Romanos 3:25 - Chayahuita (Shahui)

²⁵ Yosë nohuanton, Quisocristo chiminin. Oshanënpoaꞌ inquitinpoaso marëꞌ chiminin. “Ca marëꞌ chiminin,” topatëhuaꞌ, oshanënpoaꞌ inquitarinpoaꞌ. Huënainën quëran anoyacancantarinpoaꞌ. Iráca piyapiꞌsaꞌ oshahuanpirinahuëꞌ, Yosëri co aꞌnaroáchin anaꞌintërinhuëꞌ. “Aꞌna tahuëri Quisocristo chiminpachin, oshanënaꞌ inquitarahuë,” taꞌton, co anaꞌintërinhuëꞌ.

Romanos 3:25 ပူးပေါင်းရင်းမြစ်များ

Salmos 119:142

Quëmasoꞌ noya coisë pochinquën, noꞌtëquënáchin shaꞌhuiran. Aꞌchinansopitantaꞌ, noꞌtëquënáchin aꞌchinan.

Salmos 22:31

Aꞌna tahuëri huaꞌhuatopisopita, Yosë noꞌtëquënáchin nininsoꞌ shaꞌhuitaponaꞌ. Nani maꞌsha nininsopitantaꞌ, anitotaponaꞌ.

Salmos 40:10

Noyasáchin ninansoꞌ shaꞌhuitërahuë. Nichaꞌërancosoꞌ, co nisha nisha cancantëransohuëꞌ, inapitanta shaꞌhuitërahuë. Nosororancosoꞌ, noꞌtëquënáchin nonansoꞌ, inapitantaꞌ, notohuaroꞌ piyapinënpita niyontonpiquë noꞌtëquën shaꞌhuitërahuë.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Levítico 16:10

Aꞌnantaꞌ, Asasironquën nininsoꞌ, co tëpaponahuëꞌ, quëshiponco. Israiroꞌsa oshanën inquitaꞌhuaso marëꞌ quëshiponco. Ina piquëran inotëro parti, Asasiro yaꞌhuërintaquëchin aꞌpapona huachi.

Levítico 16:15

Nani inapotohuachin, chipo israiroꞌsa oshanëna marëꞌ, nininsoꞌ tëpaꞌin. Tëpahuachin, huënainën sënanquë main. Ina huënaiꞌ masahuaton, noya noya patoanaquë quëpapon. Inaquë caposonëhuë aꞌtanamën aipi taꞌsatapon. Ina quëran caposonëhuë aꞌtanamën notënan quërantaꞌ, taꞌsatapon. Toroaꞌhua huënainën quëran napotërinso chachin nitarin.

Juan 6:47

Noꞌtëquën shaꞌhuitëranquëmaꞌ. Imapatamaco, Yosë nohuitatomaꞌ nanpimiataramaꞌ.

Hechos 14:16

Iráca piyapiꞌsaꞌ co Yosë nohuitopihuëꞌ niꞌton, Yosëri tananpitërin inahuara yonquipisoꞌ imacaiso marëꞌ.

Hechos 15:18

tënin Yosë. Iráca quëran huarëꞌ yonquirin nisha nisha piyapiꞌsaꞌ nichaꞌëcasoꞌ. Ina yonquiaton, anitotërinpoaꞌ,” tënin pënëntonaꞌpi.

Hechos 17:30

Iráca co Yosë nohuitopihuëꞌ niꞌton, co anaꞌintërinhuëꞌ. Iporaso nipirinhuëꞌ, yaꞌipi piyapinpoaꞌ pënëninpoaꞌ: ‘Co noyahuëꞌ yonquiramasoꞌ naniantatomaꞌ, casáchin chinotoco,’ itërinpoaꞌ Yosë.

Hechos 2:23

Napoaponahuëꞌ, canpitari atëpatëramaꞌ. Masahuatomaꞌ, nisha piyapiꞌsaꞌ quëtonamaꞌ corosëquë tëpacaiso marëꞌ. Co Yosë natëpihuëꞌ niꞌton, tëpapi. Iráca chachin Yosëri yonquirin huiꞌnin chiminacasoꞌ. Ina nohuanton, oshanënpoa marëꞌ chiminin. Co nohuantërinhuëꞌ naporini, co macacamasoꞌ nanichitomahuëꞌ. Canpitari atëpatopiramahuëꞌ,

Hechos 3:18

Iráca pënëntonaꞌpiroꞌsaꞌ ninotonaꞌ, ninshitopi. ‘Aꞌna tahuëri Cristo parisitapon,’ topi. Yosë nohuanton, ninopi. Ninopiso pochachin parisitërin.

