Mateo 5:5 - Chayahuita (Shahui)

⁵ Sano piyapi nipatamaꞌ, Yosë noya niꞌsarinquëmaꞌ. Naporahuaton, aꞌna tahuëri nasharoꞌpaquë yaꞌhuëmiataramaꞌ.

Mateo 5:5 ပူးပေါင်းရင်းမြစ်များ

Salmos 22:26

Aꞌnaquëmantaꞌ, aꞌnapita aparisitápirinënquëmahuëꞌ, noyá natëaquë huarëꞌ coshatoco huachi. Sinioro yoniramasopita huaꞌqui tahuëri nicatomaꞌ, ina chinotocoꞌ.

Salmos 37:11

Sano piyapiroꞌsaso nipirinhuëꞌ, iso noꞌpaꞌ huaꞌanëntaponaꞌ. Naporahuatonaꞌ, sano cancantapi huachi.

Salmos 37:22

Siniorori catahuarinsopitasoꞌ, iso noꞌpaꞌ huaꞌanëntaponaꞌ. Inari co noyahuë yonquirapiton noꞌhuirinsopitasoꞌ, taꞌhuantaponaꞌ.

Salmos 37:29

Noya nipisopitasoꞌ, iso noꞌpaꞌ huaꞌanëntaponaꞌ. Naporahuatonaꞌ, inaquë yaꞌhuëmiataponaꞌ.

Salmos 37:34

Quëmanta Sinioro natëton ina ninaquëꞌ. Inapohuatan Sinioro noya acoarinquën. Inari chachin iso noꞌpaꞌ huaꞌanëntacaso marëꞌ quëtarinquën. Inpioroꞌsa ataꞌhuantërinsoꞌ, quëmaora yaꞌpiran quëran chachin niꞌsaran.

Salmos 37:9

Co noyahuëꞌ nipisopitasoꞌ, yaꞌhuëpiso noꞌpa quëran aꞌpaponaꞌ. Sinioro chinotopisopitaso nipirinhuëꞌ, yaꞌhuëpisoꞌ noꞌpaꞌ huaꞌanëntaponaꞌ.

Salmos 69:32

Ina nicatona parisitopisopita capa cancantapi. Chinotërinënquënsopita chiníquën cancantapi.

Isaías 11:4

Noya coisë pochin, sanpatopisopita maꞌsona onpotacasoꞌ shaꞌhuitapon. Popriyatopisopitanta paꞌpoyaton, catahuapon. Noꞌhuitërayaroꞌsasoꞌ, topinan noncharapirinhuëꞌ anaꞌintapon. Co noyahuëꞌ nipisopitantaꞌ, pihuitëꞌ aꞌparëso pochin ataꞌhuantapon.

Isaías 60:21

Yaꞌipi inaquë yaꞌhuëramasopita, noya nicatënëmaꞌ, natëponëmaꞌ. Noꞌpanëma huaꞌanëntomiataramaꞌ. Shanëhuë, papoyantërinso pochin nisaramaꞌ. Chini chiníquën nanantërahuësoꞌ aꞌnocaꞌhuaso marëꞌ carima noya noya acoaranquëmaꞌ.

Isaías 61:1

Sinioro piyapinën naporin: “Sinioro ispiritonën yaꞌcoancantërinco niꞌton, noya catahuarinco. Ina chachin acorinco popriyaroꞌsa noya nanan shaꞌhuitaꞌhuaso marëꞌ. Aparisitopisopita catahuacaꞌhuaso marëꞌ acorinco. Yaꞌhuëpi quëran quëparahuatona huaꞌanëntapirinahuëꞌ, yaꞌhuëpiquë chachin paantacaiso shaꞌhuitarahuë. Tashinan pëiquë pochin yaꞌhuëapisopitantaꞌ, ina quëran pipicaisoꞌ shaꞌhuitarahuë.

Números 12:3

Moisësësoꞌ, yaꞌipi piyapiꞌsa quëran sano sano quëmapi ninin.

Mateo 11:29

Co carinquëmaꞌ nocananquëmahuëꞌ. Sanoanan quëran pënënanquëmaꞌ. Casáchin natanco aꞌchinchinquëmaꞌ. Nani tahuëri catahuaranquëmaꞌ noya cancantacamaso marëꞌ. Ina pochin imapatamaco, sano cancantarama huachi.

