Romanos 15:3 - Chayahuita (Shahui)

³ Quisocristosoꞌ co inaora nohuantërinsoꞌ yonquirinhuëꞌ. Yosëíchin natërin. Ina nontaton, itërin: “Quëma inimiconënpita Tata, noꞌhuirinënquën. Natëranquën niꞌton, noꞌhuirinaco cantaꞌ,” itërin. Quiricanënquë naporinso chachin ninin.

Romanos 15:3 ပူးပေါင်းရင်းမြစ်များ

Salmos 69:20

Maꞌsha onpotápatonaco asëtomiatërinaco. Inapoato co huachi chiníquën cancantërahuëꞌ: “Insha tëranta taꞌma nosoroatonco achinicancanaponco,” taꞌto ninápirahuëꞌ. ¡Coꞌchi paya!

Salmos 69:9

Quëma pëinën Sinioro paꞌpi aꞌpitërahuë. Napoaton quëma inimiconënpita noꞌhuirinaco cantaꞌ.

Mateo 10:25

Napoaton noꞌhuihuachinënquëmaꞌ, co ina marëꞌ sëtacasoꞌ yaꞌhuërinhuëꞌ. Nani noꞌhuirinaco cantaꞌ. ‘Sopainquën,’ itërinaco niꞌton, canpitanta ina pochachin nontarinënquëmaꞌ,” itërin Quisosori.

Mateo 26:39

Amashamiachin paꞌsahuaton, isonconin. Noꞌpaquë huarëꞌ monshomarahuaton, Yosë nontërin: “Quëma nohuantohuatan Tata, nichaꞌëco ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantopirahuëꞌ, quëma nohuantohuatan, noya, tënahuë. Noꞌtëquën yanatëranquën,” itërin.

Mateo 26:42

Ina quëran paantarahuaton, Yosë nontaantarin. —Nohuantohuatan Tata, nichaꞌëco ama maꞌsha onpoꞌisohuëꞌ. Nipirinhuëꞌ co nohuantohuatanhuëꞌ, maꞌsona yaonpotohuatancontaꞌ noya, tënahuë. Noꞌtëquën yanatëranquën, itaantarin.

Mateo 27:44

Ina pirayan patanantopisopitantaꞌ Quisoso noꞌhuipi.

Juan 15:10

Tata Yosë noꞌtëquën natërahuë niꞌton, paꞌpi nosororinco. Inapochachin natëhuatamaco, carinquëmantaꞌ paꞌpi nosoroaranquëmaꞌ.

Juan 15:24

Naꞌa piyapiꞌsaꞌ aꞌnaroáchin anoyatërahuë. Nani maꞌsha Yosë pochin ninahuë. Aꞌnapita piyapiꞌsasoꞌ co nanitapapihuëꞌ. Yosë anohuitaꞌhuaso marëꞌ sacaiꞌ nininsoꞌ aꞌnotërahuë. Co aꞌnotërahuëꞌ naporini, co ina marëꞌ oshahuaintonahuëꞌ. Nani nicaponaracohuëꞌ, noꞌhuirinaco. Tata Yosëntaꞌ noꞌhuipi.

Juan 4:34

—Yosë aꞌpaimarinco nohuantërinsoꞌ nicaꞌhuasoꞌ. Yaꞌipiya yanatërahuë. Ina yonquiato, co huachi cosharoꞌ yonquirahuëꞌ. Cosharo pochin achinirinco.

Juan 5:30

Ina quëran Quisosori itantarin: “Co caora nohuanto mantaꞌ ninahuëꞌ. Tata Yosë shaꞌhuitohuachincora, inachachin shaꞌhuirahuë. Co casoꞌ nisha yonquirahuëꞌ. Tata yonquirinsoráchin nohuantërahuë. Napoaton noꞌtëquën anaꞌintarahuë.

Juan 6:38

Co caora nohuanto, maꞌsha ninahuëꞌ. Inápa quëran oꞌmarahuë Tata Yosë natëcaꞌhuaso marëꞌ. Ina aꞌpaimarinco.

Juan 8:29

Tatahuë aꞌpaimarinco niꞌton, caꞌtaninco. Ina nohuantërinsoráchin noꞌtëquën natërahuë niꞌton, co patarincohuëꞌ, itërin.

2 Corintios 8:9

Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.

Filipenses 2:5

Noya ninicatomaꞌ, Quisocristo pochachin cancantocoꞌ.

Filipenses 2:8

Isoroꞌpaquë yaꞌhuëhuachina, Yosëíchin natërin. Ina nohuanton, canpoa marëꞌ chiminin. Yosë huiꞌnin niponahuëꞌ, corosëquë patanantohuachinara, chiminin.