Números 14:33 - Chayahuita (Shahui)

³³ Isëquë chachin huiꞌnamapitantaꞌ, ohuicanëna aꞌpaitona yaꞌhuaponaꞌ. Catapini shonca piꞌipi napoaponaꞌ. Canpita co natëramacohuëꞌ niꞌton, huiꞌnamapitanta ina pochin parisitapi. Yaꞌipi mashonquëma ninamasopita isëquë chachin taquiama huarëꞌ inapoaponaꞌ.

Números 14:33 ပူးပေါင်းရင်းမြစ်များ

Salmos 107:4

Aꞌnaquënsoꞌ, inotëro parti chihuëatonaꞌ, paꞌsápirinahuëꞌ, co aꞌna ninano tëranta yaꞌhuëcaiso marëꞌ quënanpihuëꞌ.

Salmos 107:40

Yosëriso napoaponahuëꞌ, inapita anaꞌintaton, inotëroroꞌsaquë achihuërin.

Éxodo 20:5

Ama monshorahuatoma inapita moshacosohuëꞌ. Ama piꞌpian tëranta chinotocosohuëꞌ. Casáchin Sinioroco niꞌto, aꞌpitëranquëmaꞌ. Co natëhuatamacohuëꞌ, anaꞌintaranquëma huachi. Huiꞌnamapita, shiparimapita, huiꞌnama shinpitaquë huarëꞌ anaꞌintarahuë.

Hechos 7:36

Ina quëran Iquipitoquë paantarahuaton, nani maꞌsha Yosë pochin ninin, sacaiꞌ nininsopita. Inapoaton, Iquipito quëran ocoirahuaton, nichaꞌërin. Inapochachin Quëhuai marëquë, inotëro parti inaquëpita Yosë pochin ninin. Catapini shonca piꞌipi inaporin.

Deuteronomio 1:3

Israiroꞌsa Iquipito quëran pipipisoꞌ nani cara shonca iscon piꞌi nisapi. Ina nisahuaton, shonca yoqui aꞌna tahuëriraꞌ naniso chachin Moisësëri israiroꞌsa shaꞌhuitaantarin. Yaꞌipi Sinioro pënëntërinsoꞌ shaꞌhuitaantarin.

Deuteronomio 8:2

Catapini shonca piꞌi inotëro parti paꞌtasëmaꞌ, Sinioro nohuanton nisha nisha maꞌsha onporamaꞌ. Inapotatënquëmaꞌ, natëtochináchin cancantamaso marëꞌ napotërinquëmaꞌ. Onpopinsona cancantëramasoꞌ, nitotacaso marëꞌ tënirinquëmaꞌ. Naporahuaton: ‘¿Tëhuënchachin taꞌma natërëꞌponaco to?’ taꞌton napotërinquëmaꞌ. Inaso nipirinhuëꞌ, co patërinquëmahuëꞌ. Ama ina naniantocosohuëꞌ.

Deuteronomio 8:4

Catapini shonca piꞌipi paꞌsápomarahuëꞌ, co aꞌmoramaso mocarinhuëꞌ. Co nantëma tëranta pomatërinhuëꞌ.