Miqueas 4:8 - Chayahuita (Shahui)

⁸ Quirosarinquë yaꞌhuëpisopitasoꞌ, Sion motopiquë noyá niacorapipi. Inapoaton ohuica aꞌpainaꞌpiroꞌsa torinën pochin ninin. Inaquë chachin canta huënsëato huaꞌanëntarahuë niꞌton, iráca pochachin niantapon,” tënin.

Miqueas 4:8 ပူးပေါင်းရင်းမြစ်များ

Génesis 35:21

Inaporahuaton, Israiroso paantarin. Itiri tori aquëcha, yaꞌhuaantacaiso marëꞌ nëꞌmëtë pëinëna ótëënpi.

2 Samuel 5:7

Naporoꞌ Tapisoꞌ sontaronënpita itapon: “Quiposoroꞌsa ahuëcamaso marëꞌ isopocoꞌ: Yayaꞌconpatamaꞌ, iꞌsha ninanoquë yaꞌconintaquëchin yaꞌconacamaso yaꞌhuërin. Nani yaꞌconpatamaꞌ, somarayaroꞌsaꞌ, sonpacharoꞌsaꞌ, inapita quihuitërinacosoꞌ tëpacoꞌ. ‘Inapitari tëranta yaꞌcopiapon,’ topiso marëꞌ inapita paꞌpi co quëꞌyarahuëꞌ,” tënin. Napoaton piyapiꞌsa nonpachinara napopi: “Somarayaroꞌsaꞌ, sonpacharoꞌsaꞌ, inapitasoꞌ, co onporonta Sinioro pëinënquë yaꞌconaponahuëꞌ,” topi. Inapotaton Tapisoꞌ sontaronënpitarë chachin quiposoroꞌsa yaꞌcontatona ahuëpi. Nani canarahuatona inaquë yaꞌhuërin. Napoaton inaso ninanoꞌ: “Tapi ninanonën,” itopi antaꞌ. Oshaquëranchin Quirosarin co pairahuanhuëꞌ nininsonta apairatërin. Noꞌpaꞌ paꞌpipi quëran apairatërinsoꞌ, pëinënquëꞌpaꞌ huarëꞌ nanirin.

Salmos 24:7

Quirosarin ninano yaꞌcoanaroꞌsasoꞌ, iráca quëran huarëꞌ yaꞌhuërin. Noya noya copirno yayaꞌconpachina, yaꞌcoana aꞌpairoꞌsa camaiaponaꞌ: “¡Yaꞌcoanaroꞌsa noyá iꞌsoatocoꞌ! ¡Naporo huarëꞌ noya noya copirno yaꞌconarin!” itapi. “¿Inta isoso noya noya copirno?” topachinantaꞌ: “¡Isoso mini Sinioro! Israiroꞌsanpoa chinotërëhuasoꞌ. Chini chiníquën nanantaton, míso ahuëtërin. Inariáchin yaꞌipi maꞌsha yaꞌhuërinso huaꞌanëntërin,” tosarëhuaꞌ.

Isaías 1:26

Ca nohuanton iráca pochachin coisëroꞌsaꞌ, yaꞌhuëtaantarinquëmaꞌ. Ayonquinaꞌpiroꞌsantaꞌ, yaꞌhuëantapon. Noya acoantahuatënquëmaꞌ: “Noyasáchin nipiquë ninanoꞌ,” itaantaponëmaꞌ. “Noꞌtëquënáchin natëtopiquë ninanoꞌ,” itaponëma antaꞌ.

Isaías 5:2

Noꞌpaꞌ ohuërërahuaton, naꞌpiranënpita inquitërin. Noya noya oparoꞌsa paꞌhuëquën huayonaton, apitërin. Imin huáncana tori acorin. Nanpinta toꞌpoitacaso marëꞌ naꞌpi quëran nitërin. ‘Cashi cashin opa nitapon,’ taꞌton, noya ancantaton ninarin. Napoaponahuëꞌ, áin opasáchin nitërin.

Daniel 2:44

Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

Daniel 7:18

Inapita piquëransoꞌ, Yosë chini chiníquën nanantërinsoꞌ imapisopitari, huaꞌanëntapona huachi. Inapita huaꞌanëntohuachinaꞌ, co huachi onporonta aꞌnapitari huaꞌanëntopiso matarinhuëꞌ,’ itërinco.

Miqueas 2:12

Ina quëran Sinioro taantarin: “Piyapinëhuëpita yaꞌhuëpiso noꞌpa quëran, inimiconënapitari quëpaponaꞌ. Quëpapirinahuëꞌ, cari chachin yaꞌipi inapita ayontoantarahuë. Inapitasoꞌ caraya pochin quëparitopirinahuëꞌ, ohuicaroꞌsa huëꞌërinquë ayontonëso pochin nitarahuë. Ohuica huënton pastonënquë quëparëso pochin nitarahuë. Panca huënton ohuica noncaropiso pochin israiroꞌsa noncaroponaꞌ.

