Mateo 27:4 - Chayahuita (Shahui)

⁴ —Co huachi iso coriqui nohuantërahuëꞌ. Paꞌpi co noyahuëꞌ ninahuë. Quisoso nóya quëmapi nipirinhuëꞌ, shaꞌhuirapirahuë. Ina marëꞌ oshahuanahuë, itoonin. —¿Maꞌmarëtaꞌ ina shaꞌhuitërancoi? Co quiyasoꞌ ina yonquiraihuëꞌ. Quëma naporansoꞌ, itopi.

Mateo 27:4 ပူးပေါင်းရင်းမြစ်များ

1 Reyes 21:27

Iniasëri napotërinsoꞌ natanahuaton, Acaposo paꞌpi sëtërin. Aꞌmorinso osharahuaton, saꞌcatën nininsoꞌ aꞌmorin. Naporahuaton co huachi coshatatonhuëꞌ, Yosë yonquirin. Huëꞌëpachinantaꞌ, inanpi aꞌmorinquëranchin huëꞌërin. Oshanën marëꞌ sëtërinsoꞌ nitotacaiso marëꞌ naporin.

Éxodo 12:31

Napohuachina copirnori, Moisësë, Aaron, inapita amataantarin. Canconpachinara itapon: “Paco huachi yaꞌhuërahuë quëran. Yaꞌipi israiroꞌsanta paatona Yosë chinochinaꞌ.

Jeremías 26:15

Napoaponahuëꞌ, noya yonquicoꞌ. Tëpahuatamacosoꞌ, co manta onpopirahuëꞌ tëpapomaco. Ina marëꞌ yaꞌipinquëma naꞌinaramaꞌ. Yaꞌipi shaꞌhuitëranquëmasopitasoꞌ, co caora nohuanton shaꞌhuitëranquëmahuëꞌ. Sinioro aꞌparinco niꞌton, napotëranquëmaꞌ,” itërahuë.

Jonás 1:14

Napohuachina, Sinioro nontopi huachi: “Sinioro. Quëmaso nohuantëransoráchin ninan. Iso quëmapi naꞌinin quëran poꞌsarai nipachina, ama yaꞌipicoi taquiitaꞌhuaiso nohuantëquësohuëꞌ. Yaꞌhuërëꞌ inaso co manta tëhuëpirinhuëꞌ tëꞌyaitohuatoi, chimanapon. Napohuachin, ama ina naꞌinchincoisohuëꞌ,” itopi.

Mateo 27:19

Huaꞌan shiranënquë huënsëasoꞌ, saꞌinintaꞌ nanan aꞌpatiirin Quisoso ocoicaso marëꞌ. “Achin tashiꞌ aꞌninquëchin huaꞌnarahuë. Quisoso huaꞌnato, chiníquën paꞌyanahuë. Inasoꞌ noya quëmapi. Co mantaꞌ onporinhuëꞌ niꞌton, nichaꞌëquëꞌ. Co tëpacasoꞌ yaꞌhuërinhuëꞌ,” itërin saꞌini. Ina marëntaꞌ Piratori co yatëparinhuëꞌ.

Mateo 27:54

Quisoso chiminpachina, capitanso sontaronënpitarë chachin niꞌsapi. Ocohua paꞌninsoꞌ, naꞌpiroꞌsaꞌ nopaatërinsoꞌ, inapita niꞌsahuatonaꞌ, paꞌpi paꞌyanpi. —Tëhuënchachin iso quëmapisoꞌ, Yosë huiꞌnin, topi.

Lucas 23:22

—¿Maꞌmarëtaꞌ atëpachi? Nani natanpirahuëꞌ. Co mantaꞌ onporinhuëꞌ. Co tëpacasoꞌ yaꞌhuërinhuëꞌ, tënahuë. Topinan ahuihuitahuato, ocoiꞌi, tënin. Nani cararoꞌ inachachin itaantarin.

Lucas 23:41

Canposoꞌ co noyahuëꞌ ninëꞌ. Napoaton noꞌtëquën coisë anaꞌintarinpoꞌ. Iso quëmapiso nipirinhuëꞌ nóya. Co mantaꞌ onporinhuëꞌ, itërin.

Lucas 23:47

Capitansoꞌ ina niꞌsahuaton, Yosë chinotërin: —Tëhuënchachin iso quëmapi co mantaꞌ onporinhuëꞌ, tënin.

