Mateo 5:19 - Chayahuita (Shahui)

¹⁹ Napoaton piꞌpian tërantaꞌ co natëhuatamahuëꞌ, co Yosë noya niꞌsarinquëmahuëꞌ. Huaꞌanëntërinquë co acanarinquëmahuëꞌ. Piyapiꞌsaꞌ aꞌchintatomaꞌ: ‘Ama natëquësohuëꞌ,’ itohuatamaꞌ, co noya aꞌchinaramahuëꞌ. ‘Natëcasoꞌ yaꞌhuërin,’ itohuatamaꞌ, noya aꞌchinaramaꞌ. Natëhuatamaꞌ, Yosë noya niꞌsarinquëmaꞌ. Huaꞌanëntërinquë acanamiatarinquëmaꞌ.

Mateo 5:19 ပူးပေါင်းရင်းမြစ်များ

Mateo 11:11

“Iráca quëran huarëꞌ naꞌa piyapiꞌsaꞌ pënëntopirinahuëꞌ, Coansha Paotistasoꞌ noya noya pënëntërin. Pënëntërinsoꞌ noya, nipirinhuëꞌ, inso tërantaꞌ imapachinaco, noya noya nisarin. Yosë huaꞌanëntërinquë chachin yaꞌconarin huachi, tënahuë.

Mateo 19:28

—Tëhuënchachin iyaroꞌsaꞌ canaaramaꞌ. Yosë quëran quëmapico niꞌto, aꞌna tahuëri yaꞌipiya anoyatarahuë. Naporoꞌ noya noya yaꞌnoato, huaꞌanëntacasoꞌ shiraquë huënsëarahuë. Inaquë coisë pochin noꞌtëquën shaꞌhuitarahuë. Canpitantaꞌ acoaranquëmaꞌ yaꞌipi israiroꞌsaꞌ shonca catoꞌ huënton chachin nininsoꞌ huaꞌanëntacamaso marëꞌ. Shonca catonquëmaꞌ napoaramaꞌ.

Mateo 20:26

Canpitaso nipirinhuëꞌ ama inapita pochin cancantocosohuëꞌ. Yosë huëntonënquë yaꞌconpatëra, co chiníquën nanantacasoꞌ nohuantërëhuëꞌ. Noya noya iyaroꞌsaꞌ yanipatamaꞌ, yaꞌipi piyapiꞌsaꞌ catahuacoꞌ.

Mateo 28:20

Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.

Lucas 1:15

Inasoꞌ nóya quëmapi nipon. Yosëri catahuaarin niꞌton, noya noya nisarin. Naporahuaton, co piꞌpian tërantaꞌ main oꞌoponhuëꞌ. Coꞌhuara nasichátëraponhuëꞌ, Ispirito Santori yaꞌcoancantarin. Inasáchin natëarin.

Lucas 11:42

“Parisioroꞌsanquëmaꞌ, ¡maꞌhuantacha canpitasoꞌ nisarama paya! ‘Nani maꞌsha canarëhua quëran, diesmo Yosë quëtacasoꞌ yaꞌhuërin,’ itërinpoaꞌ Moisësë. Ina natëpiramahuëꞌ, co noya ninamahuëꞌ. Nani maꞌsha shaꞌnama quëran, diesmo quëtëramaꞌ. Yaꞌipi cosharoꞌ apimotacaso marëꞌ shaꞌnamaso manama quëran huarëꞌ, diesmo quëtëramaꞌ. Napoaponahuëꞌ, co Yosë nosororamahuëꞌ. Piyapiꞌsantaꞌ yanonpintëramaꞌ. Ina marëꞌ Yosë anaꞌintarinquëmaꞌ. Diesmo Yosë quëtacasoꞌ noya nipirinhuëꞌ, nosorocasoꞌ naꞌcon naꞌcon nohuantërin.

Lucas 9:48

—Ama chiníquën nanantacamasoꞌ yonquicosohuëꞌ. Imaramaco niꞌton, huaꞌhuasha nosorohuatamaꞌ, nosoroaramaco cantaꞌ. Nosorohuatamaco, co casáchin nosoroaramacohuëꞌ. Yosëntaꞌ nosoroaramaꞌ. Inasoꞌ isoroꞌpaquë aꞌpaimarinco. Huaꞌhuaroꞌsa pochin cancantopisopita Yosëri noya noya niꞌnin, itërin Quisosori.

