Romanos 13:12 - Chayahuita (Shahui)

¹² Huaꞌquiꞌ piyapiꞌsaꞌ co noyahuëꞌ nicatonaꞌ, tashi pochin cancantopirinahuëꞌ. Iporasoꞌ Sinioro tahuërinën yaꞌcaritëriarin. Napoaton ama tashi pochin cancantahuasohuëꞌ. Sontaroꞌsaꞌ huaꞌna quëran aꞌmopiso pochin tahuëri pochin cancantatëhuaꞌ, noyasáchin niahuaꞌ.

Romanos 13:12 ပူးပေါင်းရင်းမြစ်များ

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

1 Corintios 10:11

Yosë nohuanton, iráca napopisopita quiricanënquë ninshitopi pënëinpoaso marëꞌ. Inapita pochin nipatëhuaꞌ, anaꞌintarinpoaꞌ canpoantaꞌ. Nani anaꞌintacasoꞌ tahuëri naniriarin.

1 Corintios 7:29

Niꞌcoꞌ, iyaroꞌsaꞌ. Yosë nohuanton, co huaꞌquiꞌ isoroꞌpaquë yaꞌhuarihuahuëꞌ. Napoaton saꞌahuanpatamaꞌ, ama saꞌamachin yonquicosohuëꞌ. Yosë naꞌcon naꞌcon yonquicoꞌ.

2 Corintios 10:4

Aꞌnaquënsoꞌ inimiconënpita minsëcaiso marëꞌ nisha nisha quihuípi. Quiyaso nipirinhuëꞌ co quiyaora yonquinëhuëi quëran minsëtaraihuëꞌ. Sacaiꞌ nipirinhuëꞌ, Yosë ananitërincoi nonpin nananoꞌsaꞌ minsëcaꞌhuaisoꞌ.

2 Corintios 6:7

Noꞌtëquën aꞌchinai. Yosë naꞌcon catahuarincoi niꞌton, aꞌchinpatoira, naꞌa piyapiꞌsaꞌ natanatonaꞌ, imasapi. Niꞌcoꞌ. Inimicoroꞌsaꞌ huëꞌpachinara, sontaroꞌsaꞌ huaꞌna quëran aꞌmorin ama inimicori paquitacaso marëhuëꞌ. Inapochachin Yosë achinirincoi ama sopai minsëincoiso marëhuëꞌ. Yosë nohuanton, noyasáchin ninai. Noya catahuarincoi niꞌton, sopai minsëarai.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Efesios 5:11

Aꞌnaquën tashi pochin cancantatonaꞌ, co noyahuëꞌ nipi. Topinan quëran yaꞌhuërapi niꞌton, ama inapita pochin cancantocosohuëꞌ. Noꞌtëquën shaꞌhuitocoꞌ co noyahuëꞌ nipisopita naniantacaiso marëꞌ.

Efesios 5:8

Iráca tashi pochin cancantopiramahuëꞌ, iporasoꞌ Yosë imaramaꞌ niꞌton, anoyacantërinquëmaꞌ tahuëri pochin nicacamaso marëꞌ. Napoaton tahuëri pochin nicoꞌ.

Hebreos 10:25

Aꞌnaquën co huachi niyontonpihuëꞌ Yosë chinotacaiso marëꞌ. Ama inapita pochin cancantahuasohuëꞌ. Sinioro oꞌmacasoꞌ tahuëri naniriarin niꞌton, niyontonatëhuaꞌ, naꞌcon naꞌcon nicatahuahuaꞌ chiníquën cancantacaso marëꞌ.

