Oseas 13:14 - Chayahuita (Shahui)

¹⁴ ¡Co carima poꞌoroꞌ quëran nichaꞌësaranquëmahuëꞌ! ¡Piyapinëhuëpita nipiramahuëꞌ, co huachi nosoroaponquëmahuëꞌ! Napoaton chimirin përato: ‘Chimirin. Quëmasoꞌ ataꞌhuantonaꞌpinquën. ¿Intohuata iporasoꞌ inapoyantëransoꞌ?’ itërahuë. Poꞌoronta nontato: ‘Poꞌoroꞌ. Quëmantaꞌ naní quëran tëꞌhuachantërinën. ¿Intohuacha iporasoꞌ tëꞌhuachantërinënsoꞌ?’ itërahuë.

Oseas 13:14 ပူးပေါင်းရင်းမြစ်များ

Copo naporinso' 41:22

Cononënsoꞌ, panca masho. Naporahuaton paꞌpi chiníquën. Ina niꞌpachinara, yaꞌipiya quëran tëꞌhuatopi.

Salmos 16:10

Quëmasáchin Sinioro natëranquën niꞌton, co nohuantaranhuëꞌ nonëhuë chanatacasoꞌ. Huaꞌyanëhuëntaꞌ, co chimipiroꞌsa yaꞌhuërinquë tëꞌyataranhuëꞌ.

Jeremías 15:6

Canpitaso aꞌporahuatomaco, co huachi tahuërëtëramacohuëꞌ. Ca Sinioroco napotaranquëmaꞌ. Noya yonquiantamacoso marëꞌ ninarápiranquëmahuëꞌ, amirahuë. Napoaton anaꞌintatënquëma ataꞌhuantaranquëma huachi.

Jeremías 20:16

Aꞌnaquën ninanoroꞌsa Siniorori ataꞌhuantomiatërin. Ina ninanoroꞌsa pochin ina quëmapinta niin. Tashiramiachin maꞌsha onpoatona noncaropisoꞌ, nataꞌin. Camotëchinta ahuëtahuachinaꞌ, shaꞌhuitona noncaropisoꞌ, nataantaꞌin.

Jeremías 31:35

Siniorosoꞌ, yaꞌipi nanitaparin. Ina nohuanton piꞌisoꞌ, tahuëri aꞌpinin. Yoqui, tayora, inapitaso tashi aꞌpinin. Ina nohuanton marënta coꞌsacaitohuachina, tënëntërin. Ina Sinioro chachin naporin:

Ezequiel 37:9

Naporoꞌ Siniorosoꞌ nontaantatonco: “Carinquën nanan quëtaranquën niꞌton, niinëhuë përáquëꞌ: ‘Catapini parti quëran chachin huëꞌsahuaton isopita chimipiroꞌsa ananpiquëꞌ,’ itëquëꞌ,” itaantarinco.

Malaquías 3:6

Naquëranchin Sinioro israiroꞌsanquëma nontatënquëmaꞌ: “Caso Sinioroco niꞌto, co nishatërahuëꞌ. Napoaton canpitaso Cacopo quëran pipiramasopita, co ataꞌhuantëranquëmahuëꞌ.

Números 23:19

Yosëso co canpoa pochinhuëꞌ. Co nisha nisha nonaton nonpininhuëꞌ. Maꞌsona topachina, inachachin nisarin. Catahuatacaso shaꞌhuihuachina, catahuatërin.

Romanos 11:15

Iporaso Yosëri tananpitërin niꞌton, nisha nisha piyapiꞌsaꞌ ina nohuitapi. Aꞌna tahuëriso nipirinhuëꞌ israiroꞌsantaꞌ imaantahuachinaꞌ, noya noya nisapi. ¿Ma pochintaꞌ nisapi? Chimipi nanpiantarinso pochin nisapi, tënahuë.

Romanos 11:29

Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ.

2 Corintios 5:4

Iporasoꞌ isoroꞌpaquë yaꞌhuatëhuaꞌ, co chinirëhuahuëꞌ, sëtërëhuaꞌ, naporëhuaꞌ. Napopirëhuahuëꞌ, co chiminacasoꞌ nohuantërëhuahuëꞌ. Nasha nonënpoaꞌ tëhuënchinsoꞌ naꞌcon nohuantërëhuaꞌ. Isoroꞌpaquë taꞌhuantopirëhuahuëꞌ, Yosëꞌpaꞌ noya noya nanpimiatarihuaꞌ.

