Nehemías 2:19 - Chayahuita (Shahui)

¹⁹ Sanparato, Topiasë, inapitaso napoaponahuë nocanatonacoi, tëhuarinacoi: —¿Maꞌcha canpitanta inaquë yaniantarama nicaya? ¡Copirno ipora noꞌhuitomaꞌ, co huachi yanatëantaramahuëꞌ! itërinacoi. Aꞌna huaꞌaontaꞌ, tëhuarincoi. Inaso Arapia piyapi. Quisimo itopi.

Nehemías 2:19 ပူးပေါင်းရင်းမြစ်များ

Nehemías 2:10

Ina parti cato huaꞌanoꞌsa yaꞌhuëpi: Sanparato, Topiasë, inapita itopisoꞌ. Sanparatosoꞌ Oron piyapi. Yaꞌhuërëꞌ Topiasësoꞌ, Amon piyapi. Inapitasoꞌ israiroꞌsa catahuaꞌhuaso marëꞌ huëꞌsarahuëso natantahuatonaꞌ, paꞌpi noꞌhuitopi.

Nehemías 4:1

Ninano pairanën acoantaraisoꞌ Sanparato natantahuaton, paꞌpi noꞌhuitërin. Noꞌhuitaton yaatapanincoi.

Salmos 80:6

Niyacaparaisoꞌ capini nipirinhuëꞌ, nocanatonacoi tëhuarinacoi. Inimicoroꞌsanta tëhuarinacoi.

Salmos 80:7

Quëmaso Yosënquën. Yaꞌipi nanitaparan. Catahuacoi iráca pochachin niantaꞌi. Noya nicatoncoi nichaꞌëpatancoi, chaꞌësarai.

Jeremías 20:8

Maꞌsona nonpatëra co maꞌsha shaꞌhuirahuëꞌ: “Inimicoroꞌsa huëꞌsahuatonaꞌ, ahuëarinënquëmaꞌ. Ataꞌhuantarinënquëmaꞌ,” tosárahuë. Ina marëꞌ noꞌhuirárinaco. Tëhuarárinaco. Quëma nanamën shaꞌhuirahuë niꞌton, napotërinaco.

Mateo 9:24

Quisosori itapon: —Yaꞌipinquëmaꞌ pipicoꞌ. Co sanapiaꞌhua chimininhuëꞌ. Topinan huëꞌësárin, itërin. —Co huëꞌërinhuëꞌ. Nani chiminin, itatonaꞌ tëhuapi.

Marcos 5:40

Naporinsoꞌ natanahuatonaꞌ, piyapiꞌsari tëhuapirinahuëꞌ. Quisosorisoꞌ inapita ocoirahuaton, paꞌpin, aꞌshin, cara caꞌtanoꞌsanën, inapitaráchin quëparin. Sanapiaꞌhua yaꞌhuërinquë yaꞌconcontarin.

Lucas 23:2

Inaquë shaꞌhuirapipi. —Iso quëmapi piyapiꞌsaꞌ nonpintarin. “Noma copirno coriqui yamaꞌpahuachinquëmaꞌ, ama quëtocosohuëꞌ,” tosahuaton: “Casoꞌ Cristoco. Yosë aꞌpaimarinco huaꞌanëntaꞌhuaso marëꞌ,” toconin, itopi.

Juan 19:12

Naporoꞌ quëran huarëꞌ Piratori yaocoipirinhuëꞌ, cotioroꞌsari itaantapi: —Iso quëmapi ocoihuatan, Noma copirno noꞌhuiarinquën. “Casoꞌ copirnoco,” tëninso marëꞌ copirnori inimicotarin, itopi.

Hechos 24:5

Iso quëmapi Paono itopisoꞌ paꞌpi co noyahuëꞌ, tënai. Yaꞌipi parti paaton, piyapiꞌsaꞌ nisha nisha ayonquirin. Aꞌchinpachina, cotioroꞌsaꞌ ninoꞌhuipi. Yaꞌipi parti naporin. Nisha imarin. Nasarinoroꞌsaꞌ itopisoꞌ imaton, naꞌa piyapiꞌsaꞌ aꞌchintarin imacaiso marëꞌ.

Hebreos 11:36

Aꞌnaquëontaꞌ Yosë imapi niꞌton, tëhuapi, huihuipi, catinaquë tonpopi, tashinan pëiquë poꞌmopi, napotopi.