Mateo 8:20 - Chayahuita (Shahui)

²⁰ —Sacaiꞌ imancosoꞌ iyasha, tënahuë. Anashiroꞌsaꞌ, huëꞌëshinantëna yaꞌhuëtopi, inaquë huëꞌëpi. Inairaroꞌsantaꞌ pëꞌpëtëna yaꞌhuëtopi. Caso nipirinhuëꞌ Yosë quëran quëmapico niporahuëꞌ, co pëiꞌ yaꞌhuëtërincohuëꞌ. Paꞌsápato, co yaꞌhuëmiatërahuëꞌ, itërin.

Mateo 8:20 ပူးပေါင်းရင်းမြစ်များ

Salmos 104:12

I yonsanquë inairaroꞌsa huaꞌhuatopi. Nararoꞌsaquë huënsëatonaꞌ, përarantapi.

Salmos 104:17

Inaquë inairaroꞌsa huaꞌhuatopi. Pino nararoꞌsaquëntaꞌ, yoꞌhuin tamëroꞌsa huënsëpi.

Salmos 40:17

Caso nipirinhuëꞌ, maꞌsha onpoato nosorotárahuë. Ama Sinioro naniantocosohuëꞌ. Quëmasáchin catahuatonco nichaꞌëranco. ¡Manóton catahuaco huachi!” itërahuë.

Salmos 69:29

Caso canioto, co napion cancantápirahuëꞌ, quëma Yosënëhuënquën anoyatahuatonco nichaꞌëco.

Salmos 84:3

Shinihuatëꞌ, pëirashiꞌ, inapitanta artaronënpitaquë pëꞌpëtën acoatonaꞌ, huaꞌhuatopi. Quëmaso huaꞌanëhuëinquën, Yosënëhuëinquën. Sinioronquën niꞌton, yaꞌipi nanitaparan.

Daniel 7:13

Huëꞌëhuëquë inapita nicasoco, aꞌnanaya, aꞌnara quëmapi chitoro huáncana oꞌmararin. Oꞌmarahuaton Ansiano huënsëarinso yaꞌcariꞌ, paꞌnin. Ina quëran ayaꞌcaritopi huachi.

Mateo 12:32

Casoꞌ Yosë quëran quëmapico nipirahuë pinopatamaco, ina marëꞌ oshahuanpiramahuëꞌ, oshanëma marëꞌ sëtohuatamaꞌ, inquitarinquëmaꞌ. Nipirinhuëꞌ, Ispirito Santo pinopatamaꞌ, co oshanëmaꞌ inquitarinquëmahuëꞌ. Co onporontaꞌ inquitarinquëmahuëꞌ,” itërin Quisosori.

Mateo 12:40

Iráca Conasë marëquë tëꞌyaitohuachinara, panca sami pochin nininsoari miꞌtërin. Cara tahuëri tashirë chachin inaquë yaꞌhuapirinhuëꞌ. Ina quëran Yosë nohuanton, chaꞌërin. Inapochachin cantaꞌ Yosë quëran quëmapico niꞌto, chiminpato, cara tahuëri tashirë chachin acoporoꞌ yaꞌhuaporahuëꞌ, chaꞌësarahuë huachi.

Mateo 12:8

Yosë quëran quëmapico niꞌto, chiníquën nanantërahuë. Chinoto tahuëri maꞌsona noya nicacasoꞌ shaꞌhuichinquëmaꞌ. Co nicacasohuë nininsontaꞌ shaꞌhuichinquëmaꞌ, itërin.

Mateo 13:37

“Inta nipachin, aꞌchinchinquëmaꞌ. Patron ashaꞌtërinso pochin piyapiꞌsaꞌ aꞌchintërahuë. Yosë quëran quëmapico niꞌto, nanamën aꞌchinaꞌhuaso marëꞌ oꞌmarahuë.

Mateo 16:13

Ina quëran Sisaria Pinipo parti paꞌpi. Inaquë caꞌtanoꞌsanënpita itapon: —Nani maꞌsha nanitaparahuëso marëꞌ, ¿inpochintaꞌ piyapiꞌsaꞌ cancantërinaco? itërin.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 17:9

Ina quëran motopi quëran nohuaramapona pochin, Quisosori itërin: —Achin niꞌnamasoꞌ, ama insontaꞌ shaꞌhuitocosohuëꞌ. Yosë quëran quëmapico niꞌto, aꞌna tahuëri nanpiantarahuë. Naporo huarëꞌ aꞌnapita shaꞌhuitocoꞌ, itërin.

