Mateo 21:26 - Chayahuita (Shahui)

²⁶ Nipirinhuëꞌ, “Co Yosëri nanan quëtërinhuëꞌ. Piyapiri quëtërin,” itohuatëhuaꞌ, naꞌa piyapiꞌsaꞌ noꞌhuiarinënpoaꞌ. “Yosëri aꞌparin pënëntacaso marëꞌ,” topi yaꞌipiya, nitopi.

Mateo 21:26 ပူးပေါင်းရင်းမြစ်များ

Mateo 11:9

Pënëntërinsoꞌ natanacamaso marëꞌ paꞌnamaꞌ, tënahuë. Coansha tëhuënchachin nóya pënëntërin. Co topinan quëran pënëntërinhuëꞌ. Yosëri chachin aꞌparin pënëntacaso marëꞌ.

Mateo 14:5

Chiníquën noꞌhuiton, yatëpapirinhuëꞌ, piyapiꞌsaꞌ tëꞌhuatërin. “Yosëri chachin Coansha aꞌparin pënëinpoaso marëꞌ,” taꞌtonaꞌ, noya niꞌpi. Inapita tëꞌhuataton, co atëpatërinhuëꞌ.

Mateo 21:11

—Coꞌta Quisoso, Cariria parti yaꞌhuërinsoꞌ. Nasarito quëran huëcaton, naꞌcon pënëntërin, itopi.

Mateo 21:25

¿Incaritaꞌ Coansha nanan quëtërin piyapiꞌsaꞌ aporintacaso marëꞌ? ¿Yosëri nanan quëtërin, piyapiꞌsari nica? ¿Maꞌtaꞌ tënamaꞌ canpita? Shaꞌhuitoco carinquëmantaꞌ nanan quëtërincosoꞌ shaꞌhuichinquëmaꞌ, itërin Quisosori. Natanahuatonaꞌ, inahua capini ninontapi. —¿Maꞌtaꞌ itahuaꞌ? “Yosëri nanan quëtërin aporintacasoꞌ,” itohuatëhuaꞌ, “¿Onpoatomataꞌ nipachin co natëramahuëꞌ?” itarinpoaꞌ.

Mateo 21:27

Nani ninontohuachinara, Quisoso itaponaꞌ: —Ahuën. Co quiyasoꞌ nitotëraihuëꞌ. ¿Incarisoꞌ Coansha nanan quëtomara? Co nitotëraihuëꞌ, toconpi. —Iꞌyan, napoahuarëꞌ co carinquëmantaꞌ insosona nanan quëtërincosoꞌ shaꞌhuitaranquëmahuëꞌ, itërin Quisosori.

Mateo 21:46

Noꞌhuitonaꞌ tashinan pëiquë yapoꞌmopirinahuëꞌ, piyapiꞌsaꞌ tëꞌhuatatonaꞌ, co mapihuëꞌ. Notohuaroꞌ piyapiꞌsaꞌ Quisoso noya natanpi. “Yosëri chachin acorin pënëinpoaso marëꞌ,” topi. Napoaton cotio huaꞌanoꞌsaꞌ co nanitopihuëꞌ Quisoso macacaisoꞌ.

Marcos 11:32

Nipirinhuëꞌ, ‘Co Yosëri nanan quëtërinhuëꞌ. Piyapiri quëtërin,’ itohuatëhuaꞌ, naꞌa piyapiꞌsaꞌ noꞌhuiarinënpoaꞌ. ‘Yosëri Coansha aꞌparin pënëntacasoꞌ,’ topi yaꞌipi piyapi,” nitopi.

Marcos 12:12

Natanahuatonaꞌ, cotio huaꞌanoꞌsari chiníquën noꞌhuipi. “Chinotatonpoaꞌ pënënarinpoaꞌ,” taꞌtonaꞌ Quisoso yamapirinahuëꞌ tashinan pëiquë poꞌmocaiso marëꞌ. Piyapiꞌsaꞌ niyontonpisopita tëꞌhuatatonaꞌ, co mapihuëꞌ. Patopi huachi.

Marcos 6:20

Irotisërisoꞌ Coansha noya natanin. “Nóya quëmapi inasoꞌ. Co oshahuanhuëꞌ,” taꞌton, co nohuantërinhuëꞌ atëpatacasoꞌ. Coanshari pënënpachina, nisha nisha yonquiaponahuëꞌ, noya natanin.

Lucas 20:19

Ina natanatonaꞌ, corto huaꞌanoꞌsaꞌ, cotio maistroꞌsaꞌ, inapitasoꞌ noꞌhuitopi: “Chinotatonpoaꞌ, pënënarinpoaꞌ,” taꞌtonaꞌ, yamapirinahuëꞌ tashinan pëiquë poꞌmocaiso marëꞌ. Piyapiꞌsaꞌ tëꞌhuatatonaꞌ, co mapihuëꞌ.

Lucas 20:6

Nipirinhuëꞌ: ‘Co Yosëri nanan quëtërinhuëꞌ. Piyapiri quëtërin,’ itohuatëhuaꞌ, naꞌa piyapiꞌsaꞌ chiníquën noꞌhuiarinënpoaꞌ. Naꞌpiquë tëꞌyaratënënpoaꞌ, tëpamarinënpoaꞌ. ‘Yosëri aꞌparin pënëinpoaso marëꞌ,’ topi yaꞌipiya,” nitopi.

Lucas 22:2

Corto huaꞌanoꞌsaꞌ, cotio maistroꞌsaꞌ, inapitari chinotopi Quisoso tëpacaisoꞌ. Piyapiꞌsaꞌ tëꞌhuatatonaꞌ, co nanitopihuëꞌ aꞌninquëchin macacaisoꞌ.

Juan 5:35

Coanshasoꞌ noya quëmapi. Huaroro noya orotërinso pochin niꞌton, noya anitotërinquëmaꞌ. Yaꞌnan natanpatamara, huaꞌquimiachin paꞌyatëramaꞌ.

Juan 9:22

Cotio huaꞌanoꞌsaꞌ tëꞌhuataton, napotërin. Iꞌhua chachin huaꞌanoꞌsa capini ninontopi Quisoso imarinsopita anaꞌintacaiso marëꞌ. “Quisososoꞌ Cristo chachin,” topachinaꞌ, ocoiaꞌahuaꞌ. Ocoihuatëhuaꞌ, co huachi nanitapihuëꞌ niyontonpiso pëiquë huëcacaisoꞌ, nitopi.

Hechos 5:26

Ina quëran ponisiaroꞌsasoꞌ huaꞌanënarë chachin paꞌsahuatonaꞌ, macoantapi. Piyapiꞌsaꞌ tëꞌhuatatonaꞌ, co ahuëpihuëꞌ. “Naꞌpiquë tëꞌyarahuachinënpoaꞌ,” taꞌtonaꞌ, oshaquëran mapi.