Miqueas 5:2 - Chayahuita (Shahui)

² Naquëranchin Sinioro taantarin: “Pirin ninanosoꞌ, Iporata itopi antaꞌ. Inasoꞌ ninanoꞌ, aꞌnapita ninanoroꞌsa Cota huëntonquë yaꞌhuërin quëran nani naniaꞌhuaya. Ina niponahuëꞌ, yaꞌipi israiroꞌsa huaꞌanëntacaso marëꞌ inaquë aꞌnara copirno nasitapon. Ina shimashonënpitasoꞌ, iráca quëran huarëꞌ yaꞌhuëpi,” tënin.

Miqueas 5:2 ပူးပေါင်းရင်းမြစ်များ

Génesis 35:16

Huaꞌquimiachin inaquë yaꞌhuërapi quëran paantapi. Paꞌsápatonaꞌ, Iporata ninanoquë yaꞌcaritopi huachi. Inaquë Naquirasoꞌ, paꞌpi parisë quëran huaiton, coꞌchachin ninin. Napoaso ahuaitonaꞌpiri itapon: “Ama paꞌyanquësohuëꞌ, quëmapi chachin huaiyantaran,” itërin.

Génesis 35:19

Inapo chimintërin Naquira. Napoaton Iporata ira pirayan paꞌpitopi. (Iporataso ipora marëꞌ, Pirin itopi.)

Génesis 48:7

Co topinan napotaranquënhuëꞌ. Mamaparin co aquëtë huaꞌhuaninso marëhuëꞌ, napotaranquën. Quëmanta nani nitotëran: Patan-aran quëran huënantasëhuaꞌ, Canaan parti quëmaquën mama tëparëhuaꞌ. Iporata ninano yaꞌcariya nicasëhuaꞌ, chiminin. Chiminpachina, inaquë chachin ira pirayan paꞌpitërëhuaꞌ. (Ina ninanosoꞌ, ipora marëꞌ Pirin itopi antaꞌ.)

Génesis 49:10

Co inso tëranta huaꞌan quëran, quëmasoꞌ Cota, ocoiarinënhuëꞌ. Huara sëꞌquëranso co insonta mataponënhuëꞌ. Huaꞌanën chachin oꞌmaquë huarëꞌ co nanitapaponënhuëꞌ. Ina oꞌmahuachin, yaꞌipi nacionoꞌsari natëpona huachi.

Salmos 90:2

Coꞌhuara isoroꞌpaꞌ, motopiroꞌsaꞌ, inapita yaꞌhuëyátërasohuëꞌ, quëmasoꞌ yaꞌhuëran. Iráca quëran huarëꞌ yaꞌhuëran. Tahuëri nitiquipirinhuë tërantaꞌ, quëmaso yaꞌhuëápon. Quëmasáchin Yosënquën.

Isaías 11:1

Nara motoꞌ itëquën quëran pichopitahuaton papotaantarinso pochin aꞌna tahuëri Quisi shiin copirno yaꞌconaton, huaꞌanëntapon.

Isaías 53:2

Sinioro nohuanton piyapinën, co chiníquën nanantonaꞌpi pochin yaꞌnoarinhuëꞌ. Naraaꞌhuaya yaniroquë co noyatërinhuëꞌ. Inapochachin inantaꞌ, co noya noyatarinhuëꞌ.

Isaías 55:4

Nisha nisha piyapiroꞌsa naporahuësoꞌ shaꞌhuitacaso marëꞌ, cari ina acorahuë. Nisha nisha parti yaꞌhuëpisopita huaꞌanëntaton aꞌchintacaso marëꞌ acorahuë.

Isaías 7:14

Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

Amós 9:11

Naquëranchin Sinioro taantarin: “Co huaꞌquiya quëranhuëꞌ israiroꞌsa noya acoantarahuë. Iráca Tapi copirnori huaꞌanëntapon naporinso pochachin acoantarahuë.

Miqueas 4:10

Co nohuantopiramahuëꞌ, inimiconëmapita áquë quëpaponënquëmaꞌ. Papironiaꞌpaꞌ huarëꞌ cansaramaꞌ. Papoma pochin caparoꞌtëquë huëꞌërantapomaꞌ. Napoarama niꞌton, ipora Quirosarinquë yaꞌhuëramasopitasoꞌ, sanapi yahuaiton nisiꞌhuitërinso pochin nicoꞌ. Napoaponahuëꞌ, huaꞌqui parisitëramaso piquëran inimiconëma quëran carima nichaꞌësaranquëmaꞌ. Piyapinëhuëpitanquëma niꞌton, napotaranquëmaꞌ.

