. Iporaso nipirinhuëꞌ co huachi nanitaramahuëꞌ. Co natantochináchinhuëꞌ cancantëramaꞌ.

Lucas 2:14

“¡Ma noyacha Yosëso paya! Inápaquë yaꞌhuaponahuëꞌ, piyapinquëmaꞌ yonquirinquëmaꞌ. Cancantatoma ina yanatëramasopitasoꞌ sano cancantaramaꞌ,” itopi anquëniroꞌsari.

Juan 14:27

Pantaporahuëꞌ, asanocancanaranquëmaꞌ. Tata Yosë natëto, co mantaꞌ tëꞌhuatërahuëꞌ. Catahuaaranquëmaꞌ ca pochachin cancantacamaso marëꞌ. Piyapiꞌsaꞌ inahuara co sano cancantopihuëꞌ. Aꞌnaroáchin paꞌyanpi. Carinquëmaso nipirinhuëꞌ catahuaaranquëmaꞌ sano cancantacamaso marëꞌ. Ama paꞌyancosohuëꞌ. Ama tëꞌhuacosohuëꞌ.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Juan 20:31

Iso quiricaquë ninshitërahuësopitasoꞌ, Quisoso natëcamaso marëꞌ ninshitërahuë: “Inasoꞌ tëhuënchachin Cristo, Yosë huiꞌnin. Inari aꞌpaimarinsoꞌ,” taꞌtomaꞌ, ina imaco huachi. Imapatamaꞌ, Yosë nohuitatomaꞌ nanpimiataramaꞌ.

Juan 5:24

Noꞌtëquën itaranquëmaꞌ. Yosë chachin aꞌpaimarinco. Noya natanpatamaco, cancanëma quëran huarëꞌ ina imapatamaꞌ, nanpimiataramaꞌ. Co onporontaꞌ anaꞌintaranquëmahuëꞌ. Chiminpatamaꞌ, co parisitomiataramahuëꞌ. Nani Yosë nohuitaramaꞌ niꞌton, nanpimiataramaꞌ.

Hechos 10:36

Iráca israiroꞌsacoi noya nanan shaꞌhuitërincoi. Piyapinënpita pochin nicatoncoi, Yosë anitotërincoi. Oshahuanëhuaꞌ niꞌton, Yosë inimicotopirëhuahuëꞌ, Quisocristo aꞌpaimarin nanan anoyatinpoaso marëꞌ. Inasoꞌ yaꞌipi piyapinpoaꞌ yahuaꞌanëntërinpoaꞌ.

Romanos 1:17

“Yosëíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ. Oshanënpoaꞌ inquitatonpoaꞌ, co huachi inapita yonquiarinhuëꞌ. Quiricanën quëran ina anitotërinpoaꞌ. “Cancanënpoa quëran huarëꞌ Yosë natëhuatëhuaꞌ, noya niꞌsarinpoaꞌ niꞌton, noya nanpimiatarihuaꞌ,” tënin Yosë quiricanënquë. Co canpoara nanitërëhuahuëꞌ noya cancantacasoꞌ.

Romanos 1:7

Napoaton Nomaquë yaꞌhuëramasopita ninshitaranquëmaꞌ. Yosë paꞌpi nosororinquëmaꞌ. Nani acorinquëmaꞌ piyapinënpita nicacamasoꞌ. Niꞌton, inasáchin yonquicasoꞌ yaꞌhuërin. Tata Yosë inaora nohuanton, catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ. Inasoꞌ huaꞌanëntërinpoaꞌ.

Romanos 10:10

“Yosë co onporontaꞌ nonpintarinpoahuëꞌ,” taꞌtëhuaꞌ, cancanënpoa quëran natëhuatëhuaꞌ, noya niꞌsarinpoaꞌ. “Casoꞌ Quisocristo imarahuë,” topatëhuaꞌ, naporo chachin anoyacancantarinpoaꞌ.

Romanos 10:15

Co Yosëri aꞌchinaꞌpiroꞌsaꞌ aꞌpahuachinhuëꞌ, ¿onpo nitotaponataꞌ? Yosë quiricanën quëran naporin: “Ma noyacha niꞌton, noya nanan shaꞌhuitaonpoaꞌ huëꞌsarin paya,” tënin.

Romanos 14:17

Yosë noya huaꞌanëntërinpoaꞌ. Ina imapatëhuaꞌ, noya nisarëhuaꞌ. Asanocancanarinpoaꞌ niꞌton, co ninoꞌhuicasoꞌ yaꞌhuërinhuëꞌ. Yosësoꞌ, caꞌnëhuasoꞌ, oꞌorëhuasoꞌ, inapita co onpopinchin yonquirinhuëꞌ. Ispirito Santo catahuarinpoaꞌ noya cancantahuasoꞌ. Catahuahuachinpoaꞌ, capa cancantarihuaꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 15:33

Yosëíchin asanocancaninpoaꞌ. Canpitantaꞌ noya catahuainquëmaꞌ, tënahuë. Amen.

