Mateo 5:3 - Chayahuita (Shahui)

³ “Natanco iyaroꞌsaꞌ aꞌchinchinquëmaꞌ. Yosë huëntonënquë yayaꞌconpatamaꞌ, iso pochin cancantacasoꞌ yaꞌhuërin. ‘Caora co nanitërahuëꞌ noya nicaꞌhuasoꞌ. Catahuaco Sinioro,’ topatamaꞌ, Yosë noya niꞌsarinquëmaꞌ niꞌton, noya cancantaramaꞌ. Huaꞌanëntërinquë chachin ayaꞌconarinquëmaꞌ.

Mateo 5:3 ပူးပေါင်းရင်းမြစ်များ

Copo naporinso' 42:6

Napoaton co noya yonquiatohuëꞌ nonahuëso marëꞌ tapanahuë. Amocan, huarianoꞌ, inaquëpita huënsëato nonahuëso marëꞌ sëtërahuë. Ama huachi ina yonquiquësohuëꞌ, tënahuë,” itërin.

Salmos 1:1

Cancanënpoa quëran huarëꞌ Yosë imapatëhuaꞌ, noya niꞌsarinpoaꞌ. Ina marëꞌ tëhuënchachin noya cancantarihuaꞌ. Co noyahuëꞌ nipisopitasoꞌ, yaanishacancantërinënpoaꞌ. Yainapotohuachinënpoaꞌ, ¡ama natëahuasohuëꞌ! Oshahuanoꞌsa napopisoꞌ, ¡ama nonanapatahuasohuëꞌ! Aꞌnaquënsoꞌ, Yosë yatëhuapi. ¡Co inapita payacaso yaꞌhuërinhuëꞌ!

Salmos 2:12

Isonama quëran huiꞌnin chinotocoꞌ. Inapotatomaꞌ, apinorantëcoꞌ. Coꞌhuara noꞌhuiyátërasënquëmahuëꞌ, inapocoꞌ. Noꞌhuihuachinquëmasoꞌ, pahuayanpiramahuëꞌ chiminaramaꞌ. Coꞌsoꞌ chinotohuatamahuëꞌ, aꞌnanaya inaso noꞌhuiarinquëmaꞌ. Ina natëtoma chinotohuatamaso nipirinhuëꞌ, tëhuënchachin noya cancantaramaꞌ.

Salmos 34:18

Oshanëna marëꞌ co napion sëtohuachinara, yaꞌcarísha Siniorori huaniparin. Oshanëna yonquiatona naꞌnëhuachinara, Siniorori nichaꞌësarin.

Salmos 51:17

Oshanëhuëi marëꞌ paꞌpi sëtatoi, co napion cancantohuatoira tëhuënchinsoꞌ, noya niꞌsarancoi.

Salmos 84:12

Sinioro quëmasoꞌ, yaꞌipi nanitaparan. Chinotërinënquënsopitasoꞌ, tëhuënchachin capa cancantomiatapi.

Proverbios 8:32

Iporaso huaꞌhuaroꞌsa noya natancoꞌ. Ca nonanpatamaco, tëhuënchachin capa cancantaramaꞌ.

Isaías 30:18

Inapotiimaso shaꞌhuitopirinquëmahuëꞌ, iporaso nosoroinquëmaso marëꞌ ninarinquëmaꞌ. Inasoꞌ, nosororinquëmasoꞌ paꞌpi yaaꞌnotërinquëmaꞌ. Siniorosoꞌ noyasáchin ninaꞌpi. Inaso Yosë niꞌton, inasáchin ninahuatëhuaꞌ, tëhuënchachin capa cancantarihuaꞌ.

Isaías 61:1

Sinioro piyapinën naporin: “Sinioro ispiritonën yaꞌcoancantërinco niꞌton, noya catahuarinco. Ina chachin acorinco popriyaroꞌsa noya nanan shaꞌhuitaꞌhuaso marëꞌ. Aparisitopisopita catahuacaꞌhuaso marëꞌ acorinco. Yaꞌhuëpi quëran quëparahuatona huaꞌanëntapirinahuëꞌ, yaꞌhuëpiquë chachin paantacaiso shaꞌhuitarahuë. Tashinan pëiquë pochin yaꞌhuëapisopitantaꞌ, ina quëran pipicaisoꞌ shaꞌhuitarahuë.

Isaías 66:2

Ca chachin yaꞌipi maꞌsha ninahuë. ¡Acohuatora, caniaritopi yaꞌhuëcaisoꞌ!” tënin. Ina quëran taantarin: “Napoaporahuëꞌ, caso Sinioroco shaꞌhuitaranquëmaꞌ. Insosona catahuacaꞌhuaso nohuantohuachin, nanamëhuë tëꞌhuataton natëpon. Oshahuaninso marëꞌ co napion cancantapon. Naporahuaton: ‘Caora co nanitërahuë noya nicaꞌhuasoꞌ,’ tëcapon. Naporinsopitaráchin, noya nicato catahuaarahuë,” tënin.

