Romanos 4:10 - Chayahuita (Shahui)

¹⁰ ¿Onporotaꞌ noya niꞌnin? ¿Marca niacotërin piquëran noya niꞌnin? Co naporoꞌ naporinhuëꞌ. Coꞌhuara marca niacochatërasohuëꞌ, noya niꞌnin.

Romanos 4:10 ပူးပေါင်းရင်းမြစ်များ

Génesis 15:16

Catapini shinpita huënton, yaꞌhuërin piquëran, shiparinpita isëquë chachin huëntaponaꞌ. Amororoꞌsa co noyahuëꞌ nipisoꞌ, co aquëtë huarëꞌ nishátërarinhuëꞌ. Napoaton naporo tahuëriꞌsa huarëꞌ anaꞌintarahuë huachi.

Génesis 17:1

Apran iscon shonca iscon piꞌipitasoꞌ, Siniorori yaꞌnotahuaton, itapon: —Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ.

Génesis 17:10

Ina pochin canpitarëꞌco anoyatërahuë. Canpitanta anoyatërëhuaso yonquicamaso marëꞌ yaꞌipi quëmapinquëmaꞌ, marcahuanamaso yaꞌhuërin. Naporahuaton, yaꞌipi shiparimapitanta inachachin natëinaꞌ.

Romanos 4:11

Yosë natërin niꞌton, inari noya niꞌnin. Coꞌhuara marca niacochatërasohuëꞌ, piyapinën pochachin niꞌnin. Ina piquëran marca niacotërin imarinsoꞌ anitotacaso marëꞌ. “Noꞌtëquën nontërinco,” topachina, noya niꞌnin. Nisha piyapiꞌsantaꞌ ina pochachin natëtohuachinara, Apraan pochin cancantopi. Co marca niacotopirinahuëꞌ, Apraan huiꞌninpita pochin nipi.

Romanos 4:9

¿Inpitataꞌ ina pochin noya cancantapi? Co cotioroꞌsaráchin ina pochin noya cancantacasoꞌ yaꞌhuëtopihuëꞌ. Co marca niacotopirinahuëntaꞌ noya cancantapi. Apraan yonquicoꞌ. “Yosë noꞌtëquën nontërinco. Inasáchin catahuarinco,” topachina, Yosëri noya niꞌnin. Nani shaꞌhuitëranquëmaꞌ.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Gálatas 6:15

Marcasoꞌ co onpopinchin yonquicasoꞌ yaꞌhuërinhuëꞌ. Co ina marëꞌ Yosë noya niꞌninpoahuëꞌ. Quisocristo imapatëhuaꞌ, nasha cancan quëtërinpoaꞌ. Ina marëꞌ tëhuënchinsoꞌ noya niꞌninpoaꞌ.