Mateo 5:22 - Chayahuita (Shahui)

²² Co tëpatërëso marëáchin anaꞌintinpoasoꞌ yaꞌhuërinhuëꞌ, tënahuë. Aꞌna piyapi noꞌhuihuatamaꞌ, anaꞌintarinquëmaꞌ. Pinotohuatamantaꞌ, cotio ansianoꞌsaꞌ anaꞌinchinquëmaꞌ. Cancanëma quëran huarëꞌ noꞌhuitomaꞌ, ‘Quëmasoꞌ sopainquën,’ itohuatamaꞌ, pënquë chachin parisitacasoꞌ yaꞌhuërin, tënahuë.

Mateo 5:22 ပူးပေါင်းရင်းမြစ်များ

Génesis 37:4

Iinpitariso nipirinhuëꞌ, paꞌpini ina naꞌcon naꞌcon nosororinsoꞌ nicatonaꞌ, co quëꞌyapihuëꞌ. Co quëꞌyatonaraihuëꞌ, co nanitopihuëꞌ noya nontacaisoꞌ.

Génesis 37:8

Napohuachina, inapitari itapon: —Huaꞌan yaꞌconpato iyahuëpita camaiyápo ¿tocomaranquën ti? ¡Catoroꞌ quëma camaiyáponcoi! itopi. Huaꞌnarinso marëpita naꞌcon naꞌcon noꞌhuipi. Shaꞌhuihuachina, co yainhuëꞌ natanpi.

2 Samuel 16:7

Tëꞌyaratapon pochin: —¡Paquë paꞌsáquë matararo mashonquën!

2 Samuel 6:20

Tapinta pëinënquë paꞌsahuaton, saꞌinpita, huiꞌninpita, inapita nontoonin. Micaroriso nipirinhuëꞌ, nacapirahuaton itapon: Quëmasoꞌ Israiro copirnonquën nipiranhuëꞌ, co taparohuanhuëꞌ ninan. Piyapinënpita quëmapiꞌsaꞌ, sanapiꞌsaꞌ, inapita niꞌtonënquë nansaton naporan, itërin.

1 Reyes 21:4

Napotërinso natanaton, inaso sëtërin, noꞌhuitërin, naporin. Pëinënquë quëhuënconahuaton, paira parti notëtërin quëran natantárin. Coshatacaso marëꞌ përapirinahuëꞌ, co nohuantërinhuëꞌ.

Salmos 14:1

Piyapiꞌsa naponin yonquiatonaꞌ, co Yosë yaꞌhuërinhuë pochin cancantopi. Inapoatona chihuëpiso pochin nipi. Co nishinahuën nicatonaꞌ, oshahuanpi. ¡Co aꞌnaya tëranta noya nininhuëꞌ!

Salmos 37:8

Ama noꞌhuitaton yaiꞌhuërëtëquësohuëꞌ. Inapohuatan, aquë aquëtë nanan yaꞌhuëapon.

Salmos 69:4

Ainëhuë huaꞌhuayátërahuë nipirinhuëꞌ, ina quëran naꞌcon naꞌcon inimicotërinacosopita naꞌarin. Co manta onpotopirahuëꞌ, noꞌhuirinaco. Inimicoroꞌsa naꞌatonaꞌ, topinan quëran yatëparinaco. Co manta ihuatopirahuëꞌ, ayanaꞌhuaso camaiárinaco.

Daniel 3:13

Copirnosoꞌ paꞌpi noꞌhuitahuaton, inapita quëcacaisoꞌ camaitërin. Quëpachinara: —¿Tëhuënchachin canpitaso yosënëhuëpita, co yamosharamahuëꞌ ti? Mamanshi oro quëran anitërahuësontaꞌ, co yamosharamahuëꞌ, topi.

