Romanos 3:9 - Chayahuita (Shahui)

⁹ ¿Onpopintaꞌ iporasoꞌ yonquiarihuaꞌ? Cotioroꞌsanpoa noya noya ninëhuaꞌ, ¿tëcarihua ti? ¡Co naporinhuëꞌ! Nani shaꞌhuitëranquëmaꞌ. Cotioroꞌsanpoaꞌ, nisha piyapiꞌsaꞌ, yaꞌipinpoaꞌ oshahuanëhuaꞌ.

Romanos 3:9 ပူးပေါင်းရင်းမြစ်များ

Isaías 65:5

Napoaponaraihuë nonpachinara: ‘Ama yaꞌcaricosohuëꞌ. Inaquëranchin huaniquëꞌ. Quëmá quëran noya noyaco niꞌton, co cariancoso yaꞌhuërinhuëꞌ,’ toconpi. Napoatonaꞌ, pën nani tahuëri orotárinso pochin nipi. Conai imëhuatëra, apininposo pochin nipi,” tënin.

Lucas 7:39

Ina niꞌsahuaton, pëiꞌ huaꞌanëni co noyahuëꞌ niꞌnin. Inaora yonquinën quëran yonquirarin. “Quisoso pënëntonaꞌpi naporini, iso sanapi nohuichitonhuëꞌ. Oshahuan niꞌton, co sëꞌhuacasoꞌ nohuanchitonhuëꞌ,” tënin yonquiaton.

Romanos 1:18

Yosë inápaquë yaꞌhuaponahuëꞌ, cancanënpoa quëran anitotërinpoaꞌ. “Piyapiꞌsaꞌ co noyahuëꞌ nipi. Co ca pochin cancantopihuëꞌ. Ina marëꞌ noꞌhuito, anaꞌintarahuë huachi,” tënin Yosë. Noꞌtën nanan nitotaponaraihuëꞌ, co nohuantopihuëꞌ natëcaisoꞌ.

Romanos 11:32

Yosëri yaꞌipi piyapiꞌsaꞌ tananpitërin niꞌton, co natëtochináchinhuëꞌ cancantopi. Yaꞌipinpoaꞌ nosoroinpoaso marëꞌ naporin.

Romanos 11:7

Napoahuarëꞌ, ¿maꞌtaꞌ nipachin tëcarihuaꞌ? Naꞌa israiroꞌsaꞌ Yosë huëntonënquë yayaꞌconpirinahuëꞌ, co inahuara nanitopihuëꞌ noya cancantacaisoꞌ. Aꞌnaquën huayoninsopitasoꞌ Yosë nohuanton, yaꞌconpi. Aꞌnapitaso nipirinhuëꞌ co natantochináchinhuëꞌ cancantopi.

Romanos 2:1

Aꞌnaquëmaꞌ iyaroꞌsaꞌ piyapiꞌsaꞌ yonquirapiratomaꞌ: “Pasoꞌ quëmapi co noyahuëꞌ ninin,” tënamaꞌ. Napoapomarahuëꞌ, ina pochachin canpitantaꞌ co noyahuëꞌ ninamaꞌ. Napoatomaꞌ, ninaꞌintaramaꞌ.

Romanos 3:1

Cotioroꞌsaꞌ niꞌtonaꞌ, marca niacotopi. ¿Maꞌtaꞌ ina marëꞌ canapi?

Romanos 3:19

Tëhuënchachin co noyahuëꞌ nicatëhuaꞌ, yaꞌipinpoaꞌ oshahuanëhuaꞌ. Yosë pënëntërinsoꞌ nitotopirëhuahuëꞌ, co natërëhuahuëꞌ niꞌton, anaꞌintinpoasoꞌ yaꞌhuërin.