Mateo 19:28

—Tëhuënchachin iyaroꞌsaꞌ canaaramaꞌ. Yosë quëran quëmapico niꞌto, aꞌna tahuëri yaꞌipiya anoyatarahuë. Naporoꞌ noya noya yaꞌnoato, huaꞌanëntacasoꞌ shiraquë huënsëarahuë. Inaquë coisë pochin noꞌtëquën shaꞌhuitarahuë. Canpitantaꞌ acoaranquëmaꞌ yaꞌipi israiroꞌsaꞌ shonca catoꞌ huënton chachin nininsoꞌ huaꞌanëntacamaso marëꞌ. Shonca catonquëmaꞌ napoaramaꞌ.

Marcos 8:38

Ipora tahuëriꞌsaꞌ yaꞌhuëpisopita co noyahuëꞌ nipi. Nitëhuananpitopisopita pochin cancantopi. Tapayatomaco aꞌpohuatamaco, aꞌna tahuëri carimantaꞌ tapayatënquëmaꞌ, aꞌpoaranquëmaꞌ. Nanamëhuë aꞌpohuatamaꞌ, carimantaꞌ oꞌmantahuato, aꞌpoaranquëmaꞌ. Yosë quëran quëmapico niꞌto, aꞌna tahuëri oꞌmantararahuë. Tatahuë pochin huënaratahuato, noya anquëniroꞌsapitaroꞌco oꞌmantararahuë, itërin.

Lucas 12:8

Ina quëran taantarin: “Tëhuënchachin iyaroꞌsaꞌ, ‘Quisoso imarahuë,’ topatamaꞌ, ayaroꞌ tahuëri cantaꞌ nohuantaranquëmaꞌ. ‘Imarinco mini,’ itarahuë Yosëꞌpaꞌ. Anquëniroꞌsantaꞌ natanapi.

Lucas 18:8

Tahuëri nanihuachin, aꞌnaroáchin anaꞌintarin. Napoaponahuëꞌ oꞌmantahuato, ¿naꞌa yaꞌpitaꞌmaꞌ natëarinaco quënaimapo to?” itërin Quisosori.

Lucas 2:12

Inaquë paꞌpatamaꞌ, huaꞌhuishin quënanconaramaꞌ. Nëꞌmëtërinquë soꞌquëëtahuatonaꞌ, ohuaca coshatërinquë acopi. Ina quëran nohuitaramaꞌ,” itërin.

Lucas 2:16

Manorahuatonaꞌ, paꞌpi. Canconahuatonaꞌ, huaꞌhuasha, Maria, Cosi, inapita quënanconpi. Huaꞌhuasha ohuaca coshatërinquë quëhuëánin.

Lucas 2:7

Paninan huairin, quëmapiaꞌhuaya. Nëꞌmëtërinquë soꞌquëëtahuaton, nonaꞌhuayaquë acorin, ohuaca coshatërinquë. Huëꞌëcaisoꞌ pëiꞌ nani yaꞌsotopi niꞌton, co inaquë huëꞌëpatërinhuëꞌ. Napoaton nonaꞌhuayaquë huaꞌhuin acorin.

Lucas 21:36

Napoaton noya cancantatomaꞌ, Yosë nontocoꞌ achinicancainquëmaꞌ chaꞌëcamaso marëꞌ. Yosë quëran caso quëmapico niꞌto, co imapisopitahuëꞌ anaꞌintarahuë. Apira apira Yosë nontohuatamaꞌ, naporoꞌ tahuëri co tapanatomahuëꞌ, noya huaniparamaco,” tënin Quisoso.

Lucas 8:3

Coanantaꞌ imarin. Cosa saꞌin inasoꞌ. Soꞌinsoꞌ yaꞌipi Irotisë maꞌshanënpita aꞌpairin. Sosanantaꞌ imarin. Inapita imatonaꞌ, inahuara coriquinëna quëran cosharoꞌ paꞌanpi Quisoso, caꞌtanoꞌsanënpita, inapita coshatacaiso marëꞌ.

Lucas 9:58

—Sacaiꞌ imancosoꞌ, tënahuë. Maꞌsha tananquë yaꞌhuërinsopita huëꞌëshinantëna yaꞌhuëtopi huëꞌëcaiso marëꞌ. Inairantaꞌ pëꞌpëtën yaꞌhuëtërin. Caso nipirinhuëꞌ Yosë quëran quëmapico niporahuëꞌ, co pëiꞌ yaꞌhuëtërincohuëꞌ. Paꞌsápato, co yaꞌhuëmiatërahuëꞌ, itërin.