Romanos 3:22

Quisocristo imapatëhuaꞌ, Yosë noya niꞌsarinpoaꞌ. Insosona natëhuachin, anoyacancantarin. Co nisha nisha nontërinpoahuëꞌ.

Romanos 3:30

Aꞌnaíchin Yosë yaꞌhuërin. Yaꞌipinpoaꞌ napopianachin nosororinpoaꞌ. Cotioroꞌsantaꞌ, nisha piyapiꞌsantaꞌ, Quisocristo imapachinaꞌ, anoyacancantarin.

Romanos 4:5

Yosëso nipirinhuëꞌ, inaora nohuanton nosororinpoaꞌ. “Co caora noya nipirahuëꞌ, Yosë chachin anoyacancantarinco,” topatëhuaꞌ, oshanënpoaꞌ inquitatonpoaꞌ noya niꞌninpoaꞌ.

Romanos 5:11

Naporahuaton, “Yosë nosororinpoaꞌ,” taꞌtëhuaꞌ, ina paꞌyatërëhuaꞌ. Huiꞌnin chachin nanan anoyatërinpoaꞌ niꞌton, noya cancantërëhuaꞌ.

Romanos 5:18

Atan co noyahuëꞌ ninin niꞌton, yaꞌipinpoaꞌ anaꞌintinpoasoꞌ yaꞌhuëpirinhuëꞌ. Quisocristo chiminin niꞌton, yaꞌipinpoaꞌ nanitërëhuaꞌ nanpimiatacasoꞌ. Imapatëhuaꞌ, co anaꞌintarinpoahuëꞌ.

Romanos 6:23

Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

Romanos 9:30

Napoahuarëꞌ ¿maꞌtaꞌ tëcarihuaꞌ? tënahuë yonquiato. Nisha piyapiꞌsaꞌ huaꞌquiꞌ co Yosë yonquipirinahuëꞌ, inari anoyacancantërin. “Yosë noꞌtëquën nonin,” taꞌtonaꞌ natëpi. Napoaton noya niꞌnin.

Gálatas 2:16

Napopirëhuahuëꞌ, Moisësë pënëntërinsoꞌ natëhuatëhuaꞌ, co ina marëꞌ Yosë noya niꞌsarinpoahuëꞌ. Quisocristoíchin imapatëhuaꞌ, noya niꞌsarinpoaꞌ. Napoaton canpoantaꞌ Quisocristo natërëhuaꞌ oshanënpoaꞌ inquitinpoaso marëꞌ. Co inso tërantaꞌ pënëntërinsoꞌ natërinso marëꞌ Yosëꞌpaꞌ paꞌsarinhuëꞌ. Quisocristoráchin nichaꞌërinpoaꞌ.

Gálatas 3:25

Iporasoꞌ nani Quisocristo oꞌmarin niꞌton, co huachi maistro pochin nininsoꞌ nohuantarihuahuëꞌ.

Gálatas 5:22

Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ.

Efesios 2:7

Yosë inaora nohuanton, naꞌcon nosororinpoaꞌ. Quisocristo imapatëhuaꞌ, noya catahuarinpoaꞌ. Aꞌna tahuëri aꞌnapitantaꞌ nicatënënpoaꞌ, Yosë chinotapi: “Ma noyacha Yosëri nosororin paya,” tosapi.

Filipenses 3:9

Quisocristoíchin imasarahuë huachi. Co caora noya nicato chaꞌërahuëꞌ. Co pënëntërinsoꞌ natëto, chaꞌërahuëꞌ. Quisocristoíchin anoyacancantërinco, taꞌto, ina imarahuë. Imapatora, oshanëhuë inquitatonco, anoyacancantërinco. Ina quëran Yosë catahuarinco noya nicaꞌhuasoꞌ. Ina marëꞌ noya niꞌninco.

Colosenses 1:20

Iráca oshahuanëhuaꞌ niꞌton, yaꞌipinpoaꞌ Yosë inimicotopirëhuahuëꞌ. Yosë nohuanton, Quisocristo chiminin nanan anoyatinpoaso marëꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipiya nohuantërin anoyatacasoꞌ. Canpoa marëꞌ huënainën paꞌnin. Corosëquë chiminin niꞌton, co huachi Yosë inimicotacasoꞌ yaꞌhuërinhuëꞌ.

Colosenses 3:15

Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

2 Tesalonicenses 3:16

Sinioroíchin asanocancaninpoaꞌ. Ina catahuainquëmaꞌ sano cancantacamaso marëꞌ. Maꞌsona onpopiramahuëntaꞌ, nani tahuëri catahuainquëmaꞌ ama paꞌyanacamaso marëhuëꞌ. Nani tahuëri noya aꞌpainquëmaꞌ.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.