Romanos 15:16 - Chayahuita (Shahui)

¹⁶ Quisocristo chachin aꞌparinco nisha nisha piyapiꞌsaꞌ aꞌchintaꞌhuaso marëꞌ. Nanamën aꞌchintarahuë inapitantaꞌ imacaiso marëꞌ. Aꞌchinato, Yosë marëꞌ sacatarahuë. Nisha piyapiꞌsantaꞌ imapachinaꞌ, Ispirito Santori yaꞌcoancantarin. Noyápiachin cancan quëtarin. Ina marëꞌ Yosëri noya niꞌsarin.

Romanos 15:16 ပူးပေါင်းရင်းမြစ်များ

Hechos 13:2

Aꞌna tahuëri co coshatatonaraihuëꞌ, Sinioro chinotopi. Napohuachinara, Ispirito Santori shaꞌhuitërin: “Pirnapi, Saono inapita nohuantërahuë paatonaꞌ, piyapiꞌsaꞌ aꞌchintacaiso marëꞌ. Ina marëꞌ inapita acorahuatomaꞌ, aꞌpacoꞌ paꞌinaꞌ,” itërin.

Hechos 20:24

Yatëpapirinacohuëntaꞌ, co casoꞌ tëꞌhuatërahuëꞌ. Co ina yonquirahuëꞌ. Sinioro Quisoso natëaꞌhuasoáchin cancantërahuë. Iráca ina shaꞌhuitërinco aꞌchinaꞌhuaso marëꞌ. ‘Yosëri yaꞌipi piyapi nosoroaton, anoyacancantacasoꞌ nohuantërin. Ina noya nanan chachin aꞌchintonquëꞌ,’ itërinco. Napoaton paato, aꞌchintárahuë. Co chiminaꞌhuasoꞌ tëꞌhuatërahuëꞌ.

Hechos 20:32

Paꞌpato, Yosë noya aꞌpainquëmaꞌ. Quiricanën quëran nontarinquëmaꞌ. Ina quëran nosororinpoasoꞌ anitotarinpoaꞌ. Ina natëhuatamaꞌ, achinicancanarinquëmaꞌ. Oshaquëran noya noya cancantaramaꞌ. Quisocristo imarëhuaꞌ niꞌton, anoyacancantërinpoaꞌ. Ina nohuanton, aꞌna tahuëri yaꞌipi shaꞌhuitërinpoasoꞌ noya acotarinpoaꞌ.

Hechos 22:21

‘Ina nipirinhuëꞌ, paquëꞌ. Aquë yaaꞌparanquën nisha piyapiꞌsaꞌ aꞌchintamaso marëꞌ,’ itërinco. Napoaton nisha piyapiꞌsaꞌ aꞌchintarahuë,” tënin Paono.

Hechos 9:15

“Iꞌhua mini co noyahuëꞌ yonquipirinhuëꞌ, nani huayonahuë ca nanamëhuë aꞌchinacaso marëꞌ. Nisha nisha piyapiꞌsaꞌ aꞌchintarin imainacoso marëꞌ. Huaꞌanoꞌsanënpitantaꞌ shaꞌhuitarin. Israiroꞌsantaꞌ aꞌchintarin imainacoso marëꞌ.

Romanos 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristoíchin natërahuë. Ina acorinco paato nanamën aꞌchinaꞌhuaso marëꞌ. Yosë nohuanton, noya nanan aꞌchinárahuë.

Romanos 11:13

Aꞌnaquëmasoꞌ nisha piyapiꞌsanquëmaꞌ. Yosë aꞌparinco aꞌchintaꞌhuanquëmaso marëꞌ. Ina marëꞌ noya cancantërahuë. Paꞌsápato, aꞌchintaranquëmaꞌ.

