Números 23:20 - Chayahuita (Shahui)

²⁰ Nani Yosë camairinco israiroꞌsa noya yaꞌhuëcaiso marëꞌ shaꞌhuitaꞌhuasoꞌ. Yosëri chachionta nani inapita noya yaꞌhuëcaiso marëꞌ shaꞌhuitërin. Napoaton co nanitërahuëꞌ naponin yaꞌhuëcaiso marëꞌ shaꞌhuitaꞌhuasoꞌ.

Números 23:20 ပူးပေါင်းရင်းမြစ်များ

Génesis 12:2

Aꞌna tahuëri ca nohuanto, shiparinpita panca nacion ocoiaponaꞌ. Carinquën catahuamiataranquën. Inapotaranquën niꞌton, sacóshin nahuinaran. Naporahuaton, quëmá quëran aꞌnapitanta catahuararahuë.

Génesis 22:17

Noya nicatënquën catahuamiataranquën. Ca nohuanto shiparinpita, tayoraroꞌsa nápo naꞌaponaꞌ. Marë yonsanquë inotëraꞌhuaya nápo, naꞌamiataponaꞌ. Naporahuaton, inapitaso inimiconëna minsëraꞌpiaponaꞌ.

Génesis 27:33

Huiꞌnin natanahuaton, Isaco paꞌpi paꞌyantërin. Paꞌyanaton ropa ropátarin quëran itapon: —¿Inta nipachin apípora inantërinso poꞌmorahuaton, quëshirinco? Co quëma canquiyátërasënquënhuë quëshirinco niꞌton, nani yaꞌipi caꞌnahuë: “Isao mini,” taꞌto, nani noya yaꞌhuëcaso marëꞌ shaꞌhuitërahuë. Ipora inasoꞌ, noya noya yaꞌhuapon huachi, itërin.

Isaías 43:13

Coꞌhuara tahuëri yaꞌhuëyátëraponhuëꞌ, caso Yosëco yaꞌhuërahuë. Insosona anaꞌintaꞌhuasoꞌ yonquihuato, co insoari tëranta nichaꞌësarinhuëꞌ. Maꞌsona nisahuato co insonta yaꞌcopiarincohuëꞌ,” tënin.

Números 22:12

—Ama inapitarëꞌquën paquësohuëꞌ. Naporahuaton co ina piyapiroꞌsa inapotamaso yaꞌhuërinhuëꞌ. Inapitasoꞌ cari chachin noya yaꞌhuëcaiso marëꞌ nani shaꞌhuitërahuë, itërin Yosëri.

Números 22:18

Itopirinahuë Paramorisoꞌ itapon: —Caso co caora yonquinëhuë quëran maꞌsha nicaꞌhuasoꞌ nanitërahuëꞌ. Pancahuë nipon, naniahuë nipon maꞌsha nipatora, Yosë nohuantërinsoráchin nisarahuë. Pëinën mëntasha oro, prata, inapita Paraco quëtopirincohuë tërantaꞌ, Yosë nohuantërinsoráchin nisarahuë.

Números 22:38

—Maꞌtana nani canquirahuë. Napoaponahuëꞌ, co maꞌsha tëranta caora yonquinëhuë quëran, nonaꞌhuaso yaꞌhuërinhuëꞌ. Yosë shaꞌhuitërincosoráchin shaꞌhuipo casoꞌ.

Números 6:27

Ina pochin corto huaꞌanoꞌsari, onpopinsona ninahuëso israiroꞌsa shaꞌhuitaponaꞌ. Inapohuachina carintaꞌ, inapita nosoroato catahuamiatarahuë,” itërin.

1 Pedro 1:5

Tata Yosë yaꞌipiya nanitaparin. “Yosë co quënanpirëhuahuëꞌ, catahuarinpoaꞌ,” topatëhuaꞌ, noya aꞌpaiarinpoaꞌ. Maꞌsha onpohuatëhuaꞌ, catahuarinpoaꞌ ahuantacasoꞌ. Ayaroꞌ tahuëri nóya nichaꞌësarinpoaꞌ. Nani yonquirin oꞌmantacasoꞌ. Aꞌna tahuëri niꞌsarëhuaꞌ. Oꞌmantaquë huarëꞌ aꞌpaiarinpoaꞌ.