Romanos 2:4 - Chayahuita (Shahui)

⁴ Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

Romanos 2:4 ပူးပေါင်းရင်းမြစ်များ

Salmos 104:24

¡Maꞌpitacha Sinioro quëmasoꞌ ninan paya! Noya yonquiaton nani maꞌsha acoran. Nani maꞌsha ninansopita isoroꞌpaꞌ mëntatërin.

Éxodo 34:6

Moisësë naꞌhuëtapon pochin chiníquën nonsarin: —¡Caso Sinioroco! ¡Caso Sinioroco! Caso Yosëco noyápiachin cancantërahuë. Aꞌnaroáchin yanosorotërahuë. Co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Noꞌtëquënáchin nonahuë.

Isaías 30:18

Inapotiimaso shaꞌhuitopirinquëmahuëꞌ, iporaso nosoroinquëmaso marëꞌ ninarinquëmaꞌ. Inasoꞌ, nosororinquëmasoꞌ paꞌpi yaaꞌnotërinquëmaꞌ. Siniorosoꞌ noyasáchin ninaꞌpi. Inaso Yosë niꞌton, inasáchin ninahuatëhuaꞌ, tëhuënchachin capa cancantarihuaꞌ.

Jeremías 7:10

Napoapomarahuëꞌ, pëi acotërinacoquë huëꞌsahuatomaꞌ, canta chinotaantaramaco. “Sinioro pëinënquë yaꞌhuëhuatëhuaꞌ, co manta onpoarihuahuëꞌ,” tënamaꞌ. Co costarahuëso nisápomarahuëꞌ, “noya inachachin nisápasoꞌ,” toconamaꞌ.

Oseas 3:5

Ina piquëran israiroꞌsasoꞌ, Yosë chachin tahuërëtaantaponaꞌ. Naporahuaton aꞌnara Tapi copirno shiin, copirnonëna nisarin. Tahuëri yanitiquirahuachin, Sinioro noya nicatonaꞌ, chinotapi. Inapotohuachina inarintaꞌ, noya nicaton catahuaantapon.

Números 14:18

“Caso co aꞌnaroáchin noꞌhuitërahuëꞌ. Piyapinëhuëpita nosoromiatërahuë. Co noyahuëꞌ nipirinahuëꞌ, oshanëna inquitato nanan anoyatërahuë. Co natëtonacohuëꞌ oshahuanpachinantaꞌ, inapotërahuë. Tëhuëhuachinaso napoaponahuëꞌ, onpopionta anaꞌintarahuë. Huiꞌninpita, shinpita, inapitanta anaꞌintarahuë. Shiparina shinpita nicoantarinquë huarënta anaꞌintápo,” tënan.

Romanos 10:12

Aꞌnaíchin Yosë yaꞌhuërin. Yaꞌipinpoaꞌ huaꞌanëntërinpoaꞌ. Co cotioroꞌsaráchin naꞌcon nosororinhuëꞌ. Nisha piyapiꞌsantaꞌ nosororin. Ina nontohuatëhuaꞌ, nóya catahuarinpoaꞌ.

Romanos 11:22

Ma noyacha Yosësoꞌ nosororinpoa paya. Co natëpisopitasohuëꞌ nipirinhuëꞌ, chiníquën anaꞌintarin. Inasáchin imapatamaꞌ, nosoromiatarinquëmaꞌ. Nipirinhuëꞌ naniantohuatamaꞌ, anaꞌintarinquëmaꞌ canpitantaꞌ.

Romanos 11:33

¡Ma noyacha Yosësoꞌ catahuarinpoa paya! ¡Ma noyacha yonquirin paya! Yaꞌipiya nitotërin. Yonquirinsopita co nitotochináchinhuëꞌ ninin. Naporahuaton, ina pochin cancantacasoꞌ co onporontaꞌ nanitarihuahuëꞌ.

