Mateo 11:25 - Chayahuita (Shahui)

²⁵ Naporoꞌ noya cancantaton, Yosë nontërin: “¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën.

Mateo 11:25 ပူးပေါင်းရင်းမြစ်များ

Génesis 14:19

Nani aꞌcarahuaton, Miriquisori Apran iso pochin shaꞌhuitërin: “Yosë chini chiníquën nanantërinsoꞌ, catahuainquën. Inasoꞌ, piꞌiroꞌtëꞌ, isoroꞌpaꞌ, inapita acorin.

Génesis 14:22

Napotopirinhuëꞌ, Apranisoꞌ itapon: —Yosë chini chiníquën nanantaton, piꞌiroꞌtëꞌ, isoroꞌpaꞌ, inapita acorin. Ina niꞌsárinco niꞌton, co piꞌshi tërantaꞌ, co sapatë nonin tëranta caora marëꞌ macapohuëꞌ: “Cari, Apran amaꞌhuanahuë.” Ama tëcamaso marëhuëꞌ, co macapohuëꞌ.

2 Reyes 19:15

Ina quëran Yosë nontaton: “Quëmasoꞌ Sinioro, Yosënquën. Israiroꞌsacoi chinotërainquën. Quiropinoꞌsa aipi, huaꞌanëntëranso shiranën yaꞌhuërin. Quëmariáchin yaꞌipi nacionoꞌsa ninan. Isoroꞌpaꞌ, piꞌiroꞌtëꞌ, inapitanta quëma nohuanton yaꞌhuërin.

Salmos 8:2

Quëma nohuanton huaꞌhuaroꞌsa noya chinotarinën. Shoꞌshopiaꞌhuaroꞌsantaꞌ, chinotarinën. Inapohuachinara, chini chiníquën nanantaton, piyapinënpita paꞌpoyaran. Inapita paꞌpoyaton, inimicoroꞌsa minsëaran.

Isaías 66:1

Naquëranchin Sinioro taantarin: “Piꞌiroꞌtësoꞌ, huaꞌanëntërahuëso shiranëhuë pochin ninin. Isoroꞌpantaꞌ, nantëhuë ayaꞌnanahuëquë pochin ninin. Ina pochin niꞌton, ¡co insëquë tërantaꞌ, pëi nitamacoso marëꞌ nanirinhuëꞌ! ¡Co insëquë tëranta chinotaꞌhuaso marëꞌ nitamacosoꞌ nanitëramahuëꞌ!

Daniel 2:23

Quëmaso Yosënquën. Shimashonëhuëipitantaꞌ, chinotërinën. ‘Yosparinquën,’ itatënquën chinotëranquën. Quëma nohuanton yonquínahuan nisahuato chiníquënco. Natananquënsonta anitotëranco. Copirno huaꞌnaton co napion ancantápirinhuëꞌ, anitotëranco,” itërin.

Daniel 4:35

Isoroꞌpaquë yaꞌhuëpisopita quëma marësoꞌ, co máquënoꞌsahuëꞌ. Inápaquë yaꞌhuëpisopita, nohuantëransoráchin nipi. Isoroꞌpaquëntaꞌ, ina pochachin nipi. Chini chiníquën nanantëran niꞌton, co insonta nanitarinhuëꞌ, chinitiinquënsoꞌ. Maꞌsha nipataontaꞌ: ‘¿Onpoatonta ina pochin nisaran?’ co itiinënso yaꞌhuërinhuëꞌ,” itërahuë.

Mateo 16:17

—Ma noyacha iyasha Yosë catahuarinquën niꞌton, naporan. Napoaton noya cancantëran. Co quëmaora yonquinën quëran nitotëranhuëꞌ. Tata Yosë chachin anitotërinquën. Quëmasoꞌ Conasë huiꞌninquën. Simon itopirinënquënhuëꞌ,

Mateo 21:16

Noꞌhuitonaꞌ, Quisoso itopi: —Isopita napopisoꞌ ¿co natananhuëꞌ ti? itopi. —Natanahuë mini. Noꞌtëquën nonsapi. Yosë quiricanënquë naporin: “Quëma nohuanton, huaꞌhuaroꞌsaꞌ nóya nonapiarinënquën. Shoꞌshopiaꞌhuaroꞌsaꞌ niponaraihuëꞌ, ‘Ma noyanquëncha quëmaso paya,’ itarinënquën,” tënin, itërin Quisosori.