Zacarías 9:9

Sinioro chachin naporin: “Sion motopiaꞌhuaquë yaꞌhuëramasopita, capa cancantomiatocoꞌ. Quirosarinquë yaꞌhuëramasopitantaꞌ, capa cancantatoma cantacoꞌ. Niꞌcoꞌ. Copirnonëma huëꞌsarin. Inaso noyasáchin ninin. Yaꞌipi inimicoroꞌsa minsërin. Ina niponahuëꞌ, topinan piyapi pochin mora huiꞌnapishinquë yaꞌmitëahuaton, huëꞌsarin.

Mateo 2:1

Quisososoꞌ Pirinquë nasitërin. Cotia parti chachin nasitërin. Naporoꞌ Irotisëri inaquë huaꞌanëntërin. Ina quëran tayora nitotonaꞌpiroꞌsaꞌ canquipi. Piꞌi pipirinso parti quëran huëꞌpi. Canquihuachinara, Quirosarinquë, natantiipi:

Mateo 2:6

“Cotiaquë aꞌna ninanoꞌ yaꞌhuërin, Pirin itopisoꞌ. Co panca ninanoyahuëꞌ niponahuëꞌ, inaquë aꞌna copirno nasitapon. Naꞌa copirnoroꞌsaꞌ Cotia parti yaꞌhuëpirinahuëꞌ, inasoꞌ chini chiníquën nanantapon. Yaꞌipi piyapinëhuëpita israiroꞌsaꞌ itopisoꞌ huaꞌanëntapon,” tënin Yosë, itopi.

Mateo 28:18

Quisosori yaꞌcarirahuaton, itapon: —Tata Yosë nohuanton, chini chiníquën nanantërahuë. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntarahuë.

Lucas 23:2

Inaquë shaꞌhuirapipi. —Iso quëmapi piyapiꞌsaꞌ nonpintarin. “Noma copirno coriqui yamaꞌpahuachinquëmaꞌ, ama quëtocosohuëꞌ,” tosahuaton: “Casoꞌ Cristoco. Yosë aꞌpaimarinco huaꞌanëntaꞌhuaso marëꞌ,” toconin, itopi.

Lucas 23:38

Onporinso marësona tëparapisoꞌ ninshitopi. isosoꞌ cotioroꞌsaꞌ copirno taꞌcaso ninshitopi. Nani ninshitohuachina, corosëquë chachin motën pëtëcha achinpitopi.

Juan 7:42

¿Coꞌta “Tapicoꞌ shiin niꞌton, ina ninanonënquë chachin nasitapon? Pirinquë nasitapon,” tënin Yosë quiricanënquë, topi aꞌnaquëontaꞌ.

Colosenses 1:17

Coꞌhuara maꞌsha yaꞌhuëyátërasohuëꞌ, Quisocristo yaꞌhuërin. Ina nohuanton, piyapiꞌsaꞌ, maꞌsharoꞌsaꞌ, yaꞌipiya yaꞌhuërapi. Ipora huantaꞌ co yonquirinpoahuëꞌ naporini, yaꞌipinpoaꞌ taꞌhuanchitërihuahuëꞌ. Yaꞌipi maꞌsharëꞌquënpoa chachin taꞌhuanchitërihuahuëꞌ.

Hebreos 13:8

Quisocristo co onporontaꞌ nishataponhuëꞌ. Iráca nosororinpoaꞌ. Ipora huantaꞌ catahuarinpoaꞌ. Co onporontaꞌ naniantarinpoahuëꞌ. Inasáchin imahuaꞌ.

1 Juan 1:1

Iso quirica aꞌpataranquëmaꞌ, niꞌcoꞌ. ¿Noyanquëmaꞌ canpitantaꞌ? Quiyantaꞌ isëquë noya yaꞌhuarai. Quisocristo noya noya nohuitacamaso marëꞌ ninshitaranquëmaꞌ. Iráca coꞌhuara isoroꞌpaꞌ yaꞌhuëyátërasohuëꞌ, inápaquë yaꞌhuërin. Ina quëran oꞌmarahuaton, aꞌchintërincoi, natanai. Quiyasoꞌ niꞌnai. Nirayarai. Nonën chachin yaꞌhuëtërin, sëꞌhuarai. Inasáchin Yosë yonquirinsoꞌ anitotërinpoaꞌ. Ina nohuitohuatëhuaꞌ, nóya nanpimiatarihuaꞌ.

Apocalipsis 19:16

Aipi aꞌmorinsoquë nani ninshitërin: iso quëmapi chini chiníquën nanantaton, yaꞌipi copirnoroꞌsantaꞌ, huaꞌanëntarin. inasáchin natëcasoꞌ yaꞌhuërin tënin. Tonamënquëntaꞌ ina chachin ninshitërin.

Apocalipsis 2:8

Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.

