Miqueas 5:8 - Chayahuita (Shahui)

⁸ Naporoꞌ aꞌnapitanta nisha nisha nacionquë yacapatapirinahuëꞌ, paꞌpiniꞌ pochin nicaponaꞌ. Yaꞌipi maꞌsharoꞌsa quëran paꞌpinisoꞌ, chini chiníquën ninin. Inapochachin inapitanta nicaponaꞌ. Paꞌpiniri ohuicaroꞌsa yaꞌcontaton, tiquirinso pochin co aꞌnaya tëranta nichaꞌëponahuëꞌ.

Miqueas 5:8 ပူးပေါင်းရင်းမြစ်များ

Génesis 49:9

Quëmasoꞌ conpa masho, Cota itëranquën. Paꞌpiniaꞌhua pochin chinimiatëran. Mapintahuaton paꞌpiniꞌ pëꞌinihuachina, mónsho mónsho tërarinquëran quëhuënin huachi. Panca paꞌpiniꞌ pochin ninan. ¡Paꞌpiniꞌ chinotasoꞌ, co incari tëranta apisarinhuëꞌ! Inapochachin quëmanta inimiconënpita nitaponën.

Salmos 104:20

Tashihuachinantaꞌ, yaráton aꞌmopiquë isoroꞌpaꞌ imotërëso pochin nitëran. Naporo tashi paꞌtëroꞌsasoꞌ, pipirapi.

Oseas 5:14

Paꞌpiniꞌ, niirahuaton mapintërinso pochin israiroꞌsaꞌ, Cota huënton israiroꞌsaꞌ, inapita nitarahuë. Cari chachin paꞌsa paꞌsatërëso pochin aparisitarahuë. Inapotahuato patarahuë. Quëpatë pochin nipatontaꞌ, co insonta osërëtiincosoꞌ nanitarinhuëꞌ.

Miqueas 2:12

Ina quëran Sinioro taantarin: “Piyapinëhuëpita yaꞌhuëpiso noꞌpa quëran, inimiconënapitari quëpaponaꞌ. Quëpapirinahuëꞌ, cari chachin yaꞌipi inapita ayontoantarahuë. Inapitasoꞌ caraya pochin quëparitopirinahuëꞌ, ohuicaroꞌsa huëꞌërinquë ayontonëso pochin nitarahuë. Ohuica huënton pastonënquë quëparëso pochin nitarahuë. Panca huënton ohuica noncaropiso pochin israiroꞌsa noncaroponaꞌ.

Miqueas 4:13

Ina quëran Quirosarinquë yaꞌhuëramasopita camaiaranquëmaꞌ: ‘Paatoma inimiconëmapita anaꞌintocoꞌ. Toro trico toꞌnorarinso pochin inapita nitocoꞌ. Carinquëma catahuaranquëma niꞌton, ina chinirinso pochin chiniaramaꞌ. Huaꞌna quëran pomohuanaton, shaꞌpi huaꞌna quëran toꞌtëratëtërinso pochin nisha nisha parti quëran huëꞌpisopita ataꞌhuantapomaꞌ. Inapitaso ihuatatonaꞌ, tiquitatonaꞌ, inapoatona maꞌhuanpiso matapomaꞌ. Matatomaꞌ, quëtapomaco. Ca Sinioroco yaꞌipi isoroꞌpaꞌ huaꞌanëntato, camaiaranquëmaꞌ,’ itaranquëmaꞌ,” tënin.

Miqueas 5:3

Napoaton ipora tananpitopirinpoahuëꞌ, co huaꞌqui napotarinpoahuëꞌ. Sanapi cayorin quëran huaꞌhuin nasitaquë huarëꞌ parisirinso pochin canpoanta parisiarëhuaꞌ. Naporoꞌ quëparitërëhuasopitasoꞌ, inimicoroꞌsari quëparinsopitarëꞌquënpoa aꞌna huëntoíchin niantarihuaꞌ.

