Mateo 23:34 - Chayahuita (Shahui)

³⁴ Napoaton pënëntonaꞌpiroꞌsaꞌ aꞌpataranquëmaꞌ. Noꞌtëquën yonquinaꞌpiroꞌsaꞌ, aꞌchinaꞌpiroꞌsaꞌ inapita aꞌpataranquëmaꞌ aꞌchintinënquëmaso marëꞌ. Noꞌtëquën pënënaponënquëmaꞌ nipirinhuëꞌ, noꞌhuiaramaꞌ. Aꞌchintopirinënquëmahuëꞌ, aꞌnaquën tëpaaramaꞌ. Aꞌnaquën niyontonpiso pëiquë chiníquën huihuiaramaꞌ. Nisha nisha ninanoquë imatomaꞌ, aparisitaramaꞌ. Aꞌnaquëontaꞌ corosëquë patanantatomaꞌ, tëpaaramaꞌ.

Mateo 23:34 ပူးပေါင်းရင်းမြစ်များ

Jeremías 26:8

Sinioro camairincosoꞌ, nani shaꞌhuihuatora, yaꞌipi natanpisopita masahuatonaco noꞌhuirinaco: “Iporasoꞌ chiminamaso yaꞌhuërin. Quëmasoꞌ pënëntohuatana, ‘Yosë chinotacaso nëꞌmëtë pëi Siroquë yaꞌhuërinsoꞌ, Siniorori ataꞌhuantërin. Ina pochachin isonta chinotërëhuaso pëiꞌ, ataꞌhuantarin. Iso ninanonta ataꞌhuantohuachin, tanahuantápon,’ tënan. Napoaton quëmasoꞌ, co tëꞌhuarohuanhuë pochin nonan. ¡Co ina pochin nonacaso yaꞌhuërinhuëꞌ!” itërinaco.

Jeremías 36:26

Naporahuaton, Parocoroꞌco chachin macainacoiso marëꞌ camaitërin. Quëmopinën Quiramiiro itopisoꞌ ina marëꞌ camairin. Asirisi huiꞌnin Siraiasë, Apitiiri huiꞌnin Sirimiasë, inapitanta ina chachin camairin. Napotohuachina, inapitaso yonisápirinacoihuëꞌ, co quënaninacoihuëꞌ. Sinioro poꞌorincoi niꞌton, co quënaninacoihuëꞌ.

Mateo 10:23

Aparisitohuachinënquëmaꞌ, aꞌna ninanoquë paantacoꞌ. Inaquëntaꞌ aꞌchiantacoꞌ. Naꞌa ninanoroꞌsaꞌ Cotia parti yaꞌhuërin. Co yaꞌipi ninanoroꞌsaquë paꞌshatërasënquëmahuëꞌ, cantaꞌ oꞌmantararahuë. Yosë quëran quëmapico niꞌto, aꞌna tahuëri oꞌmantarahuë Yosë huaꞌanëntërinsoꞌ acocaꞌhuaso marëꞌ.

Mateo 13:52

—Yosë quiricanën nani nitotaramaꞌ. Yosë huaꞌanëntërinsoꞌ aꞌchintëranquëmaꞌ niꞌton, pëiꞌ huaꞌanën pochin nisaramaꞌ. Pëiꞌ huaꞌanën noya nipachina, yaꞌipi pëinënquë yaꞌhuëpisopita noya nocomarin. Nani naꞌcon aꞌchintëranquëmaꞌ Yosë nanamën aꞌchinacamaso marëꞌ. Iráca ninshitopisoꞌ nitotëramaꞌ. Naporahuaton, aꞌnantaꞌ nashamiachin aꞌchintaranquëmaꞌ. Yaꞌipiya nitotatomaꞌ, aꞌchintëraꞌpiaramaꞌ, itërin Quisosori.

Mateo 23:31

shimashonëmaꞌ quëpatomaꞌ, canpitantaꞌ tëpatonaꞌpiroꞌsa pochin cancantaramaꞌ.