Daniel 3:19

Ina natanaton, copirnoso paꞌpi noꞌhuitërin. Naporahuaton: “¡Naꞌcon naꞌcon orno huënaratacaso marëꞌ ihuë tëꞌyanantocoꞌ!” tënin camaitaton. Napohuachina, inapotopi.

Mateo 10:17

Niꞌcona iyaroꞌsaꞌ, piyapiꞌsaꞌ aꞌnaroáchin anoꞌhuitotamaꞌ. Aꞌnaquën noꞌhuitënënquëmaꞌ, masarinënquëmaꞌ. Mapachinënquëmaꞌ, coisëquë quëpaarinënquëmaꞌ. Niyontonpiso pëiroꞌsaquëntaꞌ huihuiarinënquëmaꞌ.

Mateo 10:28

Ama piyapiꞌsaꞌ tëꞌhuatocosohuëꞌ. Tëpapirinënquëmaontaꞌ, co huaꞌyanëmaꞌ matarinënquëmahuëꞌ. Yosë tëhuënchinsoꞌ tëꞌhuatacasoꞌ yaꞌhuërin, tënahuë. Ina nohuanton, chiminëꞌ. Co noyahuëꞌ nipachinaꞌ, pënquë chachin aꞌpaarin huachi. Inatohuaꞌ huaꞌyanënarë chachin parisitomiatapi huachi. Napoaton Yosë naꞌcon naꞌcon tëꞌhuatacasoꞌ yaꞌhuërin. Co piyapiꞌsaꞌ tëꞌhuatacasoꞌ yaꞌhuërinhuëꞌ.

Mateo 12:24

Parisioroꞌsariso nipirinhuëꞌ, co natëpihuëꞌ: “Sopairoꞌsaꞌ huaꞌan Piirsipo itopisoari catahuarin niꞌton, nanitaparin sopairoꞌsaꞌ aꞌpacasoꞌ. Co inari catahuarinhuëꞌ naporini, co nanichitonhuëꞌ,” topi.

Mateo 17:5

Nonaquëyaꞌ, chitorori imotërin. Huënaráchin huënaráchin ninin. Chitoroꞌ huáncana quëran Yosëri shaꞌhuitërin: “Isosoꞌ ca huiꞌnahuë, naꞌcon nosororahuësoꞌ. Nóya niꞌnahuë. Ina noya natancoꞌ,” itërin.

Mateo 18:21

Ina quëran Pitrori itërin: —Aꞌna iyahuë Sinioro maꞌsha onpotohuachinco, nanan anoyachi, tënahuë. Nipirinhuëꞌ, naquëranchin naquëranchin maꞌsha onpotohuachinco, ¿onpo onporotaꞌ nanan anoyachi? ¿Canchisëroꞌ pochin nimara ti? itërin.

Mateo 18:35

Ina quëran itaantapon: —Inapochachin Tata Yosë naꞌcon nosoroatënquëmaꞌ, yaꞌipi oshanëmaꞌ yainquitopirinquëmahuëꞌ, co canpita capini nanan anoyatohuatamahuëꞌ, co oshanëmaꞌ inquitarinquëmahuëꞌ. Chiníquën parisitaramaꞌ. Yaꞌipi cancanëma quëran huarëꞌ nanan anoyatacasoꞌ yaꞌhuërin, itërin Quisosori.

Mateo 23:15

Canpitasoꞌ nonpintënquëma niꞌton, ¡maꞌhuantacha nisarama paya! Nisha piyapiꞌsaꞌ aꞌchintacamaso marëꞌ ira iratë́rantaramaꞌ. Aquë paatomaꞌ, aꞌnaya aꞌnaya aꞌchintëramaꞌ canpita pochin yonquicaiso marëꞌ. Natëhuachinënquëmaꞌ, aquë aquëtëꞌ co noyahuëꞌ cancantapi. Yaꞌipinquëmaꞌ parisitopiquë paꞌsarama huachi.

