Romanos 12:3 - Chayahuita (Shahui)

³ Yosë nosoroatonco, acorinco piyapiꞌsaꞌ aꞌchintaꞌhuasoꞌ. Nani tahuëri catahuarinco. Napoaton pënënaranquëmaꞌ. Yaꞌipinquëmaꞌ sano yonquicoꞌ. Ama aꞌnapita nocancosohuëꞌ. Yosë nisha nisha acorinpoaꞌ. Nisha nisha catahuarinpoaꞌ maꞌsona nohuantërinsoꞌ nicacasoꞌ. Napoaton, co aꞌnapita nocanacasoꞌ yaꞌhuërinhuëꞌ. Noꞌtëquën yonquiatomaꞌ, maꞌmarësona acorinquëmasoꞌ nitotocoꞌ. Aꞌnaya aꞌnayanquëmaꞌ anitotarinquëmaꞌ.

Romanos 12:3 ပူးပေါင်းရင်းမြစ်များ

Miqueas 6:8

Napopiramahuëꞌ, co inapita Siniorosoꞌ nataninquëmahuëꞌ. Nani inaso maꞌsona nicacasoꞌ shaꞌhuitërinpoaꞌ. Piyapiꞌsa nosoroatëhua paꞌpoyacaso yaꞌhuërin. Maꞌsona nicacasoꞌ shaꞌhuihuatëra, ananicaso yaꞌhuërin. Naporahuaton: “Caora co nanitërahuë noya nicaꞌhuasoꞌ,” taꞌtëhuaꞌ, Sinioroíchin natëcaso yaꞌhuërin.

Lucas 18:11

Parisiosoꞌ huanirahuaton, sacaronquë Yosë nontërin: ‘Tata Yosë, yanontëranquën. Casoꞌ noyaco. Ina marëꞌ noya niꞌnanco niꞌton: “Yosparinquën,” itëranquën. Co aꞌnapita pochincohuëꞌ. Co ihuatërahuëꞌ. Co nonpinahuëꞌ. Co monshihuanahuëꞌ. Pasoꞌ quëmapi co noyahuëꞌ. Caso nipirinhuëꞌ co ina pochincohuëꞌ.

Juan 3:34

Quisososoꞌ Yosë nanamën chachin nonin. Ispirito Santori noyá yaꞌcoancantërin niꞌton, noꞌtëquënáchin nonin.

Romanos 1:5

Ina nosoroatonco, acorinco nisha nisha piyapiꞌsaꞌ aꞌchintaꞌhuaso marëꞌ. Inapitantaꞌ nanamën natëcaiso marëꞌ pënënarahuë. Natëhuachinaꞌ, “Quisocristosoꞌ noya noya,” tosapi.

Romanos 11:20

Yosëri tananpitërin mini. Nipirinhuëꞌ, co ina marëꞌ tananpitërinhuëꞌ. Co Quisocristo nohuantopihuëꞌ niꞌton, tananpitërin. Canpitantaꞌ imaramaꞌ niꞌton, noya niꞌninquëmaꞌ. Napoaton ama inapita nocancosohuëꞌ. Niꞌcona canpitantaꞌ Quisocristo naniantotamaꞌ.

Romanos 11:25

Yosë yonquirinsoꞌ iyaroꞌsaꞌ shaꞌhuichinquëmaꞌ, noꞌtëquën nitotacamaso marëꞌ. Aꞌnapita co nitotopirinahuëꞌ, ama nocantamaso marëhuëꞌ shaꞌhuitaranquëmaꞌ. “Quiyasáchin noꞌtëquën yonquirai,” ama tocosohuëꞌ. Iporasoꞌ naꞌa nisha piyapinquëmaꞌ Yosë huëntonënquë yaꞌconaramaꞌ. Yaꞌipi Yosë nohuantërinquëmasopita yaꞌconamaquë huarëꞌ naꞌa israiroꞌsaꞌ co natantochináchinhuëꞌ cancantapi.

