Oseas 2:23 - Chayahuita (Shahui)

²³ Naporo tahuëriꞌsa israiroꞌsasoꞌ, yaꞌhuëpiso noꞌpaquë chachin yaꞌhuëmiataponaꞌ. Inaquë acohuato, nóya yaꞌhuëaponaꞌ. ‘No-roama’ itato, co quëꞌyarësohuë pochin nitopirahuëꞌ, nosoromiatapo huachi. ‘No-ami’ itato, nisharoꞌsa pochin nitopirahuëꞌ. ‘Canpitaso piyapinëhuëpitanquëma chachin,’ itarahuë huachi. Inapitantaꞌ, ‘Quëmaso Yosënëhuëinquën,’ itaponaco,” itërinco.

Oseas 2:23 ပူးပေါင်းရင်းမြစ်များ

Salmos 118:28

Quëmasoꞌ Sinioro chini chiníquën nanantëran. “¡Ma noyanquëncha ninan paya!” taꞌto chinotaranquën.

Salmos 22:27

Nisha nisha piyapinquëma nisha nisha nacionquë yaꞌhuëramaꞌ. Yaꞌipi parti yaꞌhuëramasopita huëcapairahuatomaꞌ, ina chinotocoꞌ. ¡Isonahuatoma chinotocoꞌ!

Salmos 72:16

Notohuaroꞌ trico yaꞌhuërëhuaso noꞌpaquë yaꞌhuëꞌin. Motopiroꞌsa huiꞌnimotënquëpita noya noyachin. Nipano motopi tanantërinquë maꞌsha noya noyatërin. Ina pochin trico shaꞌnëhuasoꞌ noyachin. Iminoꞌsaquë pacatoro yaꞌhuërinso pochin. Ninanoroꞌsaquëntaꞌ, notohuaroꞌ piyapi naꞌain.

Isaías 44:5

Napohuachina aꞌnasoꞌ: ‘Caso Sinioro huaꞌanëntërinco,’ tapon. Aꞌnantaꞌ: ‘Caso Cacopo shiinco,’ tapon. Aꞌnantaꞌ, imirinquë ninshitaton: ‘Yosë caso huaꞌanëntërinco,’ tapon. Aꞌnaquënsoꞌ, nininën ninshitahuaton, ina pirayan Israiro nininën ninshitaantarin,” tënin.

Jeremías 31:27

Ina quëran Sinioro taantarin: “Israiroꞌsa yaꞌhuëpiquë, Cota huënton israiroꞌsa yaꞌhuëpiquë, inaquëpita ca nohuanton aꞌna tahuëri notohuaroꞌ piyapiꞌsaꞌ, naꞌamiatapon. Pëꞌtahuaroꞌsanta napoapon.

Ezequiel 36:29

Oshanëma inquitahuato, ama huachi inachachin nisápamaso marëhuëꞌ catahuaranquëmaꞌ. Ca nohuanto notohuaroꞌ trico naꞌapon niꞌton, co huachi tanarotaramahuëꞌ.

Oseas 1:6

Comiri naquëranchin huaꞌhuaantahuachina, sanapiaꞌhua huairin. Naporoꞌ Siniorori Osiasë camaiantaton: “Huiꞌnan huaꞌhuatërinsoꞌ, No-roama itëquëꞌ. Israiro huënton co huachi nosoroapohuëꞌ. Napoaton co huachi chaꞌëtarinacohuëꞌ. Ina tapon ina pochin inanta nohuitëquëꞌ.

Malaquías 1:11

Yaꞌipi isoroꞌpaquë nisha nisha piyapiroꞌsa yaꞌhuëpisoꞌ, noya nicatonaco natërinaco. Inapotatonaco yonarin pochin nininsoꞌ, chinotiinacoso marëꞌ aꞌpëpi. Naporahuaton noya nininsopita maꞌsha quëshirinaco.

Romanos 3:29

Yosë yaꞌipi piyapinpoaꞌ nohuantërinpoaꞌ. Co cotioroꞌsaráchin nosororinhuëꞌ. Nisha piyapiꞌsantaꞌ nosororin. Yaꞌipinpoaꞌ nosororinpoaꞌ.

Santiago 1:1

Ca Santiacoco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Tata Yosë huaꞌanëntërinco niꞌton, Sinioro Quisocristoíchin natërahuë. Yaꞌipi cotioroꞌsanquëmaꞌ Quisocristo imaramasoꞌ ninshitaranquëmaꞌ. Canpitasoꞌ yanquëërahuatomaꞌ, nisha nisha parti yaꞌhuaramaꞌ. Yaꞌipi Yosë piyapinënpitanquëmaꞌ ninamasoꞌ ninshitaranquëmaꞌ.