Mateo 23:33

¡Yaꞌhuan pochin cancantatomaꞌ, paꞌpi co noyahuëꞌ nisaramaꞌ! ¿Onporahuatomacha pën quëran chaꞌërëꞌponquëmaya? Co chaꞌësaramahuëꞌ.

Mateo 25:41

Ahuënanëhuë quëran acorahuësopitaso nipirinhuëꞌ, shaꞌhuitarahuë: ‘Yaꞌipinquëmaꞌ paco huachi. Tata Yosë co noyahuëꞌ niꞌninquëmaꞌ niꞌton, anaꞌintarinquëma huachi. Panca pën nani acorin sopairoꞌsaꞌ anaꞌintacaso marëꞌ. Inaquë pën co onporontaꞌ tacopiarinhuëꞌ. Inaquë pacoꞌ canpitantaꞌ.

Mateo 26:59

Corto huaꞌanoꞌsaꞌ, cotio huaꞌanoꞌsaꞌ inapitari yatëpapi niꞌton, aꞌnaya aꞌnaya yonípi Quisoso shaꞌhuirapicaiso marëꞌ.

Mateo 3:17

Naporoꞌ inápa quëran Yosë noninsoꞌ natanpi. —Isosoꞌ ca huiꞌnahuë chachin, naꞌcon nosororahuësoꞌ. Noya niꞌnahuë, tënin.

Mateo 5:34

Nipirinhuëꞌ, carinquëmaꞌ shaꞌhuichinquëmaꞌ. Noꞌtëquënáchin nonpatëra, co Yoscoarëꞌ taꞌcasoꞌ yaꞌhuërinhuëꞌ. Co onporontaꞌ nonpinacasoꞌ yaꞌhuërinhuëꞌ, tënahuë. Aꞌnaquënsoꞌ yanonpinatonaꞌ, taponaꞌ: ‘Piꞌiroꞌtëꞌ yaꞌhuërin niꞌton, noꞌtëquën nontëranquën,’ toconpi. ‘Ina pochin nontato, nonpintohuatëra, co Yosë anaꞌintarincohuëꞌ,’ topirinahuëꞌ. Piꞌiroꞌtëntaꞌ Yosëri ninin. Inaquë yaꞌhuaton, yaꞌipiya huaꞌanëntarin. Napoaton co ina pochin nonacasoꞌ yaꞌhuërinhuëꞌ.

Mateo 5:44

Nipirinhuëꞌ carimaꞌ shaꞌhuichinquëmaꞌ. Inimiconëmapitantaꞌ iyaroꞌsaꞌ, nosorocoꞌ. Aparisitopirinënquëmaontaꞌ, nosorocasoꞌ yaꞌhuërin. Inapita marëntaꞌ noya Yosë nontocoꞌ inahuantaꞌ catahuain.

Marcos 14:55

Yaꞌipi huaꞌanoꞌsari yatëpapi niꞌton, aꞌnaya aꞌnaya Quisoso nonpinapicaiso marëꞌ yonípirinahuëꞌ, co quënanpihuëꞌ.

Marcos 15:1

Tahuërianpitohuachinara, yaꞌipi cotio ansianoꞌsaꞌ, cotio maistroꞌsaꞌ, corto huaꞌanoꞌsaꞌ, inapita niyontonahuatonaꞌ, ninontopi. Ina quëran Quisoso tonporahuatonaꞌ, Pirato yaꞌhuërinquë quëpapi.

Lucas 12:5

Yosë tëhuënchinsoꞌ tëꞌhuatacasoꞌ yaꞌhuërin, tënahuë. Co noyahuëꞌ nipatamaꞌ, Yosë huaꞌyanëmaꞌ matahuatënquëmaꞌ, parisitopiquë aꞌpamiatarinquëmaꞌ. Napoaton ina naꞌcon naꞌcon tëꞌhuatocoꞌ. Co piyapiꞌsaꞌ tëꞌhuatacasoꞌ yaꞌhuërinhuëꞌ.