Romanos 12:16

Noya ninicatomaꞌ yaꞌhuëcoꞌ. Ama aꞌna piyapi tërantaꞌ nocancosohuëꞌ. Topinan piyapi pochin cancantatomaꞌ, yaꞌipiya catahuacoꞌ. Ama: “Casoꞌ naꞌcon naꞌcon nitotërahuë,” tocosohuëꞌ. Ama ina pochin yonquicosohuëꞌ.

1 Corintios 15:10

Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi.

1 Corintios 3:10

Natëricho quëran yapëihuatëra, acopoꞌ ihuatahuatëꞌ, siminto acorëꞌ. Inaꞌton acorëso pochin carinquëmaꞌton aꞌchintëranquëmaꞌ. Yosë catahuarinco noꞌtëquën aꞌchinaꞌhuasoꞌ. Ina quëran aꞌnapitantaꞌ aꞌchintantarinënquëmaꞌ. Napoaponahuëꞌ, aꞌnaya aꞌnaya noya yonquiaton pëirinso pochin aꞌnapita noya aꞌchintacasoꞌ yaꞌhuërin.

1 Corintios 7:17

Yosë nohuanton, nisha nisha ninëhuaꞌ. Co napopináchin ninëhuahuëꞌ. Onpopinsona nicasëhuaꞌ Yosë imapatëhuaꞌ, inachachin niahuaꞌ. Yaꞌhuërëhuaquë chachin sano yonquiatëhuaꞌ, imahuaꞌ. Paato, yaꞌipi imapisopita inachachin pënënarahuë.

2 Corintios 10:13

Co quiyaora nohuanton, chiníquën nanantëraihuëꞌ. Yosë chachin acorincoi naꞌa piyapiꞌsaꞌ aꞌchintaꞌhuaiso marëꞌ. Insëquësona aꞌchinaꞌhuaisontaꞌ shaꞌhuitërincoi. Ina nohuanton, Corintoquë yaꞌhuëramasopitantaꞌ aꞌchintërainquëmaꞌ.

2 Corintios 12:13

Aꞌnaquënso nipirinhuëꞌ shaꞌhuitërinënquëmaꞌ. “Aꞌnapita imapisopita noya noya niꞌnin,” itopirinënquëmahuëꞌ, yaꞌipinquëmaꞌ napopináchin niꞌnanquëmaꞌ. Aꞌna parti aꞌchinpato, cosharoꞌ, coriqui, inapita maꞌpatërahuë capato, nanpicaꞌhuaso marëꞌ. Canpitaíchin co maꞌpachinanquëmahuëꞌ. ¿Ina marëꞌ noꞌhuiramaco ti? Noꞌhuihuatamaco, ¡naniantocoꞌ!

2 Corintios 12:7

Yosë naꞌcon naꞌcon anitotërinco. Ina quëran ama aꞌnapita nocanaꞌhuaso marëhuëꞌ ina nohuanton, maꞌsha onporahuë. Nahuan acoposha ohuanincoso pochin natanahuë. Co oshahuanaporahuëꞌ, Satanasë naꞌcon aparisitërinco.

Gálatas 6:3

“Casoꞌ noya piyapico,” topatan, quëmaora ninonpintaran, co noꞌtëquën yonquiranhuëꞌ. Co insontaꞌ Yosë pochachin cancantërinhuëꞌ. Co Yosë catahuarinpoahuëꞌ naporini, co mantaꞌ noya niitërihuahuëꞌ.

Efesios 3:2

Inaora nohuanton, Yosë chachin acorinco aꞌchintaꞌhuanquëmaso marëꞌ. Naꞌcon catahuarinco niꞌton, nanamën shaꞌhuiárahuë, natantëramaꞌ.

Efesios 3:4

Ina nontohuatamaꞌ, Quisocristo nanamën anitotërincosoꞌ canpitantaꞌ nitotaramaꞌ.