Hechos 4:28

Quëmaso nipirinhuëꞌ chini chiníquën nanantëran. Co nohuantëranhuëꞌ naporini, co nanitapaitonahuëꞌ. Iráca quëran huarëꞌ yonquiran ina chiminacasoꞌ niꞌton, aparisitopi.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

Romanos 3:26

Iporaso huachi Quisocristo chachin aꞌpaimarin yaꞌhuërënamënpoaꞌ chiminacaso marëꞌ. “Quisocristo oshanënpoa marëꞌ chiminin,” topatëhuaꞌ, oshanënpoaꞌ inquitarinpoaꞌ. Noyápiachin cancan quëtarinpoaꞌ. Ina imapatëhuaꞌ, Yosë noya niꞌsarinpoaꞌ. Co canpoantaꞌ anaꞌintarinpoahuëꞌ.

Romanos 5:1

“Sinioro Quisocristoíchin nichaꞌësarinpoaꞌ,” taꞌtëhuaꞌ, imarëhuaꞌ. Oshanënpoaꞌ inquitërinpoaꞌ niꞌton, Yosë noya niꞌninpoaꞌ. Co inimiconënpita pochin niꞌninpoahuëꞌ.

Romanos 5:11

Naporahuaton, “Yosë nosororinpoaꞌ,” taꞌtëhuaꞌ, ina paꞌyatërëhuaꞌ. Huiꞌnin chachin nanan anoyatërinpoaꞌ niꞌton, noya cancantërëhuaꞌ.

Romanos 5:18

Atan co noyahuëꞌ ninin niꞌton, yaꞌipinpoaꞌ anaꞌintinpoasoꞌ yaꞌhuëpirinhuëꞌ. Quisocristo chiminin niꞌton, yaꞌipinpoaꞌ nanitërëhuaꞌ nanpimiatacasoꞌ. Imapatëhuaꞌ, co anaꞌintarinpoahuëꞌ.

Romanos 5:9

“Corosëquë huënainën paꞌnin. Oshanënpoa marëꞌ chiminin,” topatëhuaꞌ, Yosë noya niꞌsarinpoaꞌ. Napoaton ayaroꞌ tahuërintaꞌ catahuarinpoaꞌ. Naporoꞌ tahuëri co noyahuëꞌ nipisopita chiníquën anaꞌintarin. Imarëhuasopitaso nipirinhuëꞌ, co anaꞌintarinpoahuëꞌ. Quisocristo chachin nichaꞌësarinpoaꞌ.

1 Corintios 5:7

Iráca Pascoa cosharoꞌ caꞌpachinara, co piꞌpian tërantaꞌ ahuëpocatërinsoꞌ nohuantopihuëꞌ. Yaꞌipiya tëꞌyatopi. Pascoaquë carniroaꞌhua tëpapiso pochin Quisocristo nani chiminin canpoa marëꞌ. Ina imaramaꞌ niꞌton, nasha cancan quëtërinquëmaꞌ.

2 Corintios 5:21

Iráca Quisocristo co mantaꞌ oshahuanaponahuëꞌ, Yosë nohuanton, yaꞌhuërëtërinpoaꞌ. Oshahuan pochin nicaton, Yosëri chiníquën anaꞌintërin. Canpoa marëꞌ chiminin niꞌton, co huachi oshahuan pochin niꞌninpoahuëꞌ. Quisocristo imapatëhuaꞌ, Yosë nóya niꞌsarinpoaꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 2:13

Co Yosë nohuitatomarahuëꞌ, áquë pochin nisapiramahuëꞌ. Iporasoꞌ Quisocristo imatomaꞌ, nohuitërama huachi. Oshanëma marëꞌ huënainën paꞌnin niꞌton, Yosë anohuitërinquëmaꞌ. Yaꞌcaritëramaso pochin ninamaꞌ.

1 Timoteo 1:15

Noꞌtëquën shaꞌhuitaranquëmaꞌ. Yaꞌipi piyapiꞌsaꞌ natëinaꞌ. Quisocristo isoroꞌpaquë oꞌmarin oshahuanoꞌsaꞌ anoyacancantacaso marëꞌ. Casoꞌ naꞌcon naꞌcon oshahuanpirahuëꞌ, anoyacancantërinco.

Hebreos 10:4

Maꞌsharoꞌsaꞌ tëpapirinahuëꞌ, ina huënainën quëran co onporontaꞌ oshanënaꞌ inquitërinhuëꞌ.