Romanos 3:25

Yosë nohuanton, Quisocristo chiminin. Oshanënpoaꞌ inquitinpoaso marëꞌ chiminin. “Ca marëꞌ chiminin,” topatëhuaꞌ, oshanënpoaꞌ inquitarinpoaꞌ. Huënainën quëran anoyacancantarinpoaꞌ. Iráca piyapiꞌsaꞌ oshahuanpirinahuëꞌ, Yosëri co aꞌnaroáchin anaꞌintërinhuëꞌ. “Aꞌna tahuëri Quisocristo chiminpachin, oshanënaꞌ inquitarahuë,” taꞌton, co anaꞌintërinhuëꞌ.

Romanos 6:1

Yosë inaora nohuanton nosororinpoa niꞌton, manta tërantaꞌ niahuaꞌ inaora nohuanton, oshanënpoaꞌ inquitiinpoaso marëꞌ ¿tëcarihua ti?

Romanos 6:15

Tëhuënchachin co huachi iráca pënëntërinsoꞌ natëcasoꞌ yaꞌhuërinhuëꞌ. Yosë nosoroatonpoaꞌ, nichaꞌërinpoaꞌ. Aꞌnaquënso nipirinhuëꞌ ina natanatonaꞌ, co mantaꞌ yanatëpihuëꞌ. “Noya oshahuanacasoꞌ,” toconpi. ¡Co ina pochin yonquicaso yaꞌhuërinhuëꞌ!

2 Corintios 8:2

Maꞌsha onpotohuachinara, chiníquën parisitaponaraihuëꞌ, noya cancantopi. Naporahuaton, piꞌpisha yaꞌhuëtopirinahuëꞌ, aꞌnapita imapisopita pahuantohuachinara, naꞌcon coriqui quëtopi.

Efesios 1:18

Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 2:4

Yosëso nipirinhuëꞌ naꞌcon nosororinpoaꞌ. Nosoroatonpoaꞌ, yanichaꞌërinpoaꞌ.

Efesios 2:7

Yosë inaora nohuanton, naꞌcon nosororinpoaꞌ. Quisocristo imapatëhuaꞌ, noya catahuarinpoaꞌ. Aꞌna tahuëri aꞌnapitantaꞌ nicatënënpoaꞌ, Yosë chinotapi: “Ma noyacha Yosëri nosororin paya,” tosapi.

Efesios 3:16

Napoaton canpita yonquiatënquëmaꞌ, Yosë nontërahuë. “Quëmasoꞌ Sinioro chini chiníquën nanantëran. Noya noyanquën niꞌton, imarinënsopita nosoroaton, catahuaquëꞌ chiníquën cancanchinaꞌ. Ispirito Santori achinicancain noya noya imainënquën.

Efesios 3:8

Casoꞌ aꞌnapita imapisopita quëran naꞌcon naꞌcon co noyahuëꞌ nipirahuëꞌ, anoyacancantërinco. Ina quëran nosoroatonco, acorinco nisha piyapiꞌsaꞌ shaꞌhuitaꞌhuaso marëꞌ. Quisocristo nanamënsoꞌ noyápiachin. Ma inacha niꞌton, nosoromiatërinpoa paya, tënahuë yonquiato.

Filipenses 4:19

Canpitantaꞌ maꞌsona pahuantohuachinquëmaꞌ, Yosë chachin quëtarinquëmaꞌ. Yaꞌipi huaꞌanëntaton, nanitaparin. Quisocristo imaramaꞌ niꞌton, catahuarinquëmaꞌ. Co huachi pahuantarinquëmahuëꞌ.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 2:2

Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

1 Timoteo 1:16

Yosë nosororinco. Huaꞌqui co noyahuëꞌ nipirahuëꞌ, nosororinco. Aꞌnapitantaꞌ natëcaiso marëꞌ napotërinco. “Paono paꞌpi co noyahuëꞌ nipirinhuëꞌ, huaꞌqui ahuantaton, Quisocristori nosororin. Nosoroarinco cantaꞌ,” taꞌtonaꞌ, natëtapi. Natëtohuachinaꞌ, Yosë nohuitatonaꞌ, noya nanpiapi. Aꞌna tahuërintaꞌ inápaquë nanpimiatapi.

