Romanos 16:18 - Chayahuita (Shahui)

¹⁸ Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

Romanos 16:18 ပူးပေါင်းရင်းမြစ်များ

2 Samuel 15:6

Yaꞌipi copirno paapapisopita inapotëraꞌpiarin. Inapotohuachina, israiroꞌsaso co huachi copirno paꞌyatatonaraihuëꞌ, inaraꞌ paꞌyatapi huachi.

Salmos 119:130

Quëma nanamën natanpatora, aꞌpintërëso pochin catahuarinco. Apinapichin yonquipisopitantaꞌ, ina natanpachina, yonquínanhuan quëparitapi.

Salmos 19:7

Sinioro pënëntërinsontaꞌ, noya noya. Anitotohuachinpoaꞌ, anoyacancantërinpoaꞌ. Shaꞌhuirinsopita noya natëhuachinaꞌ, apínapichin yonquipisopitantaꞌ, yonquínanhuan quëparitapi.

Proverbios 22:3

Yonquínahuansoꞌ, huëꞌhuëpiro nininsoꞌ tantiarin. Napoaton coꞌhuara maꞌsha onpoyátëraponhuëꞌ, yaꞌhuincarin. Naponin yonquipisopitaso nipirinhuëꞌ, co inapoatonahuëꞌ, maꞌsha onpocasoꞌ quënapatopi.

Proverbios 8:5

Naꞌaquëma huiꞌnapinquëma niꞌton, co noya yonquiátëraramahuëꞌ. Naponin yonquiramasopitantaꞌ, yonquínahuan nicacamasoꞌ nohuantocoꞌ.

Jeremías 23:17

Nanamëhuë nocanpisopita pënënpachinara: ‘Yaꞌipi ninamasopita noya pipitarinquëmaꞌ,’ itopi. Co noyahuëꞌ yonquipiso imapisopita pënënpachinarantaꞌ: ‘Co manta maꞌsha onpoaramahuëꞌ,’ itopi.

Miqueas 3:5

Naquëranchin Sinioro taantarin: “Piyapinëhuëpitasoꞌ, chihuëpiso pochin nisha nisha yonquipi. Nonpi nanan pënëntopisopitari nonpintopi niꞌton, napopi. Inapitasoꞌ insoari tëranta aꞌcahuachinaꞌ: ‘Quëmasoꞌ noya yaꞌhuëaran,’ itopi. Yaꞌhuërëꞌ co aꞌcahuachinarahuëꞌ: ‘Quëmaso napoonin yaꞌhuëapon,’ itopi. Napoaton cari chachin inapita itapo:

Malaquías 1:10

Inquëma tërantaꞌ, chinotëramacoso pëi yaꞌcoananën oncoatoma noyá patanantërama naporini, noya niitonhuëꞌ. Co huachi insonta yaꞌconaton, artaronëhuëquë topinan quëran aꞌpëchitonhuëꞌ. Co noyahuëꞌ ninama niꞌton, carimanta co noya niꞌnanquëmahuëꞌ. Maꞌsha quëshiramacosopitantaꞌ, co huachi maꞌpaponquëmahuëꞌ.

Mateo 24:11

Aꞌnaquëontaꞌ nonpin nanan pënëntaponaꞌ. Nonpinapirinahuëꞌ, naꞌa piyapiꞌsari natëtonaꞌ, nonpin nanan imasapi huachi.

Mateo 24:24

Naꞌa nonpin nanan pënëntonaꞌpiroꞌsaꞌ huëcaponaꞌ. ‘Casoꞌ Cristoco’ tosapi aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsopita nisapi piyapiꞌsaꞌ nonpintacaiso marëꞌ. Huayoninsopitantaꞌ nonpintochinaichin nisapi.

Mateo 6:24

Ina quëran itaantarin: “Aꞌna piyapi catoꞌ patron yaꞌhuëtohuachina, nisha nisha camaitopi niꞌton, co nanitërinhuëꞌ cato chachin natëcasoꞌ. Aꞌnasoꞌ nohuantaton, noya natëarin. Aꞌnaso nipirinhuëꞌ co onpopinchin nohuantatonhuëꞌ, co natëarinhuëꞌ. Inapochachin canpitantaꞌ coriquiráchin cancantohuatamaꞌ, co nanitaramahuëꞌ Yosë natëcamasoꞌ,” tënin.

Mateo 7:15

Ina quëran itaantarin: “Niꞌcona iyaroꞌsaꞌ nonpin nanan pënëntonaꞌpiroꞌsaꞌ nonpintochinënquëmaꞌ. ‘Quiyantaꞌ imarai,’ itopirinënquëmahuëꞌ, co cancanëna quëran imapihuëꞌ. Tanan niꞌniꞌ yamapintërinso pochin cancantatonaꞌ, yatapicancaninquëmaꞌ. Co noꞌtëquën aꞌchinpihuëꞌ.