Lucas 22:66

Tahuërihuachina, cotio ansianoꞌsaꞌ, corto huaꞌanoꞌsaꞌ, cotio maistroꞌsaꞌ, inapita niyontonpi. Nani niyontonpachinaꞌ, inaquë Quisoso quëpapi natanacaiso marëꞌ.

Juan 11:47

Ina natanahuatonaꞌ, parisioroꞌsaꞌ, corto huaꞌanoꞌsaꞌ, inapita napopianáchin yonquiatonaꞌ, yaꞌipi cotio huaꞌanoꞌsaꞌ ayontonpi ninontacaiso marëꞌ. —¿Maꞌtaꞌ onpotahuaꞌ? Ina quëmapi naꞌa piyapiꞌsaꞌ aꞌnaroáchin anoyatarin. Iporantaꞌ aꞌna piyapi chiminpirinhuëꞌ, ananpitaantarin. “Yosëri chachin catahuarin,” topi.

Juan 15:25

Iráca Yosë quiricanënquë ninshitopi. ‘Topinan quëran noꞌhuirinaco,’ tënin ninshitaton. Iporasoꞌ naporinso chachin topinan quëran noꞌhuiarinaco.

Juan 7:20

—¡Quëmasoꞌ sopai yaꞌcoancantërinquën niꞌton, huaꞌyantëran! ¿Intaꞌ yatëparinquën? itopi.

Juan 8:48

Ina natanahuatonaꞌ huaꞌanoꞌsari itantapi: —¿Coꞌta quëmasoꞌ Samaria piyapinquën? tënai. “Sopai yaꞌcoancantërinquën niꞌton, huaꞌyantëran,” topatëira, noꞌtëquën napotërainquën, itopi.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Hechos 22:30

Tahuëririnquë capitan huaꞌani yanatantërin. “¿Maꞌmarëtaꞌ cotioroꞌsari shaꞌhuirapipi?” taꞌton, sontaroꞌsaꞌ shaꞌhuitërin Paono ocoicaiso marëꞌ. Naporahuaton, yaꞌipi cotio huaꞌanoꞌsaꞌ amatërin. Corto huaꞌanoꞌsaꞌ chini chiníquën nanantopisontaꞌ amatërin. Nani niyontonpachinara, inaquë Paono quëparin natanacaiso marëꞌ.

Hechos 23:1

Paono yaꞌconahuaton, huaꞌanoꞌsaꞌ notëërahuaton, itapon: —Ipora iyaroꞌsaꞌ piꞌpian nonchinquëmaꞌ natanco. Huaꞌhuatapo quëran huarëꞌ noya ninahuë. Yosë niꞌsárinco, co mantaꞌ onporahuëꞌ, itërin.

Hechos 24:20

Iꞌhua cotio huaꞌanoꞌsaꞌ niyontonpachinara, amatërinaco. Isopita nataninaco. Maꞌsona onporahuësoꞌ shaꞌhuichinën.

Hechos 4:15

Pitro, Coansha, inapita aipiran aꞌparahuatonaꞌ, inahua capini ninontapi.

Hechos 5:21

Ina natanahuatonaꞌ, tashiramiachin Yosë chinotopiso pëiquë paꞌpi. Piyapiꞌsaꞌ huëꞌpachinara, aꞌchintapi. Corto huaꞌan chini chiníquën nanantërinsoꞌ, satosioroꞌsaꞌ, inapitasoꞌ co nitotatonahuëꞌ, niyontonahuatonaꞌ, yaꞌipi huaꞌanoꞌsaꞌ, Israiro ansianoꞌsaꞌ, inapita amatopi. Huëꞌpachinara, ponisia aꞌpapi inapita maconacaiso marëꞌ.