Efesios 4:16

Ina natëhuatëhuaꞌ, noya niniꞌtëhuaꞌ, yaꞌhuarihuaꞌ. Yaꞌipinpoaꞌ nicatahuacasoꞌ yaꞌhuërin. Nisha nisha nicatahuarihuaꞌ noya noya imacaso marëꞌ. Quisocristo chachin catahuahuachinpoaꞌ, noya nicatahuarihuaꞌ. Ina quëran ninosoroatëhuaꞌ, yaꞌipinpoaꞌ noya noya cancantarihuaꞌ.

Filipenses 2:13

Co noyahuëꞌ cancantatomaꞌ, co canpitaora nanitëramahuëꞌ Yosë natëcamasoꞌ. Nipirinhuëꞌ, Yosë nontohuatamaꞌ, catahuarinquëmaꞌ nohuantacasoꞌ. Ina quëran Yosë yanatëhuatamaꞌ, inari chachin catahuarinquëmaꞌ noꞌtëquën natëcamasoꞌ. Inasoꞌ noya noya ayonquiarinquëmaꞌ.

Colosenses 1:29

Ina marëꞌ paꞌsápato, aꞌchinárahuë. Quisocristo chachin catahuarinco. Achinicancaninco niꞌton, chiníquën cancantato aꞌchinárahuë.

Colosenses 2:13

Iráca canpitasoꞌ oshahuanatomaꞌ, chimipi pochin ninamaꞌ. Co noyahuëꞌ nicacasoráchin yonquiramaꞌ. Co Yosë piyapinënpita ninamahuëꞌ. Iporaso nipirinhuëꞌ Quisocristo imaramaꞌ niꞌton, anoyacancantërinquëmaꞌ. Oshanëmaꞌ inquitatënquëmaꞌ, nanpiantarinso pochin niꞌninquëmaꞌ.

1 Timoteo 1:14

Sinioro chachin inaora nohuanton, nosoroatonco, naꞌcon catahuarinco. Catahuahuachincora, “Quisocristoíchin anoyacancantarinco,” taꞌto, ina natërahuë. Ina imato, nosororahuë cantaꞌ.

1 Timoteo 2:15

Sanapiꞌsaso nipirinhuëꞌ huaꞌhuinpita noya asoꞌsohuachinaꞌ, Yosëri noya niꞌsarin. “Yosë catahuarinco,” taꞌtonaꞌ, imamiachinaꞌ. Piyapiꞌsaꞌ noya nosoroꞌinaꞌ. Noyasáchin niꞌinaꞌ. Sano yonquiꞌinaꞌ. Inapohuachinaꞌ, nichaꞌësarin.

1 Timoteo 2:9

Sanapiꞌsantaꞌ noya niinaꞌ. Aꞌnaquën sanapiꞌsaꞌ nitapacaisoráchin yonquipi. Naꞌcon naꞌcon yanco nitonpomototopi, notohuaroꞌ miyo pëꞌpëpi, nisha nisha aꞌsontanpapi. Paꞌton nininsopita aꞌmocaisoꞌ paꞌyatopi. Ainën tapacaisoráchin yonquipi. Yosë imarinsopitaso nipirinhuëꞌ, ama inasáchin yonquiatonahuëꞌ, sano yonquiꞌinaꞌ. Ama piyapiꞌsari paꞌyatacaiso marëáchin nitapainasohuëꞌ.

Tito 2:12

Nosoroatonpoaꞌ, pënëninpoaꞌ yaꞌipi co noyahuëꞌ yonquirëhuasopita naniantacaso marëꞌ. Ama maꞌsharáchin nohuantahuasohuëꞌ. Co monshihuanacasoꞌ yaꞌhuërinhuëꞌ. Sano yaꞌhuatëhuaꞌ, nóya yonquiaꞌahuaꞌ. Yosë yonquirinsoráchin imahuaꞌ. Nani tahuëri Yosë chinotatëhuaꞌ, noyasáchin niahuaꞌ. Ina marëꞌ pënëninpoaꞌ.

