Mateo 5:12 - Chayahuita (Shahui)

¹² Iracantaꞌ Yosë piyapinënpita pënëntohuachinara, aꞌnaquëni inapochachin noꞌhuipi. Napoaton aꞌnapita noꞌhuihuachinënquëmaꞌ, noya cancantocoꞌ. Parisitëramaso marëꞌ Yosëꞌpaꞌ naꞌcon acanaarinquëmaꞌ. Ina yonquiatomaꞌ, capa cancantocoꞌ,” itërin Quisosori.

Mateo 5:12 ပူးပေါင်းရင်းမြစ်များ

Génesis 15:1

Ina piquëran Siniorori, Apran yaꞌnotërin. Co huëꞌëponahuëꞌ, huaꞌnarëso pochin nontërinsoꞌ natanin: —Apran, ama tëꞌhuaquësohuëꞌ, carinquën paꞌpoyaranquën. Panca acanamiataranquën, itërin.

1 Reyes 18:13

Iꞌhua chachin Quisapirari sontaroꞌsa camairin pënëntonaꞌpiroꞌsa tëpacaisoꞌ. Napohuachina, carisoꞌ pasa pënëntonaꞌpi poꞌorahuë. Aꞌnatërápo shonca, aꞌnatërápo shonca acorahuato, cato motopi naninoꞌsaquë poꞌorahuë. Inapotahuato, aꞌcarárahuë. ¡Co aꞌna ina nitotomaranquënhuëꞌ!

1 Reyes 19:2

Ina natanahuaton Quisapirasoꞌ, Iniasë shaꞌhuitacaso marëꞌ aꞌnara comision aꞌparin: “Naporin Quisapira: ‘Quëmasoꞌ Paaro marëꞌ pënëntonaꞌpiroꞌsa acorahuësoꞌ, atëpatëran. Napoaton carionta atëpataꞌhuanquënso yaꞌhuërin. Tashiraya ipora pochin atëpatëransopita pochin nitaranquën. Coꞌsoꞌ inapotohuatënquënhuëꞌ, mamanshiroꞌsa chiníquën anaꞌinchinaco,’ tënin,” itërin.

1 Reyes 21:20

Napotohuachina, paꞌsahuaton Siniorori napotërinsoꞌ Acapo shaꞌhuitonin. Napotohuachina Acapori itapon: —¡Quëmasoꞌ inimiconëhuënquën nipiranhuëꞌ, niquënanëchi paya! itërin. Napotohuachina Inari itapon: —Co Sinioro costarinsohuëráchin ninanso marëꞌ niquënanëꞌ.

1 Reyes 22:8

—Yaꞌhuërin mini aꞌnara. Inasoꞌ, Imiro huiꞌnin Micaiasë itopisoꞌ. Cariso napoaporahuëꞌ, co quëꞌyarahuëꞌ. Maꞌsha onpocaꞌhuasoráchin shaꞌhuitërinco niꞌton, naporahuë, tënin Acapo. Napopirinhuëꞌ: —Ama napoquësohuëꞌ, itërin Cosahuatori.

Nehemías 9:26

Quëmarisoꞌ nosoropiranhuëꞌ, co natëtënënhuëꞌ anoꞌhuitërinën. Pënëntëransopita nocanatona aꞌpopi. Quëma marëꞌ pënëntopisopitanta tëpapi. Inapitari co noyahuëꞌ nipiso aꞌninquëchin shaꞌhuitopi: ‘Ina aꞌporahuatomaꞌ, Sinioroíchin tahuërëtocoꞌ,’ itopi. Napotopirinahuëꞌ, tëpapi. Inapoatona panca tëhuëtërinën.

Salmos 19:11

Yosë shaꞌhuirinsopita yonquiatëhuaꞌ, niyátainpichin yaꞌhuëarihuaꞌ. Noya natëhuatëhuaꞌ, naꞌcon catahuarinpoaꞌ.

Jeremías 2:30

Topinan quëran huiꞌnamapita anaꞌintërahuë. Cancan yonquicaiso marëꞌ napotopirahuëꞌ, co yanitotopihuëꞌ. Paꞌpiniroꞌsa tëꞌhuatoro yaꞌnopiso pochin nicatomaꞌ, pënëntonaꞌpiroꞌsa tëparamaꞌ.

Jeremías 26:8

Sinioro camairincosoꞌ, nani shaꞌhuihuatora, yaꞌipi natanpisopita masahuatonaco noꞌhuirinaco: “Iporasoꞌ chiminamaso yaꞌhuërin. Quëmasoꞌ pënëntohuatana, ‘Yosë chinotacaso nëꞌmëtë pëi Siroquë yaꞌhuërinsoꞌ, Siniorori ataꞌhuantërin. Ina pochachin isonta chinotërëhuaso pëiꞌ, ataꞌhuantarin. Iso ninanonta ataꞌhuantohuachin, tanahuantápon,’ tënan. Napoaton quëmasoꞌ, co tëꞌhuarohuanhuë pochin nonan. ¡Co ina pochin nonacaso yaꞌhuërinhuëꞌ!” itërinaco.

