Oseas 2:15 - Chayahuita (Shahui)

¹⁵ Israiroꞌsa iráca Iquipitoquë yaꞌhuëpi. Naporo tahuëriꞌsasoꞌ, ipora huarëꞌ nanontatë pochin nisapi. Ina quëran ocoiapo, inapitaso piyapinëhuëpita. Canta inapita Yosënënaco. Inapochachin aꞌna tahuërinta niantapon. Yaꞌhuëpiso noꞌpaquë chachin, oparoroꞌsa quëtaantarahuë. Acoro itopisoꞌ motopiana, anishatarahuë. Inaquë shaꞌtohuachina, paꞌpi notohuaroꞌ nitërinsoꞌ macaponaꞌ. Napohuachina: ‘Noya yaꞌhuëáparihuaꞌ,’ tëcaponaꞌ.

Oseas 2:15 ပူးပေါင်းရင်းမြစ်များ

1 Reyes 16:31

Quiropoamo iráca co noyahuëꞌ ninin. Acaposo nipirinhuëꞌ, naꞌcon naꞌcon co noyahuëꞌ ninin. Canaan sanapi Quisapira itopisoꞌ macaton, naporin. Quisapirasoꞌ paꞌpin, Iti-paaro itopi. Inaso Sitonquë copirno yaꞌconinsoꞌ. Inapitasoꞌ Paaro mamanshi moshapi niꞌton, Acaponta ina moshapatërin.

Isaías 65:21

Inaquë pëirahuatona yaꞌhuëaponaꞌ. Oparotatonaꞌ, nitërinsoꞌ caponaꞌ.

Jeremías 2:1

Naquëranchin Sinioro nontatonco:

Jeremías 2:2

“Quirosarinquë yaꞌhuëpisopita nontoonquëꞌ. Chiníquën nonaton ca Sinioroco naporahuësoꞌ shaꞌhuitëquëꞌ: ‘Iráca casáchin cancantëramaco. Niꞌquëꞌ. Nanon nasha soꞌyahuachina, soꞌin naꞌcon nosororin. Ina pochin canpitanta cancantatomaꞌ, inotëro parti imaquiramaco. Inaquëso co maꞌsha tëranta shaꞌnëhuë nipirinhuëꞌ, naporamaꞌ.

Oseas 11:1

Sinioro naporin: “Israiro nacion ipora caniaritapon, huaꞌhuishin pochin ninin. Naporo chachin cariso huiꞌnahuë pochin nicato, nosororahuë. Iquipitoquë yacapatopirinhuëꞌ, ina quëran pipicaso marëꞌ huiꞌnahuë përarahuë.

Oseas 13:4

Sinioro naporin: “Iquipitoquë yaꞌhuërama quëran huarëꞌ, casáchin Sinioroco niꞌto, Yosënëmaco. Co aꞌna ca pochin chinotamaso yaꞌhuërinhuëꞌ. Carinquëmáchin nichaꞌëranquëmaꞌ.

Oseas 2:12

Monshihuantë sanapisoꞌ, monshinpitarëꞌ poꞌninso marëꞌ maꞌsha quëtopi. Inapochachin israiroꞌsantaꞌ: ‘Mamanshi catahuarincoi niꞌton, oparoroꞌsaꞌ, iquiraroroꞌsaꞌ, inapita noya noya yaꞌhuëtërincoi,’ toconpi. Napopiso marëꞌ ina oparoroꞌsaꞌ, iquiraroroꞌsaꞌ, inapita, ataꞌhuantarahuë. Tanan maꞌsharoꞌsari pëꞌyapon. Ina noꞌparoꞌsantaꞌ, pacananoꞌsa atarantapo.

Amós 9:14

Naporoꞌ israiroꞌsa nisha nisha parti quëpapisoꞌ, isëquë chachin quëantarahuë. Ninanoroꞌsa ataꞌhuantopisopita anoyataantaponaꞌ. Inapotahuatona inaquë yaꞌhuëaponaꞌ. Oparotahuatonaꞌ, huino oꞌoponaꞌ. Nisha nisha cosharo shacatona caponaꞌ.

Zacarías 9:12

Naquëranchin Sinioro taantarin: “Naꞌaquëma nisha nisha parti quëpapirinënquëmahuëꞌ: ‘Sinioro nichaꞌësarinpoaꞌ,’ taꞌtoma ninaramaco. ¡Iporaso tahuëri nanirin niꞌton, Quirosarinquë chachin panantacoꞌ! Inasoꞌ, noyá niacorapiramaso ninanoꞌ. Nisha nisha parti paatoma naꞌcon parisitopiramahuëꞌ, naporama quëran naꞌcon naꞌcon catahuatënquëmaꞌ, noya noya acoantaponquëma huachi.

Juan 10:9

Casáchin yaꞌcoana pochin ninahuë. Ca quëran yaꞌconpatamaꞌ, chaꞌësaramaꞌ. Ohuicaroꞌsaꞌ pipirahuatonaꞌ, noya coshatopi. Ina quëran yaꞌcoantapi. Inapochachin imarinacosopita noya paꞌsapi.

Jueces 8:34

Sinioroso Yosënëna nipirinhuëꞌ, ina naniantopi. Yaꞌipi inimiconënapita quëran nichaꞌëpirinhuëꞌ, naniantopi.