Oseas 6:5 - Chayahuita (Shahui)

⁵ Napoaton pënëntonaꞌpiroꞌsa quëran paꞌsa paꞌsatërëso pochin nitëranquëmaꞌ. Shaꞌhuitopiranquëmahuëꞌ co natëramacohuë niꞌton, tëpatë pochin nitëranquëmaꞌ. Oꞌcori huënshaꞌ, taꞌsochachin huira ahuëtërin. Inapochachin carimanta anaꞌintohuatënquëmaꞌ, co oshataponquëmahuëꞌ.

Oseas 6:5 ပူးပေါင်းရင်းမြစ်များ

Génesis 18:25

¡Ama Sinioro napoquësohuëꞌ! ¡Tëhuëpisopita, co tëhuëpisopitahuëꞌ co napopináchin oshahuanpiso pochin anaꞌintamaso yaꞌhuërinhuëꞌ! ¡Ama napoquësohuëꞌ! ¡Quëmasoꞌ, noya noya coisë yaꞌipi isoroꞌpaꞌ marëꞌ ninan niꞌton, noꞌtëquënáchin anaꞌintamaso yaꞌhuërin! itërin.

1 Reyes 17:1

Carata parti, Tisipi ninanoquë aꞌnara pënëntonaꞌpi yaꞌhuërin. Inasoꞌ, Iniasë itopi. Aꞌna tahuëri inasoꞌ, Acapo paaparahuaton itapon: “Sinioro chinotërëhuaso yaꞌhuërin niꞌton, caso inasáchin natërahuë. Ina camairinco niꞌton, noꞌtëquën shaꞌhuitaranquën. Ipora quëran huarëꞌ co huachi oꞌnanaponhuëꞌ. Co poroncayo tëranta yaꞌhuëaponhuëꞌ. Ca shaꞌhuiantaꞌhuarëꞌ yaꞌhuëantapon. Co Sinioro natëtonhuëꞌ oshahuananso marëꞌ ina pochin anaꞌintarinquën,” itërin.

1 Reyes 18:17

Ipora quënanapon chachin Acapori itapon: —¡Iꞌyan! Israiroꞌsa aparisitápiranhuëꞌ, nani quënananquën huachi, itërin.

1 Reyes 19:17

Inapotohuatan, insosona Asairo quëran chaꞌëpachin, Quiori tëpapon. Quio quëran chaꞌëpachin, Irisiori tëpapon. Ina nipirinhuëꞌ, ca nohuanton canchisë huaranca israiroꞌsa imamiatarinaco. Inapitaso mamanshi Paaro itopisoꞌ, co moshapihuëꞌ,” itërin.

Salmos 37:6

Camotëchin nipachina, piꞌi noya noya aꞌpinin. Inapochachin Sinioro catahuahuachinquëmaꞌ, noya nicatoma imamiatëramasoꞌ, yaꞌnoarin.

Isaías 11:4

Noya coisë pochin, sanpatopisopita maꞌsona onpotacasoꞌ shaꞌhuitapon. Popriyatopisopitanta paꞌpoyaton, catahuapon. Noꞌhuitërayaroꞌsasoꞌ, topinan noncharapirinhuëꞌ anaꞌintapon. Co noyahuëꞌ nipisopitantaꞌ, pihuitëꞌ aꞌparëso pochin ataꞌhuantapon.

Isaías 58:1

Sinioro shaꞌhuitërinco: “Ama manta tëꞌhuatonhuëꞌ chiníquën nonquëꞌ. Tronpita pihuihuachina irininso pochin niquëꞌ. Piyapinëhuëpita co noyahuëꞌ nipiso marëꞌ pënënquëꞌ. Cacopo quëran pipipisopita oshahuanpiso marëꞌ inapotëquëꞌ.

