Mateo 9:13 - Chayahuita (Shahui)

¹³ Oshahuanoꞌsaꞌ pënënaꞌhuaso marëꞌ oꞌmarahuë. “Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ,” itërahuë. Aꞌnapitasoꞌ: “Quiyasoꞌ co oshahuancoihuëꞌ,” topiso marëꞌ co naꞌcon aꞌchintërahuëꞌ. Paatomaꞌ, Yosë quiricanën noya nitotocoꞌ noꞌtëquën yonquicamaquë. Inaquë iráca ninshitopi: “Aꞌnaquën topinan quëran chinotatonaco oshanëna marëꞌ maꞌsha tëpapirinahuëꞌ, co aꞌnapita nosoropihuëꞌ. Nosorotacasoꞌ naꞌcon naꞌcon nohuantërahuë,” tënin Yosë, itërin Quisosori.

Mateo 9:13 ပူးပေါင်းရင်းမြစ်များ

Oseas 6:6

Chinotatomaco maꞌsha tëpamasoꞌ, co onpopinchin nohuantërahuëꞌ. Nosoroamacosoꞌ tëhuënchinsoꞌ, naꞌcon naꞌcon nohuantërahuë. Oshanëma marënta maꞌsha tëparahuatoma yaꞌipi ahuiquitamasoꞌ, co onpopinchin nohuantërahuëꞌ. ‘Inasoꞌ Yosë niꞌton, natëaꞌhuaiso yaꞌhuërin,’ taꞌcamaso naꞌcon naꞌcon nohuantërahuë,” itërinquëmaꞌ.

Mateo 12:3

Napotohuachinara, itërin: —Yosë quiricanën ¿co nontëramahuëꞌ ti? Iráca Tapi tanahuachina,

Mateo 12:5

Isontaꞌ yonquicoꞌ. Nani chinoto tahuëri corto huaꞌanoꞌsaꞌ Yosë pëinënquë sacatopi. Piyapiꞌsaꞌ oshanëna marëꞌ ohuicaroꞌsaꞌ tëpapi. Sacatopirinahuëꞌ, co ina marëꞌ oshahuanpihuëꞌ. ¿Co inantaꞌ nontëramahuëꞌ ti?

Mateo 12:7

Yosë chachin naporin: “Piyapiꞌsaꞌ nosorocamasoꞌ naꞌcon naꞌcon nohuantërahuë. Maꞌsha oshanëma marëꞌ tëparahuatoma yaꞌipi ahuiquitamasoꞌ, co onpopinchin nohuantërahuëꞌ,” tënin quiricanënquë. Nontopiramahuëꞌ, co natantochináchinhuëꞌ cancantëramaꞌ. Noꞌtëquën yonquiramaꞌ naporini, co topinan quëran shaꞌhuirapiitomahuëꞌ.

Mateo 19:4

—¿Maꞌtaꞌ Yosë quiricanën quëran shaꞌhuitërinpoaꞌ? Iráca yaꞌnan piyapi nipon, catoíchin Yosëri ninin. Aꞌna quëmapi, aꞌna sanapi, inaíchin ninin.

Mateo 21:42

—Iráca Yosë quiricanënquë ninshitërinsoꞌ ¿co nontëramahuëꞌ ti? Ninshitaton, naporin: “Naꞌpi quëran yapëihuachina, aꞌna naꞌpi quënanpirinahuëꞌ, pëinaꞌpiroꞌsaꞌ co nohuantopihuëꞌ. ‘Napoonin,’ taꞌtonaꞌ, tëꞌyatopirinahuëꞌ. Huaꞌanëni maantarahuaton, ‘Iso naꞌpi naꞌcon naꞌcon nohuantërahuë pëicaꞌhuaso marëꞌ,’ taꞌton, noya acoantarin. Yosëri chachin inapotërin. Napoaton ‘ma noya’ tënëhuaꞌ,” tënin quiricanënquë.

Mateo 3:2

—Yosë huaꞌanëntiinpoasoꞌ tahuëri nani yaꞌcariarinpoaꞌ. Napoaton co noyahuëꞌ yonquiramasopita naniantatomaꞌ, Yosë chachin tahuërëtantaco huachi, itarin. Nani tahuëri ina pochin pënënárin.

Mateo 3:8

Co noyahuëꞌ yonquiramasopita naniantatomaꞌ, noya nico huachi.

Mateo 4:17

Naporo quëran huarëꞌ Quisosori pënënarin. —Iso tahuëriꞌsaꞌ Yosë yahuaꞌanëntarinquëmaꞌ. Napoaton yaꞌipi co noyahuëꞌ yonquiramasopita naniantatomaꞌ, Yosë chachin tahuërëtaantaco huachi, itëraꞌpiarin pënënaton.

Marcos 12:26

Chiminpisopita tëhuënchachin nanpiantarapi. ¿Coꞌna ina Moisësë ninshitërinquë nontëramahuëꞌ? Sarsa naraꞌhuaya orotarinsoꞌ nicasoꞌ, Yosëri nontërin. “Casoꞌ Yosëco. Apraan chinotarinco. Isaco, Cacopo, inapitantaꞌ chinotarinaco,” itërin Yosëri.