Romanos 15:18

Quisocristo noya catahuahuachincora, nisha nisha piyapiꞌsaꞌ aꞌchintërahuë. Ina nohuanton, noya ninahuë niꞌton, natëpi. Co catahuarincohuëꞌ naporini, co imaitonahuëꞌ. Napoaton inasáchin shaꞌhuitaranquëmaꞌ.

Romanos 15:19

Tëhuënchachin Ispirito Santo ananitërinco niꞌton, naꞌa caniaꞌpiroꞌsaꞌ aꞌnaroáchin anoyatërahuë Yosë natëcaiso marëꞌ. Ina niꞌsahuatonaꞌ, natëpi. Ispirito Santori yaꞌcoancantërin niꞌton, imapi. Quirosarinquë aꞌchintërahuë. Ina quëran paꞌsápato, Iriricoquë huarëꞌ Quisocristo nanamën aꞌchintëraꞌpiarahuë. Yaꞌipi parti pënëntërahuë.

Romanos 15:20

Insëquësona aꞌna piyapiri aꞌchintohuachina, co inaquësoꞌ aꞌchinahuëꞌ. Co Quisocristo nohuitopiquëhuëꞌ paꞌnahuë. Ina marëꞌ acorinco niꞌton, inaporinquëráchin aꞌchinaꞌhuasoꞌ nohuantërahuë.

Romanos 15:29

Canpitataquë paꞌpato, Quisocristo noya catahuarinco nanamën aꞌchintaꞌhuanquëmaso marëꞌ, tënahuë.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

1 Corintios 3:5

Co ca imamacosoꞌ yaꞌhuërinhuëꞌ. Aporosëntaꞌ co imacaisoꞌ yaꞌhuërinhuëꞌ. Quiyantaꞌ topinan piyapicoi nipiraihuëꞌ, Yosë shaꞌhuitërincoi niꞌton, aꞌchintërainquëmaꞌ. Natanpatamaꞌ, Yosë imasaramaꞌ.

1 Corintios 4:1

Huaꞌquiꞌ piyapiꞌsaꞌ co Yosë nanamën nitotopihuëꞌ niꞌton, Yosë aꞌparincoi nanamën aꞌchinaꞌhuaiso marëꞌ. Quisocristo inpriatonën pochin ninai. Ina yonquicoꞌ.

1 Corintios 6:19

Quisocristo imapatëhuaꞌ, Ispirito Santo yaꞌcoancantërinpoaꞌ. Nani ina nitotëramaꞌ. Yosë aꞌpatimarinpoaꞌ niꞌton, cancanënpoaquë chachin yaꞌhuërarin. Napoaton co huachi canpoara nohuantërëhuasopita nicacasoꞌ yaꞌhuërinhuëꞌ. Yosë chachin huaꞌanëntërinpoaꞌ.

2 Corintios 11:23

“Quisocristo shaꞌhuitërincoi niꞌtoi, natërai,” itopirinënquëmahuëꞌ. ¡Casoꞌ naꞌcon naꞌcon natërahuë! Inapitasoꞌ nocaninaco niꞌton, huaꞌyantërinso pochin nonato, piꞌpian inapita pochin nonchinquëmaꞌ noꞌtëquën yonquicamaso marëꞌ. Yosë marëꞌ casoꞌ chini chiníquën sacatërahuë. Paꞌsápato, Yosë nanamën aꞌchinahuë. Ina marëꞌ naꞌcon naꞌcon parisitaporahuëꞌ, ahuantërahuë. Inantaꞌ shaꞌhuichinquëmaꞌ. Aꞌchinahuëso marëꞌ naꞌaroꞌ tashinan pëiquë poꞌmorinaco. Naꞌaroꞌ ahuërinaco. Shitëparinaco.

2 Corintios 5:20

Quisocristo chachin acorincoi aꞌnapita anitotaꞌhuaiso marëꞌ. Ina yaꞌhuërënamën pochin shaꞌhuitarainquëmaꞌ. “Yosë nontocoꞌ nanan anoyachinquëmaꞌ,” itárainquëmaꞌ.