Miqueas 7:18

Siniorosoꞌ noya niꞌton, ina nontato: “¡Quëmaíchin Yosënquën. Co aꞌna quëma pochin yaꞌhuërinhuëꞌ! Piyapiꞌsa co noyahuëꞌ nipirinahuëꞌ, oshanëna marëꞌ sëtatona nontërinën niꞌton, nichaꞌëran. Caraya israiroꞌsacoi quëparitëraisopita, co natantochináchinhuëꞌ cancantatoi tëhuëtërainquën. Inapopiraihuëꞌ nontërainquën niꞌton, tëhuëtërainquënsoꞌ naniantëran. Noꞌhuípiro nipiraihuëꞌ nosororancoi niꞌton, noꞌhuitëransoꞌ asanoran. Inapoaton catahuantarancoi.

Zacarías 9:15

Siniorosoꞌ, yaꞌipi nanitaparin. Inimiconënapitasoꞌ, israiroꞌsa ahuëcaiso marëꞌ naꞌpira tëꞌyatopiquë quëcaponaꞌ. Inanpiquë naꞌpiroꞌsa tëꞌyatopirinahuëꞌ, israiroꞌsaso Siniorori paꞌpoyapon. Inari catahuapon niꞌton, inimiconëna minsëaponaꞌ. Minsëhuachinaꞌ, pita nicaponaꞌ. Naꞌcon huino oꞌopiso pochin noncaroaponaꞌ. Corto huaꞌanoꞌsa maꞌsha tëpahuachinara, tasonoꞌsaquë huënaiꞌ mëntaitopi. Inapotatona artaro aipi opopi. Inapochachin inapitantaꞌ, tasonënaquë huino mëntaitaponaꞌ.

Malaquías 4:3

Anaꞌintaꞌhuaso tahuëri nanihuachin, canpitaso piyapinëhuëpitanquëma nicatomaꞌ, co noyahuëꞌ nipisopita minsëaramaꞌ. Nonëna huiquitërinso yanonën, toꞌpi toꞌpitapomaꞌ,’ itëranquëmaꞌ,” tënin.

Números 24:9

Israiroꞌsa chinotai marëꞌ quëhuënpachinara, paꞌpiniroꞌsa pochachin niconpi. Co macari tëranta ochinanaponhuëꞌ. Inpitarisona inapita noya yaꞌhuëcaiso marëꞌ shaꞌhuitohuachinaꞌ, inapitanta noya yaꞌhuëcaiso marëꞌ shaꞌhuitaponaꞌ. Inpitarisona ama huachi noya yaꞌhuëcaiso marëhuëꞌ shaꞌhuitohuachina, inapitanta inapotacaiso yaꞌhuërin,” tënin.

Mateo 10:14

Insëquësona paꞌpatamaꞌ, ‘Ama isëquë huëcosohuëꞌ. Co yanatanainquëmahuëꞌ,’ itohuachinënquëmaꞌ, patocoꞌ. Yapaꞌpatamaꞌ, pënëncoꞌ. ‘Nani shaꞌhuitopiranquëmahuëꞌ. Co nohuantëramahuëꞌ niꞌton, canpitaora tëhuënëmaquë ninaꞌintaramaꞌ,’ itocoꞌ. Ina quëran aꞌna parti paco huachi.

Hechos 18:6

Inapitaso nipirinhuëꞌ noꞌhuitonaꞌ, Paono pinopi. Napoaton tananpitërin. —Tëhuënchachin Yosë anaꞌintarinquëmaꞌ. Nani yaꞌipi aꞌchintopiranquëmahuëꞌ, co yanatëramahuëꞌ niꞌton, canpitaora tëhuënëmaquë ninaꞌintaramaꞌ. Iporaso nisha piyapiꞌsaꞌ aꞌchintarahuë huachi, tënin Paono.

Hebreos 12:25

Napoaton Quisocristo nanamën noya natancoꞌ. Ama piꞌpian tërantaꞌ aꞌpocosohuëꞌ. Pënëntërinso nanan shaꞌhuitohuachinara, aꞌnaquën co yanatëtopihuëꞌ niꞌton, aꞌnaroáchin anaꞌintërin. Quisocristo nanamënsoꞌ noya noya niꞌton, ina naniantohuatëhuaꞌ, aquë aquëtëꞌ anaꞌintinpoasoꞌ yaꞌhuërin. Inasoꞌ inápa quëran pënëninpoaꞌ.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.