Filipenses 3:21

Iporasoꞌ nonënpoaꞌ co chinirinhuëꞌ. Yacaniorëhuaꞌ. Chiminacasoꞌ yaꞌhuërin. Nipirinhuëꞌ, Quisocristo oꞌmantahuachin, nonënpoaꞌ anishatarin. Ina pochachin yaꞌnoarihuaꞌ. Nanitaparin niꞌton, yaꞌipi minsërahuaton, ananpitomiatarinpoaꞌ, noya noya acoarinpoaꞌ.

1 Tesalonicenses 4:14

Quisososoꞌ chiminaponahuëꞌ, nanpiantarinsoꞌ nitotërëhuaꞌ. Inapochachin imapisopita chiminpachinaꞌ, Yosëri ananpitaantarin. Quisoso isoroꞌpaquë oꞌmantahuachin, ananpitaantarin.

Santiago 1:17

Yosësoꞌ noyasáchin yonquirinpoaꞌ. Noya noya cancantacaso marëꞌ catahuarinpoaꞌ. Inasáchin noya aꞌpintërinpoaꞌ noꞌtëquën yonquicaso marëꞌ. Piꞌi, yoqui, tayora, inapita inari acopirinhuëꞌ, co yaꞌipi tahuëri noya aꞌpininhuëꞌ. Aꞌna tashintaꞌ co mantaꞌ aꞌpininhuëꞌ. Yosëso nipirinhuëꞌ co ina pochin nininhuëꞌ. Nani tahuëriya nosoroatonpoaꞌ, catahuarinpoaꞌ.

Apocalipsis 20:13

Yaꞌipi piyapiꞌsaꞌ Yosëri nontarin. Paꞌitatonaꞌ, marëquë chimiitopi quëran huarëꞌ ananpitaantarin noꞌtëquën anaꞌintacaso marëꞌ. Insëquëso tërantaꞌ chiminpisopita yaꞌipiya yaꞌnorapi. Aꞌnaya aꞌnayanpoaꞌ nontarinpoaꞌ. Co noyahuëꞌ nipatëhuaꞌ, noꞌtëquën anaꞌintarinpoaꞌ.

Apocalipsis 21:4

Yosëri chachin naꞌnëiꞌ amirayatarin. Co huachi chiminaponahuëꞌ. Co huachi sëtaponahuëꞌ. Co huachi naꞌnëponahuëꞌ. Co piꞌpisha tërantaꞌ iquitaponahuëꞌ. Iráca naꞌcon parisitopirinahuëꞌ, co huachi ina pochin yaꞌhuaponahuëꞌ. Noya noya yaꞌhuaponaꞌ, tënin.

Apocalipsis 6:8

—¡Huëquë huachi! itohuachina, aꞌna cahuariontaꞌ yaꞌnoantarin, shaꞌpíchin nininsoꞌ. Quëmapi ina aipi huënsërinsoꞌ, Chimirin itopi. Ina nohuanton, naꞌa piyapiꞌsaꞌ chiminapi. Notohuaroꞌ chiminatonaꞌ, chimipiroꞌsaꞌ yaꞌhuëpiquë paꞌsapi. Aꞌnaquën niahuëatonaꞌ, nitëparapi. Aꞌnaquën tanari tëpaarin. Naporahuaton, chiníquën caniori masarin niꞌton, naꞌa piyapiꞌsaꞌ chiminapi. Tanan niꞌniroꞌsarintaꞌ tëparapi. Inapoatonaꞌ, patoma patoma pochin piyapiꞌsaꞌ chiminapi. Cacharonquë un cuarto itopi.

1 Samuel 15:29

Yosëso noya noya niꞌton, israiroꞌsanpoa chinotërëhuaꞌ. Co inaso nonpininhuëꞌ. Maꞌsona nicacaso yonquirinsoꞌ, noꞌtëquën nisarin. Inaso co piyapihuë niꞌton, co nisha nisha yonquirinhuëꞌ, itërin.