Hebreos 11:14

“Co isoroꞌpaquë yaꞌhuëmiatarihuahuëꞌ. Yosëꞌpaꞌ tëhuënchinsoꞌ yaꞌhuëmiatarihuaꞌ,” taꞌtonaꞌ, napopi.

Hebreos 11:17

Apraan tëhuënchachin Yosë natërin. Aꞌnaíchin huiꞌnin yaꞌhuëtërin. Nasitohuachina, Isaco itërin. Naporoꞌ Yosëri shaꞌhuitërin: “Isaco mashotohuachin, huiꞌnahuanarin antaꞌ. Naporahuaton, oshaquëran notohuaroꞌ shinpita yaꞌhuëtarin,” itopirinhuëꞌ. Huiꞌnin huiꞌnapitohuachina, Yosëri itantarin: “Huiꞌnan quëparahuaton, motopiꞌpaꞌ paquëꞌ. Inaquë huiꞌnan tëpaquëꞌ chinotancoso marëꞌ,” itërin. Tënicaso marëꞌ napotërin.

Hebreos 11:7

Iráca Nointaꞌ yaꞌhuëpirinhuëꞌ, aꞌna tahuëri Yosëri itapon: “Co huaꞌqui quëranhuëꞌ maꞌsha onpoaramaꞌ. Co niꞌchinamasohuëꞌ niꞌsaramaꞌ. Naporoꞌ yaꞌipi oshahuanoꞌsaꞌ iiꞌ quëran ataꞌhuantarahuë,” itërin. Coꞌhuara oꞌnayantërasohuëꞌ napotopirinhuëꞌ: “Yosë noꞌtëquën nontërinco,” taꞌton, Noi natëtërin. Shaꞌhuitohuachina, natëton, panca nancha ninin. Ina quëran saꞌin, huiꞌninpitarë chachin chaꞌëpi. Aꞌnapitasoꞌ natanaponaraihuëꞌ, co yanatëpihuëꞌ. Napoaton naꞌinpi. Noiso nipirinhuëꞌ, yaꞌipi cancanën quëran natëtërin. “Noꞌtëquën nontërinco,” topachina, Yosëri noya niꞌnin.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

Hebreos 9:5

Caposo aꞌtanamënquë catoꞌ anquëniaꞌhuaya pochin nonanatonaꞌ, acopi. Yosë huënaráchin nininsoꞌ ayonquiinpoaso marëꞌ napopi. Aꞌna inchinan quëran, aꞌna ahuënan quëran ninotëëpi. Naporahuaton anpiantëna quëran, caposo aꞌtanamën imotatë pochin nipi. Nisha nisha nininsopita aꞌchintacaꞌhuanquëmasoꞌ yaꞌhuëpirinhuëꞌ, co apira aquëtëꞌ shaꞌhuitaranquëmahuëꞌ.

1 Juan 1:10

“Yaꞌipinquëmaꞌ co noyahuëꞌ ninamaꞌ,” itërinpoaꞌ Yosë. Napotopirinpoahuëꞌ, “Noya ninahuë. Co casoꞌ oshahuancohuëꞌ,” topatëhuaꞌ, “Yosë nonpintërinpoaꞌ,” tënëhuaso pochin cancantërëhuaꞌ. Nanamën noꞌtëquën shaꞌhuitopirinpoahuëꞌ, co tëhuënchachin natërëhuahuëꞌ.

1 Juan 2:2

Yaꞌhuërënamënpoaꞌ chiminin niꞌton, nontohuatëhuaꞌ, oshanënpoaꞌ inquitarinpoaꞌ. Oshanënpoaꞌ inquitatonpoaꞌ, nanan anoyatërinpoaꞌ. Yaꞌipi piyapi marëꞌ chiminin. Yaꞌipinpoaꞌ oshanënpoaꞌ inquitinpoasoꞌ nohuantopirinhuëꞌ.

1 Juan 4:10

Co canpoarisoꞌ nosoropirëhuahuëꞌ, Yosësoꞌ naꞌcon nosororinpoaꞌ. Ina nohuanton, huiꞌnin chachin oꞌmarahuaton, chiminin. Yaꞌhuërënamënpoaꞌ chiminin niꞌton, oshanënpoaꞌ inquitatonpoaꞌ, nanan anoyatërinpoaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

Apocalipsis 20:15

Co nanpirin quiricaquë nininënpita yaꞌhuëhuachinahuëꞌ inaquë chachin aꞌpararin.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.