Nehemías 9:30 - Chayahuita (Shahui)

³⁰ Napopirinahuëꞌ, naꞌcon piꞌipi ahuantaton niꞌsáran. Quëma ispiritonën quëran pënëntonaꞌpiroꞌsa ayonquiran. Inapitari pënënpirinhuëꞌ, co natëpihuëꞌ. Napoaton nisha nisha nacionoꞌsaquë quëpapi. Inapitari huaꞌanëntatona camaipi.

Nehemías 9:30 ပူးပေါင်းရင်းမြစ်များ

2 Reyes 18:11

Asiria copirnori israiroꞌsa canarahuaton, yaꞌhuërinso roꞌtëquë quëparin. Ara parti, Aporo parti, inapita parti acorin. Inapitasoꞌ, Cosaniiquë yaꞌhuërin. Naporahuaton Mitia piyapiroꞌsa ninanonënaquëntaꞌ, acorin.

Nehemías 9:20

Quëma Ispiritonëni nosoroaton aꞌchintërarin. Mananta co osërëtëranhuëꞌ. Yamorohuachinaranta iꞌsha quëtëran.

Nehemías 9:26

Quëmarisoꞌ nosoropiranhuëꞌ, co natëtënënhuëꞌ anoꞌhuitërinën. Pënëntëransopita nocanatona aꞌpopi. Quëma marëꞌ pënëntopisopitanta tëpapi. Inapitari co noyahuëꞌ nipiso aꞌninquëchin shaꞌhuitopi: ‘Ina aꞌporahuatomaꞌ, Sinioroíchin tahuërëtocoꞌ,’ itopi. Napotopirinahuëꞌ, tëpapi. Inapoatona panca tëhuëtërinën.

Nehemías 9:29

Quëma pënëntëransopitaráchin natëantatonaꞌ, yaꞌhuëcaiso pënënan. Pënënpiranhuëꞌ: ‘Noya quiyaora yaꞌhuëapoi,’ tënëso pochin cancantatona co natëtopihuëꞌ. Camaitëransopita, shaꞌhuitëransopita, inapita natëhuachina ananpitomiatacaso nipirinhuëꞌ, co natëtochináchinhuëꞌ cancantopi.

Isaías 42:24

Canpitaso Cacopo shinpitanquëmaꞌ, nani noyá nitotërama insosona nohuanton huëcapairahuatënënquëma minsërinënquëmasoꞌ. Inapotahuatënënquëma quiquirinënquëmasontaꞌ, ¡nani nitotëramaꞌ! ¡Sinioro mini nohuanton napotërinënquëmaꞌ! Co ina natëtomahuëꞌ oshahuanama niꞌton, napotërinquëmaꞌ. Onpopinsona nanpicasoꞌ nani pënënpirinquëmahuëꞌ, co ina pochin ninamaso marëhuëꞌ napotërinquëmaꞌ.

Isaías 63:10

Israiroꞌsaso napoaponahuëꞌ, co Sinioro yanatëpihuëꞌ. Inasoꞌ noyasáchin nipirinhuëꞌ, noꞌhuipi. Napotopiso marëꞌ inimiconënpita pochin nicaton, ahuërin.

Jeremías 7:25

Shimashonëmapita Iquipito quëran ocoirahuë. Naporo quëran huarëꞌ pënëntonaꞌpiroꞌsa aꞌpatëranquëmaꞌ. Inapitasoꞌ natëtonaco naquëranchin naquëranchin pënëninquëmaꞌ.

Daniel 9:6

Pënëntonaꞌpiroꞌsasoꞌ piyapinënpita nipirinahuëꞌ, co natëraihuëꞌ. Inapitasoꞌ quëmari nanan quëtëran niꞌton, copirnonëhuëipita pënënpi. Huaꞌanoꞌsanëhuëipita, shimashonëhuëipita, yaꞌipi israiroꞌsaꞌ, inapita pënënpi.

Números 11:26

Cato yaꞌpinta Moisësëri huayonpirinhuëꞌ, co chinotopiso pëiquë paꞌpihuëꞌ. Inapitasoꞌ, Iritato, Mitato, inapita itopi. Inapitanta ispiritori yaꞌcoancantërin niꞌton, yaꞌhuëpiquëranchin caniaritopi Yosë yonquirinsoꞌ shaꞌhuicaisoꞌ.

Hechos 13:18

Catapini shonca piꞌipi inotëro parti paꞌpachinara, Yosëri nosoroaton, co ataꞌhuantërinhuëꞌ. Co yanatëpirinahuëꞌ, naꞌcon catahuarin.

Hechos 28:25

Nisha nisha yonquiatonaꞌ, yapipipi. Yapipihuachinara, Paonori itaantarin: —Ma noꞌtëquën iyaroꞌsaꞌ Ispirito Santori nontërin shimashonënpoaꞌ pënënacaso marëꞌ. Ina nohuanton, Isaiasë ninshitaton, naporin:

Hechos 7:51

Canpitaso nipirinhuëꞌ co piꞌpisha tërantaꞌ yanatëtëramahuëꞌ. Co natantochináchinhuëꞌ cancantëramaꞌ. Co onporontaꞌ Ispirito Santo yanatëramahuëꞌ. Iráca shimashonëmapita co noyahuëꞌ cancantopi. Inapita quëpatomaꞌ, inapochachin cancantëramaꞌ.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

1 Pedro 1:11

Ispirito Santo nohuanton, iráca Cristo ninopi. “Parisitapon. Ina quëran nanpiantarahuaton, noya noya yaꞌhuapon,” topi ninotonaꞌ. Napoatonaꞌ, yonquiapi. “¿Ma quëmapitaꞌ oꞌmaton, parisitapon? ¿Onporotaꞌ parisitaponsoꞌ?” topi.

2 Pedro 1:21

Iráca co inahuara nohuanton, ninshitopihuëꞌ. Yosëri acorin nanamën anitotinpoaso marëꞌ. Ispirito Santo nohuanton, Yosë yonquirinso chachin ninshitopi.

2 Pedro 3:9

Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.