Miqueas 6:8

Napopiramahuëꞌ, co inapita Siniorosoꞌ nataninquëmahuëꞌ. Nani inaso maꞌsona nicacasoꞌ shaꞌhuitërinpoaꞌ. Piyapiꞌsa nosoroatëhua paꞌpoyacaso yaꞌhuërin. Maꞌsona nicacasoꞌ shaꞌhuihuatëra, ananicaso yaꞌhuërin. Naporahuaton: “Caora co nanitërahuë noya nicaꞌhuasoꞌ,” taꞌtëhuaꞌ, Sinioroíchin natëcaso yaꞌhuërin.

Mateo 11:25

Naporoꞌ noya cancantaton, Yosë nontërin: “¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën.

Mateo 11:6

Insosona yaꞌipi cancanëna quëran natëmiatohuachinaco, nóya cancantapi, itërin Quisosori.

Mateo 13:16

Canpitaso nipirinhuëꞌ, ma noya Yosë catahuarinquëmaꞌ niꞌton noya niꞌnamaco. Noya natanamaco. Napoaton noya cancantaramaꞌ.

Mateo 19:14

Quisososo nipirinhuëꞌ tënin: —Tananpitocoꞌ huaꞌhuaroꞌsantaꞌ huëꞌinaꞌ. Ama aꞌpacosohuëꞌ. Huaꞌhuaroꞌsaꞌ aꞌnaroáchin yaimarinaco. Inapita pochin cancantohuatamaꞌ, Yosë huaꞌanëntërinquë yaꞌconaramaꞌ, itahuaton,

Mateo 24:46

Inpriatosoꞌ noya yonquihuachin, noꞌtëquën natëtarin. Patronëni huëcapaintahuachin, noya niꞌsarin. Ina marëꞌ noya cancantarin.

Mateo 25:34

Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ.

Mateo 3:2

—Yosë huaꞌanëntiinpoasoꞌ tahuëri nani yaꞌcariarinpoaꞌ. Napoaton co noyahuëꞌ yonquiramasopita naniantatomaꞌ, Yosë chachin tahuërëtantaco huachi, itarin. Nani tahuëri ina pochin pënënárin.

Mateo 8:11

Iporaso huachi nisha nisha parti quëran huëꞌsapi. Nisha piyapiꞌsaꞌ niponaraihuëꞌ, imatonaꞌ, Yosë huaꞌanëntërinquë yaꞌconapi. Inápaquë paꞌpachinaꞌ, Apraan, Isaco, Cacopo, inapita nohuitapi. Inapitarëꞌ huënsëapi coshatacaiso marëꞌ. Nóya yaꞌhuërapi huachi, tënahuë.

Marcos 10:14

Ina niꞌsahuaton, Quisosori co noyahuëꞌ niꞌnin. —Tananpitocoꞌ iyaroꞌsaꞌ huaꞌhuaroꞌsantaꞌ huëꞌinaꞌ. Ama aꞌpacosohuëꞌ. Huaꞌhuaroꞌsa pochin cancantopisopita Yosë huaꞌanëntërinquë yaꞌconapi.

Lucas 11:28

Inaso napopirinhuëꞌ, Quisosori itapon: —Yosë nanamën natanahuatona natëpisopita tëhuënchinsoꞌ, noya noya cancantaponaꞌ tënahuë, itërin.

Lucas 18:14

Ina oshanën inquitaton, Yosëri noya niꞌnin. Parisioso nipirinhuëꞌ, co noyahuëꞌ niꞌnin. Aꞌnapita nocanpatamaꞌ, aꞌna tahuëri Yosë atapanarinquëmaꞌ. Nipirinhuëꞌ: ‘Caora co nanitërahuëꞌ noya nicaꞌhuasoꞌ. Catahuaco Sinioro,’ topatamaꞌ, noya acoarinquëmaꞌ,” tënin Quisoso.

Lucas 22:29

Ina marëꞌ Yosëꞌpaꞌ canaaramaꞌ. Aꞌna tahuëri Yosë nohuanton, huaꞌanëntarahuë. Naporoꞌ canpitantaꞌ acoaranquëmaꞌ huaꞌan pochin nicamasoꞌ.

Lucas 22:30

Huaꞌanëntohuato, carëꞌquëmaꞌ noya coshatërëhuaso pochin nóya cancantaramaꞌ. Inaquë catahuaramaco yaꞌipi israiroꞌsaꞌ huaꞌanëntaꞌhuasoꞌ,” itërin.

