Romanos 12:12 - Chayahuita (Shahui)

¹² “Yosë ananpitaantarinpoaꞌ,” taꞌtomaꞌ, noya cancantocoꞌ. Maꞌsha onpohuatamaꞌ, ama noꞌhuitocosohuëꞌ. Chiníquën cancantatomaꞌ, ahuantocoꞌ. Apira apira Yosë nontocoꞌ.

Romanos 12:12 ပူးပေါင်းရင်းမြစ်များ

Salmos 37:7

Sinioro yonquiaton sano cancantëquëꞌ. “Catahuaponco mini,” tëcaton ina ninaquëꞌ. Aꞌnaquën co noyahuëꞌ nicaponahuëꞌ maꞌhuanahuachin, ama noꞌhuitëquësohuëꞌ.

Salmos 40:1

Maꞌsha onpohuatora, Sinioroíchin catahuaincoso ninarahuë. Naporahuë niꞌton, co napion ancantato nontërahuësoꞌ natanahuatonco, catahuarinco.

Mateo 5:12

Iracantaꞌ Yosë piyapinënpita pënëntohuachinara, aꞌnaquëni inapochachin noꞌhuipi. Napoaton aꞌnapita noꞌhuihuachinënquëmaꞌ, noya cancantocoꞌ. Parisitëramaso marëꞌ Yosëꞌpaꞌ naꞌcon acanaarinquëmaꞌ. Ina yonquiatomaꞌ, capa cancantocoꞌ,” itërin Quisosori.

Lucas 10:20

Sopairoꞌsaꞌ aꞌpapiramahuëꞌ, ama ina marëáchin noya cancantocosohuëꞌ. Imaramaco niꞌton, Yosëꞌpaꞌ paꞌsaramaꞌ. Inatohuaꞌ nininëmaꞌ nani ninshitërinquëmaꞌ. Ina marëꞌ tëhuënchinsoꞌ nóya cancantocoꞌ, itërin.

Lucas 21:19

Noya imamiatohuatamaco, chaꞌësaramaꞌ.

Lucas 8:15

Aꞌnaquën piyapiꞌsaso nipirinhuëꞌ noyaroꞌpa pochin nipi. Yosë nanamën noya natanpi. Natanahuatonaꞌ, noya cancantatonaꞌ, natëtopi. Noꞌtëquën yonquiatonaꞌ, natëmiatopi. Maꞌsha onpoaponaraihuëꞌ, co aꞌpopihuëꞌ. Yaꞌipi cancanëna quëran imatonaꞌ noya noya nisapi,” tënin.

Hechos 1:14

Inapitasoꞌ nani tahuëri niyontonatonaꞌ, Yosë nontápi. Quisoso iinpitantaꞌ huëꞌpi Yosë nontacaiso marëꞌ. Sanapiꞌsantaꞌ inaquë huëꞌpi. Aꞌnasoꞌ Maria. Quisoso aꞌshin inasoꞌ. Napopianachin yonquiatonaꞌ, inaquë naꞌcon Yosë nontápi.

Hechos 12:5

Pitro tashinan pëiquë yaꞌhuapirinhuëꞌ, Quisoso imapisopita Yosë nontapi. Pitro marëꞌ chiníquën Yosë nontapi.

Hechos 2:42

Caꞌtanoꞌsa aꞌchinpachinara, paꞌyatopi natanacaisoꞌ. Noya natanatonaꞌ, natëpi. Noya niniꞌtonaꞌ, yaꞌhuërapi. Quisoso chimininsoꞌ yonquiatonaꞌ, coshatapatapi. Naporahuatonaꞌ, apira apira Yosë nontapi.

Hechos 6:4

Quiyaso nipirinhuëꞌ Yosë nontaꞌhuaisoꞌ, nanamën aꞌchinaꞌhuaisoꞌ, inasáchin yonquiarai, itopi caꞌtanoꞌsari.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 15:4

Iráca Yosë quiricanënquë naꞌcon ninshitopi. Canpoantaꞌ yonquicaso marëꞌ napopi. “Iráca imapisopitantaꞌ maꞌsha onpoaponaraihuëꞌ, Yosë yonquiatonaꞌ, ahuantopi. Yosëri noya catahuahuachina, imamiatopi. Inapochachin Yosë noya catahuarinpoaꞌ canpoantaꞌ,” taꞌcaso marëꞌ ninshitopi.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Romanos 8:25

“Tëhuënchachin noyá nichaꞌësarinpoaꞌ,” taꞌtëhuaꞌ, co sëtërëhuahuëꞌ. Noya cancantatëhuaꞌ, ninarihuaꞌ.

1 Corintios 13:13

Cancanënpoa quëran huarëꞌ Yosë natëcasoꞌ yaꞌhuërin. “Co onporontaꞌ nonpintarinpoahuëꞌ,” taꞌtëhuaꞌ, inasáchin ninacasoꞌ yaꞌhuërin. Ninosorocasontaꞌ yaꞌhuërin. Yosësoꞌ naꞌcon naꞌcon nohuantërin ninosorocasoꞌ.