Juan 19:7

—Iráca pënëntërinsoꞌ co natërinhuëꞌ niꞌton, chimiꞌin. Topinan piyapi niponahuëꞌ, “Yosë huiꞌninco,” toconin, itopi.

Hechos 13:28

Co maꞌmarë tërantaꞌ tëpacasohuëꞌ nipirinhuëꞌ, Pirato shaꞌhuitopi: ‘Tëpaquëꞌ,’ itopi.

Romanos 3:19

Tëhuënchachin co noyahuëꞌ nicatëhuaꞌ, yaꞌipinpoaꞌ oshahuanëhuaꞌ. Yosë pënëntërinsoꞌ nitotopirëhuahuëꞌ, co natërëhuahuëꞌ niꞌton, anaꞌintinpoasoꞌ yaꞌhuërin.

1 Timoteo 4:2

Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi.

Tito 1:16

“Yosë nohuitërahuë,” topirinahuëꞌ, co noyahuëꞌ nipi. Ina marëꞌ co tëhuënchachin imapihuëꞌ, tënahuë. Co Yosëri noya niꞌninhuëꞌ. “Napoonpi,” tënin. Co mantaꞌ yanatëpihuëꞌ. Yosë aꞌpoatonaꞌ, co piꞌpisha tërantaꞌ nanitopihuëꞌ noya nicacaisoꞌ.

Hebreos 7:26

Quisocristoíchin nanan anoyatërinpoaꞌ. Inasoꞌ corto huaꞌan chini chiníquën nanantërinso pochin nicaton, nóya ninin. Co piꞌpian tërantaꞌ oshahuaninhuëꞌ. Co nëꞌhuëtërinso pochin nininhuëꞌ. Co oshahuanoꞌsa pochin cancantërinhuëꞌ. Inápaquë panantahuachina, Yosëri chini chiníquën nanan quëtërin.

1 Pedro 1:19

Huiꞌninso nipirinhuëꞌ noya noya. Ina chiminpachina, huënainën paꞌnin. Iráca cotioroꞌsaꞌ co noyahuëꞌ nipachinara, carniroaꞌhua noyápiachin nininsoꞌ masahuatonaꞌ, tëpapi. Inapochachin Quisocristosoꞌ nóya. Co mantaꞌ oshahuanaponahuëꞌ, corosëquë chiminin. Oshanënpoaꞌ inquitatonpoaꞌ, ocoirinpoa huachi.

1 Juan 3:12

Iráca Cainosoꞌ sopai natëton, iin tëparin. ¿Maꞌmarëtaꞌ tëparin? Iinsoꞌ noya ninin niꞌton, noꞌhuiton, tëparin. Ama ina pochin cancantocosohuëꞌ.

Apocalipsis 11:10

Tëpapi niꞌton, capa cancantatonaꞌ, pita nisapi. Maꞌshanënantaꞌ topinan aꞌnaya aꞌnaya niquëtapi. “Huaꞌquiꞌ pënënatonpoaꞌ, apininpoaꞌ nipirinhuëꞌ, iporasoꞌ nani chiminpi,” taꞌtonaꞌ, capa cancantapi.

1 Samuel 15:24

Napotohuachina, inariso itapon: —Sontaronëhuëpita tëꞌhuatato maꞌsona nohuantopiso ninahuë. Inapoato Sinioro camaitërinsoꞌ, quëma shaꞌhuitërancosopita, inapita naniantërahuë. Inapoato oshahuanahuë.

1 Samuel 15:30

Napotohuachina Saono taantarin: —Caso oshahuanahuë. Napopirahuëꞌ, onpopiontaꞌ, ansianoꞌsaꞌ, aꞌnapita israiroꞌsaꞌ, inapita niꞌtonënquë noya niꞌcoꞌ. Noya nicatonco natëco. Napoaton carëꞌquën Sinioro chinotacaso marëꞌ panantaꞌa. Inasoꞌ Yosë quëmari chinotëransoꞌ, itërin.

1 Samuel 19:5

Naporoꞌ Coriato tëpapon, chiminchináchin ninin. Siniorori catahuarin niꞌton, ina quëran israiroꞌsanpoa nichaꞌërinpoaꞌ. Quëmaora chachin naporinso nicaton capa cancantëran. ¡Napoaton co tëpamaso yaꞌhuërinhuëꞌ! ¡Co manta onporinhuëꞌ! itërin.