Zacarías 9:10

Inari israiroꞌsa ahuëtacaiso marëꞌ toronanoꞌsa yaꞌhuëtopisoꞌ, ataꞌhuantarin. Cahuarioroꞌsanta ina marëꞌ Quirosarinquë yaꞌhuërinsoꞌ, ataꞌhuantarin. Pëꞌchinanoꞌsantaꞌ, opanaꞌpiapon. Yaꞌipi nacionquë yaꞌhuëpisopita camaiton: ‘Ama huachi aquëtë quira nicosohuëꞌ,’ itarin. Aꞌna marë quëran, aꞌna marëꞌpaꞌ huaꞌanëntarin. Iopiratisiiꞌ quëran, isoroꞌpaꞌ coꞌyontërinquëꞌpaꞌ huarëꞌ napoarin,” tënin.

Zacarías 9:12

Naquëranchin Sinioro taantarin: “Naꞌaquëma nisha nisha parti quëpapirinënquëmahuëꞌ: ‘Sinioro nichaꞌësarinpoaꞌ,’ taꞌtoma ninaramaco. ¡Iporaso tahuëri nanirin niꞌton, Quirosarinquë chachin panantacoꞌ! Inasoꞌ, noyá niacorapiramaso ninanoꞌ. Nisha nisha parti paatoma naꞌcon parisitopiramahuëꞌ, naporama quëran naꞌcon naꞌcon catahuatënquëmaꞌ, noya noya acoantaponquëma huachi.

Zacarías 9:9

Sinioro chachin naporin: “Sion motopiaꞌhuaquë yaꞌhuëramasopita, capa cancantomiatocoꞌ. Quirosarinquë yaꞌhuëramasopitantaꞌ, capa cancantatoma cantacoꞌ. Niꞌcoꞌ. Copirnonëma huëꞌsarin. Inaso noyasáchin ninin. Yaꞌipi inimicoroꞌsa minsërin. Ina niponahuëꞌ, topinan piyapi pochin mora huiꞌnapishinquë yaꞌmitëahuaton, huëꞌsarin.

Números 24:19

Ina copirnosoꞌ, Cacopo shiin nisarin. Inasoꞌ, inimicoroꞌsa minsëapon. Ninanoroꞌsaquë yaꞌhuëpisoꞌ, yaꞌipi noyá tiquiapon,” tënin.

Mateo 21:33

Ina quëran itaantarin: “Aꞌnantaꞌ pënënto nanan, aꞌchinchinquëmaꞌ, natancoꞌ. Aꞌna quëmapi pancana imianatërin. Inaquë oparachin shaꞌnin. Nani pairapirahuaton, naꞌpi quëran nanpi ninin opa toꞌpoitonaꞌ huino nicacaiso marëꞌ. Naporahuaton, tori ninin. Inaquë piyapinën yaꞌhuaton nocorarin ama ihuacaiso marëhuëꞌ. Nani tiquihuachina, inpriatoroꞌsaꞌ acorin aꞌpaicaiso marëꞌ. ‘Sacatëramaso marëꞌ patoma nitërinsoꞌ canpitaoranquën marëꞌ macoꞌ. Patomachin cantaꞌ acotoco,’ itërin. Itahuaton, aꞌna parti paꞌnin huachi.

Marcos 12:1

Ina quëran Quisosori pënënto nanan shaꞌhuitaantarin: “Aꞌna quëmapi pancana iminaton, oparotërin. Nani pairapirahuaton, naꞌpi quëran nanpi ninin opa toꞌpoitonaꞌ, huino nicacaiso marëꞌ. Naporahuaton, naꞌpi quëran chachin tori ninin. Inaquë piyapinën yaꞌhuaton, nocorarin ama ihuacaiso marëhuëꞌ. Nani tiquihuachina, inpriatoroꞌsaꞌ acorin aꞌpaicaiso marëꞌ. ‘Sacatëramaso marëꞌ nitërinsoꞌ patomachin canpitaora marëꞌ macoꞌ. Patomachin cantaꞌ acotoco,’ itërin. Itahuaton, aꞌna parti paꞌnin.

Efesios 1:21

Isoroꞌpaquë nisha nisha huaꞌanoꞌsaꞌ, chirinchiroꞌsaꞌ, copirnoroꞌsaꞌ, inapita chiníquën nanantopi. Inapaquëntaꞌ chiníquën nanantopisopita yaꞌhuëpi. Quisocristoso nipirinhuëꞌ, inapita quëran chini chiníquën nanantërin. Co incari tërantaꞌ nanitërinhuëꞌ ina minsëcasoꞌ. Co onporontaꞌ aꞌnapitari ina minsëapihuëꞌ.

Apocalipsis 22:5

Co onporontaꞌ tashiaponhuëꞌ. Co huachi piꞌi nohuantarihuahuëꞌ. Co nanparin tërantaꞌ nohuantarihuahuëꞌ. Tata Yosëíchin aꞌpintarinpoaꞌ. Ichihuaꞌanëntarinpoaꞌ. Co onporontaꞌ pipiarihuahuëꞌ.