Hechos 5:27

Huaꞌanoꞌsaꞌ niyontopiquë quëpapi. Inaquë quëpahuachinara, huaꞌan chini chiníquën nanantërinsori itapon:

Hechos 6:12

Ina pochin nonatonaꞌ, naꞌa piyapiꞌsaꞌ anoꞌhuitopi. Cotio ansianoꞌsaꞌ, cotio maistroꞌsaꞌ, inapitantaꞌ anoꞌhuitopi. Co huachi Istipan noya niꞌpihuëꞌ. Napoaton maconpi. Maconahuatonaꞌ, quëpapi cotio huaꞌanoꞌsari natanacaiso marëꞌ.

Hechos 6:15

Ina quëran huaꞌanoꞌsari Istipan niꞌsapi. Niꞌsapirinahuëꞌ, yaꞌpirin anquëni pochin huënaráchin niꞌtërin.

Hechos 7:37

Moisësëri chachin inapita itërin: “Aꞌna tahuëri Yosë nohuanton, aꞌna pënëntonaꞌpi yaꞌhuapon, ca pochin nininsoꞌ. Inantaꞌ Israiro quëmapi nisarin,” tënin.

Romanos 12:10

Imaramasopita capini noya ninosorocoꞌ. Iyaparima pochin niniꞌcoꞌ. Ama “Casoꞌ noya noyaco,” tocosohuëꞌ. Aꞌnapita noya noya niꞌcoꞌ.

1 Corintios 6:10

Aꞌnaquëontaꞌ maꞌsha ihuatopi, apirapi, noꞌpipi, pinotopi. Aꞌnaquën aꞌnapita ahuëatonaꞌ, maꞌshanënaꞌ matopi. Yaꞌipi co noyahuëꞌ nipisopita co Yosë huaꞌanëntërinquë yaꞌcoanpihuëꞌ.

1 Corintios 6:6

Canpitaso nipirinhuëꞌ imaramaso capini nipinotomaꞌ, nishaꞌhuirapiramaꞌ. Naporahuaton, coisësoꞌ co Yosë natëpirinhuëꞌ, inaquë niquëpahuatamara, co noyahuëꞌ ninamaꞌ.

1 Tesalonicenses 4:6

Aꞌna quëmapi saꞌin ama sëꞌhuacosohuëꞌ. Ama ina pochin niꞌtomaꞌ, soꞌin nonpintocosohuëꞌ. Sëꞌhuahuatamaꞌ, Yosë noꞌtëquën anaꞌintarinquëmaꞌ. Iráca inachachin chiníquën pënënainquëmaꞌ.

Tito 3:2

Ama pinochinasohuëꞌ. Ama ninoꞌhuiinasohuëꞌ. Noya ninicatonaꞌ yaꞌhuëꞌinaꞌ. Yaꞌipi piyapiꞌsaꞌ noya nicatonaꞌ, sanoanan quëran nonchinaꞌ.

Hebreos 12:25

Napoaton Quisocristo nanamën noya natancoꞌ. Ama piꞌpian tërantaꞌ aꞌpocosohuëꞌ. Pënëntërinso nanan shaꞌhuitohuachinara, aꞌnaquën co yanatëtopihuëꞌ niꞌton, aꞌnaroáchin anaꞌintërin. Quisocristo nanamënsoꞌ noya noya niꞌton, ina naniantohuatëhuaꞌ, aquë aquëtëꞌ anaꞌintinpoasoꞌ yaꞌhuërin. Inasoꞌ inápa quëran pënëninpoaꞌ.

Hebreos 5:9

Noꞌtëquën natëton, canpoa marëꞌ chiminin. Napoaton nanitërin anoyacancantinpoasoꞌ. Ina natëhuatëhuaꞌ, noya nichaꞌësarinpoaꞌ nanpimiatacaso marëꞌ.

Santiago 2:20

¡Coꞌchi noꞌtëquën yonquiranhuë paya! Co noya nipatanhuëꞌ, “Cantaꞌ imarahuë,” topiranhuëꞌ, topinan quëran nonsaran.