Tito 2:2

Quëmapiꞌsaꞌ quëmá quëran mashomiachin nipisopita pënënquëꞌ natëtonoꞌsaꞌ niinaꞌ. Ama nisha nisha yonquiꞌinasohuëꞌ. Noya yonquiatona yaꞌhuëꞌinaꞌ. Yosë nanamën noꞌtëquën imainaꞌ. Yaꞌipi piyapi nosoroꞌinaꞌ. Aparisitopirinahuëntaꞌ, ama yaiꞌhuërëchinasohuëꞌ, ahuanchinaꞌ.

Tito 2:4

Ina quëran sanapiꞌsasoꞌ nanitopi nasha soꞌyahuanoꞌsaꞌ aꞌchintacaisoꞌ. Soꞌinaꞌ, huaꞌhuinpita inapita nosorocaiso marëꞌ pënëinaꞌ.

Tito 2:6

Huiꞌnapiꞌsantaꞌ pënënquëꞌ sano yonquiꞌinaꞌ.

Santiago 4:6

Sacaiꞌ Yosëíchin yonquicaso nipirinhuëꞌ, inari chachin inaora nohuanton catahuarinpoaꞌ ina pochin cancantacasoꞌ. “Caora noya ninahuë,” topatëhuaꞌ, co Yosë noya niꞌsarinpoahuëꞌ. Nipirinhuëꞌ, “Co caora nanitërahuëꞌ noya nicaꞌhuasoꞌ. Catahuaco Sinioro,” topatëhuaꞌ, Yosë catahuarinpoaꞌ. Nosoroatonpoaꞌ, catahuarinpoaꞌ, tënin Yosë quiricanënquë.

1 Pedro 1:13

Napoaton chiníquën cancantatomaꞌ, yonquicoꞌ noya nicacamasoꞌ. Sano yonquicoꞌ. Quisocristo oꞌmantahuachin, inaora nohuanton, nichaꞌësarinpoaꞌ. Ina ninatomaꞌ, noya cancantocoꞌ.

1 Pedro 4:11

Aꞌnaquën Yosë nohuanton, nitotopi pënëntacaisoꞌ. Nitotohuatamaꞌ, Yosë noninso chachin pënëntocoꞌ. Aꞌnaquëontaꞌ Yosë nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Yosë catahuarinquëmaꞌ niꞌton, ina yonquiatomaꞌ, aꞌnapita noya catahuacoꞌ. Maꞌsona tërantaꞌ nipatamaꞌ, yaꞌipi cancanëma quëran nicoꞌ. Piyapiꞌsaꞌ nicatënënquëmaꞌ Yosë noya noya yonquicaiso marëꞌ inapocoꞌ. Yosësoꞌ noya noya ninin. Chini chiníquën nanantërin. Yaꞌipi piyapiꞌsari ina chinochinaꞌ. Quisocristo catahuarinpoaꞌ ina pochin cancantacasoꞌ. Amen.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

1 Pedro 5:5

Huiꞌnapiꞌsanquëmantaꞌ ansianoꞌsaꞌ natëcoꞌ. Yaꞌipinquëmaꞌ noya yonquiatomaꞌ, nicatahuacoꞌ. Quiricanën quëran itërinpoaꞌ: “Caora noya nisarahuë, taꞌtomaꞌ, nocantohuatamaꞌ, Yosë co noya niꞌsarinquëmahuëꞌ. Nipirinhuëꞌ, ‘Caora co nanitërahuëꞌ noya nicaꞌhuasoꞌ. Catahuaco,’ topatamaꞌ, inaora nohuanton, Yosë nóya catahuarinquëmaꞌ,” tënin.

1 Pedro 5:8

Sopaisoꞌ inimiconënpoaꞌ. Yacamairinpoaꞌ co noyahuëꞌ nicacaso marëꞌ. Paꞌpiniꞌ yamaninposo pochachin sopai paꞌsarin piyapiꞌsaꞌ minsëcaso marëꞌ. Napoaton noya yonquiatomaꞌ, niꞌsácoꞌ.

3 Juan 1:9

Yaꞌipi yaꞌhuëramaquë imaramasopita quirica nani ninshitëranquëmaꞌ. Tiotripisëso nipirinhuëꞌ, co yanatërincohuëꞌ. Inasoꞌ huaꞌan pochin yaninin.