Apocalipsis 21:6

Ina quëran itantarinco: —Nani yaꞌipiya anoyatërahuë. Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ. Napoaton nontoco catahuainquëmaꞌ. Niꞌquëꞌ. Chiníquën yamorohuatëra, oꞌorëꞌ. Oꞌopatëra, chiníquën cancantërëꞌ. Inapochachin cantaꞌ catahuaranquëmaꞌ. Yamororëso pochin cancantohuatamaꞌ, nanpirin iiꞌ quëchinquëmaꞌ noya cancantacamaso marëꞌ. Caora nohuanto, catahuaranquëmaꞌ. Insonquëma tërantaꞌ nohuantohuatamaco, huëcoꞌ anoyacancanchinquëmaꞌ.

Rota naporinso' 1:1

Huaꞌanoꞌsa Israiro parti huaꞌanëntasoiꞌ, yaꞌipi ina parti tanarotopi. Napohuachinara, aꞌnaso Cota huënton quëmapi Pirin ninanoquë yaꞌhuërinsoꞌ, pipirin. Pipiton moaporoꞌsa noꞌpanën parti paꞌnin yacapatapon. Inasoꞌ quëmapi Irimiri itopi. Saꞌin, cato huiꞌninpita, inapitarë chachin paꞌnin. Saꞌinsoꞌ, Noimi itopi. Huiꞌninpitantaꞌ, aꞌnaso Quirion, aꞌnantaꞌ, Maaron itopi. Yaꞌipi inapita Pirinquë yaꞌhuëpi niꞌton, iporataroꞌsa itopi. Inapitasoꞌ Moapoquë canconahuatonaꞌ, inaquë yaꞌhuëantapi.

Rota naporinso' 4:11

Napohuachina, yaꞌipi inaquë nisapisopitari itaponaꞌ: —Quiya mini niꞌtonëhuëiquë napoaran. Sinioro nohuanton sanapi manansoꞌ, Naquira, Nia, inapita pochin niin. Inapita quëran yaꞌipi israiroꞌsanpoa pipirëhuaꞌ. Quëmanta yaꞌipi Pirin ninanoquë yaꞌhuëpisopita noya niꞌinën. Napotërinënsoꞌ, yaꞌipi iso ninanoquë nahuiꞌin. Sinioro nohuanton ina sanapi masaranquë naꞌa huiꞌnahuanquëꞌ. Inapita quëraonta panca huënton quëmopiroꞌsa pipiinaꞌ. Parisi itërëhuaso yaꞌhuëtërinso nápoꞌ, pipiinaꞌ. Inasoꞌ, Cota huiꞌnin Tamaraquëya huiꞌnahuaninsoꞌ, itopi.

1 Samuel 10:19

Iporaso napoaponahuëꞌ, nocanatomaco aꞌporamaco. Caso Yosënëmaco niꞌton, parisitërama quëran nichaꞌëranquëmaꞌ. Copirno huaꞌanëntiinquëmasoꞌ natanatomaco, naporamaꞌ. Iporaso nipirinhuëꞌ, nohuantëramaso chachin nitaranquëmaꞌ. Napoaton iporasoꞌ, niꞌtonëhuëquë aꞌna huënton aꞌna huënton yaꞌcaritocoꞌ. Huëntoaꞌhuaroꞌsantaꞌ, inapochachin nicatona yaꞌcarichinaꞌ,” tënin Yosë, itërin Samoirori.

1 Samuel 17:12

Shaꞌhuitëranquëmaso chachin Pirin ninanoquë aꞌnara Israiro quëmapi yaꞌhuërin. Inasoꞌ, Quisi itopi. Saono copirno nicasoꞌ, inasoꞌ nani másho ninin. Posa huiꞌninpita yaꞌhuëtërin. Aꞌnasoꞌ, Tapi itërin.

1 Samuel 17:18

Isonta shonca quiso ohuaca shoꞌshoiꞌ quëran nipinan, capitan huaꞌan quëpatëquëꞌ. Iya mashoroꞌsa onpoinsona nisapisoꞌ, niꞌcontaquëꞌ. Naporahuaton noya yaꞌhuapiso nitotaꞌhuaso marëꞌ, maꞌsha tëranta quëchinën quëshico, itërin.

1 Samuel 8:12

Aꞌnaquëntaꞌ, huaranca sontaroꞌsa camaiapon. Aꞌnaquënsoꞌ, aꞌnatërápo shonca camaiapon. Aꞌnaquëontaꞌ, iminënpitaquë noꞌpaꞌ ohuërëaton shaꞌtapon. Nitërinsopitanta macapon, napoapon. Aꞌnaquënsoꞌ, ahuëtacaiso marëꞌ ohuarapisopita nitaponaꞌ. Naporahuaton ahuëtacaiso toronanënpita maquënpitasona nininsoꞌ, nitaponaꞌ.