Hebreos 12:1

Iráca quëran huarëꞌ naꞌa piyapiꞌsaꞌ parisitaponaraihuëꞌ, imamiatopi. “Yosë catahuarinpoaꞌ,” taꞌtonaꞌ, natëpi. Napoaton inapita yonquiatëhuaꞌ, canpoantaꞌ nóya imahuaꞌ. Niꞌcoꞌ. Quëmapiꞌsaꞌ nicanacaiso marëꞌ taꞌahuachinara, chiníquën taꞌapi. Co mantaꞌ quëpapihuëꞌ. Torosarëáchin taꞌapi. Naporopi aꞌmopisoꞌ co ocoihuachinahuëꞌ, co nanitopihuëꞌ chiníquën taꞌacaisoꞌ. Inapochachin canpoantaꞌ naporopi aꞌmopisoꞌ ocoipiso pochin yaꞌipi oshanënpoaꞌ naniantahuaꞌ. Co noyahuëꞌ yonquirëhuasopita naniantatëhuaꞌ, yaꞌipi cancanënpoa quëran Quisocristo imahuaꞌ. Sacaiꞌ nipirinhuëꞌ, ahuantatëhuaꞌ, noya imahuaꞌ.

Santiago 1:21

Napoaton yaꞌipi co noyahuëꞌ yonquiramasopita naniantocoꞌ. Ama huachi oshahuancosohuëꞌ. Yosë nanamën nani aꞌchintërinënquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” taꞌtomaꞌ, nanamën yonquirácoꞌ. Ina yonquihuatamaꞌ, nichaꞌësarinquëmaꞌ.

Santiago 5:8

Inapochachin canpitantaꞌ noya cancantatomaꞌ, Sinioro oꞌmantacasoꞌ tahuëri ninacoꞌ. Nani yaꞌcaritëriarin. Napoaton ama sëtocosohuëꞌ. Chiníquën cancantocoꞌ.

1 Pedro 2:1

Yaꞌipi co noyahuëꞌ yonquiramasopita naniantocoꞌ. Ama iyaroꞌsaꞌ ninonpintocosohuëꞌ. Aꞌnaquën noyasha nonaponaraihuëꞌ, poꞌoana quëran co noyahuëꞌ nipi. Ama ina pochin nicosohuëꞌ. Yaꞌipi cancanëma quëran noꞌtëquën ninontocoꞌ. Aꞌnapita noya yaꞌhuëhuachinaꞌ, ama noyapatocosohuëꞌ. Ama pinotocosohuëꞌ.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

2 Pedro 3:11

Co mantaꞌ yaꞌhuëmiatarinhuëꞌ. Yaꞌipi taꞌhuantarin niꞌton, ¡Yosë pochin cancantatëhuaꞌ, noyasáchin niahuaꞌ!

2 Pedro 3:9

Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.

1 Juan 2:18

Co huaꞌquiya quëranhuëꞌ, apiaꞌhuaroꞌsaꞌ, Quisocristo oꞌmantararin. “Cristo yaoꞌmahuachin, inimiconën huëꞌsarin,” itërinënpoaꞌ. Nani natantëramaꞌ canpitantaꞌ. Iporasoꞌ naꞌa piyapiꞌsari Cristo yainimicotopi. Napoaton oꞌmantacasoꞌ tahuëri naniriarin, tënëhuaꞌ.

Apocalipsis 1:3

Iso quirica nontohuatamaꞌ, noya cancantaramaꞌ. Ina natanpatamantaꞌ, noya cancantaramaꞌ. Aꞌna tahuëri maꞌsona onpocasoꞌ shaꞌhuitaranquëmaꞌ. Natëhuatamaꞌ, Yosë noya niꞌsarinquëmaꞌ. Ayaroꞌ tahuëri nani yaꞌcaririarinpoa huachi.

Apocalipsis 22:10

Ina quëran itantarinco: “Yaꞌipi Yosë anitotërinquënsoꞌ nani ninshitëran. Ama topinan ninshitëquësohuëꞌ. Ninorinsoꞌ nani naniriarin niꞌton, yaꞌipi piyapiꞌsaꞌ nanan aꞌpatëquëꞌ nitochinaꞌ.