Juan 12:26

Nohuantërahuësoꞌ yanipatamaꞌ, ca pochin cancantatomaꞌ imaco. Insëquësona paꞌpato, piyapinëhuëpita imasarinaco. Inquëma tërantaꞌ ca marëꞌ sacatohuatamaꞌ, Yosë noya niꞌsarinquëmaꞌ, itërin Quisosori.

Romanos 14:18

Ina pochin Quisocristo imapatëhuaꞌ, Yosë noya niꞌsarinpoaꞌ. Piyapiꞌsantaꞌ noya niꞌsarinpoaꞌ.

Romanos 16:19

Canpitaso nipirinhuëꞌ noya natëramaꞌ niꞌton, yaꞌipi piyapiꞌsaꞌ natantopi. Ina marëꞌ noya cancantërahuë. Naꞌcon yonquicoꞌ noya nicacamaso marëꞌ. Ama oshahuanamaso marëꞌ yonquicosohuëꞌ.

2 Corintios 11:3

Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

2 Corintios 2:17

Aꞌnaquën nonpinatonaꞌ, inahuara canacaiso marëꞌ aꞌchinapi. “Yosë nanamën aꞌchintërainquëmaꞌ,” topirinahuëꞌ, co noꞌtëquën aꞌchinpihuëꞌ. Quiyaso nipirinhuëꞌ noꞌtëquën shaꞌhuitërainquëmaꞌ. Yosë aꞌparincoi niꞌton, ina nanansáchin aꞌchinarai. Yosë niꞌsárincoi niꞌton, Quisocristoíchin natëarai.

2 Corintios 4:2

Aꞌnaquënsoꞌ co noyahuëꞌ yonquiatonaꞌ, aꞌchinapi. Noyasha nonpirinahuëꞌ, nonpinacaiso marëꞌ napopi. Quiyaso nipirinhuëꞌ co mantaꞌ poꞌoana quëran ninaihuëꞌ niꞌton, co tapanaꞌhuaisoꞌ yaꞌhuërinhuëꞌ. Co nisha nisha aꞌchinaihuëꞌ. Yaꞌipi Yosë nanamën noꞌtëquën aꞌchintarainquëmaꞌ. Yosë niꞌsárincoi niꞌton, inasáchin aꞌchinarai. Aꞌninquëchin aꞌchinai yaꞌipi piyapiꞌsaꞌ yonquicaiso marëꞌ.

Gálatas 1:10

Co piyapiꞌsaꞌ noya nicainacoso marëꞌ aꞌchinahuëꞌ. Yosë noya nicaincoso marëꞌ aꞌchinahuë. Piyapiꞌsaꞌ paꞌyatinacoso marëꞌ naꞌcon naꞌcon yonquirahuë naporini, co Quisocristo natëitohuëꞌ.

Filipenses 2:21

Aꞌnapitasoꞌ inahuara nohuantopisoráchin yonquipi. Co Quisocristo naꞌcon yonquipihuëꞌ.

Filipenses 3:19

Inapitasoꞌ co Quisocristo nanamën imapihuëꞌ. Maꞌsona tërantaꞌ yanipachinara, nipi. Ina marëꞌ tapanacasoꞌ yaꞌhuëpirinhuëꞌ, co tapanpihuëꞌ. “Nohuantato, napoarahuë,” toconpi. Isoroꞌpaquë yaꞌhuërinsopitaráchin yonquipi. Aꞌna tahuëri pënquë parisitomiatapi.

Colosenses 2:4

Aꞌnaquënso nipirinhuëꞌ nisha aꞌchinpi. Ama Quisocristoíchin yonquicamaso marëhuëꞌ noyásha nontarinënquëmaꞌ. Niꞌcona nonpintochinënquëmaꞌ.

Colosenses 3:24

Inasoꞌ noꞌtëquën acanaarinpoaꞌ. Inápaquë noya noya acoarinpoaꞌ. Quisocristo tëhuënchinsoꞌ huaꞌanëntërinpoaꞌ. Napoaton noya natëcoꞌ.

2 Tesalonicenses 2:10

Co noyahuëꞌ nicaton, naꞌa piyapiꞌsaꞌ nonpintarin. Co noꞌtën nanan nohuantopihuëꞌ niꞌton, Yosë inimiconën natëapi, parisitopiquë paꞌsapi huachi. Yosë nanamën nohuantopi naporini, chaꞌëitonahuëꞌ.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

Santiago 1:1

Ca Santiacoco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Tata Yosë huaꞌanëntërinco niꞌton, Sinioro Quisocristoíchin natërahuë. Yaꞌipi cotioroꞌsanquëmaꞌ Quisocristo imaramasoꞌ ninshitaranquëmaꞌ. Canpitasoꞌ yanquëërahuatomaꞌ, nisha nisha parti yaꞌhuaramaꞌ. Yaꞌipi Yosë piyapinënpitanquëmaꞌ ninamasoꞌ ninshitaranquëmaꞌ.

