Mateo 8:16 - Chayahuita (Shahui)

¹⁶ Iꞌhuanahuanquë yatashirahuasoꞌ, naꞌa piyapiꞌsaꞌ huëcatonaꞌ, caniaꞌpiroꞌsaꞌ quëpi Quisosori anoyatacaso marëꞌ. Aꞌnaquën sopairi yaꞌcoancantërin niꞌton, co inaora yonquirinsoꞌ yonquirinhuëꞌ. Quisosori topinan noncharapirinhuëꞌ, sopairoꞌsaꞌ pipipi. Yaꞌipi caniaꞌpiroꞌsaꞌ anoyatërin.

Mateo 8:16 ပူးပေါင်းရင်းမြစ်များ

Éxodo 15:26

“Caso Sinioroco. Canpitaso chinotëramaco. Casáchin nanitërahuë anoyatacasoꞌ. Nonahuësopita nóya natancoꞌ. Noya natanatomaꞌ, nohuantërahuëso nicoꞌ. Camaitërahuësopita natëtoma noya nipatamaꞌ, carinquëmanta noya niꞌsaranquëmaꞌ. Noya nicatënquëma canpitasoꞌ, catahuaaranquëmaꞌ. Iquipitoroꞌsasoꞌ, nisha nisha quëran anaꞌintërahuë. Canpitaso co ina pochin anaꞌintaponquëmahuëꞌ,” itërin.

Mateo 12:22

Ina quëran aꞌna quëmapi quëpi Quisosori anoyatacaso marëꞌ. Sopairi yaꞌcoancantërin niꞌton, co nanitërinhuëꞌ nonacasoꞌ. Co quënantacaso tërantaꞌ nanitërinhuëꞌ. Sopai aꞌparahuaton, aꞌnaroáchin anoyatërin. Noya niꞌtërin. Nonacasontaꞌ nanitërin huachi.

Mateo 14:14

Quisososo canconahuaton nonshipirinhuëꞌ, notohuaroꞌ piyapiꞌsaꞌ quënanconin. Quënanconahuaton, naꞌcon nosororin. Noya nontaton, yaꞌipi caniaꞌpiroꞌsaꞌ anoyatërin.

Mateo 8:15

Quisosori maimirarahuaton, aꞌnaroáchin anoyatërin. Co huachi saporinhuëꞌ. Huanirahuaton, inari chachin aꞌcarin, oꞌshitërin, napotërin.

Mateo 8:33

Ina niꞌsahuatonaꞌ, aꞌpainaꞌpiroꞌsasoꞌ paꞌyanpi. Paꞌyanatona ninanoꞌpaꞌ taꞌapi. Inaquë yaꞌipiya shaꞌhuiconpi. —Sopairoꞌsasoꞌ quëmapiꞌsa quëran pipirahuatonaꞌ, coshiroꞌsaquë yaꞌconconpi. Napohuachinara, huaꞌyantatonaꞌ, tahuan paꞌtopi. Yaꞌipi chimiitopi, itopi.

Mateo 9:2

Inaquë catapini quëmapiꞌsari huëcatonaꞌ, apia quëpi. Pëꞌsaraꞌhuaya pochin nininquë quëpi. Huaꞌquiꞌ co nanitërinhuëꞌ huanicasoꞌ, quëhuënárin. “Ma noya isopita natërinaco,” taꞌton, Quisosori caniaꞌpi itërin: —¡Noya cancantëquëꞌ, apiaꞌhua! Apiramiáchin quëma oshanën inquitaranquën, itërin.

Marcos 2:3

Naporo chachin catapini quëmapiꞌsaꞌ huëcatonaꞌ, apia pëꞌsaraꞌhuayaquë quëshipi. Huaꞌquiꞌ co nanitërinhuëꞌ huanicasoꞌ, quëhuënárin.

Marcos 9:25

Naꞌa piyapiꞌsaꞌ niyontonquirapi niꞌsahuaton, aꞌnaroáchin sopai itapon: —Quëmasoꞌ sopainquën. Piyapi yaꞌcoancantohuatana, anëꞌhuëran. Napoaton carinquën napotaranquën. Iso huaꞌhuasha quëran pipirahuaton, ama huachi onporontaꞌ yaꞌcoancantantaquësohuëꞌ, itërin.

Lucas 13:12

Quisosori quënanahuaton, përarin. Huëcapaihuachina: —Nani imoya noyatëran, itërin.

Lucas 4:40

Iꞌhuanahuanquë piꞌi yayaꞌconahuasoꞌ, naꞌa caniaꞌpiroꞌsaꞌ nisha nisha caniori maninsopita Quisoso quëshipi. Napohuachinara, aꞌnaya aꞌnaya sëꞌhuarahuaton, yaꞌipiya anoyatërin.

Lucas 4:41

Sopairi yaꞌcoancantërinsopitantaꞌ quëntapi. Quisosori nontohuachina, sopairoꞌsaꞌ pipipi. Yapipihuachinaꞌ, chiníquën nontapi. —Quëmasoꞌ Yosë huiꞌninquën, itopi. Yosëri aꞌpaimarinsoꞌ nitotatonaꞌ, napotopi. Napoaton Quisosori itapon: “Taꞌtëquëꞌ. Ama insontaꞌ shaꞌhuitëquësohuëꞌ,” itohuachina, taꞌtopi huachi.

Hechos 5:15

“Quisosori catahuarin niꞌton, caꞌtanoꞌsaꞌ nani maꞌsha nanitapapi,” taꞌtonaꞌ, naꞌa caniaꞌpiroꞌsaꞌ quëntarahuatonaꞌ, cachiquë acoonpi anoyatacaiso marëꞌ. Aꞌnaquën nantëtërë chachin acoonpi. Aꞌnaquëontaꞌ sahuanasaquë tërantaꞌ aquëhuënpi. “Pitro paꞌpachin, huaꞌyanën tërantaꞌ tashinantohuachin, noyatapon nimara,” taꞌtonaꞌ, quëntapi.