Lucas 24:47

Ina nanan chachin shaꞌhuicasoꞌ yaꞌhuërin. “Co noyahuëꞌ yonquiramasopita naniantohuatamaꞌ, oshanëmaꞌ inquitarinquëmaꞌ,” itocoꞌ. Quirosarinquëꞌton shaꞌhuicasoꞌ yaꞌhuërin. Ina quëran nisha nisha nananquë nonpisopita shaꞌhuitacasoꞌ yaꞌhuërin.

Juan 16:2

Niyontonpiso pëiroꞌsa quëran ocoiarinënquëmaꞌ. Aꞌna tahuëri yatëparinënquëmaꞌ. ‘Co noyahuëꞌ nipi niꞌton, tëpahuatoi, Yosë noya niꞌsarincoi,’ taꞌtonaꞌ, aꞌnaquëmaꞌ tëpaarinënquëmaꞌ.

Juan 20:21

—Sano cancantocoꞌ iyaroꞌsaꞌ. Tatahuë aꞌparincoso pochachin canpitantaꞌ aꞌpaaranquëmaꞌ piyapiꞌsaꞌ aꞌchintacamaso marëꞌ, itërincoi.

Hechos 1:8

Iporaso nipirinhuëꞌ Ispirito Santo naꞌcon catahuarinquëmaꞌ. Yaꞌcoancantohuachinquëmaꞌ, nóya pënëntaramaꞌ. Ina nohuanton, nani maꞌsha nanitaparamaꞌ. Yaꞌipi naporahuësoꞌ niꞌnamaꞌ, nani nitotëramaꞌ. Aꞌnapitantaꞌ shaꞌhuitocoꞌ. Quirosarinquë chachin shaꞌhuitocoꞌ. Ina quëran yaꞌipi Cotia parti paatomaꞌ, shaꞌhuitoncoꞌ. Samaria partintaꞌ shaꞌhuitoncoꞌ. Yaꞌipi parti paatomaꞌ, shaꞌhuitëraꞌpiacoꞌ, itërin Quisosori.

Hechos 11:27

Naporoꞌ tahuëriꞌsaꞌ pënëntonaꞌpiroꞌsaꞌ Quirosarin quëran Antioquiaquë huëꞌpi.

Hechos 12:2

Santiaco maconpi. Inasoꞌ Coansha iin. Mapachinara, sahuëniquë atëpatërin.

Hechos 13:1

Antioquiaquë naꞌa Quisoso imapisopita yaꞌhuëpi. Naꞌa niyontonahuatonaꞌ, Yosë chinotopi. Aꞌnatërápo quëmapiꞌsaꞌ ansiano yaꞌconpi. Aꞌnaquënsoꞌ Quisoso nanamën shaꞌhuitonaꞌ, pënëntopi. Aꞌnaquëontaꞌ imapisopita aꞌchintopi noya imacaiso marëꞌ. Inapitasoꞌ: Pirnapi, Simon, Nosio, Manain, Saono, inanapo yaꞌhuëpi. Simonsoꞌ yara piyapi. Nosiosoꞌ Sirini quëran huëꞌnin. Manainsoꞌ, Cariria huaꞌan Irotisë pëinënquë soꞌsorinsoꞌ.

Hechos 14:19

Napoaponahuëꞌ, cotioroꞌsari huëcapairahuatonaꞌ, anishacancantopi. Aꞌnaquën Antioquia quëran huëꞌpi. Aꞌnapitantaꞌ Iconio quëran huëꞌpi. Huëꞌsahuatonaꞌ, Paono, Pirnapi, inapita shaꞌhuirapipi niꞌton, noꞌhuipi. Noꞌhuirahuatonaꞌ, Paono mapi. Masahuatonaꞌ, naꞌpiquë tëꞌyarahuachinara, chiminpirinhuëꞌ. Ohuararahuatonaꞌ, ninano intonquë tëꞌyatonpi. “Nani chiminin,” taꞌtonaꞌ inaquë patopi.