Jeremías 1:10

“Ca nohuanto nanamëhuë noꞌtëquën shaꞌhuiaran. Nisha nisha piyapiꞌsaꞌ, nisha nisha copirnoroꞌsari huaꞌanëntopisoꞌ, inapita pënënacaso marëꞌ nanan quëtaranquën. Pënënpatan co natëtohuachinahuëꞌ, pacatoro huaꞌtahuatë ataꞌhuantërëso pochin, noꞌpapi pëi ohuatahuatë ninomotërëso pochin anaꞌintarahuë. Noya natëhuachinaso nipirinhuëꞌ, sharoꞌsa shacatë pochin nitato, noya noya nicacaisoꞌ catahuararahuë,” itërinco.

Jeremías 1:18

Ipora tahuëri carinquën acoranquën pairahuan ninano noyá niacorapipiso pochin nicacaso marëꞌ. Huaꞌnamia quëran onë nipiso pochin, shaꞌpi huaꞌna quëran paira nipiso pochin acoranquën. Inapoaton yaꞌipi Cota huëntonquë yaꞌhuëpisopita chinitaran. Copirnonënapita, huaꞌanënapita, corto huaꞌanoꞌsanënapita, inapitanta chinitaran.

Ezequiel 3:9

Tiamanti naꞌpisoꞌ paꞌpi taríton. Ina tarítërinso pochin quëmanta acoaranquën. Naꞌpi tarítërinso pochin acoaranquën niꞌton, ama inapita tëꞌhuatëquësohuëꞌ. Co natantochináchinhuëꞌ cancantopi niꞌton, pënënpatan nishinahuën niꞌtaponaꞌ. Napopirinahuë tërantaꞌ, ama tëꞌhuatëquësohuëꞌ,” itërinco.

Hechos 7:31

Ina niꞌsahuaton, paꞌyanin. “¿Maꞌtaꞌ inasoꞌ nimara?” taꞌton, yaꞌcariconin. Naporoꞌ Yosëri itapon:

Romanos 2:5

Canpitaso nipirinhuëꞌ, co natantochináchinhuëꞌ cancantëramaꞌ. Co oshanëmaꞌ yaaꞌporamahuëꞌ. Napoaton ayaroꞌ tahuëri chini chiníquën anaꞌintarinquëmaꞌ. Naporoꞌ yaꞌipi piyapiꞌsaꞌ noꞌtëquën anaꞌintarin.

Efesios 6:17

Sontaroꞌsaꞌ co casco huaꞌna quëran nininsoꞌ yancopihuëꞌ naporini, aꞌnaroáchin inimiconënpitari motën acochitonahuëꞌ. Inapochachin canpoantaꞌ co Yosë anoyacancantërinpoahuëꞌ naporini, co chaꞌëitërihuahuëꞌ. Yosë quiricanëntaꞌ yaꞌhuëtërinpoaꞌ. Ispirito Santo nohuanton, ninshitërinënpoaꞌ sopai minsëcaso marëꞌ. Napoaton nani tahuëri ina nontatomaꞌ, yonquicoꞌ. Sontaroꞌsari sahuëninëna quëran inimico minsëpi. Inapochachin canpoantaꞌ Yosë quiricanën quëran sopai minsëarihuaꞌ.

Hebreos 4:12

Yosë nanamën chiníquën nanantërin. Yosë nanpiárin niꞌton, ipora huantaꞌ quiricanën quëran nontarinpoaꞌ. Noya natëhuatëhuaꞌ, nanamën quëran chachin catahuarinpoaꞌ noya noya imacaso marëꞌ. Coꞌsoꞌ natëhuatëhuahuëꞌ, aquë aquëtëꞌ co noyahuëꞌ cancantarihuaꞌ. Sahuëni cato quëran chachin toꞌnahuatëra, inëshin niꞌton, niahuëpatëra, aꞌnaroáchin nansë acopoquë huarëꞌ nipëꞌsharëꞌ. Inapochachin Yosë nanamënsoꞌ chini chiníquën yaꞌcoancantërinpoaꞌ. Ina yonquihuatëhuaꞌ, noꞌtëquën nitotarihuaꞌ. Yaꞌipi yonquirëhuaso chachin anitotërinpoaꞌ. Yonquinënpoaquë maꞌmarësona naporëhuasopitantaꞌ anitotarinpoaꞌ.