Juan 1:51

Ina quëran itaantarin: —Noꞌtëquën itëranquëmaꞌ. Iráca Cacopo nanpisoꞌ, piꞌiroꞌtëꞌ niꞌsoarin. Niꞌsoatohuachina, anquëniroꞌsari huëcapaimapi. Huëcapaimarahuatonaꞌ, panantarapi. Inapochachin iporasoꞌ Yosë quëran quëmapico niꞌto, oꞌmarahuë Yosë anohuitaꞌhuanquëmaso marëꞌ. Yaꞌipi ninahuësoꞌ niꞌsaramaꞌ, itërin Quisosori.

Juan 12:34

Ina quëran nataninsopitari itaponaꞌ: —Cristo nanpimiatarin. Co onporontaꞌ chimianinhuëꞌ, tënai. Yosë quiricanënquë naporin, nontërai. Quëmaso nipirinhuëꞌ nisha nonan. “Yosë quëran quëmapico niporahuëꞌ, inápaquë achinpiarinaco,” tënan. ¿Onpoatontaꞌ naporan? ¿Ma quëmapinquëntaꞌ quëmasoꞌ? itopi.

Juan 13:31

Cotasë nani pipihuachina, Quisoso itantarincoi: —Yosë quëran quëmapico niꞌto, apira noꞌtëquën Yosë natëarahuë. Napoaton nóya niꞌsarinco. Piyapiꞌsaꞌ niꞌpachinaco: “Ma noyacha Yosësoꞌ niꞌton, naꞌcon catahuarin paya,” tosapi.

Juan 3:13

Co inso piyapi tërantaꞌ inápaquë pantarinhuëꞌ. Casáchin ina quëran oꞌmarahuë. Yosë quëran quëmapico niꞌto, inápa quëran oꞌmarahuë. Napoaton casáchin inápaquë yaꞌhuërinsoꞌ aꞌchintaranquëmaꞌ.

Juan 3:14

Iráca shimashonëmapita inotëro parti paasoiꞌ, naꞌa piyapiꞌsaꞌ yaꞌhuanapi. Co noyahuëꞌ cancantopi niꞌton, Yosëri anaꞌintërin. Naꞌa yaꞌhuanoꞌsaꞌ huëcatonaꞌ, quëtëraꞌpiapi. Ina quëran Moisësë yaꞌhuan nonanpisoꞌ ninin. Huaꞌna quëran nisahuaton, naraquë achinpirin. Achinpirahuaton, inápaquë ahuanirin. Inapochachin Yosë quëran quëmapico niporahuëꞌ, aꞌna tahuëri inápaquë achinpiarinaco.

Juan 6:27

Cosharomia aꞌnaroáchin chanatërin. Ama inasáchin nohuantocosohuëꞌ. Cosharo pochin nininsoꞌ yaꞌhuërin. Cancanëma marëꞌ quëtaranquëmaꞌ. Ina co onporontaꞌ chanatarinhuëꞌ. Yaꞌhuëtohuachinquëmaꞌ, Yosë nohuitatomaꞌ nanpimiatarama. Ina naꞌcon naꞌcon yonquicoꞌ. Yosë quëran quëmapico niꞌto, quëtaranquëmaꞌ. Ina marëꞌ Tata Yosë acorinco. Ina nohuanton, nani maꞌsha nanitaparahuë nohuitamacoso marëꞌ, itërin.

Juan 6:53

—Noꞌtëquën itëranquëmaꞌ. Casoꞌ Yosë quëran quëmapico niꞌto, yaꞌipi cancanëma quëran yonquico. Coꞌsoꞌ nonëhuë caꞌnëso pochin nitohuatamahuëꞌ, huënainëhuëntaꞌ co oꞌorëso pochin nitohuatamahuëꞌ, co onporontaꞌ nanpimiataramahuëꞌ.

Juan 6:62

Yosë quëran quëmapico niꞌto, aꞌna tahuëri Yosë yaꞌhuërinꞌpaꞌ panantararahuë. Ina niꞌpatamaꞌ ¿maꞌtaꞌ yonquiaramaꞌ?

Hechos 7:56

—Niꞌcochi iyaroꞌsaꞌ. Piꞌiroꞌtë niiꞌsoatërin niꞌnahuë. Quisoso chachin Yosë inchinanën quëran huaniarin, quënanahuë, itërin Istipani.

2 Corintios 8:9

Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.