Jeremías 37:14

—Co naporinhuëꞌ. Co ina marëꞌ paꞌnahuëꞌ, itërahuë. Napopirahuëꞌ, inaso co natëtoncohuëꞌ, copirno catahuarinsopita huaꞌanoꞌsaquë, yoꞌconinco.

Mateo 16:27

Yosë quëran quëmapico niꞌto, aꞌna tahuëri oꞌmantararahuë. Tatahuë huënaratërinso pochin cantaꞌ huënaratarahuë. Anquëniroꞌsapitarëꞌco oꞌmantararahuë. Naporoꞌ coisë pochin noꞌtëquën shaꞌhuitarahuë huachi. Noya nipachinaꞌ, noya acoarahuë. Co noyahuëꞌ nipachinaꞌ, anaꞌintarahuë huachi.

Mateo 6:16

Ina quëran itaantarin: “Ama nonpinaꞌpiroꞌsa pochin nicosohuëꞌ. Aꞌnaquën Yosë nontacaso marëꞌ yaꞌipi tahuëri co mantaꞌ coshatërinhuëꞌ. Naporahuaton, co nitapamantarinhuëꞌ. Sëtërëso pochin yaꞌnorin aꞌnapita nitotacaiso marëꞌ. Co cancanën quëran chinotaponahuëꞌ, aꞌnapitari nicacaiso marëꞌ naporin. Niꞌpachinara: ‘Ma noya Yosë chinotërin,’ topi. Piyapiꞌsari noya niꞌpirinahuëꞌ, co huachi Yosëri acanaarinhuëꞌ.

Lucas 13:34

Ina quëran itantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ.

Lucas 6:23

Iráca Yosë piyapinënpita pënëntohuachinara, shimashonëmapitari inapochachin noꞌhuipi. Napoaton aꞌnapita noꞌhuihuachinënquëmaꞌ, noya cancantocoꞌ. Parisitëramaso marëꞌ Yosëꞌpaꞌ naꞌcon canaaramaꞌ. Ina yonquiatomaꞌ, capa cancantocoꞌ.

Lucas 6:35

Canpitaso nipirinhuëꞌ inimiconëmantaꞌ nosorocoꞌ. Inapitantaꞌ catahuacoꞌ. Piyapiꞌsaꞌ pahuantohuachinaꞌ, coriqui aꞌnancoꞌ. ‘Co iꞌhuërëtaponcohuëꞌ nimara,’ tapomarahuëntaꞌ, aꞌnancoꞌ. Ina pochin nipatamaꞌ, Yosëꞌpaꞌ naꞌcon canaaramaꞌ. Yosë pochachin cancantaramaꞌ. Inasoꞌ yaꞌipi piyapiꞌsaꞌ nosoroaton, catahuarin. Oshahuanoꞌsantaꞌ nosororin. Co ‘Yosparinquën,’ itopirinahuëꞌ, catahuarin.

Hechos 16:25

Yono tashiꞌ nisahuasoꞌ, parisitaponaraihuëꞌ, co sëtopihuëꞌ. Cato chachin Yosë nontápi. Yosë chinotatonaꞌ, cantarapi. Apiroꞌsaꞌ natantapi.

Hechos 5:41

Aꞌpahuachinara, pipipi. “Yosë noya niꞌnincoi niꞌtoi, Quisoso marëꞌ parisitërai,” taꞌtonaꞌ, capa cancantopi. Co mantaꞌ sëtopihuëꞌ.

Romanos 5:3

Iporasoꞌ parisitarihuarahuëꞌ, noya cancantarihuaꞌ. “Parisitohuatëhuaꞌ, Yosë catahuarinpoaꞌ imamiatacaso marëꞌ,” taꞌtëhuaꞌ, co sëtarihuahuëꞌ. Chiníquën cancantatëhuaꞌ, noya ahuantarihuaꞌ.

1 Corintios 3:8

Shaꞌtërëso pochin carinquëmaꞌton aꞌchintëranquëmaꞌ. Aꞌnari iꞌshaquë oporapitërinso pochin Aporosëntaꞌ aꞌchintantarinquëmaꞌ. Catocoi chachin Yosë inpriatonën pochin ninai. Inpriatoroꞌsaꞌ sacatohuachinara, huaꞌanëni pahuërërin. Onpopinsona sacatohuachinara, noꞌtëquën pahuërërin. Inapochachin quiyasoꞌ Yosë marëꞌ sacatarai niꞌton, ina acanarincoi.

2 Corintios 4:17

Tëhuënchachin iporasoꞌ piꞌpian parisitapirëhuahuëꞌ, co huaꞌquiꞌ isoroꞌpaquë yaꞌhuarihuahuëꞌ. Yosëꞌpaꞌ paꞌpatëhuaꞌ, co onporontaꞌ pipiarëhuahuëꞌ. Imarëhuaso marëꞌ parisitapirëhuahuëꞌ, inapaquësoꞌ noya noya cancantarihuaꞌ. Yosë pochachin cancantarihuaꞌ.

