Mateo 9:38 - Chayahuita (Shahui)

³⁸ Napoaton Yosë nontocoꞌ aꞌnapitantaꞌ aꞌpaꞌin pënënchinaꞌ. Ina shaꞌhuitërinpoaꞌ aꞌchinacaso marëꞌ, itërin Quisosori.

Mateo 9:38 ပူးပေါင်းရင်းမြစ်များ

Miqueas 5:7

Naporoꞌ aꞌnapitaso nisha nisha nacionquë quëpapirinahuëꞌ, yaꞌhuëhuanoꞌsa ahuëaponaꞌ. Oꞌnan, poroncayo, inapitaso co piyapiꞌsa nohuantaiquë huarëꞌ anotërinhuëꞌ. Siniorori aꞌpaimahuachina anotërin. Inapochachin inapitantaꞌ, yaꞌhuëhuanoꞌsa ahuëatona napotaponaꞌ.

Mateo 9:37

Nosoroaton, caꞌtanoꞌsanënpita itërin: —Notohuaroꞌ piyapiꞌsaꞌ yaꞌhuëpirinahuëꞌ, co incariso tërantaꞌ catahuarinhuëꞌ Yosë huaꞌanëntërinquë yaꞌconacaiso marëꞌ. Isoroꞌpaꞌ panca imin pochin ninin. Cayarinsoꞌ manëso pochachin piyapiꞌsaꞌ manëꞌ Yosë imacaiso marëꞌ. Notohuaroꞌ piyapiꞌsaꞌ yaꞌhuaponaraihuëꞌ, caraíchin pënëntapi Yosë imacaiso marëꞌ.

Juan 20:21

—Sano cancantocoꞌ iyaroꞌsaꞌ. Tatahuë aꞌparincoso pochachin canpitantaꞌ aꞌpaaranquëmaꞌ piyapiꞌsaꞌ aꞌchintacamaso marëꞌ, itërincoi.

Juan 4:35

“Catapini yoqui pahuanarin cayarinsoꞌ macacasoꞌ,” topiramahuëꞌ. Ipora chachin cayarinso pochin nininsoꞌ macacasoꞌ yaꞌhuërin, tënahuë casoꞌ. ¡Niꞌcochi! Isoroꞌpaꞌ panca imin pochin ninin. Cayarinsoꞌ manëso pochachin piyapiꞌsaꞌ manëꞌ Yosë imacaiso marëꞌ. Ipora tahuëriꞌsa chachin naꞌa piyapiꞌsaꞌ yaꞌhuërarin Yosë imacaiso marëꞌ. Inapita aꞌchintacasoꞌ yaꞌhuërin.

Hechos 13:2

Aꞌna tahuëri co coshatatonaraihuëꞌ, Sinioro chinotopi. Napohuachinara, Ispirito Santori shaꞌhuitërin: “Pirnapi, Saono inapita nohuantërahuë paatonaꞌ, piyapiꞌsaꞌ aꞌchintacaiso marëꞌ. Ina marëꞌ inapita acorahuatomaꞌ, aꞌpacoꞌ paꞌinaꞌ,” itërin.

Hechos 8:4

Aꞌnaquënso nipirinhuëꞌ yanquëërahuatonaꞌ, paꞌsapi. Yosë nanamën shaꞌhuiraꞌpiapi.

1 Corintios 12:28

Yosë nisha nisha acorinpoaꞌ imarëhuasopita capini nicatahuacaso marëꞌ. Quisocristo isoroꞌpaquë nipon, aꞌnaquën acorin paatonaꞌ nanamën aꞌchinacaiso marëꞌ. Inapitaꞌton Yosëri acorin. Ina quëran aꞌnapitantaꞌ acorin pënëntacaiso marëꞌ. Naporahuaton, aꞌnaquëontaꞌ acorin Quisocristo nanamën aꞌchinacaiso marëꞌ. Yosë nohuanton, aꞌnaquën sacaiꞌ nininsoꞌ nanitaparin. Aꞌnaquën acorin caniaꞌpiroꞌsaꞌ anoyatacaso marëꞌ. Aꞌnaquën acorin aꞌnapita catahuacaso marëꞌ. Aꞌnaquën acorin huaꞌan pochin nicacaso marëꞌ. Aꞌnaquën Yosë nohuanton, nisha nananquë nonpiso pochin nonin.

Efesios 4:11

Naporahuaton, nisha nisha acorinpoaꞌ nicatahuacaso marëꞌ. Aꞌnaquën Quisocristori chachin aꞌparin aꞌchinacaso marëꞌ. Aꞌnaquëontaꞌ Ispirito Santo nohuanton, Yosë yonquirinso chachin shaꞌhuirin. Aꞌnaquëontaꞌ nisha nisha parti paaton, Yosë nanamën aꞌchinaꞌpiarin. Aꞌnaquëontaꞌ ina nohuanton, yaꞌhuëpiquë yaꞌhuëhuanoꞌsaꞌ nani tahuëri catahuapi noya imacaiso marëꞌ. Aꞌnaquëontaꞌ yaꞌipi Yosë nanamën aꞌchintapi.

2 Tesalonicenses 3:1

Iporasoꞌ iyaroꞌsaꞌ, quiya marëntaꞌ Yosë nontocoꞌ nanamën noya aꞌchinaꞌhuaiso marëꞌ. Yaꞌipi parti nahuinacaso yaꞌhuërin. Canpitasoꞌ natanatomacoi, noya imaramaꞌ. Aꞌnapitantaꞌ aꞌchintohuatoi, noya nohuanchinaꞌ. Canpita pochachin noya imainaꞌ. Ina marëꞌ Yosë nontocoꞌ.