Hechos 15:32

Cotasë, Sirasë, inapitasoꞌ pënëntonaꞌpiroꞌsaꞌ niꞌton, huaꞌquiꞌ Quisoso imapisopita pënënpi. Noya pënënpi niꞌton, noya noya imasapi.

Hechos 5:40

Caꞌtanoꞌsaꞌ naquëranchin amatantarahuatonaꞌ, chiníquën huihuipi. “Ama huachi insontaꞌ Quisoso nanamën shaꞌhuitocosohuëꞌ,” itahuatonaꞌ, aꞌpapi huachi.

1 Corintios 2:6

Napoaponahuëꞌ, chinoton pochin cancantopisopita aꞌchintohuatoi, yaꞌipi Yosë yonquirinpoasoꞌ aꞌchintërai. Co piyapiꞌsaꞌ yonquipisoꞌ aꞌchinaihuëꞌ. Co huaꞌanoꞌsaꞌ yonquipiso tëranta aꞌchinaihuëꞌ. Inapitasoꞌ inahuara yonquipisoáchin yonquiatonaꞌ, co Yosë pochin yonquipihuëꞌ niꞌton, taꞌhuantapi.

1 Corintios 3:10

Natëricho quëran yapëihuatëra, acopoꞌ ihuatahuatëꞌ, siminto acorëꞌ. Inaꞌton acorëso pochin carinquëmaꞌton aꞌchintëranquëmaꞌ. Yosë catahuarinco noꞌtëquën aꞌchinaꞌhuasoꞌ. Ina quëran aꞌnapitantaꞌ aꞌchintantarinënquëmaꞌ. Napoaponahuëꞌ, aꞌnaya aꞌnaya noya yonquiaton pëirinso pochin aꞌnapita noya aꞌchintacasoꞌ yaꞌhuërin.

Colosenses 1:28

Napoaton Quisocristo nanamën aꞌchinárai. Yaꞌipi piyapi pënënárai. Noya yonquiatoi, aꞌchintarai Quisocristo imacaiso marëꞌ. Ina imapatamaꞌ, noya noya cancantaramaꞌ.

1 Tesalonicenses 2:16

Nisha piyapiꞌsaꞌ chaꞌëcaiso marëꞌ yaaꞌchintopiraihuëꞌ, cotioroꞌsasoꞌ co nohuantopihuëꞌ. “Ama aꞌchintocosohuëꞌ,” taꞌtonaꞌ, noꞌhuirinacoi. Ina marëꞌ aquë aquëtëꞌ oshahuanpi. Napoaton Yosëri chiníquën noꞌhuirin. Noꞌtëquën anaꞌintarin huachi.

Hebreos 11:37

Aꞌnaquëontaꞌ naꞌpiquë tëꞌyaratonaꞌ, tëpapi. Aꞌnaquëontaꞌ sërichoquë yatonatonaꞌ, tëpapi. “Yosë aꞌpocoꞌ, tëpachinënquëmaꞌ,” itopirinahuëꞌ, co yaaꞌpopihuëꞌ. Aꞌnaquëontaꞌ sahuëni quëran tëpapi. Aꞌnaquën co tëpapirinahuëꞌ, imapiso marëꞌ chiníquën aparisitopi. Yatëpahuachinara, taꞌapi. Co huachi yaꞌhuëmia yaꞌhuëpihuëꞌ. Capa aꞌmocaisoꞌ niꞌton, ohuica shaꞌhuëtëꞌ, chipo shaꞌhuëtëꞌ inapita aꞌmopi. Co mantaꞌ yaꞌhuëtopihuëꞌ. Chiníquën parisitopi.

Apocalipsis 11:10

Tëpapi niꞌton, capa cancantatonaꞌ, pita nisapi. Maꞌshanënantaꞌ topinan aꞌnaya aꞌnaya niquëtapi. “Huaꞌquiꞌ pënënatonpoaꞌ, apininpoaꞌ nipirinhuëꞌ, iporasoꞌ nani chiminpi,” taꞌtonaꞌ, capa cancantapi.