Miqueas 3:2 - Chayahuita (Shahui)

^2-3 Canpitaso napoaponahuëꞌ, co noyahuëꞌ nicacasoꞌ paꞌyatatomaꞌ, noya nicacasosoꞌ, co paꞌyatëramahuëꞌ. Nosha paꞌanaꞌpisoꞌ, ohuica tëparahuaton iꞌsorin. Inapotahuaton noshinën nanquitërin. Nanquitohuachina, nansëquënáchin acorinso pochin canpitanta piyapinëhuëpita aparisitëramaꞌ. Ohuica iꞌsorahuatona poꞌmocaiso marëꞌ yaquipiso pochin piyapinëhuëpita co tënororamahuëꞌ.

Miqueas 3:2 ပူးပေါင်းရင်းမြစ်များ

1 Reyes 21:20

Napotohuachina, paꞌsahuaton Siniorori napotërinsoꞌ Acapo shaꞌhuitonin. Napotohuachina Acapori itapon: —¡Quëmasoꞌ inimiconëhuënquën nipiranhuëꞌ, niquënanëchi paya! itërin. Napotohuachina Inari itapon: —Co Sinioro costarinsohuëráchin ninanso marëꞌ niquënanëꞌ.

Salmos 15:4

Co noyahuëꞌ nipisopita co paꞌyatacaso yaꞌhuërinhuëꞌ. Yosë paꞌyatopisopitasoꞌ, noya niꞌcaso yaꞌhuërin. Maꞌsona nicacasoꞌ shaꞌhuihuatëhuaꞌ, co canapirëhuahuë tëranta ananicaso yaꞌhuërin.

Ezequiel 34:3

Canpitaso nipirinhuëꞌ, co aꞌpairamahuëꞌ. Topinan shoꞌshoinëna oꞌotatë pochin nitëramaꞌ. Inapita anporonëna quëran huaita nicatoma aꞌmoramaꞌ. Amoshin nipisopita tëpatoma caꞌnamaꞌ.

Amós 4:1

Sanapiꞌsanquëmanta Samaria ninanoquë yaꞌhuëramasopita, natanco shaꞌhuichinquëmaꞌ: Canpitasoꞌ, Pasan parti ohuacaroꞌsa amonpiso pochin noya coshatatomaꞌ, amonamaꞌ. Popriyaroꞌsa nonpintatoma ihuaramaꞌ. Pahuantopisopitanta aparisitëramaꞌ. Soꞌyamanta huino quëshiimaso camairamaꞌ. Naporamaꞌ.

Amós 5:15

Co noyahuëꞌ ninamasopita noꞌhuicoꞌ. Noya nicacamasoso nipirinhuëꞌ, paꞌyatocoꞌ. Nanan anoyatahuatamaꞌ, noꞌtëquënáchin shaꞌhuicamasoꞌ cancantocoꞌ. Tapona naporamaso marëꞌ carayanquëma chaꞌëramasoꞌ, Yosë nosoroápirinquëmahuëꞌ. Inasoꞌ Sinioro. Yaꞌipi nanitaparin.

Miqueas 2:8

Sinioroso nipirinhuëꞌ, inapita pënënaton: “Inapo pënëntatoma canpitasoꞌ, piyapinëhuëpita tapiramaꞌ. Inapitasoꞌ co natantochináchinhuëꞌ, cancantatonaꞌ, co huachi yanatërinacohuëꞌ. Naporahuatoma piyapinëhuëpita ihuaramaꞌ. Ahuëtopi quëran huënantahuachinara: ‘Nani huachi inimiconënpoapita quëran chaꞌërëhuaꞌ. Noya yaꞌhuëarihua huachi,’ itëramaꞌ. Napotahuatomaꞌ, aꞌmopisopita naꞌcon naꞌcon paꞌtërinsoꞌ, osërëtëramaꞌ.

Lucas 19:14

Piyapinënpitaso nipirinhuëꞌ co nohuantopihuëꞌ. Noꞌhuipi. Napoaton comisionënpita aꞌpapi copirno shaꞌhuitacaiso marëꞌ. ‘Ina quëmapi co nohuantëraihuëꞌ huaꞌanëntiincoisoꞌ. Ama acoquësohuëꞌ,’ itoonpi.

Juan 18:40

Natanahuatonaꞌ, chiníquën aꞌpanitopi: —¡Ama ina ocoiquësohuëꞌ! ¡Parapasë ocoiquëꞌ! itopi. Inasoꞌ matararo nipirinhuëꞌ napotopi.

Juan 7:7

Canpitasoꞌ piyapiꞌsaꞌ co noꞌhuirinënquëmahuëꞌ. Caso nipirinhuëꞌ noꞌhuirinaco. “Co noyahuëꞌ ninamaꞌ,” itërahuëso marëꞌ noꞌhuirinaco.

Romanos 1:32

“Co noyahuëꞌ nipisopita chiminpachinara, anaꞌintacasoꞌ yaꞌhuërin,” tënin Yosë. Ina nitotaponaraihuëꞌ, inachachin niantapi. Naporahuatonaꞌ, aꞌnapitantaꞌ co noyahuëꞌ nipachinara, paꞌyatopi.

Romanos 12:9

Yaꞌipi piyapiꞌsaꞌ nosorocoꞌ. Cancanëma quëran huarëꞌ nosorocoꞌ. Co noyahuëꞌ ninamasopita aꞌpocoꞌ. Noyasáchin nicoꞌ.

2 Timoteo 3:3

Co piꞌpisha tërantaꞌ ninosoroapihuëꞌ. Co niquëꞌyaapihuëꞌ. Ninonpinapitonaꞌ nishaꞌhuirapiapi. Nimonshitapi. Niꞌni pochin cancantatonaꞌ niahuëapi. Noya nininsopita co piꞌpisha tërantaꞌ nohuantapihuëꞌ.