1 Timoteo 6:17

Aꞌnaquën naꞌcon coriqui yaꞌhuëtërin. Inapitantaꞌ api pënënquëꞌ: “Ama aꞌnapita nocancosohuëꞌ. Ama coriquinëmáchin paꞌyatocosohuëꞌ. Inasoꞌ co yaꞌhuëmiataponhuëꞌ. Yosë naꞌcon naꞌcon paꞌyatocoꞌ. Inasoꞌ co apiratërinpoahuëꞌ. Nani maꞌsha quëtërinpoaꞌ nóya cancantatëhua, yaꞌhuëcaso marëꞌ.

1 Pedro 3:20

Inapitasoꞌ iráca Noi nanpisoꞌ, paꞌpi co noyahuëꞌ cancantopi niꞌton, ina nohuanton, Noi pënëntárin. Pënëntopirinhuëꞌ, co yanatëpihuëꞌ. Yosësoꞌ co aꞌnaroáchin anaꞌintërinhuëꞌ. Noi panca nancha nicasoꞌ, ninarapirinhuëꞌ, co natëpihuëꞌ niꞌton, anaꞌintërin. Ipora huantaꞌ parisitapi. Noisoꞌ nancha tinirahuaton, yaꞌconin. Naporoꞌ posayaꞌpíchin iiꞌ quëran chaꞌëpi.

2 Pedro 1:11

Cancanëma quëran huarëꞌ imapatamaꞌ, aꞌna tahuëri huaꞌanëntërinquë quëpantarinquëmaꞌ noya yaꞌhuëmiatacamaso marëꞌ. Sinioro Quisocristo nóya cancantaton, nichaꞌësarinpoaꞌ. Inápaquë paꞌpatëhuaꞌ, co onporontaꞌ pipiarëhuahuëꞌ.

2 Pedro 3:15

Nosoroatonpoaꞌ, huaꞌquiꞌ Sinioro ninararin naꞌcon naꞌcon piyapiꞌsari natëcaiso marëꞌ. Ina quëran inapitantaꞌ nichaꞌësarin. Ama ina naniantocosohuëꞌ. Inachachin iya Paonontaꞌ ninshitërinquëmaꞌ. Inasoꞌ iyanpoa pochin niꞌnëhuaꞌ. Yosë nohuanton, noꞌtëquën nitotaton, ninshitërin.

2 Pedro 3:3

Isoꞌ naꞌcon yonquicoꞌ. Oꞌmantacasoꞌ tahuëri yaꞌcaritohuachin, co noyahuëꞌ piyapiꞌsaꞌ yaꞌhuaponaꞌ. Co Yosë natëtonaraihuëꞌ, maꞌsona yonquipisoꞌ nisapi. Co noyahuëꞌ cancantapi. Quisocristo shaꞌhuitërinpoasoꞌ tëhuaapi.

2 Pedro 3:9

Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.

Apocalipsis 2:21

Co aꞌnaroáchin anaꞌintërahuëꞌ. Huaꞌquiꞌ pënënpirahuëꞌ, co piꞌpisha tërantaꞌ nohuantërinhuëꞌ natëincosoꞌ. Oshahuanacasoꞌ co yaaꞌporinhuëꞌ.

Apocalipsis 3:20

Cancanëmaquë yayaꞌcoancantëranquëmaꞌ. Ina marëꞌ nontaranquëmaꞌ. Yaꞌcoana piꞌnirëso pochin ninaranquëmaꞌ. Natanahuatamaco: ‘Yaꞌcoancantoco,’ itohuatamaco, yaꞌcoancantaranquëmaꞌ. Niichicoshatërëso pochin nóya ninohuitarihuaꞌ.