Santiago 3:6

Nanamënpoasoꞌ pën pochin ninin. Paꞌpi co noyahuëꞌ ninin. Ina marëꞌ oshahuanëhuaꞌ. Sopai chachin camairinpoaꞌ co noyahuëꞌ nonacasoꞌ. Nanamënpoa quëran nipinorëhuaꞌ, ninoꞌhuirëhuaꞌ. Maꞌtëhuaꞌ maꞌtëhuaꞌ nonëhuaꞌ. Co noyahuëꞌ nonpatëhuara, nitapicancanarëhuaꞌ.

1 Pedro 2:23

Inimiconënpitari pinopachinara, co yaiꞌhuërëtërinhuëꞌ. Aparisitopirinahuëꞌ, co noꞌhuirinhuëꞌ. “Aꞌna tahuëri Yosëri noꞌtëquën anaꞌintarin,” taꞌton, Yosëíchin natërin.

1 Pedro 3:9

Piyapiꞌsaꞌ maꞌsha onpotohuachinënquëmaꞌ, ama iꞌhuërëtacamasoꞌ yonquicosohuëꞌ. Pinopachinënquëmaꞌ, ama canpitarisoꞌ pinocosohuëꞌ. Noya nontocoꞌ. Naporahuaton, Yosë nontocoꞌ inapitantaꞌ catahuain. Imapatëhuaꞌ, ina shaꞌhuitërinpoaꞌ aꞌnapitantaꞌ nosorocasoꞌ. Napohuatëhuaꞌ, Yosë noya catahuarinpoaꞌ.

1 Juan 2:9

Aꞌna piyapi noꞌhuihuatamaꞌ, co Yosë imaramahuëꞌ. “Imarahuë,” tapomarahuëꞌ, co tahuëri pochin cancantëramahuëꞌ. Ipora huantaꞌ tashi pochin cancantaramaꞌ.

1 Juan 3:10

Co sacaihuëꞌ Yosë huiꞌninpita nohuitacasoꞌ. Noyasáchin nipatëhuaꞌ, Yosë huiꞌninpita pochin nisarëhuaꞌ. Nipirinhuëꞌ, co noyahuëꞌ nipachinaꞌ, co Yosë huëntonënquë yaꞌconpihuëꞌ. Co imapisopita nosorohuachinahuëꞌ, co Yosë huiꞌninpita pochin nisapihuëꞌ. Sopai huiꞌninpita pochin nisapi. Co noyahuëꞌ cancantopi quëran sopai huiꞌninpita nohuitarëhuaꞌ.

1 Juan 5:16

Aꞌnaquën Yosë imamiataponahuëꞌ, co noyahuëꞌ ninin. Co Yosë aꞌpoaponahuëꞌ, oshahuanin. Inapita marëꞌ Yosë nontahuaꞌ anoyacancanchin. Aꞌnaquënso nipirinhuëꞌ imapirinhuëꞌ, co noyahuëꞌ yonquiaton, Quisocristo chachin aꞌpomiatërin. Aꞌpomiatohuachina, chiminpi pochin cancantantapi. Co inapita marëꞌ Yosë nontacasoꞌ yaꞌhuërinhuëꞌ.

Judas 1:9

Iráca Moisësë chiminpachina, Yosëri anquëni huaꞌan aꞌpaimarin nonën paꞌpitacaso marëꞌ. Miquiri itopisoꞌ. Sopairi yaosërëtohuachina, ninoꞌhuipi. Naporoꞌ anquëni chiníquën nanantaponahuëꞌ, co nohuantërinhuëꞌ sopai pinocasoꞌ. Co inaora anaꞌintacasoꞌ yonquirinhuëꞌ. “Sinioro anaꞌinchinquën,” itërin.

Apocalipsis 20:14

Chimirin, chiminpisopita yaꞌhuëpiquë, inapita panca sono pën orotárinquë tëꞌyatapi. Inaquë parisitomiatáponaꞌ.