Lucas 4:18

“Sinioro ispiritonën yaꞌcoancantërinco niꞌton, noya catahuarinco. Naꞌa piyapiꞌsaꞌ co Yosë nohuitatonahuëꞌ, nosorotopi. Napoaton Yosë acorinco noya nanan aꞌchintaꞌhuaso marëꞌ. Sopairi minsëpirinhuëꞌ, ocoiarahuë noya yonquicaiso marëꞌ. Somaraya nininsopita anoyatarahuë. Parisitapisopita nichaꞌësarahuë.

Juan 20:29

—Niꞌnanco niꞌton iyasha, natëranco. Aꞌnapitasoꞌ co nicaponaracohuëꞌ, natëarinaco. Inapitasoꞌ noya noya cancantapi, itërin Quisosori.

Deuteronomio 8:2

Catapini shonca piꞌi inotëro parti paꞌtasëmaꞌ, Sinioro nohuanton nisha nisha maꞌsha onporamaꞌ. Inapotatënquëmaꞌ, natëtochináchin cancantamaso marëꞌ napotërinquëmaꞌ. Onpopinsona cancantëramasoꞌ, nitotacaso marëꞌ tënirinquëmaꞌ. Naporahuaton: ‘¿Tëhuënchachin taꞌma natërëꞌponaco to?’ taꞌton napotërinquëmaꞌ. Inaso nipirinhuëꞌ, co patërinquëmahuëꞌ. Ama ina naniantocosohuëꞌ.

Santiago 1:10

Aꞌnaquëmaso nipirinhuëꞌ naꞌa coriqui, maꞌsha, inapita yaꞌhuëtërinquëmaꞌ. Ina niponahuëꞌ Quisocristo imaramaꞌ niꞌton, co maꞌsharáchin yonquicamasoꞌ yaꞌhuërinhuëꞌ. Aꞌna tahuëri chiminarihuaꞌ. Yaꞌipi maꞌsha papotërinsontaꞌ taꞌhuantaponaꞌ. Quisocristo naꞌcon yonquiatomaꞌ, noya cancantocoꞌ.

Santiago 1:12

Yaꞌipinpoaꞌ maꞌsha onporëhuaꞌ. Caniorëhuaꞌ, parisitërëhuaꞌ, naporëhuaꞌ. Noya ahuantohuatëhuaꞌ, nóya cancantarihuaꞌ. “Parisitaponaraihuëꞌ, nóya imasarinaco,” taꞌton, Yosë noya niꞌsarinpoaꞌ. Ina marëꞌ inápaquë noya acanararinpoaꞌ. Nanpimiatarihuaꞌ. “Tëhuënchachin nosorohuatamaco, ananpitaantaranquëmaꞌ,” itërinpoaꞌ. Shaꞌhuitërinpoaꞌ niꞌton, co onporontaꞌ nonpintarinpoahuëꞌ.

Santiago 2:5

Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

Apocalipsis 19:9

Ina quëran anquëni shaꞌhuitërinco ninshitaꞌhuaso marëꞌ: “Carniroaꞌhua saꞌacasoꞌ pita nininquë përapachinquëmaꞌ, nóya cancantaramaꞌ,” itërinco. Ina quëran itaantarinco: “Yosë chachin noꞌtëquën shaꞌhuitërinquën niꞌton, ina ninshitëquëꞌ,” itërinco.

Apocalipsis 22:14

Huënainën quëran anoyacancantërinsopita nóya cancantaponaꞌ. Aꞌmopisoꞌ pëꞌsarëso pochin noyápiachin cancantapi. Inapitasáchin nanan yaꞌhuëtopi nanpirin nara nitërinsoꞌ capatonaꞌ, nanpimiatacaisoꞌ. Naporahuaton, nasha Quirosarinquë noya yaꞌconapi.

Apocalipsis 3:17

Canpitasoꞌ naporamaꞌ: ‘Naꞌa maꞌsha yaꞌhuëtërincoi niꞌton, noya yaꞌhuarai. Quiyasoꞌ noya piyapicoi. Aꞌnapita quëran noya noya nitotërai. Co mantaꞌ pahuantërincoihuëꞌ,’ topiramahuëꞌ, co noꞌtëquën yonquiramahuëꞌ. Cancanëma quëran yonquiramasopita nitotërahuë. Saꞌahuaya pochin niꞌnanquëmaꞌ. Coriqui pahuantërinso pochin canpitasoꞌ naꞌcon pahuantarinquëmaꞌ noya cancantacamasoꞌ. Somaraya pochin cancantatomaꞌ, co tëhuënchachin nohuitëramacohuëꞌ. Saꞌahua capa aꞌmocasoꞌ nininso pochin co noyápiachin cancantëramahuëꞌ. Paꞌpi nosorotëramaꞌ.