Marcos 12:33

Yaꞌipi cancanënpoa quëran, yaꞌipi yonquinënpoa quëran, yaꞌipi chinirëhua quëran, yaꞌipi inaquëranpita nosoromiatacasoꞌ yaꞌhuërin. Naporahuaton, canpoara ninosororëso pochachin aꞌnapitantaꞌ nosorocasoꞌ yaꞌhuërin. Iráca Moisësë pënëninpoaꞌ. “Yosë yachinotohuatamaꞌ, oshanëma marëꞌ maꞌsha tëpatomaꞌ, ahuiquitocoꞌ,” itërinpoaꞌ. Inapopirëhuahuëꞌ, co Yosë nosorohuatëhuahuëꞌ, co piyapiꞌsantaꞌ nosorohuatëhuahuëꞌ, Yosësoꞌ co onpopinchin noya niꞌsarinpoahuëꞌ, itërin.

Marcos 2:17

Natanahuaton, Quisosori itapon: —Isopitasoꞌ tëhuënchachin nohuantërinaco imainacosoꞌ. Niꞌcoꞌ. Caniaꞌpiroꞌsasoꞌ notoro nohuantopi. “Co caniorahuëꞌ,” topatërasoꞌ, co notoro nohuantërëhuëꞌ. Inapochachin cantaꞌ oshahuanoꞌsaꞌ pënënaꞌhuaso marëꞌ oꞌmarahuë. “Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ,” itërahuë. Aꞌnapitaso nipirinhuëꞌ: “Quiyasoꞌ noyacoi,” topiso marëꞌ co naꞌcon aꞌchintërahuëꞌ, itërin.

Lucas 10:26

—Iráca Yosë quiricanën quëran ninshitaton, pënëninpoaꞌ. ¿Maꞌtaꞌ tënin? itërin.

Lucas 19:10

Naꞌa piyapiꞌsaꞌ co Yosë natëtonahuëꞌ, chihuëpi pochin nipi. Inapita yonicaꞌhuaso marëꞌ oꞌmarahuë. Cancanënaꞌ anoyacancantaꞌhuaso marëꞌ oꞌmarahuë, tënin Quisoso.

Lucas 24:47

Ina nanan chachin shaꞌhuicasoꞌ yaꞌhuërin. “Co noyahuëꞌ yonquiramasopita naniantohuatamaꞌ, oshanëmaꞌ inquitarinquëmaꞌ,” itocoꞌ. Quirosarinquëꞌton shaꞌhuicasoꞌ yaꞌhuërin. Ina quëran nisha nisha nananquë nonpisopita shaꞌhuitacasoꞌ yaꞌhuërin.

Lucas 5:31

Natanahuaton, Quisosori itërin: —Isopitasoꞌ tëhuënchachin nohuantërinaco imainacosoꞌ. Niꞌcoꞌ. Caniaꞌpiroꞌsaꞌ notoro nohuantopi. “Co caniorahuëꞌ,” topatëra, co notoro nohuantërëhuëꞌ.

Lucas 5:32

Oshahuanoꞌsaꞌ pënënaꞌhuaso marëꞌ oꞌmarahuë. “Co noyahuëꞌ yonquiramasopita naniantatomaꞌ, Yosë tahuërëtantacoꞌ,” itërahuë. Aꞌnapitasoꞌ: “Quiyasoꞌ noyacoi,” topiso marëꞌ co naꞌcon aꞌchintërahuëꞌ, itërin.

Juan 10:34

Napotohuachinara, itantarin: —Yosë pënëntërinsoꞌ quiricaquë nani ninshitopi: “Canpitasoꞌ aꞌnaya aꞌnayanquëmaꞌ Yosë pochin ninamaꞌ,” tëninsoꞌ nontëramaꞌ.

Hechos 11:18

Natanahuatonaꞌ, co huachi noꞌhuipihuëꞌ. —Tëhuënchachin Yosë nohuanton, nisha piyapiꞌsantaꞌ co noyahuëꞌ yonquipisopita naniantatonaꞌ, imasapi. Inari catahuarin niꞌton, nanpimiatapi. Ma noyacha Yosëso paya, itopi.

Hechos 2:38

Napotohuachinara, Pitrori itaantarin: —Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ.

Hechos 20:21

Co cotioroꞌsaráchin pënënahuëꞌ. Cricoroꞌsantaꞌ pënënahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Sinioro Quisoso natëco huachi. Inasáchin anoyacancantërinpoasoꞌ,’ itëranquëmaꞌ. Yaꞌipinquëmaꞌ aꞌchintëranquëmaꞌ.

Hechos 3:19

Napoaton iyaroꞌsaꞌ yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ oshanëmaꞌ inquichinquëmaꞌ.

Hechos 5:31

Inapotahuaton, inchinanën quëran acorin. Inasoꞌ huaꞌanënpoaꞌ niꞌton, natëcaso yaꞌhuërin. Nóya nicaton yaꞌipi israiroꞌsanpoaꞌ nichaꞌëinpoaso marëꞌ acorin. Co noyahuëꞌ yonquirëhuasopita naniantohuatëhuaꞌ, oshanënpoaꞌ inquitarinpoaꞌ.

2 Pedro 3:9

Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.