2 Pedro 2:3

Nisha aꞌchinaꞌpiroꞌsasoꞌ co nosororinënquëmahuëꞌ. Canacaiso marëꞌ nonpin nananoꞌsaꞌ aꞌchintarinënquëmaꞌ. Inaso nipirinhuëꞌ, iráca quëra huarëꞌ Yosëri yonquirin anaꞌintacasoꞌ. Aꞌna tahuëri noꞌtëquën anaꞌintarin. Co naniantarinhuëꞌ anaꞌintacasoꞌ.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.

Judas 1:12

Quisoso imaramasopita coshatacaso marëꞌ niyontonpatamara, nisha aꞌchinaꞌpiroꞌsantaꞌ huëꞌpi. Naporoꞌ Yosë yonquicaso nipirinhuëꞌ, naꞌcon oꞌotonaꞌ, capa cancantopi. Co Yosë tëꞌhuatatonaraihuëꞌ, napopi. Aꞌnapita catahuacasoꞌ yaꞌhuëpirinhuëꞌ, co nosoropihuëꞌ. Inahuara noya yaꞌhuëcasoráchin yonquipi. Niꞌcoꞌ iyaroꞌsaꞌ. Huaꞌquiꞌ co oꞌnanpachinahuëꞌ, noꞌpaꞌ yaniromarin. Ina pochin nipachina, yararoꞌtëꞌ quënanpatamara, paꞌyatëramaꞌ. “Oꞌnan huëꞌsarin,” topiramahuëꞌ, co oꞌnaninhuëꞌ. Ihuanaꞌ paꞌnin. Inapochachin inapitasoꞌ pënënpirinënquëmahuëꞌ, nonpin nanan aꞌchintatënënquëmaꞌ co catahuarinënquëmahuëꞌ. Nara nitërinsontaꞌ yonquicoꞌ. Piꞌipi tahuëri nanihuachina, nitacasoꞌ yaꞌhuërin. Co nitohuachinahuëꞌ, “Nani chiminin huachi,” taꞌton, huaꞌanëni nishitëtërin. Itënë chachin ocoirin niꞌton, noyá chiminin huachi. Inapochachin nonpin nanan aꞌchinaꞌpiroꞌsaꞌ ina nara pochin niconpi. Quisocristo nanamën nitotaponaraihuëꞌ, chimipi pochin nicatonaꞌ, aꞌpopi. Ina marëꞌ chiníquën anaꞌintacasoꞌ yaꞌhuërin huachi.

Judas 1:16

Yosësoꞌ noya nosoropirinpoahuëꞌ, inapitasoꞌ maꞌsha onpohuachinara, ina noꞌhuipi. Co sano cancantopihuëꞌ. Maꞌsona tërantaꞌ yonquihuachinara, nipi. Co noyahuëꞌ cancantatonaꞌ, napopi. “Quiyasoꞌ noya noya nitotërai,” taꞌtonaꞌ, chiníquën nonconpi. Co piyapi nosoroaponaraihuëꞌ, noyasha nontopi. Inahuara canacaiso marëꞌ napotopi.

Apocalipsis 1:1

Tata Yosë nohuantërin yaꞌipinpoaꞌ iso nanan nitotacasoꞌ. Napoaton aꞌna tahuëri maꞌsha onpocasoꞌ nininsoꞌ Quisocristo shaꞌhuitërin anitotinpoaso marëꞌ. Inasoꞌ anquëni aꞌpaimarin ca Coanshaco shaꞌhuitiincoso marëꞌ. Quisocristoíchin casoꞌ natërahuë. Anquëni oꞌmarahuaton, nani maꞌsha aꞌnotërinco.

1 Samuel 2:29

Nani camairanquëma maꞌsha chinotiinacoso marëꞌ quëpiso tëpatomaꞌ, ca marëꞌ ahuiquitamasoꞌ. Maꞌpitasona quëshirinacosontaꞌ, aꞌnotamacoso marëꞌ nani camairanquëmaꞌ. ¡Canpitaso co ina nocanamaso yaꞌhuërinhuëꞌ! ¡Ca naꞌcon naꞌcon paꞌyataancoso nipirinhuëꞌ, quëmasoꞌ huiꞌnanpita naꞌcon naꞌcon paꞌyatëran! Israiroꞌsa maꞌpitaso quëshihuachinacora, noya noya nininsoꞌ quëshirinaco. ¡Co ina naꞌcon naꞌcon maꞌpatatomaꞌ, canpitaso amomiatamaso yaꞌhuërinhuëꞌ!