Nehemías 8:9 - Chayahuita (Shahui)

⁹ Ina natanatonaꞌ, niyontonpisopitaso naꞌnëpi. Napoaton Niimiasë, Istrasë, maꞌsona tapon naporinsopita shaꞌhuinaꞌpiroꞌsaꞌ, inapitari piyapiꞌsa achinicancanpi. Ama aquëtë sëtatona naꞌnëcaiso marëhuëꞌ, achinicancanpi. Naporahuaton ina tahuërisoꞌ, Sinioro marëꞌ acopiso tahuëri niꞌton, co naꞌnërápaiso marëhuëꞌ napotopi.

Nehemías 8:9 ပူးပေါင်းရင်းမြစ်များ

2 Reyes 22:11

Iráca pënëntërinso quirica natanahuaton, copirnoso aꞌmorinso osharin. Sëtërinso nitotacaiso marëꞌ naporin.

Esdras 7:11

Artaquirquisë copirnori quirica ninshitahuaton, quëtërin. Istrasësoꞌ corto huaꞌan. Naporahuaton Yosë camaitërinsopita, pënëntërinsopita, inapita noyá nitotahuaton, israiroꞌsa aꞌchintërin. Iso pochin ninshitahuaton quëtërin:

Eclesiastés 3:4

Naꞌnëcaso tahuëri. Huinacaso tahuëri. Sëtacaso tahuëri. Pita nicacaso tahuëri.

Isaías 61:3

Quirosarinquë yaꞌhuëpisopita canapi niꞌton sëtápirinahuëꞌ, inahua yaꞌhuërëꞌ canatohuachinaꞌ, yancotë yancopiso pochin acoarahuë. Naꞌnërápirinahuëꞌ, noya acancantaantarahuë. Co napion ancantápirinahuëꞌ, catahuarahuë niꞌton, Sinioro chinotatona cantaponaꞌ. Nisha nisha piyapiꞌsari: ‘Ma noyacha Siniorosoꞌ nanitapaton, piyapinënpita shacatë pochin nitërin. Noyanpinanyanchin nopri nararoꞌsa pochin acorin,’ taꞌcaiso marëꞌ ina pochin catahuapo.

Oseas 4:6

Co nohuitërinacohuëꞌ niꞌton, piyapinëhuëpita ataꞌhuantarahuë. Canpita corto huaꞌanoꞌsanquëma tëhuërama niꞌton, napotarahuë. Canpita chachinta co nohuitëramacohuëꞌ. Naporahuaton co nohuantëramahuëꞌ nohuitamacosoꞌ. Napoaton cantaꞌ, co corto huaꞌanoꞌsa pochin niꞌnanquëmahuëꞌ. Pënëntërahuësonta naniantërama niꞌquëhuarëꞌ, canta canpita quëran pipipisopita catahuacaꞌhuasoꞌ, naniantarahuë.

Levítico 23:24

“Isontaꞌ camaitërahuësoꞌ, israiroꞌsa shaꞌhuitëquëꞌ: Pascoa yoqui naꞌhuërin quëran huarëꞌ, saota yoqui pichisaramaꞌ. Canchisë nanicaso marëꞌ caniaritërinso tahuëri chachin chinotaramaꞌ. Nani piꞌiquë naporo tahuëri yonquiamacoso marëꞌ niyontoanamaꞌ. Tronpitaroꞌsa pihuitoma niyontoanamaꞌ.

Romanos 3:20

“Pënëntërinsoꞌ natëhuatëhuaꞌ, Yosë noya niꞌsarinpoaꞌ,” topirinahuëꞌ aꞌnaquën. Co ina marëꞌ noya niꞌninpoahuëꞌ. Pënëntërin quëran oshahuanëhuasoꞌ anitotërinpoaꞌ. Ina natanpatëhuara, “Tëhuënchachin oshahuanëhuaꞌ. Co noyahuëꞌ ninëhuaꞌ,” tënëhuaꞌ.

Romanos 7:9

Coꞌhuara pënëntërinsoꞌ natayantërasocohuëꞌ, “Casoꞌ noya piyapico,” topirahuëꞌ. Pënëntërinsoꞌ natanpatëra, “Tëhuënchachin oshahuanco. Chiminpato, Yosë anaꞌintarinco,” tënahuë.

Deuteronomio 12:12

Naporo tahuëriꞌsaꞌ, Sinioro marëꞌ pita nisaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Inapitasoꞌ co canpita pochin noꞌpaꞌ mapihuëꞌ niꞌton, ichicapacancancoꞌ.

Deuteronomio 12:7

Inaquë Sinioro yonquiatomaꞌ: Saꞌamaꞌ, huiꞌnamaꞌ, quëmopiroꞌsaꞌ, inapita coshataramaꞌ. Sacatëramaquë, pëꞌtahuatëramaquë, inaquëpita Yosë catahuamiatërinquëmaꞌ. Ina yonquiatoma capa cancantaramaꞌ.

Deuteronomio 26:14

Ina acorahuësoꞌ, co manta sëꞌhuarahuëꞌ. Co nichimiyantëraiquë tëranta capaꞌhuaso nohuantërahuëꞌ. Co oshanëhuëroꞌco nisahuasoco tëranta ina caꞌnahuëꞌ. Co chimipiroꞌsa marëꞌ tëranta ina acorahuëꞌ. Diesmo acocaso camaitëransoꞌ, yaꞌipi Sinioro natëranquën.

Santiago 4:9

Oshanëmaꞌ yonquiatomaꞌ, sëtocoꞌ. Ina yonquiatomaꞌ, ama huachi capa cancantamasoachin yonquicosohuëꞌ. Ama narinamasoachin yonquicosohuëꞌ. Yaꞌipi cancanëma quëran oshanëma marëꞌ sëtatomaꞌ, naꞌnëcoꞌ.