Lucas 22:42

“Quëma nohuantohuatan Tata, nichaꞌëco, ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantaporahuëꞌ, quëma nohuantohuatan, maꞌsona yaonpotohuatancontaꞌ noya, tënahuë. Noꞌtëquën yanatëranquën,” itërin. [

Lucas 23:34

Patanantopirinahuëꞌ, Yosë nontërin. —Tëparinacoso marëꞌ Tata, ama anaꞌintëquësohuëꞌ. Co nohuitatonacohuëꞌ, napotarinaco, itërin.] Ina quëran sontaroꞌsa capini ninontopi. “Huëcoꞌ nicanatëhuaꞌ Quisoso aꞌmorinsoꞌ maahuaꞌ,” nitatonaꞌ, yaꞌnipirapi. Naporahuatonaꞌ, aꞌnaya aꞌnaya mapi.

Juan 11:41

Ina quëran naꞌpi chiꞌhuincatopi. Quisoso inápaquë nëꞌpëtahuaton, Yosë nontërin: —Nani Tata nontëranquën catahuancoso marëꞌ. Natanatonco, catahuaranco mini. Ina marëꞌ “Yosparinquën,” itëranquën.

Juan 12:27

Ina quëran itaantarin: “Iporasoꞌ sëtochinachin cancantërahuë. ¿Maꞌtaꞌ Yosë ichi? tënahuë, yonquiato. Co parisitaꞌhuasoꞌ nohuantopirahuëꞌ, ‘Catahuaco Tata ama parisichisohuëꞌ,’ co itarahuëꞌ. Chiminaꞌhuaso marëꞌ oꞌmarahuë,” itahuaton, Yosë itapon:

Juan 12:28

“Catahuaco Tata nohuantëranso nii. Ina quëran piyapiꞌsaꞌ nóya niꞌsarinënquën,” itërin, Yosë nontaton. Itohuachina, inápa quëran Yosëri itërin: “Nani catahuaranquën. Nohuantërahuëso ninan niꞌton, piyapiꞌsaꞌ nóya niꞌninaco. Iporasoꞌ catahuaantaranquën nohuantërahuëso nicacaso marëꞌ. Napoaton noya noya niꞌsarinaco,” itërin Yosëri.

Hechos 17:24

Ina Yosësoꞌ chini chiníquën nanantërin. Iráca isoroꞌpaꞌ, yaꞌipi maꞌsha isëquë yaꞌhuërinsontaꞌ acorin. Inasoꞌ huaꞌanënpoaꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipimiáchin huaꞌanëntarin. Moshatopiso pëiꞌ piyapiꞌsari nipiquë co Yosë yaꞌhuërinhuëꞌ.

1 Corintios 2:10

Imarëhuasopitaso nipirinhuëꞌ, nitotërëhuaꞌ. Yosë nohuanton, Ispirito Santo anitotërinpoaꞌ. Yaꞌipi Yosë yonquirinsopita Ispirito Santo nitotërin.

2 Corintios 3:14

Israiroꞌsaso nipirinhuëꞌ co natantochináchinhuëꞌ cancantopi. Ipora huantaꞌ Yosë quiricanën iráca ninshitopisoꞌ nontopirinahuëꞌ, co noꞌtëquën yonquipihuëꞌ. Nipaꞌcopirayatërinso pochin cancantatonaꞌ, co nanitopihuëꞌ Yosë quiricanën noꞌtëquën nitotacaisoꞌ. Quisocristoíchin catahuarinpoaꞌ noꞌtëquën nitotacasoꞌ.

1 Samuel 2:18

Inapoasoiꞌ, Samoirosoꞌ huiꞌnapiraꞌhuatarin. Rino piꞌshi quëran nipinan ipoto aꞌmosahuaton, Sinioro marëꞌ sacatarin. Corto huaꞌanoꞌsa inanpi aꞌmopi niꞌton, inanta inanpi aꞌmorin.