Apocalipsis 1:16

Inchinan imirin quëran canchisë tayora pochin nininsoꞌ sëꞌquërin. Naporahuaton, nanamën quëran sahuëni pochin nininsoꞌ pipirarin. Cato quëran chachin toꞌnapinan. Yaꞌipi yaꞌpirinsoꞌ piꞌi pochin aꞌpinin. Huënaráchin huënaráchin yaꞌnorin.

Apocalipsis 2:16

Napoaton yaꞌipi co noyahuëꞌ yonquiramasopita naniantocoꞌ. Insosona co naniantohuachinhuëꞌ, chiníquën anaꞌintarahuë. Nanamëhuë quëran sahuëni inëshin nininsoꞌ yaꞌhuëarin oshahuanoꞌsaꞌ anaꞌintaꞌhuaso marëꞌ.

Apocalipsis 9:15

Itohuachina, anquëniroꞌsaꞌ aꞌparin piyapiꞌsaꞌ anaꞌintacaiso marëꞌ. Iráca inaquë acopirinhuëꞌ. Nani ora nanirin niꞌton, aꞌparin huachi patoma pochin piyapiꞌsaꞌ tëpacaiso marëꞌ.

Apocalipsis 9:21

Paꞌpi co noyahuëꞌ cancantatonaꞌ, tëpatapi, pënotapi, monshihuanapi, maꞌsha ihuatapi. Yosëri anaꞌintërinsoꞌ niꞌsáponaraihuëꞌ, co naporo tërantaꞌ nohuantapihuëꞌ oshanënaꞌ aꞌpocaisoꞌ.

1 Samuel 13:13

Napotohuachina Samoirori itapon: —¡Co noꞌtëquën yonquiatonhuëꞌ naporan! Yosë nani camairinquën maꞌsona noya nicacasoꞌ. Ina noꞌtëquënáchin natëran naporini, ina nohuanton quëmasáchin israiroꞌsa huaꞌanënchitonhuëꞌ. Quëmá quëran pipipisopitanta inapita huaꞌanënchitonahuëꞌ. Co aꞌnapitari huaꞌanënchitonahuëꞌ.

1 Samuel 15:22

Napotohuachina Samoirori itapon: “Maꞌsha Sinioro marëꞌ tëpatona piꞌpian ahuiquitacaisoꞌ, noya. Yaꞌipi ahuiquitacaisontaꞌ, noya. Sinioro camaitërinso natëcasoso nipirinhuëꞌ, noya noya. Maꞌsha Sinioro marëꞌ tëpatona piꞌpian ahuiquitacaisoꞌ, noya. Carniro tomaquën ahuiquitasontaꞌ, noya. Camaitërinso noya natanatë natëcasoso nipirinhuëꞌ, noya noya.

1 Samuel 15:32

Ina quëran Samoirosoꞌ camaitaton: —Amarico copirno Acaco itopisoꞌ quëshico, tënin. Napohuachina quëshiipi. “Israiroꞌsa aparisitatonaco tëpainacoso yaꞌhuërin naporini, nani tëpaꞌitonacohuëꞌ,” tënin yonquinënquë. Ina yonquiaton co mácancayan quëranhuëꞌ huëꞌnin.

1 Samuel 15:33

Samoiroriso napoaponahuëꞌ, itapon: —Sahuëninën quëran notohuaroꞌ piyapiꞌsa tiquiran. Napoatona aꞌshina saꞌahuapi. Inapita saꞌahuapiso pochin mamaparinta quëparitapon, itërin. Itahuaton, sahuëniquë tëparin. Sinioro camaitërinso chachin nitahuaton yaquirin. Quiricaroquë naporin.