Romanos 3:5

Aꞌnaquën poꞌpin yonquipi: “Canpoa co noyahuë ninëhua niꞌton, Yosë noyasáchin nininsoꞌ aꞌninquëchin anitotërinpoaꞌ. Napoaton anaꞌintohuachinpoaꞌ, co noꞌtëquën anaꞌintërinpoahuëꞌ,” toconpi.

Romanos 6:15

Tëhuënchachin co huachi iráca pënëntërinsoꞌ natëcasoꞌ yaꞌhuërinhuëꞌ. Yosë nosoroatonpoaꞌ, nichaꞌërinpoaꞌ. Aꞌnaquënso nipirinhuëꞌ ina natanatonaꞌ, co mantaꞌ yanatëpihuëꞌ. “Noya oshahuanacasoꞌ,” toconpi. ¡Co ina pochin yonquicaso yaꞌhuërinhuëꞌ!

Romanos 7:14

Noya yonquicaso marëꞌ pënënpirinpoahuëꞌ. Casoꞌ co noya yonquiatohuëꞌ, oshahuanahuë. Oshahuanahuësoꞌ huaꞌanëntatë pochin nitërinco. Co nanitërahuëꞌ noya nicaꞌhuasoꞌ.

1 Corintios 10:19

Mamanshisoꞌ co nanpirinhuëꞌ. Co chinotacasohuëꞌ nipirinhuëꞌ, aꞌnaquëni moshapi. Maꞌsha inapita chinotacaso marëꞌ tëpahuachinara, topinan quëran napopirinahuëꞌ, co mamanshiri niꞌninhuëꞌ, co nataninhuëꞌ.

1 Corintios 14:15

Napoahuarëꞌ, ¿onpocasota yaꞌhuërin? Ispiritonëhuë quëran Yosë nontarahuëꞌ, cantarahuë, napoarahuë. Napoaporahuëꞌ, maꞌsona tapo naporahuësontaꞌ yonquiato, Yosë nontarahuë, cantarahuë napoarahuë, tënahuë.

1 Corintios 4:7

Yosë nohuanton, nisha nisha nitotërëhuaꞌ. Co canpoara nohuanton, nitotërëhuahuëꞌ. Yosëíchin catahuarinpoaꞌ noya noya nicacasoꞌ. Co catahuarinpoahuëꞌ naporini, co mantaꞌ nitochitërihuahuëꞌ. Napoaton co nocantacasoꞌ yaꞌhuërinhuëꞌ.

Gálatas 3:10

Moisësë iráca pënëntërinsoꞌ yaimapatamaꞌ, anaꞌintinquëmasoꞌ yaꞌhuërin. Co yaꞌipi natëramahuëꞌ niꞌton, Yosë anaꞌintarinquëmaꞌ. Iráca quiricanën quëran naporin: “Co yaꞌipimiáchin natëhuatamacohuëꞌ, chiníquën anaꞌintaranquëmaꞌ. Parisitopiquë aꞌparanquëmaꞌ,” tënin.

Gálatas 3:22

Nipirinhuëꞌ, co insontaꞌ nanitërinhuëꞌ noꞌtëquën natëcasoꞌ. Yaꞌipinpoaꞌ oshahuanëhuaꞌ. Ina marëꞌ anaꞌintinpoasoꞌ yaꞌhuërin, tënin Yosë quiricanën quëran. Napoaton Quisocristoráchin nanitaparin anoyacancantinpoasoꞌ. Inasáchin imapatëhuaꞌ, Yosë noya niꞌsarinpoaꞌ.

Filipenses 1:18

Ina niponahuëꞌ, co noꞌhuirahuëꞌ. Co apiratatë pochin ninahuëꞌ. Aꞌnaquën noya cancantatonaꞌ, Quisocristo nanamën aꞌchinapi. Aꞌnaquënsoꞌ co noya cancantaponaraihuëꞌ, aꞌchinapi antaꞌ. Naꞌcon naꞌcon piyapiꞌsari natanapi niꞌton, noya cancantërahuë.