Filipenses 1:29

Yosë nosoroatonpoaꞌ, noyasáchin yonquirinpoaꞌ. Ina nohuanton, Quisocristo imarëhuaꞌ. Ina quëran imarëhuaso marëꞌ parisitarëhuaꞌ. “Ca marëꞌ chiníquën parisitërin niꞌton, cantaꞌ imarahuëso marëꞌ parisichi,” taꞌtëhuaꞌ, noya cancantahuaꞌ. Inantaꞌ Yosë nohuantërin.

Filipenses 2:17

Iráca maꞌsha Yosë marëꞌ tëpahuachinaꞌ, huinontaꞌ opotopi. Inapochachin cantaꞌ canpita noya noya imacamaso marëꞌ tëpahuachinacontaꞌ, noya nisarin, co sëtarahuëꞌ. Aꞌchintëranquëmaꞌ niꞌton, noya imaramaꞌ. Napoaton noya cancantërahuë.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

Colosenses 3:24

Inasoꞌ noꞌtëquën acanaarinpoaꞌ. Inápaquë noya noya acoarinpoaꞌ. Quisocristo tëhuënchinsoꞌ huaꞌanëntërinpoaꞌ. Napoaton noya natëcoꞌ.

1 Tesalonicenses 2:15

Iráca cotioroꞌsari pënëntonaꞌpiroꞌsaꞌ noꞌhuitonaꞌ, tëpapi. Ina quëran Sinioro Quisocristo chachin oꞌmahuachina, inantaꞌ tëpaantapi. Quiyantaꞌ aparisitatonacoi, aꞌparinacoi. Napopiso marëꞌ Yosëri co noyahuëꞌ niꞌnin. Tëhuënchachin co yaꞌipi piyapiꞌsaꞌ nosoropihuëꞌ.

Hebreos 10:34

Tashinan pëiquë poꞌmohuachinara, co tëꞌhuatomarahuëꞌ, nicapomaꞌ paꞌnamaꞌ. Paatomaꞌ, catahuaramaꞌ. Canpitantaꞌ imaramaso marëꞌ maꞌshanëmaꞌ osërëtopirinënquëmahuëꞌ, co sëtëramahuëꞌ. “Yosë chachin nohuitërëhuaꞌ. Nasha cancan quëtërinpoaꞌ. Co insontaꞌ nanitërinhuëꞌ inasoꞌ osërëtinpoasoꞌ,” taꞌtomaꞌ, nóya cancantëramaꞌ.

Hebreos 11:26

Copirno huiꞌnin pochin niꞌton, nohuantërin naporini, Iquipito parti naꞌcon canaitonhuëꞌ, co ina nohuantërinhuëꞌ. Yosë naꞌcon naꞌcon yonquirin. “Aꞌna tahuëri Cristo oꞌmaton, nichaꞌësarinpoaꞌ. Iporasoꞌ ina marëꞌ aparisitopirinacohuëꞌ, Yosëꞌpaꞌ noya noya acanarinco,” taꞌton, noya ahuantërin.

Hebreos 11:33

Aꞌnaquën Yosë natëtonaꞌ, nisha nisha piyapiroꞌsaꞌ minsëpi. Aꞌnaquëontaꞌ huaꞌan yaꞌconatonaꞌ, noꞌtëquën huaꞌanëntopi. “Yosë shaꞌhuitërinpoaꞌ niꞌton, catahuarinpoaꞌ,” taꞌtonaꞌ, aꞌnaquën natëpi. Napoaton Yosëri catahuarin. Aꞌnaquënsoꞌ Yosë natëtonaꞌ, paꞌpiniꞌ quëran chaꞌëpi.

Hebreos 11:6

Yosë yonquihuatëhuaꞌ, natëtacasoꞌ yaꞌhuërin. “Yosë yaꞌhuárin. Noꞌtëquën nontërinpoaꞌ. Ina nontohuatëhuaꞌ, natanatonpoaꞌ catahuarinpoaꞌ,” topatëhuaꞌ, noya niꞌsarinpoaꞌ. Co ina pochin cancantohuatëhuahuëꞌ, co onporontaꞌ noya niꞌsarinpoahuëꞌ.

Santiago 1:2

Nisha nisha maꞌsha onpoapomarahuëꞌ iyaroꞌsaꞌ, ama sëtocosohuëꞌ. Noya cancantocoꞌ.

Santiago 5:10

Niꞌcoꞌ iyaroꞌsaꞌ. Iráca pënëntonaꞌpiroꞌsaꞌ Sinioro nanamën aꞌchinpirinahuëꞌ. Pënëntohuachinara, aꞌnaquëni noꞌhuitonaꞌ, aparisitopi. Parisitaponaraihuëꞌ, ahuantopi. Co noꞌhuipihuëꞌ.

1 Pedro 4:13

Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ.

Rota naporinso' 2:12

Inapohuatana, quëmaso Yosë chachin yoniton naporan. Inaso Sinioro, israiroꞌsacoi chinotërai. Ina paꞌpoyainquënso marëꞌ inaporan. Inasoꞌ, atari huaꞌhuinpita toꞌcohuëtërinso pochin paꞌpoyarinpoaꞌ. ¡Napoaton inari chachin naporanso marëꞌ acanainquën taꞌto, ina nontërahuë! itërin.