Romanos 4:13

Iráca Yosëri Apraan itapon: “Nosoroatënquën, páncaroꞌpaꞌ quëchinquën. Piyapinëhuë pochin niꞌsaranquën. Quëma shinparinpitantaꞌ noya catahuaarahuë. Aꞌna tahuëri yaꞌipiroꞌpaꞌ huaꞌanëntaponaꞌ,” itërin. “Yosë co onporontaꞌ nonpintarincohuëꞌ,” tëninso marëꞌ Yosëri noya niꞌnin. Co naporoꞌ Moisësë pënënchátërarinhuëꞌ. Napoaton co ina natërinso marëꞌ Apraan noya niꞌninhuëꞌ.

Gálatas 5:23

Ispirito Santo natëhuatëhuaꞌ: “Casoꞌ noya noyaco,” co tëcarihuahuëꞌ. Sano piyapi nicarihuaꞌ. Co noyahuëꞌ nicacasoꞌ yonquipirëhuahuëꞌ, ina catahuarinpoaꞌ naniantacasoꞌ. Inapohuatëhuaꞌ, Yosë noya niꞌsarinpoaꞌ. Co pënëinënpoasoꞌ yaꞌhuaponhuëꞌ.

Efesios 4:2

“Yosëíchin catahuarinpoaꞌ noya nicacasoꞌ,” taꞌtomaꞌ, ama aꞌnapita nocancosohuëꞌ. Sanoanan quëran nontatomaꞌ, ama noꞌhuicosohuëꞌ. Aꞌnapita maꞌsha onpotohuachinënquëmaꞌ, ama yaiꞌhuërëtocosohuëꞌ. Co noyahuëꞌ nipirinahuëꞌ, nosoroatomaꞌ noya nontocoꞌ.

Colosenses 3:12

Yosë nosoroatonpoaꞌ, huayoninpoaꞌ noya nicacaso marëꞌ. Napoaton yaꞌipi piyapiꞌsaꞌ nosoroatomaꞌ, noya nontocoꞌ. Nasha aꞌmorëso pochin noyápiachin cancantocoꞌ. Ama nocantocosohuëꞌ. Nani tahuëriya yonquicoꞌ aꞌnapita catahuacaso marëꞌ. Sano nicatomaꞌ, noya nontocoꞌ. Maꞌsha onpoapomarahuëꞌ, ahuantocoꞌ.

1 Timoteo 6:11

Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

2 Timoteo 2:25

Nisha nanan imapachina, oshaquëran pënëanhuanꞌ. Ama noꞌhuitatëhuahuëꞌ, aꞌchintahuaꞌ. Yosëri catahuahuachin, oshaquëran co noyahuëꞌ yonquipisopita naniantatonaꞌ, noꞌtëquën yonquiaponaꞌ nimara.

Tito 3:2

Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

Santiago 1:21

Napoaton yaꞌipi co noyahuëꞌ yonquiramasopita naniantocoꞌ. Ama huachi oshahuancosohuëꞌ. Yosë nanamën nani aꞌchintërinënquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” taꞌtomaꞌ, nanamën yonquirácoꞌ. Ina yonquihuatamaꞌ, nichaꞌësarinquëmaꞌ.

Santiago 3:13

¡Tëhuënchachin noya yonquihuatamaꞌ, noya nisaramaꞌ! Napoaton noya nicoꞌ aꞌnapitantaꞌ noya yonquiramasoꞌ nitochinaꞌ. “Co canpoara noya nitotërëhuahuëꞌ. Yosëíchin catahuarinpoaꞌ noya yonquicasoꞌ,” taꞌtomaꞌ, noya nicoꞌ.

1 Pedro 3:15

Yaꞌipi cancanëma quëran Quisocristo yonquicoꞌ. Inasoꞌ huaꞌanëntërinpoaꞌ niꞌton, chinotocoꞌ. Nani tahuëriya chiníquën cancantatomaꞌ, yonquicoꞌ Quisocristo nanamën shaꞌhuicamaso marëꞌ. Ina quëran “¿Onpoatomataꞌ imaramaꞌ?” itohuachinënquëmaꞌ, aꞌnaroáchin noꞌtëquën shaꞌhuitaramaꞌ.

1 Pedro 3:4

Quisocristo imapatamaꞌ, ama aipi yaꞌnorinsoráchin yonquicosohuëꞌ. Noyápiachin cancantacamasoꞌ naꞌcon naꞌcon yonquicoꞌ. Yosë pochin yonquicasoꞌ yaꞌhuërin. Nitaparamasoꞌ co yaꞌhuëmiatarinhuëꞌ. Cancanënpoa quëran yonquirëhuasopitaso nipirinhuëꞌ, yaꞌhuëmiatarin. Napoaton imoyaroꞌsaꞌ sano cancantocoꞌ. Ama piꞌpian tërantaꞌ noꞌhuitocosohuëꞌ. Nóya cancantohuatamaꞌ, Yosë noya niꞌsarinquëmaꞌ.