Nehemías 9:32 - Chayahuita (Shahui)

³² Quëmaso Yosënëhuëinquën. Chini chiníquën nanantaton paꞌpi huëhuëpiro nininsopita ninan. Nosororancoisoꞌ co nishatërinhuëꞌ. Quiyarëꞌquën anoyatëransontaꞌ, inachachin nisárin. Napoaton parisitëraisoꞌ noꞌtëquën tantiaquëꞌ. Copirnonëhuëipita, huaꞌanoꞌsaꞌ, corto huaꞌanoꞌsaꞌ, pënëntonaꞌpiroꞌsaꞌ, shimashonëhuëipita, yaꞌipicoi nani nohuantaso parisitërai. Asiria copirnoroꞌsa quëran huarëꞌ aparisitërinacoisoꞌ, ipora huanta inapoarai.

Nehemías 9:32 ပူးပေါင်းရင်းမြစ်များ

2 Reyes 23:29

Cosiasë huaꞌanëntaso chachin Iquipito copirno Nicao itopisoꞌ huëꞌnin. Sontaronënpitarë chachin huëꞌsahuatonaꞌ, Iopiratisiiꞌpaꞌ chinotona paꞌsapi. Asiria copirno catahuacaso marëꞌ paꞌsapirinhuëꞌ, Cosiasëri sontaronënpitarë chachin Miquitoquë nacapirin. Nacapipirinhuëꞌ, Nicaori ipora quënanaso chachin tëparin.

2 Reyes 25:7

Niꞌtonënquë chachin huiꞌninpita tëparaꞌpiapi. Yaꞌhuërëꞌ inaso ocoshorayarahuatonaꞌ, Papironiaꞌpaꞌ catinaquëtopinan quëpapi. Copirno camaitërinso chachin nipi.

Nehemías 1:5

“Quëmasoꞌ Sinioro Yosënquën. Inápaquë yaꞌhuëaton chini chiníquën nanantëran. Paꞌpi huëhuëpiro nininsopita ninan. Nosororinquënsopitarëꞌquën anoyatohuatana, noꞌtëquënáchin catahuaran. Camaitëransopitanta natëhuachinën inapotëran.

Salmos 47:2

Siniorosoꞌ chini chiníquën nanantaton, paꞌpi tëꞌhuatoro yaꞌnorin. Yaꞌipi isoroꞌpaꞌ huaꞌanëntaton noya noya copirno yaꞌconin.

Salmos 66:3

“Nani maꞌsha acoransopitasoꞌ, paꞌyápiro ninan. Chini chiníquën nanantëran niꞌton, inimiconënpita tëꞌhuatatënën, anotatonaꞌ: ‘Tomonca,’ tëcaponaꞌ.

Salmos 66:5

Sinioro catahuainpoaso marëꞌ naporinsopita, yonquicoꞌ. Canpoa marëꞌ paꞌyapiro nininsopita acorin:

Isaías 9:6

Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

Daniel 9:4

Nontohuatora: “Quëmasoꞌ Sinioro chini chiníquën nanantaton, yaꞌipi nanitaparan. Maꞌsona shaꞌhuitohuatancoi, noꞌtëquën nonan. Nosoroatënën camaitëransopita natëhuachinën, quëmarinta nosororansoꞌ aꞌnotëran.

Daniel 9:6

Pënëntonaꞌpiroꞌsasoꞌ piyapinënpita nipirinahuëꞌ, co natëraihuëꞌ. Inapitasoꞌ quëmari nanan quëtëran niꞌton, copirnonëhuëipita pënënpi. Huaꞌanoꞌsanëhuëipita, shimashonëhuëipita, yaꞌipi israiroꞌsaꞌ, inapita pënënpi.

Daniel 9:8

Copirnonëhuëipita, huaꞌanoꞌsanëhuëipita, shimashonëhuëipita, inapita pochachin quiyantaꞌ, tapanai. Co natëtëinquënhuëꞌ oshahuanaiso marëꞌ naporai.

Deuteronomio 7:12

Naquëranchin Moisësëri israiroꞌsa nontaantarin: “Iporasoꞌ nani Sinioro camaitërinsopita shaꞌhuitëranquëmaꞌ. Ina natëtomaꞌ, ina inachachin nicoꞌ. Inapohuatamaꞌ, Sinioronënpoa canpoarëꞌ anoyatërinso yonquiarin. Ina yonquiaton noya catahuarinpoaꞌ. Nani shimashonënpoapita shaꞌhuitërin niꞌton, catahuaarinpoaꞌ.

Deuteronomio 7:13

Nosoroatënquëma catahuaarinquëma niꞌton, ina nohuanton naꞌa huiꞌnama yaꞌhuëtarinquëmaꞌ. Huiꞌnamapitantaꞌ, inapochachin catahuamiatarin. Trico, sipata, inapita shaꞌnamasontaꞌ, noya noyatarin. Ina nohuanton huinonta oꞌocamasoꞌ, tomanta capamasoꞌ, co pahuantarinquëmahuëꞌ. Ina nohuanton ohuacanëmantaꞌ, ohuicanëmanta naꞌasarin. Shimashonënpoapita shaꞌhuitaton: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Ina niꞌton quëtarinquëmaꞌ. Inaquë yaꞌcontapamaꞌ, inapotarinquëmaꞌ.

Deuteronomio 7:21

Napoaton ama tëꞌhuatatoma ropatocosohuëꞌ. Sinioronënpoasoꞌ Yosë niꞌton, chini chiníquën nanantërin. Naporahuaton paꞌpi tëꞌhuatoroꞌ. Ina chachin canpitasoꞌ catahuaarinquëmaꞌ.

Deuteronomio 7:9

Naporinso marëꞌ: ‘Sinioroíchin Yosësoꞌ. Shimashonënpoapitarëꞌ anoyatërinsoꞌ, co onporonta naniantarinhuëꞌ. Ina nosoroatëhua camaitërinsopita natëhuatëhuaꞌ, co naniantarinpoahuëꞌ canpoantaꞌ,’ tocoꞌ.