Miqueas 5:3 - Chayahuita (Shahui)

³ Napoaton ipora tananpitopirinpoahuëꞌ, co huaꞌqui napotarinpoahuëꞌ. Sanapi cayorin quëran huaꞌhuin nasitaquë huarëꞌ parisirinso pochin canpoanta parisiarëhuaꞌ. Naporoꞌ quëparitërëhuasopitasoꞌ, inimicoroꞌsari quëparinsopitarëꞌquënpoa aꞌna huëntoíchin niantarihuaꞌ.

Miqueas 5:3 ပူးပေါင်းရင်းမြစ်များ

Isaías 49:6

Ina Sinioro chachin shaꞌhuitaantarinco: ‘Cacopo quëran pipipisopita huëntonoꞌsaꞌ, quëmari anoyataantapon. Inimicoroꞌsari quëpapirinahuëꞌ, quëmari ayontoantapon. Napoaponahuëꞌ, co inaíchin nicacaso marëꞌ acoranquënhuëꞌ, nisha piyapiꞌsanta aꞌchintaton, anohuitaancoso marëꞌ acoranquën. Aꞌpintërëso pochin nanamëhuë anitotaran. Yaꞌipi parti piyapiꞌsa chaꞌëcaiso marëꞌ aꞌchintëraꞌpiapon,’ itërinco,” tënin.

Jeremías 23:5

Ina quëran Sinioro taantarin: “Ca nohuanton aꞌna tahuëri Tapi shiin yaꞌhuëapon. Ina huaꞌanëntohuachin, yonquínahuan copirno nisarin. Noyasáchin nicaton, noya coisë pochin nicapon.

Jeremías 31:1

Ina quëran taantarin: “Ina tahuëri nanihuachin, casáchin yaꞌipi Israiro huëntonoꞌsa chinotarinaco. Inapitanta piyapinëhuëpita nisapi,” tënin.

Oseas 11:8

Canpitaso israiroꞌsanquëmaꞌ. Noꞌhuípiro mini nipiramahuëꞌ, ¡Co nanitërahuë aꞌpomiataꞌhuanquëmasoꞌ! Atoma, Sipoin, inapita ninanoroꞌsasoꞌ, co noyahuëꞌ nipiso marëꞌ iráca ataꞌhuantërahuë. Inapita pochachin ataꞌhuantaꞌhuanquëmasoꞌ, ¡coꞌchi nanitarahuë paya! ¡Nosorochináchin cancantëranquëmaꞌ!

Oseas 2:14

Inapotopirinacohuëꞌ, nanon nohuantohuachinara noyasha nontopiso pochin, israiroꞌsanta nitarahuë. Inotëro parti quëparëso pochin nitarahuë. Inaquë noya nontato achinicancanarahuë.

Oseas 2:9

Napopiso marëꞌ carintaꞌ, trico, huino, inapita quëtërahuësoꞌ, matatë pochin nitarahuë. Inapita macacaso tahuëriꞌsa nanipirinhuëꞌ, ca nohuanton co huachi macaponahuëꞌ. Aꞌnantatona aꞌmocaiso marëntaꞌ, rino piꞌshi, huaita, inapita quëtërahuë. Inapotopirahuëꞌ, mataantapo.

Amós 5:15

Co noyahuëꞌ ninamasopita noꞌhuicoꞌ. Noya nicacamasoso nipirinhuëꞌ, paꞌyatocoꞌ. Nanan anoyatahuatamaꞌ, noꞌtëquënáchin shaꞌhuicamasoꞌ cancantocoꞌ. Tapona naporamaso marëꞌ carayanquëma chaꞌëramasoꞌ, Yosë nosoroápirinquëmahuëꞌ. Inasoꞌ Sinioro. Yaꞌipi nanitaparin.

Miqueas 4:4

Ina tahuëri nanihuachin, co huachi tëꞌhuarëꞌna yaꞌhuëaponahuëꞌ. Opanënaꞌ, iquiranënaꞌ, inapita huanirinsoanaquë, aꞌnaya aꞌnaya noya chinotaponaꞌ. Sinioro chachin yaꞌipi nanitapaton, inapocaso shaꞌhuitarinpoaꞌ.

Miqueas 5:7

Naporoꞌ aꞌnapitaso nisha nisha nacionquë quëpapirinahuëꞌ, yaꞌhuëhuanoꞌsa ahuëaponaꞌ. Oꞌnan, poroncayo, inapitaso co piyapiꞌsa nohuantaiquë huarëꞌ anotërinhuëꞌ. Siniorori aꞌpaimahuachina anotërin. Inapochachin inapitantaꞌ, yaꞌhuëhuanoꞌsa ahuëatona napotaponaꞌ.

Miqueas 5:8

Naporoꞌ aꞌnapitanta nisha nisha nacionquë yacapatapirinahuëꞌ, paꞌpiniꞌ pochin nicaponaꞌ. Yaꞌipi maꞌsharoꞌsa quëran paꞌpinisoꞌ, chini chiníquën ninin. Inapochachin inapitanta nicaponaꞌ. Paꞌpiniri ohuicaroꞌsa yaꞌcontaton, tiquirinso pochin co aꞌnaya tëranta nichaꞌëponahuëꞌ.

Mateo 1:21

Huaicasoꞌ nanihuachin, quëmapiaꞌhuaya nasitapon. Nasitohuachin, Quisoso itëquëꞌ. Piyapinënpita oshanënaꞌ inquitaton, nichaꞌësarin niꞌton, ina nininën acotëquëꞌ, itërin anquëniri. Itahuaton, panantarin huachi.

Mateo 12:50

Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, oshihuëpita pochin niꞌnahuë. Payaroꞌsantaꞌ Yosë imapachinaꞌ, mamahuë pochin niꞌnahuë, itërin.

Mateo 25:40

‘Coꞌta, imarinacosopita parisitohuachinara, catahuaramaꞌ. Topinan piyapiꞌsaꞌ, saꞌahuaroꞌsaꞌ, inapita maꞌsha pahuantohuachinara, quëtëramaꞌ. Imatomaco, aꞌnapita catahuaramaꞌ niꞌton, cantaꞌ catahuaramacoso pochin niꞌnahuë,’ itarahuë.

Romanos 8:29

Iráca quëran huarëꞌ Yosë nohuitërinpoaꞌ. Nohuitatonpoaꞌ, huayoninpoaꞌ Quisocristo pochachin cancantacaso marëꞌ. Quisocristosoꞌ noya noya ninin. Ina quëran naꞌaquënpoaꞌ imapatëhuaꞌ, ina pochin cancantarihuaꞌ. Yosë huiꞌninpita pochin niꞌsarinpoaꞌ canpoantaꞌ.