Números 27:18 - Chayahuita (Shahui)

¹⁸ —Non huiꞌnin Cosoi itëramasoꞌ, nani huayonato ispiritonëhuë ayaꞌcoancantërahuë. Ina sëꞌhuamotorahuaton, israiroꞌsa catahuacaso marëꞌ acoquëꞌ.

Números 27:18 ပူးပေါင်းရင်းမြစ်များ

Génesis 41:38

Napoaton huaraonsoꞌ piyapinënpita itapon: —Iso quëmapisoꞌ, Yosë ispiritonëni chachin yaꞌcoancantërin. Co onporonta aꞌna quëmapi iso pochin nininsoꞌ ina sacato nicacaso marëꞌ quënanarihuahuëꞌ, tënin.

Éxodo 17:9

Naporoꞌ Moisësësoꞌ, piyapinën Cosoi itopisoꞌ camairin: —Amaricoroꞌsa ahuëamaso marëꞌ israiroꞌsa huayonahuaton quëpaquëꞌ. Caso nipirinhuëꞌ, motopiquë pantato Yosë huaranën quëpaarahuë, itërin.

Daniel 5:14

Quëma yonquiatënën: “Inasoꞌ, noya yosëroꞌsa ispiritonëni yaꞌcoancantërin. Yonquinën quëraonta yonqui yonquíchararin,” itërinaco.

Números 11:17

Inaquë oꞌmarahuato nontaranquën. Naporoꞌ inapita ayaꞌcoancatacaso marëꞌ, napoinchin ispirito quëtëranquënsoꞌ mataranquën. Inapitanta quëma pochin cancantatonaꞌ, israiroꞌsa quëpacaisoꞌ catahuapënën.

Juan 3:34

Quisososoꞌ Yosë nanamën chachin nonin. Ispirito Santori noyá yaꞌcoancantërin niꞌton, noꞌtëquënáchin nonin.

Hechos 13:3

Napoaton co coshatatonaraihuëꞌ, inapita marëꞌ chiníquën Yosë nontopi. Nani Yosë nontohuachinara, sëꞌhuamotorahuatonaꞌ, acopi paatonaꞌ aꞌchinacaiso marëꞌ. Ina quëran aꞌpapi.

Hechos 19:6

Ina quëran Paonori sëꞌhuamotohuachina, Ispirito Santori yaꞌcoancantimarin. Ina nohuanton, nisha nisha nananquë nonpi. Co nitotopirinahuëꞌ, aꞌnaroáchin nonpi antaꞌ. Naporahuaton, Ispirito Santori catahuarin Yosëri anitotërinso shaꞌhuicaiso marëꞌ.

Hechos 6:3

Napoaton iyaroꞌsaꞌ, canchisë yaꞌpi huayoncoꞌ catahuaꞌinacoiso marëꞌ. Ispirito Santori noyá yaꞌcoancantërinsoꞌ huayoncoꞌ, noya yonquipisoꞌ. Noya quëmapisáchin acoaꞌahuaꞌ cosharoꞌ yocacaiso marëꞌ.

Hechos 6:6

Inapita huayonahuatonaꞌ, caꞌtanoꞌsaquë quëpi. Yosë nontahuatonaꞌ, sëꞌhuamotopi acocaiso marëꞌ. Inapotatonaꞌ, acopi huachi.

Deuteronomio 31:14

Ina quëran Siniorori, Moisësë itapon: “Niꞌquëꞌ, nani ora naniarin chiminamaso huachi. Napoaton Cosoi amatahuaton, catonquëma chachin chinotëramacoso nëꞌmëtë pëiquë pacoꞌ. Inaquë camaiarahuë maꞌsona Cosoi nicacasoꞌ,” itërin Yosëri. Napotohuachina cato chachin inaquë paꞌpi.

Deuteronomio 31:23

Ina quëran Yosësoꞌ, Cosoi yaꞌhuërëꞌ tahuërëtahuaton itapon: “Ama tëꞌhuatonahuëꞌ, chiníquën cancantëquëꞌ. Israiroꞌsa noꞌpaꞌ quëtaꞌhuasoꞌ nani shaꞌhuitërahuë. Nani quëma huayonanquën israiroꞌsa ina noꞌpaquë poꞌmoamasoꞌ. Carinquën catahuaranquën inapotaran,” itërin.

Deuteronomio 31:3

Napoaponahuëꞌ, Sinioronënpoaso Yosë niꞌton, quëchitahuaton quëpaarinquëmaꞌ. Paꞌnamaquë nacionoꞌsa quënanamasoꞌ, inari ataꞌhuantëraꞌpiapon. Canpitari noꞌpanëna macacamaso marëꞌ inapotapon. Siniorori nani huayonin niꞌton, piyapinëhuë Cosoi itërëhuasoꞌ, huaꞌanëma nisarin.

Deuteronomio 34:9

Moisësë coꞌhuara chiminyátëraponhuëꞌ, Cosoi marëꞌ Yosë nontërin. Sëꞌhuamotorahuaton huaꞌan acocaso marëꞌ, nontërin. Napoaton Siniorori catahuarin noya yonquiaton, israiroꞌsa camaicasoꞌ. Camaitohuachina, yaꞌipi israiroꞌsari natëpi. Siniorori Moisësë shaꞌhuitërinso chachin nipi.

1 Timoteo 4:14

Iráca ansianoꞌsaꞌ niyontonahuatonaꞌ, acorinënquën Yosë nanamën aꞌchinamaso marëꞌ. Sëꞌhuamotorahuatënënquën, nanan quëtërinënquën aꞌchinamaso marëꞌ. Ina quëran Yosë catahuarinquën nóya aꞌchinamasoꞌ. Ama ina naniantaton, topinan yaꞌhuëquësohuëꞌ.

1 Timoteo 5:22

Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.

Hebreos 6:2

Ina quëran aporihuanacasontaꞌ aꞌchintërainquëmaꞌ. Naporahuaton, “Nani imapachinaꞌ, sëꞌhuamotorahuatomaꞌ, Yosë nontocoꞌ inari catahuacaso marëꞌ,” itërainquëmaꞌ. Ina quëran Yosë ananpitaantainpoaso yaꞌhuërinsontaꞌ aꞌchintërainquëmaꞌ. “Ayaroꞌ tahuëri yaꞌipinpoaꞌ noꞌtëquën shaꞌhuitarinpoaꞌ. Co noyahuëꞌ nipisopita anaꞌintomiatarin,” itërainquëmaꞌ. Yaꞌnan imapomaꞌ, inapitaꞌton anitotërainquëmaꞌ. Inasoꞌ noya nipirinhuëꞌ, co inaíchin yonquicasoꞌ yaꞌhuërinhuëꞌ.

Josué 1:17

Moisësë camaihuachincoira natërai. Inapochachin quëmanta natëarainquën. Isoíchin nohuantëraisoꞌ shaꞌhuichinquën: Sinioroso Yosënënpoa niꞌton, Moisësë caꞌtanaton catahuarin. Inapochachin quëmanta caꞌtanatënquën catahuainquën.

1 Samuel 16:18

Napotohuachina aꞌnara piyapinëni itapon: —Quisi Pirinquë yaꞌhuërinsoꞌ, aꞌnara huiꞌnin arpa noya piꞌnirin. Inasoꞌ, chiníquën cancantaton míso ahuëtërin. Noya yonquiaton nonin. Noyapin noyapin niꞌtërin. Siniorori naꞌcon catahuarin. Naporin. Inasoꞌ nininën Tapi, itërin.