Mateo 27:52 - Chayahuita (Shahui)

⁵² Nopaatohuachina, aꞌnaya aꞌnaya paꞌpitopisoꞌ niiꞌsoatërin. Aꞌnaquën Yosë imarinsopita iráca ayapirinahuëꞌ, nanpiantapi huachi.

Mateo 27:52 ပူးပေါင်းရင်းမြစ်များ

2 Reyes 13:21

Aꞌna tahuëri inapita huëcasoiꞌ, israiroꞌsanta chimipi paꞌpitapi. Co huëꞌsapiso nicatonaraihuëꞌ naporapirinahuëꞌ, aꞌnanaya yaꞌnohuachinara paꞌyanpi. Paꞌyanënaquë chimipisoꞌ, Irisioco poꞌmopi pirayan tëꞌyatopi. Napotatona taꞌananpipi. Chimipiso napoaponahuëꞌ, Irisio nansëquën cari cariaso chachin nanpiantarahuaton, huanirin.

Oseas 13:14

¡Co carima poꞌoroꞌ quëran nichaꞌësaranquëmahuëꞌ! ¡Piyapinëhuëpita nipiramahuëꞌ, co huachi nosoroaponquëmahuëꞌ! Napoaton chimirin përato: ‘Chimirin. Quëmasoꞌ ataꞌhuantonaꞌpinquën. ¿Intohuata iporasoꞌ inapoyantëransoꞌ?’ itërahuë. Poꞌoronta nontato: ‘Poꞌoroꞌ. Quëmantaꞌ naní quëran tëꞌhuachantërinën. ¿Intohuacha iporasoꞌ tëꞌhuachantërinënsoꞌ?’ itërahuë.

Juan 11:11

Ina quëran itaantarincoi: —Iya Nasaro huëꞌërin. Nipirinhuëꞌ, paato ochinanconapo, itërincoi.

Hechos 7:60

Ina quëran isonahuaton, chiníquën itantarin: “Tëparinacoso marëꞌ, ama Sinioro isopita anaꞌintëquësohuëꞌ,” itërin. Ina tosahuaton, chiminin.

1 Corintios 11:30

Napoaton naꞌanquëmaꞌ canioramaꞌ. Aꞌnaquëmantaꞌ co chiniramahuëꞌ. Aꞌnaquënsoꞌ ina marëꞌ chiminin.

1 Corintios 15:20

Nipirinhuëꞌ, Quisocristo tëhuënchachin nani nanpiantarin. Yaꞌnan cayarinsoꞌ sënarëso pochin inaꞌton nanpiantaton, nanpimiatarin. Ina quëran canpoantaꞌ chiminarihuarahuëꞌ, nanpiantarihuaꞌ.

1 Corintios 15:51

Noya natanco iyaroꞌsaꞌ. Naꞌa piyapiꞌsaꞌ co nitotopirinahuëꞌ, shaꞌhuitaranquëmaꞌ. Co yaꞌipi imarëhuasopita chiminarihuahuëꞌ. Napoaponahuëꞌ, Yosë nohuanton, yaꞌipi imarëhuasopita nisha yaꞌnoarihuaꞌ.

1 Tesalonicenses 4:14

Quisososoꞌ chiminaponahuëꞌ, nanpiantarinsoꞌ nitotërëhuaꞌ. Inapochachin imapisopita chiminpachinaꞌ, Yosëri ananpitaantarin. Quisoso isoroꞌpaquë oꞌmantahuachin, ananpitaantarin.

1 Tesalonicenses 5:10

Canpoa marëꞌ inasoꞌ chiminin. Aꞌnaquënpoaꞌ nanpiarëhuaꞌ, aꞌnaquënpoaꞌ chiminarihuarahuëꞌ, oꞌmantahuachin, yaꞌipi imarëhuasopita quëpantarinpoaꞌ. Inarëꞌquënpoaꞌ yaꞌhuëmiatarihuaꞌ.