Hechos 1:1

Iya Tiohuiro. Ca Nocasëco ninshitaantaranquën. ¿Noya quëmantaꞌ yaꞌhuaran? Noya cantaꞌ yaꞌhuarahuë. Aꞌna quiricaquë nani ninshitëranquën. Yaꞌipi Quisoso naporinsoꞌ shaꞌhuitëranquën. Aꞌchininsontaꞌ anitotëranquën.

Romanos 3:8

Aꞌnaquënta napopi: “Huëcoꞌ manta tërantaꞌ niahuaꞌ Yosë naꞌcon naꞌcon catahuainpoaso marëꞌ. Paono chachiontaꞌ ina pochin aꞌchintërinpoaꞌ,” topi pinotonaco. Co noꞌtëquën yonquipihuëꞌ niꞌton, napopisopita noꞌtëquën anaꞌintacasoꞌ yaꞌhuërin.

Romanos 6:1

Yosë inaora nohuanton nosororinpoa niꞌton, manta tërantaꞌ niahuaꞌ inaora nohuanton, oshanënpoaꞌ inquitiinpoaso marëꞌ ¿tëcarihua ti?

Romanos 6:15

Tëhuënchachin co huachi iráca pënëntërinsoꞌ natëcasoꞌ yaꞌhuërinhuëꞌ. Yosë nosoroatonpoaꞌ, nichaꞌërinpoaꞌ. Aꞌnaquënso nipirinhuëꞌ ina natanatonaꞌ, co mantaꞌ yanatëpihuëꞌ. “Noya oshahuanacasoꞌ,” toconpi. ¡Co ina pochin yonquicaso yaꞌhuërinhuëꞌ!

Deuteronomio 12:32

Yaꞌipi camairanquëmasopita, noꞌtëquën natëcoꞌ. Ama ina apancatocosohuëꞌ. Naporahuaton ama aꞌna nananya tëranta apahuantocosohuëꞌ,” itërin.

1 Timoteo 6:11

Quëmaso nipirinhuëꞌ api Yosë imaran niꞌton, ama coriquiráchin yonquiquësohuëꞌ. Noya nicacasoáchin yonquiquëꞌ. Cancanën quëran huarëꞌ Yosë chinotëquëꞌ. “Inasoꞌ nosoroatonco, catahuarinco,” taꞌton, noya natëquëꞌ. Naporahuaton, yaꞌipi piyapi nosoroquëꞌ. Maꞌsha onpoaponahuëꞌ, chiníquën cancantëquëꞌ. Sano piyapi niquëꞌ.

Tito 3:8

Noꞌtëquën shaꞌhuitëranquën. Quëmantaꞌ inachachin aꞌchintëquëꞌ, tënahuë. Pënënáquëꞌ yaꞌipi imapisopita noya nicacaiso marëꞌ. Aꞌchintëranquënsosoꞌ nóya imacasoꞌ. Natëhuatëhuaꞌ, noya noya yaꞌhuarihuaꞌ.

1 Pedro 5:4

Quisocristo imarëhuaꞌ niꞌton, yaꞌipinpoaꞌ huaꞌanëntërinpoaꞌ. Aꞌna tahuëri oꞌmantararin. Noya ansianoꞌsaꞌ nipatamaꞌ, naporoꞌ noya canaaramaꞌ. Isoroꞌpaquë canatohuachinara, yancotëꞌ huëron quëran nipisoꞌ quëtopirinahuëꞌ, inasoꞌ aꞌnaroáchin ahuirin. Inapaquëso nipirinhuëꞌ canahuatamaꞌ, yaꞌhuëtomiatarinquëmaꞌ. Noya noya yaꞌhuëcontaramaꞌ.

1 Juan 3:4

Yosë pënëninpoaꞌ. Co ina natëhuatëhuahuëꞌ, oshahuanëhuaꞌ. Co noyahuëꞌ nipatëhuaꞌ, co Yosë natërëhuahuëꞌ.

Apocalipsis 2:20

co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.

1 Samuel 2:30

Napoaton Sinioro israiroꞌsanpoa chinotërëhuaso naporin: ‘Nani yonquipirahuë piyapinëhuënquën nisápamasoꞌ. Quëmá quëran pipipisopitantaꞌ, inapoꞌina topirahuë. Iporaso nipirinhuëꞌ shaꞌhuitaranquën: Co onporo napocamaso yaꞌhuërinhuëꞌ. Noya niꞌninacosopita tëhuënchinsoꞌ, carinta noya niꞌsarahuë. Nocaninacopitaso nipirinhuëꞌ, atapamiatarahuëꞌ. Ca Sinioroco napotaranquëmaꞌ.