2 Corintios 8:5

Co coriqui quëtacasoachin yonquipihuëꞌ. Yaꞌipi cancanëna quëran Yosë imapi. Inaꞌton yonquipi. Ina pochin cancantacasoꞌ noya noya, tënahuë. Ina quëran coriqui, maꞌsha, inapita quëtopi. Quiyantaꞌ yanatërinacoi. “Maꞌsona Yosë nohuantohuachin, shaꞌhuitocoi natëꞌi,” itërinacoi.

Gálatas 3:5

“Quisocristoíchin anoyacancantërinco,” topatamaꞌ, Ispirito Santo yaꞌcoancantërinquëmaꞌ. Inapotohuachinquëmaꞌ, achinicancaninquëmaꞌ. Catahuarinquëmaꞌ niꞌton, nani maꞌsha nanitaparamaꞌ. Co iráca pënëntërinsoꞌ natëramaso marëꞌ catahuarinquëmahuëꞌ.

Efesios 2:18

Quisocristo chiminin niꞌton, yaꞌipinpoaꞌ nanitërëhuaꞌ Tata Yosë nontacasoꞌ. Ispirito Santo catahuarinpoaꞌ niꞌton, ina nontohuatëhuara, noya nataninpoaꞌ.

Efesios 2:22

Canpitantaꞌ Quisocristo imatomaꞌ, yaꞌconamaꞌ. Aꞌnaya aꞌnayanpoaꞌ naꞌpi pochin ninëhuaꞌ pëiꞌ nanicaso marëꞌ. Yaꞌipi imarëhuasopita Yosë pëinën pochin ninëhuaꞌ. Ispirito Santo yaꞌcoancantohuachinpoaꞌ, Yosë chachin canpoarëꞌ yaꞌhuërarin huachi.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Filipenses 2:17

Iráca maꞌsha Yosë marëꞌ tëpahuachinaꞌ, huinontaꞌ opotopi. Inapochachin cantaꞌ canpita noya noya imacamaso marëꞌ tëpahuachinacontaꞌ, noya nisarin, co sëtarahuëꞌ. Aꞌchintëranquëmaꞌ niꞌton, noya imaramaꞌ. Napoaton noya cancantërahuë.

Filipenses 4:18

Iporasoꞌ nóya iꞌhuërëtëramaco huachi. Napoaton noya yaꞌhuarahuë. Co mantaꞌ pahuantërincohuëꞌ. Iꞌhua Ipapërotito huëꞌpachina, coriqui aꞌpatëramaco niꞌton, maꞌsha yaꞌhuëtërinco. Ina marëꞌ “Yosparinquëmaꞌ,” itëranquëmaꞌ. Yosë nosoroatomaꞌ, aꞌpatiramaco. Yosë chinotacaiso marëꞌ pimóchin nininsoꞌ aꞌpëhuachinara, Yosëri noya niꞌnin. Inapochachin canpitantaꞌ coriqui aꞌpatëramaco niꞌton, Yosë noya niꞌninquëmaꞌ.

1 Tesalonicenses 2:2

Piriposëquë aꞌchinapiraihuëꞌ, noꞌhuitonacoi, chiníquën aparisitërinacoi. Inapotopirinacoihuëꞌ, canpitataquë canconpatëira, co tëꞌhuaraihuëꞌ. “Yosë catahuarincoi,” taꞌtoi, Quisocristo nanamën aꞌchintërainquëmaꞌ. Aꞌnapita noꞌhuipirinacoihuëꞌ, chiníquën cancantatoi, pënënainquëmaꞌ.

1 Tesalonicenses 2:9

Canpitataquë yaꞌhuasocoi, chiníquën sacatatoi, aꞌchintërainquëmaꞌ. Tahuërirë chachin tashirë chachin sacatërai ama topinan maꞌsha maꞌpacaꞌhuainquëmaso marëhuëꞌ. Quiyaora sacatonëhuëi quëran coshatërai. Naporahuatoi, Yosë nanamën aꞌchintërainquëmaꞌ. Co ina naniantëramahuëꞌ, tënahuë.

