Mateo 26:3 - Chayahuita (Shahui)

³ Ina quëran corto huaꞌanoꞌsaꞌ, cotio ansianoꞌsaꞌ, inapita Caihuasë pëinënquë niyontonpi. Inasoꞌ corto huaꞌan, chini chiníquën nanantërin.

Mateo 26:3 ပူးပေါင်းရင်းမြစ်များ

Mateo 26:69

Napotasoi, Pitrosoꞌ iꞌiratëquë huënsëarin. Aꞌna cosonari huëꞌsahuaton, itiirin. —Quëmantaꞌ Quisoso Cariria quëran huëꞌninsoꞌ caꞌtanan, itopirinhuëꞌ.

Mateo 27:27

Shaꞌhuitohuachina, Pirato pëinënquë quëpapi. Inaquë notohuaroꞌ sontaroꞌsaꞌ niyontonpi tëcariatonaꞌ tëhuacaiso marëꞌ.

Marcos 14:54

Pitroso nipirinhuëꞌ, aquë quëran imaquiarin. Corto huaꞌan iꞌiratëꞌ pairapirinquë huarëꞌ imaquirin. Inaquë yaꞌconahuaton, ponisiaroꞌsapitarëꞌ huënsëaton, napëntarin.

Marcos 14:66

Pitroso iꞌiratëquë yaꞌhuëápirinhuëꞌ, aꞌna sanapi huëꞌnin. Corto huaꞌan cosonanën inasoꞌ.

Marcos 15:16

Ina quëran sontaroꞌsari Pirato pëinënquë quëpapi. Pairaanaquë ichiyaꞌconahuatonaꞌ, yaꞌipi sontaroꞌsaꞌ amatopi.

Lucas 22:55

Iꞌiratëquë huarëꞌ imaquirahuaton, pairaanaquë yaꞌconin. Inaquë ponisiaroꞌsaꞌ nani aꞌpëtopi napëntacaiso marëꞌ. Pana yonsanquë huënsërahuaton, inantaꞌ napëntarin.

Lucas 3:2

Anasë, Caihuasë, inapita corto huaꞌan chini chiníquën nanantërinsoꞌ yaꞌconpi. Naporoꞌ Coansha pënëntarin. Sacariasë huiꞌnin inasoꞌ. Inotëroꞌ parti yaꞌhuasoꞌ, Yosëri shaꞌhuitërin paaton pënëntacaso marëꞌ.

Juan 11:57

Corto huaꞌanoꞌsaꞌ, parisioroꞌsaꞌ, inapitasoꞌ nani piyapiꞌsaꞌ shaꞌhuitopi: “Quisoso quënanpatamaꞌ, shaꞌhuitocoi maii,” itopi. Tashinan pëiquë poꞌmocaiso marëꞌ napotopi.

Juan 18:24

Ina natanahuaton, huaꞌani aꞌparin Caihuasë nontacaso marëꞌ. Tonpopinan quëpapi.

Juan 18:28

Tashíramiachin nisahuasoꞌ, Caihuasë pëinën quëran quëparahuatonaꞌ, Noma huaꞌan pëinënquë quëpapi. Cotioroꞌsaso nipirinhuëꞌ co inaquë yaꞌconpihuëꞌ. “Nisha piyapiꞌsaꞌ pëinënquë yaꞌconpatëhuaꞌ, oshahuanarihuaꞌ. Ina quëran co nanitarihuahuëꞌ Pascoa cosharoꞌ capacasoꞌ,” topi.