2 Corintios 12:8

Ina marëꞌ chiníquën Sinioro nontërahuë. “Catahuaco ama parisichisohuëꞌ,” itërahuë. Cararoꞌ ina pochin nontopirahuëꞌ.

Filipenses 3:1

Iporasoꞌ iyaroꞌsaꞌ Quisocristo yonquiatomaꞌ, nóya cancantocoꞌ. Iráca quëran huarëꞌ inachachin inachachin pënënápiranquëmahuëꞌ, co amirahuëꞌ. Naquëranchachin natantahuatamaꞌ, yonquiantaramaꞌ. Ina quëran noya noya imasaramaꞌ, tënahuë.

Filipenses 4:4

Nani tahuëri Quisocristo yonquiatomaꞌ, noya cancantocoꞌ. Naquëranchin inachachin shaꞌhuichinquëmaꞌ. Maꞌsha onpoapomarahuëꞌ, noya cancantocoꞌ, tënahuë.

Colosenses 1:11

Quëmasoꞌ, Sinioro, chini chiníquën nanantëran niꞌton, catahuaquëꞌ chiníquën cancanchinaꞌ. Maꞌsha onpohuachinaꞌ, catahuaquëꞌ noya cancantatonaꞌ, ahuanchinaꞌ. Aꞌnapitari aparisitohuachinaꞌ, catahuaquëꞌ ama noꞌhuiinasohuëꞌ,” itërai, Yosë nontatoi.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 4:12

Ipapërasëntaꞌ canpitataquë yaꞌhuërinsoꞌ saludos aꞌpatarinquëmaꞌ. Inantaꞌ Quisocristo natëton, noya nanan aꞌchinarin. Nani tahuëri canpita marëꞌ Yosë nontárin. “Catahuaquëꞌ Sinioro yaꞌipi nohuantëransoꞌ nitochinaꞌ. Noya nitotatonaꞌ imamiachinën,” itárin.

Colosenses 4:2

Nani tahuëri Yosë nontocoꞌ. Ama amiatomahuëꞌ, nontácoꞌ. Ama topinan nontocosohuëꞌ. Yaꞌipi cancanëma quëran huarëꞌ noya yonquiatomaꞌ, nontocoꞌ. “Yosparinquën Sinioro,” itocoꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

2 Tesalonicenses 1:4

Yaꞌipi parti Yosë imapisopita shaꞌhuitërai. “Tisaronicaquë yaꞌhuëpisopita noya imasapi. Imapiso marëꞌ naꞌcon aparisitopirinahuëꞌ: ‘Yosë co naniantarinpoahuëꞌ,’ taꞌtonaꞌ, ahuantapi. Co yaaꞌpopihuëꞌ. Maꞌsha onpoaponaraihuëntaꞌ, chiníquën cancantapi,” itërai. Noya natëramaꞌ niꞌton, noya cancantërai.

2 Tesalonicenses 3:5

Yosë catahuainquëmaꞌ ina nosororinpoasoꞌ naꞌcon yonquicamaso marëꞌ. Parisitopiramahuëꞌ, achinicancainquëmaꞌ Quisocristo pochin ahuantacamaso marëꞌ.

1 Timoteo 6:11

Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

2 Timoteo 3:10

Quëmaso nipirinhuëꞌ noya cancantaton, huaꞌquiꞌ caꞌtananco. Yosë nanamën aꞌchinpatëra, noya natanan. Yaꞌipi naporahuësoꞌ niꞌnan. Yosëíchin yonquiato, imamiatarahuë. Cancanëhuë quëran huarëꞌ natërahuë. Co piyapiꞌsaꞌ noꞌhuirahuëꞌ, nosororahuë. Maꞌsha onpoaporahuëꞌ, chiníquën cancantërahuë.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Tito 3:7

Napoaton iporasoꞌ Yosë noya niꞌninpoaꞌ. Iráca oshahuanpirëhuahuëꞌ, inaora nohuanton, nosoroatonpoaꞌ, nanan anoyatërinpoaꞌ. “Huëntonënquë ayaꞌconinpoaꞌ niꞌton, aꞌna tahuëri yaꞌhuërinꞌpaꞌ yaꞌhuëcontarihuaꞌ,” taꞌtëhuaꞌ, ninarëhuaꞌ. Inatohuaꞌ nanpimiatarihuaꞌ.

Hebreos 10:32

Yaꞌnan imaramasoꞌ tahuëriꞌsaꞌ yonquicoꞌ. Quisocristo nanamën aꞌchintohuachinënquëmara, noya natanatomaꞌ, imaramaꞌ. Ina marëꞌ parisitapomarahuëꞌ, co yaaꞌporamahuëꞌ. Noya ahuantëramaꞌ.