1 Tesalonicenses 5:23

Yosëíchin asanocancaninpoaꞌ. Canpita marëꞌ ina nontarahuë noyásha anoyacancanchinquëmaꞌ. “Catahuaquëꞌ Sinioro, yaꞌipi cancanëna quëran noyápiachin yonquiꞌinaꞌ. Naporahuaton, yaꞌipi yonquinëna quëran noya nininsopitaráchin nohuanchinaꞌ. Quëma nohuanton, yaꞌipi nonëna quëran huarë noyasáchin niinaꞌ,” itërahuë. Ina quëran Sinioro Quisocristo oꞌmantahuachin, nóya niꞌsarinquëmaꞌ.

1 Timoteo 1:11

Yosë nanamënsoꞌ noya nóya. Ina quëran nichaꞌërinpoaꞌ. “Ma noyacha Yosëso paya,” itërëhuaꞌ. Ina chachin acorinco nanamën shaꞌhuicaꞌhuaso marëꞌ.

1 Timoteo 2:7

Ina nanan shaꞌhuicaꞌhuaso marëꞌ Yosë acorinco. Aꞌparinco nisha piyapiꞌsaꞌ aꞌchintaꞌhuaso marëꞌ. “Yosë noꞌtëquën nontërinpoaꞌ. Ina natëcoꞌ,” itërahuë. Tëhuënchachin noꞌtëquën nonahuë, co nonpinahuëꞌ.

2 Timoteo 1:11

Yosë acorinco nanamën shaꞌhuicaꞌhuaso marëꞌ. Pënëntaꞌhuaso marëꞌ aꞌparinco. Ina nohuanton, nisha piyapiꞌsaꞌ aꞌchintarahuë.

Hebreos 13:16

Noyasáchin niahuaꞌ. Nicatahuacasoꞌ ama naniantahuasohuëꞌ. Aꞌnapita maꞌsha pahuantohuachinaꞌ, ama apiratocosohuëꞌ. Inapohuatëhuaꞌ, Yosë noya chinotarëhuaꞌ niꞌton, noya niꞌsarinpoaꞌ.

1 Pedro 1:12

Ina quëran Yosëri anitotërin. “Pahuanarin nanicasoꞌ. Aꞌna tahuëri yaꞌhuëpisopita nitotacaiso marëꞌ ca nohuanton, ninoramaꞌ,” itërin Yosëri. Canpita iyaroꞌsaꞌ nitotacamaso marëꞌ ninopi. Iporasoꞌ ina noya nanan chachin aꞌchintërainquëmaꞌ. Inápa quëran oꞌmaton, Ispirito Santo catahuarincoi noya aꞌchinaꞌhuaiso marëꞌ. Anquëniroꞌsa quëran huarëꞌ yanitotopirinahuëꞌ, co yaꞌipiya nitotopihuëꞌ.

1 Pedro 2:5

Imaramaꞌ niꞌton, canpitantaꞌ noya naꞌpiroꞌsa pochin nisaramaꞌ. Nanpimiataramaꞌ. Yaꞌipi imarëhuasopita Yosë acorinpoaꞌ pëinën pochin nicacaso marëꞌ. Cancanënpoa quëran huarëꞌ ina naꞌcon chinotërëhuaꞌ niꞌton, corto huaꞌanoꞌsa pochin nisarëhuaꞌ. Nani tahuëri ina chinotatëhuaꞌ, “Yosparinquën Sinioro,” itahuaꞌ. Nicatahuacasontaꞌ ama naniantahuasohuëꞌ. Quisocristo catahuarinpoaꞌ ina pochin nicacasoꞌ. Ina marëꞌ Yosë noya niꞌsarinpoaꞌ.