Nehemías 1:6 - Chayahuita (Shahui)

⁶ Onpopionta Sinioro nontëranquënsoꞌ natanco. Israiroꞌsacoisoꞌ, quëma piyapinënpitacoi. Inapita marëꞌ tahuëri tashirë chachin nontaranquën. Tëhuënchachin quiyasoꞌ co natëtëinquënhuëꞌ, oshahuanai. Cantaꞌ, quëmopinëhuëpitaroꞌco chachin oshahuanahuë.

Nehemías 1:6 ပူးပေါင်းရင်းမြစ်များ

1 Reyes 8:30

Quëmaso inápaquë yaꞌhuëran. Nipirinhuëꞌ Insëran tëranta iso pëi notërahuatoi nontohuatëinquën, noya natancoi. Inapoaton catahuacoi. Oshahuanpatointa nontarainquën. Nontohuatëinquën, oshanëhuëi inquitatoncoi nanan anoyatocoi.

1 Reyes 8:47

Tapona quëpapisoꞌ noꞌpaquë, chinotatënën: ‘Tëhuënchachin co noyahuëꞌ ninai. Ina nipirinhuëꞌ, oshanëhuëi inquitatoncoi catahuacoi,’ itapënën.

Nehemías 1:11

Onpopionta Sinioro nontëranquënsoꞌ natanco. Aꞌnapita piyapinënpitantaꞌ, nontarinënsoꞌ natanquëꞌ. Quiyasoꞌ paꞌyataꞌhuainquënsoráchin cancantarai. Copirno yanontërahuë. Nontohuato, quëma nohuanton noya natanatonco catahuainco,” itërahuë.

Salmos 32:5

Naporoꞌ oshanëhuë shaꞌhuitëranquën. Co noyahuëꞌ ninahuësopita noꞌtëquën shaꞌhuitëranquën. Inapohuatora, yaꞌipi oshanëhuë Sinioro inquitëranco huachi.

Salmos 34:15

Aꞌnapita maꞌshanëna noya nicatonaꞌ, co sëꞌhuahuachinahuëꞌ, Siniorori noya aꞌpaiarin. Maꞌsha onpoatona nontohuachinara, noya natanaton catahuararin.

Isaías 6:5

Ina yonquiato: “¡Maꞌhuantacha caso nicato chiminarahuë paya! ¡Caso co noyahuëꞌ cancantato naponi nonahuë! ¡Aꞌnapitanta ca pochachin cancantopi nipirinhuëꞌ, inapitarëꞌco yaꞌhuërahuë! ¡Napoaporahuëꞌ, Sinioro yaꞌipi nanitapaton yaꞌipi huaꞌanëntërinso quënanahuë!” tënahuë.

Daniel 9:15

Quëmaso Sinioro Yosënëhuëinquën. Chiníquën nanantaton piyapinënpitacoi Iquipito quëran ocoirancoi. Inapotatoncoi sacóshin nahuinan. Quiyaso napoaponahuëꞌ, co noyahuëꞌ nicatoi oshahuanai.

Daniel 9:20

Ina pochin nontato oshanëhuë Yosë shaꞌhuitërahuë. Israiroꞌsa oshanënanta shaꞌhuitërahuë. Quirosarin marënta nontërahuë.

Daniel 9:4

Nontohuatora: “Quëmasoꞌ Sinioro chini chiníquën nanantaton, yaꞌipi nanitaparan. Maꞌsona shaꞌhuitohuatancoi, noꞌtëquën nonan. Nosoroatënën camaitëransopita natëhuachinën, quëmarinta nosororansoꞌ aꞌnotëran.

Daniel 9:5

Tëhuënchachin quiyasoꞌ co noyahuëꞌ nicatoi oshahuanai. Co costaransohuëꞌ ninai. Co quëma yaꞌhuëransohuë pochin cancantatoi yaꞌhuërai. Camaitëransopita, shaꞌhuiransopita, inapita aꞌporai.

Daniel 9:8

Copirnonëhuëipita, huaꞌanoꞌsanëhuëipita, shimashonëhuëipita, inapita pochachin quiyantaꞌ, tapanai. Co natëtëinquënhuëꞌ oshahuanaiso marëꞌ naporai.

Lucas 18:7

¡Yosëso nipirinhuëꞌ nóya niꞌton, huayoninsopita naꞌcon catahuarin! Aꞌnapitari aparisitohuachinaꞌ, Yosëri noꞌtëquën anaꞌintarin. Tahuërirë chachin, tashirë chachin ina nontopi niꞌton, catahuaarin. Co naniantarinhuëꞌ.

Lucas 2:37

soꞌini ayananpirin niꞌton, nani huaꞌquiꞌ quëyoronin. Nani posa shonca catapini piꞌipitërin. Yosë chinotopiso pëiquë yaꞌhuëmiatërin. Tahuërirë chachin, tashirë chachin Yosë chinotërin. Apira apira Yosë yonquirin. Co cosharoꞌ yonquiatonhuëꞌ, Yosë nontárin.

Efesios 2:3

Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

1 Timoteo 5:5

Aꞌnaquën quëyoronoꞌsaso nipirinhuëꞌ, co huaꞌhuinpita yaꞌhuëtërinhuëꞌ. Yosëíchin yonquiarin. “Ina catahuarinco,” taꞌton, nani tahuëri Yosë nontarin. Tashirë chachin nontarin. Inapitasoꞌ catahuahuaꞌ.

2 Timoteo 1:3

Iráca shimashonëhuëpita Yosë chinotopi. Inapochachin cantaꞌ chinotërahuë. Yosë nanamën noꞌtëquën natëto, chinotërahuë. Ina marëꞌ noyápiachin cancantërahuë. Nani tahuëri tashirë chachin Yosë nontato, quëma yonquiranquën. Noya imaranso marëꞌ: “Yosparinquën Sinioro,” itërahuë.

1 Juan 1:9

Onporosona co noyahuëꞌ nipatëhuaꞌ, Yosë nontahuaꞌ. “Tëhuënchachin co noyahuëꞌ nicato, oshahuanco,” topatëhuaꞌ, Yosë oshanënpoaꞌ inquitarinpoaꞌ. Co nonpintërinpoahuëꞌ. Quisocristo chiminin niꞌton, nanitërin yaꞌipi oshanënpoaꞌ inquitinpoasoꞌ. Noyápiachin cancan quëtarinpoaꞌ.