Hebreos 10:36

Maꞌsha onpopiramahuëntaꞌ, noya ahuantocoꞌ. Noya natëhuatamaꞌ, naꞌcon catahuarinquëmaꞌ. Nani shaꞌhuitërinquëmaꞌ niꞌton, co nonpintarinquëmahuëꞌ. Noya nichaꞌësarinquëmaꞌ.

Hebreos 12:1

Iráca quëran huarëꞌ naꞌa piyapiꞌsaꞌ parisitaponaraihuëꞌ, imamiatopi. “Yosë catahuarinpoaꞌ,” taꞌtonaꞌ, natëpi. Napoaton inapita yonquiatëhuaꞌ, canpoantaꞌ nóya imahuaꞌ. Niꞌcoꞌ. Quëmapiꞌsaꞌ nicanacaiso marëꞌ taꞌahuachinara, chiníquën taꞌapi. Co mantaꞌ quëpapihuëꞌ. Torosarëáchin taꞌapi. Naporopi aꞌmopisoꞌ co ocoihuachinahuëꞌ, co nanitopihuëꞌ chiníquën taꞌacaisoꞌ. Inapochachin canpoantaꞌ naporopi aꞌmopisoꞌ ocoipiso pochin yaꞌipi oshanënpoaꞌ naniantahuaꞌ. Co noyahuëꞌ yonquirëhuasopita naniantatëhuaꞌ, yaꞌipi cancanënpoa quëran Quisocristo imahuaꞌ. Sacaiꞌ nipirinhuëꞌ, ahuantatëhuaꞌ, noya imahuaꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Hebreos 5:7

Quisocristo isoroꞌpaquë oꞌmarahuaton, piyapi chachin nasitimarin. Yatëpahuachinara, chiníquën Yosë nontërin. Naꞌnëton, itapon: “Quëma nohuantohuatan Tata, nichaꞌëco, ama tëpaꞌinacosohuëꞌ. Nipirinhuëꞌ, co quëma nohuantohuatanhuëꞌ, maꞌsona yaonpotohuatancontaꞌ noya,” itërin. Noꞌtëquën yanatërin niꞌton, Yosëri natanaton, catahuarin noya natëcasoꞌ.

Hebreos 6:12

Ama amitomarahuëꞌ, naꞌcon Yosë yonquicoꞌ. Noya natëpisopita nonancoꞌ. Inapitasoꞌ imamiatapi. “Yosë noꞌtëquën nontërinpoaꞌ,” taꞌtonaꞌ, noya natëapi. Maꞌsha onpoaponaraihuëꞌ, noya ahuantapi. Iráca Yosëri shaꞌhuitërinso chachin ninapi.

Hebreos 6:15

Itohuachina, Apraani Yosë natërin. Huaꞌquiꞌ co huiꞌnin yaꞌhuëtopirinhuëꞌ, noya cancantaton, ninarárin. “Co Yosë nonpintërincohuëꞌ,” taꞌton, natërin. Napoaton napoin quëran huiꞌnin nasitërin.

Santiago 5:7

Napoaton iyaroꞌsaꞌ aparisitohuachinënquëmaꞌ, noya ahuantocoꞌ. Aꞌna tahuëri Sinioro oꞌmantararin. Naporoꞌ yaꞌipiya noꞌtëquën anaꞌintarin. Niꞌcoꞌ. Shaꞌtohuatëra, co aꞌnaroáchin manëhuëꞌ. Oꞌnanpachina, oshaquëran papotarin. Oꞌnaantahuachina, cayarin. “Oshaquëran cayahuachin, mapatëhuaꞌ caꞌsarëhuaꞌ,” taꞌton huaꞌanëni ninararin.

1 Pedro 4:13

Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ.

1 Pedro 4:7

Ayaroꞌ tahuëri nani yaꞌcariarinpoaꞌ. Napoaton ama nisha nisha yonquicosohuëꞌ. Noya yonquiatomaꞌ, Yosë nontácoꞌ.

2 Pedro 1:6

Ina nitotatomaꞌ, co noyahuëꞌ yonquihuatamaꞌ, aꞌnaroáchin naniantocoꞌ. Naporahuatomaꞌ, maꞌsha onpoapomarahuëꞌ, chiníquën cancantocoꞌ. Chiníquën cancantohuatamaꞌ, yaꞌipi cancanëma quëran ina chinotocoꞌ.

Apocalipsis 13:10

“Mapachinënquëmaꞌ, parisitacasoꞌ yaꞌhuërin. Sahuëniquë yatëpahuachinënquëmaꞌ, ahuantacasoꞌ yaꞌhuërin. Ina yonquiatomaꞌ, chiníquën cancantocoꞌ. ‘Yosë catahuarinpoaꞌ,’ taꞌtomaꞌ, imamiatocoꞌ.”