Nehemías 1:7 - Chayahuita (Shahui)

⁷ Paꞌpi co noyahuëꞌ nicatoi, camaitëransopita, pënëntëransopita, inapita co natëraihuëꞌ. Quëma nohuanton iráca piyapinën Moisësë itopisoꞌ, inapita ninshitërincoi.

Nehemías 1:7 ပူးပေါင်းရင်းမြစ်များ

1 Reyes 2:3

Nani Yosë camairinpoaꞌ, aꞌchintërinpoa ina nohuantërinso nicacasoꞌ. Yaꞌipi ina camaitërinso natëquëꞌ. Yaꞌipi Moisësë ninshitërinpoaso natëquëꞌ. Ina mini Yosë pënëninpoaꞌ. Ina pochin nipatan, nani maꞌsha ninanquë noya pipitarinquën. Intohuasona paꞌpataontaꞌ, noya paꞌsaran.

Esdras 7:6

Istrasësoꞌ, iráca pënëntërinsoꞌ quirica nóya nitotaton, aꞌchinaꞌpi yaꞌconin. Ina quiricaquë Sinioro nohuanton Moisësë ninshitërin. Naporahuaton Siniorori noya catahuarin. Napoaton Artaquirquisë copirnori yaꞌipi nataninsopita catahuacaso marëꞌ quëtërin. Inapoaton inasoꞌ, Papironia quëran Quirosarinquë huëntarin. Aꞌna huëntonaꞌ, israiroꞌsari imaquipi. Inapitasoꞌ aꞌnaquën corto huaꞌanoꞌsaꞌ. Aꞌnaquëntaꞌ, nihuiroꞌsaꞌ. Aꞌnapitasoꞌ, cantanaꞌpiroꞌsaꞌ. Aꞌnapitantaꞌ, yaꞌcoana aꞌpairoꞌsaꞌ. Aꞌnaquënsoꞌ, Yosë chinotacaso pëiquë sacatopisopita. Artaquirquisë nani canchisë piꞌipi copirno yaꞌconinso nisapasoꞌ, Quirosarinquë canquipi. Yaꞌnatiirinso yoquiquë yaꞌnatiirinso tahuëri chachin pipipi. Napoaponaraihuëꞌ, aꞌnatërápo yoqui nisahuaton, aꞌna tahuëri quëran Quirosarinquë canquipi. Siniorori catahuarin niꞌton, noya iratopi.

Isaías 1:4

Oshahuanacasoráchin cancantëramasopita, ¡maꞌhuantacha nisarama paya! Canpitaso paꞌpi co noyahuëꞌ ninamaꞌ. Co noyahuëꞌ nipisopita huiꞌnarinquëmaꞌ. Nitapicancamiatëramaꞌ. Aꞌporamaco. Naporamaꞌ. Caso Yosëco noyasáchin ninahuë niꞌton, Israiro chinotërinco. Inaco nipirahuëꞌ, aꞌporamaco.

Daniel 9:11

Yaꞌipi israiroꞌsacoi aꞌchintërancoisopita co natëraihuëꞌ. Camaitëransopitantaꞌ, co natëcaꞌhuaiso nohuantëraihuëꞌ. Iráca Moisësë pënëntërinsoꞌ quiricaquë shaꞌhuitërancoi: ‘Caso Yosëco niꞌton, shaꞌhuitaranquëmaꞌ. Iso quirica quëran pënënanquëmasopita co natëhuatamacohuëꞌ, paꞌpi chiníquën aparisitaranquëmaꞌ,’ itërancoi. Co quëma natëtëinquënhuëꞌ panca tëhuërai niꞌton, naporanso chachin iporasoꞌ parisitarai.

Daniel 9:13

Moisësë pënëntërinsoꞌ quiricaquë ninshitërinso pochachin paꞌpi chiníquën parisitërai. Inapoapiraihuëꞌ, co chinotërainquënhuëꞌ. Co noyahuëꞌ ninaisopitanta co aꞌporaihuëꞌ. Noꞌtë nanan aꞌchintërancoisontaꞌ, co imaraihuëꞌ.

Malaquías 4:4

Tiquiapon pochin Siniorosoꞌ pënëntaton: “Piyapinëhuë Moisësë itopisoꞌ, Sinai motopiquë pënëntërahuësoꞌ aninshitërahuë. Ama ina naniantatomarahuëꞌ, yonquiráco. Inaquë nanamëhuë, camaitërahuësopita, inapita israiroꞌsanquëma natëcamaso marëꞌ quëtëranquëmaꞌ.

Deuteronomio 4:1

Moisësëri israiroꞌsa nontaton itapon: “Iporaso huachi, Sinioro pënëntërinsoꞌ natëcoꞌ. Camairinquëmasopitantaꞌ, natëcoꞌ. Nani yaꞌipi carinquëma aꞌchintëranquëmaꞌ. Ama topinan quëran natanatomarahuëꞌ, ina nohuantërinso nicoꞌ. Inapohuatamaꞌ, noya nanpitoma Yosë quihuitërinpoasoꞌ noꞌpaquë yaꞌconatoma huaꞌanëntaramaꞌ. Shimashonënpoapita shaꞌhuitërinso chachin quëtarinpoaꞌ.

Deuteronomio 4:5

Yaꞌipi Sinioronënpoa pënëntërinsoꞌ, camaitërinsoꞌ, inapita shaꞌhuitërincosoꞌ nani aꞌchintëranquëmaꞌ. Noꞌpaꞌ manamaquë yaꞌhuëhuatamaꞌ, yaꞌipi inapita natëcoꞌ.

Deuteronomio 6:1

Naquëranchin Moisësëri israiroꞌsa nontaton itapon: “Yosë camairinco niꞌton, pënëntërinsopita, camaitërinsopita, inapita natëcamaso marëꞌ apira shaꞌhuitaantaranquëmaꞌ. Yosë noꞌpaꞌ quëtarinquëmaquë yaꞌhuëhuatamaꞌ, inapita noꞌtëquën natëcoꞌ.

Apocalipsis 19:2

Co topinan quëran anaꞌintërinhuëꞌ. Yaꞌipiya noꞌtëquën anaꞌintërin. Monshihuanaꞌpi pochin nininsoꞌ nani anaꞌintërin. Inasoꞌ notohuaroꞌ piyapiꞌsaꞌ anishacancantërin. Imapisopita tëpapi niꞌton, iꞌhuërëtërin,” topi.