Oseas 5:1 - Chayahuita (Shahui)

^1-2 Naquëranchin Siniorori piyapinënpita itapon: “Corto huaꞌanoꞌsanquëmaꞌ, yaꞌipi Israiro huaꞌanoꞌsanquëmaꞌ, copirnonta quëmopinënpitarë chachin, yaꞌipinquëma natanco shaꞌhuichinquëmaꞌ: ‘Canpitaso piyapinëhuëpita anishacancantërama niꞌton, Mispa ninanoquë pëcotan acoatë pochin ninamaꞌ. Taporo motopiquënta huënson acoatë pochin ninamaꞌ. Sitin motopianaquëpita noꞌpaꞌ ihuarahuatomaꞌ, pëcotan acoatë pochin ninamaꞌ. Ina marëꞌ anaꞌintaꞌhuanquëmaso yaꞌhuërin,’ tënahuë.

Oseas 5:1 ပူးပေါင်းရင်းမြစ်များ

Oseas 13:8

Tocaniꞌ huaꞌhuinpita ayataton paaso piyapi quënanpachina, tëparin. Inapotahuaton ninopinën paꞌsa paꞌsatërin. Inapochachin carinquëmantaꞌ, nitaranquëmaꞌ. Paꞌpininta mapintohuachina, mapinën inaranchin pëꞌyarinso pochin nitaranquëmaꞌ. Maton maꞌshantaꞌ, mapinën paꞌsa paꞌsatërin. Inapochachin carinquëmantaꞌ, israiroꞌsanquëma ataꞌhuantaranquëmaꞌ. Co insonta paꞌpoyaponquëmahuëꞌ.

Oseas 4:1

Israiroꞌsanquëmaꞌ. Sinioro naporinso natancoꞌ: “Iso noꞌpaquë yaꞌhuëpisopita paꞌpi co noyahuëꞌ nipi. Isëquësoꞌ, co noꞌtëquën ninosoropihuëꞌ. Nisha nisha cancantopi. Caso Yosëco nipirahuëꞌ, co nohuitërinacohuëꞌ. Nonpiáponaraihuëꞌ, ‘Yoscoarëꞌ,’ niitopi. Apira apira nitëpapi, niihuapi, nitëhuananpitopi, paꞌpi noꞌhuitërayaroꞌsa nipi, napopi.

Joel 1:2

Cota huëntonquë mashoyanquëma yaꞌhuëramasopita, yaꞌipi ina huëntonquë yaꞌhuëramasopitantaꞌ, noya natanco shaꞌhuichinquëmaꞌ: ¡Tëhuënchachin co onporonta niꞌnamasohuëꞌ niꞌsaramaꞌ! Shimashonëmapitanta yaꞌhuëaponaꞌ, ¡tëhuënchachin co onporonta ina pochin niꞌchinpihuëꞌ!

Amós 3:1

Israiroꞌsanquëmaꞌ. Canpitasoꞌ, Sinioro Iquipito quëran ocoirinquëmaꞌ. Ina naporinso natanco shaꞌhuichinquëmaꞌ:

Amós 7:9

Isaco quëran pipipisopita mamanshi moshacaiso marëꞌ inahuara nohuanton artaroroꞌsa acopi. Inapitasoꞌ, yaꞌipi taꞌhuantaponaꞌ. Israiroꞌsa mamanshi moshacaiso marëꞌ pëipisopitantaꞌ, tapiarahuë. Quiropoamo copirno quëmopinënpitantaꞌ, co huachi israiroꞌsa huaꞌanëntaponahuëꞌ, tënin.

Miqueas 3:1

Aꞌna tahuëri Siniorosoꞌ pënëntaton: “Israiro huaꞌanoꞌsanquëmaꞌ. Iporasoꞌ canpita pënënaranquëmaꞌ: ¡Canpitaꞌton mini piyapiꞌsa noya nicatoma paꞌpoyamaso yaꞌhuërin!

Miqueas 3:9

Naquëranchin Sinioro pënëntaantarin: “Israiro huaꞌanoꞌsanquëmaꞌ, ipora chachin pënëantaꞌinquëma natanco: ‘Canpitaso noya nicacasoꞌ co paꞌyatëramahuëꞌ. Napoatoma noya nisapisopitantaꞌ, anaꞌintoconamaꞌ.

Malaquías 1:6

Siniorosoꞌ, yaꞌipi nanitaparin. Corto huaꞌanoꞌsa pënënaton: “Huaꞌhuaroꞌsasoꞌ, paꞌpina noya nicatona natëcaiso yaꞌhuërin. Patronoꞌsantaꞌ, piyapinënpitari natëcaiso yaꞌhuërin. Caso canpita tatanëmaco niꞌquëhuarëꞌ, ¡noya nicatomaco natëamacoso yaꞌhuërin! Patronëmaco niꞌquëhuarëꞌ, ¡natëamacoso yaꞌhuërin! Canpitaso napoaponahuëꞌ, nocanamaco. Napoapomarahuëꞌ: ‘¿Maquëta nocanainquën?’ itëramaco.

Malaquías 2:1

Naquëranchin Siniorori corto huaꞌanoꞌsa pënënaton: “Isontaꞌ, corto huaꞌanoꞌsanquëma shaꞌhuitaantaꞌinquëmaꞌ:

Jueces 4:12

Paraco sontaronënpitarë chachin Taporo motopiquë niyontopisoꞌ, Sisara natantërin.

Jueces 4:6

Aꞌna tahuëri Tiporasoꞌ, Apinoamo itopisoꞌ huiꞌnin amatërin. Inasoꞌ, Paraco itopi. Quitisë ninanoquë yaꞌhuërin. Inaso ninanoꞌ, Nipitari israiroꞌsa huënton noꞌpaꞌ mapiquë yaꞌhuërin. Canquihuachina, itapon: —Israiroꞌsanpoa chinotërëhuaso Yosë, iso pochin camairinquën: “Taporo motopiquë paꞌsahuaton, shonca huaranca Israiro sontaroꞌsa ayontonquëꞌ. Saporono, Nipitari, inapita huëntonoꞌsa quëran ayontonquëꞌ.

1 Samuel 7:16

Nani piꞌiquë Pitiriquë, Quiricaroquë, Mispaquë, inaquëpita paꞌsárin. Israiroꞌsa catahuacaso marëꞌ inaquëpita paꞌsárin.

1 Samuel 7:5

Ina piquëran Samoirosoꞌ comisionoꞌsa aꞌparin: “Yaꞌipi israiroꞌsanpoa Mispaquë pacatëhua niyontoanhuaꞌ. Inaquë Samoiro canpoa marëꞌ Yosë nontarin, itocoꞌ,” itërin.

1 Samuel 7:6

Napotohuachinara, Mispaquë niyontonpi. Inaquë iꞌsha ocoipi. Sinioro aꞌnotacaiso marëꞌ ocoirahuatonaꞌ, noꞌpaquë opopi. Naporo tahuëri co manta coshatatonaraihuëꞌ Yosë chinotopi. Yaꞌipiya natantonënaquë co Sinioro natëtonaraihuëꞌ oshahuanpisoꞌ, shaꞌhuipi. Inaquë chachin Samoirosoꞌ, israiroꞌsa huaꞌan nicacasoꞌ caniaririn.