Oseas 2:11 - Chayahuita (Shahui)

¹¹ Inapotohuato, co huachi noya ancantacaiso yaꞌhuëaponhuëꞌ. Co maꞌsha pita tëranta naꞌhuëcaiso yaꞌhuëaponhuëꞌ. Yoquiaꞌhuaraiꞌ pitaroꞌsaquë tëranta co huachi niyontoanpihuëꞌ. Co sahuatoquë tëranta niyontoantaponahuëꞌ.

Oseas 2:11 ပူးပေါင်းရင်းမြစ်များ

1 Reyes 12:32

Nasha pita naꞌhuëcaiso marëntaꞌ, inaora yonquinën quëran ocoirin. Ina pitasoꞌ, pascoa yoqui quëran canchisë yoqui nisahuaton shonca aꞌnatërápo tahuëritahuasoꞌ, naꞌhuëpi. Cota huënton israiroꞌsa Quirosarinquë niyontonatona pita naꞌhuëpiso pochin ninin. Quiropoamo chachintaꞌ, toroaꞌhua nonanpisoꞌ moshacaso marëꞌ Pitiriquë yápaꞌmarin. Inaquë maꞌsharoꞌsa tëparahuaton nonanpisoꞌ mosharin. Naporahuaton ina moshaton yonarin pochin nininsoꞌ aꞌpërin. Inaora nohuanton artaroroꞌsa acorinquë sacatacaiso marëntaꞌ, corto huaꞌanoꞌsa acoraꞌpiarin.

Jeremías 7:34

Cota huënton ninanoroꞌsaquë, Quirosarin cachiroꞌsaquë, inaquëpita capa cancantopisoꞌ, copi tapona huachi. Pita naꞌhuëhuachinara capa cancantopisoꞌ, saꞌapachinara cantarapipisoꞌ, inapita copi taponaꞌ. Yaꞌipi iso noꞌpaꞌ tanahuantápon,” tënin Sinioro.

Oseas 3:4

Inapochachin israiroꞌsantaꞌ, huaꞌqui co copirnohuanhuëꞌ nicaponaꞌ. Co maꞌsha huaꞌan tëranta yaꞌhuëtaponahuëꞌ. Chinotacaiso marëntaꞌ, co maꞌsha tëpaponahuëꞌ. Naꞌpiraꞌhuaroꞌsa Yosë nohuantërinsoꞌ nitotacaiso marëntaꞌ, co huachi yaꞌhuëaponhuëꞌ. Co huachi aꞌnaya tëranta corto huaꞌan yaꞌhuëaponhuëꞌ. Pëinënaquë mamanshiroꞌsa yaꞌhuëtopisopitantaꞌ, capa nisarin.

Oseas 5:7

Co Sinioroíchin cancantatonaraihuëꞌ, mamanshiroꞌsa moshapiso marëꞌ nishaquëya huaꞌhua mapiso pochin nipi. Napopiso marëꞌ aꞌna yoquiya marëáchin noꞌpanëna ataꞌhuantapi.

Amós 5:21

Naquëranchin Sinioro taantarin: “Chinotamacoso marëꞌ pita ninamasopita, co quëꞌyarahuëꞌ. Niyontonpatamara paꞌyápiro nipiramahuëꞌ, co costarincohuëꞌ.

Amós 8:3

Ina tahuëri nanihuachin, copirno noyápiachin pëinënquë cantayantopisoꞌ, copi tapon. Naꞌnëroꞌsa yaꞌhuërëꞌ, oshaatona noncarorantaponaꞌ. Notohuaroꞌ piyapi naporo chiminapon niꞌton, co huachi paꞌpitaponahuëꞌ. Onpopinquë tëranta topinan tëꞌyataponaꞌ. Co manta tëcaponaraihuëꞌ, tëꞌyataponaꞌ. Ca Sinioroco noꞌtëquën shaꞌhuitaranquëmaꞌ, tënin.

Amós 8:5

Canpitaso maꞌsha paꞌanaꞌpinquëma niꞌton: “¡Trico paꞌantacaso marëꞌ yoquiaꞌhuaraiꞌ pita, manóton naꞌhuëin! Ihuatë pëꞌtënanquë pëꞌtënatëhuaꞌ, naꞌcon naꞌcon canacaso marëꞌ ¡Sahuatontaꞌ, aꞌnaroáchin naꞌhuëin! Popriyaroꞌsa aquëtë apopriyatahuaꞌ. Inahuara chachiontaꞌ, nihuirinpoaso marëꞌ paꞌanhuaꞌ. Sapatë marëya tëranta nihuihuachinpoaꞌ, inapotahuaꞌ. Trico nitapihuachina tëꞌyatopirëhuahuëꞌ, ina tëranta paꞌantacaso yaꞌhuërin,” tënamaꞌ.