Mateo 10:19 - Chayahuita (Shahui)

¹⁹ Inaquëpita quëpahuachinënquëmaꞌ, ama paꞌyancosohuëꞌ. ‘¿Maꞌcha tonoꞌpoya?’ ama tocosohuëꞌ. Naporoꞌ Yosë anitotarinquëmaꞌ noꞌtëquën aꞌpanitacamaso marëꞌ.

Mateo 10:19 ပူးပေါင်းရင်းမြစ်များ

Éxodo 4:12

Napoaton, Iquipitoquë noya paquëꞌ. Noya nonacasosoꞌ, carinquën catahuaranquën. Maꞌsona taꞌcasontaꞌ, anitotaranquën, itërin.

Éxodo 4:15

Yaꞌipi camairanquënsoꞌ, ina shaꞌhuitëquëꞌ. Inari quëma yaꞌhuërënamën israiroꞌsa nontarin. Quëma ca yaꞌhuërënamëhuë nonsaranso pochin, inanta quëma yaꞌhuërënamën nonsarin. Carinquëma catahuaponquëma nonacamasoꞌ. Maꞌsona nicacasonta anitotaranquëmaꞌ.

Jeremías 1:7

Siniorosoꞌ taantarin: “Ama, ‘caso huiꞌnapico,’ tëquësohuëꞌ. Ipora quëran huarëꞌ quëmasoꞌ, intohuaso aꞌparanquë paꞌsaran. Maꞌsona camairanquënsoꞌ, shaꞌhuiaran.

Jeremías 1:9

Ina quëran imirin ihuësahuaton cariananinco. Inapotahuatonco nontaantarinco:

Mateo 10:18

Imaramacoso marëꞌ huaꞌanoꞌsaꞌ yaꞌhuërinquë shaꞌhuirapiarinënquëmaꞌ. Copirnoroꞌsaquëntaꞌ quëpaarinënquëmaꞌ. Ca nohuanto, inaquë quëpaarinënquëmaꞌ nanamëhuë shaꞌhuitacamaso marëꞌ. Inaquë nisha piyapiroꞌsantaꞌ aꞌchintaramaꞌ.

Mateo 6:25

Ina quëran itaantarin: “Aꞌnaquënsoꞌ maꞌsharáchin yonquipi. Capacaisoꞌ, oꞌocaisoꞌ, aꞌmocaisoꞌ, inasáchin yonquipi. ‘Nani maꞌsha yaꞌhuëtohuachinco, nóya yaꞌhuarahuë huachi,’ topirinahuëꞌ. Ama iyaroꞌsaꞌ ina pochin cancantocosohuëꞌ. Co capacaso marëáchin isoroꞌpaquë acorinpoahuëꞌ. Aꞌmocasontaꞌ, co onpopinchin yonquicaso yaꞌhuërinhuëꞌ. Yosë naꞌcon naꞌcon yonquihuatëhuaꞌ, catahuarinpoa noya yaꞌhuëcasoꞌ.

Mateo 6:31

Ama maꞌsha yonquiatomaꞌ, paꞌyancosohuëꞌ. ‘¿Maꞌcha caꞌnëꞌpoya? ¿Maꞌcha oꞌorëꞌpoya? ¿Maꞌcha aꞌmorëꞌpoya?’ ama tocosohuëꞌ.

Mateo 6:34

Napoaton ama tashiraya maꞌsha onpoamasoꞌ yonquiatomaꞌ, paꞌyancosohuëꞌ. Tashirayantaꞌ maꞌsha onpohuatamaꞌ, paꞌyanacaso yaꞌhuapon niꞌton, co ipora quëranchin ina yonquiatoma co napion ancantápamaso yaꞌhuërinhuëꞌ,” tënin Quisoso.

Lucas 12:11

Aꞌna tahuëri mapachinënquëmaꞌ, cotio niyontonpiso pëiquë quëpaarinënquëmaꞌ. Huaꞌanoꞌsaꞌ, coisëroꞌsaꞌ, inapitaquë shaꞌhuirapihuachinënquëmaꞌ, ‘¿Maꞌcha tonoꞌpocoya?’ ama tocosohuëꞌ.

Lucas 12:12

Naporoꞌ Ispirito Santo catahuaarinquëmaꞌ noya aꞌpanitacamasoꞌ,” itërin Quisosori.

Hechos 6:10

Istipanso nipirinhuëꞌ, Ispirito Santori catahuarin niꞌton, noꞌtë noꞌtëquën nonin. Co nanitopihuëꞌ aꞌpanicaisoꞌ.

Filipenses 4:6

Maꞌsha onpohuatamaꞌ, ama paꞌyancosohuëꞌ. Ama nisha nisha yonquicosohuëꞌ. Yosë nontocoꞌ catahuainquëmaꞌ. Maꞌsha pahuantohuachinquëmaꞌ, nitocoꞌ. “Ma noya catahuarancoi niꞌton, ‘Yosparinquën, Sinioro,’ ” itocoꞌ.

2 Timoteo 4:17

Taꞌananpipirinacohuëꞌ, Quisocristo catahuarinco. Co patërincohuëꞌ. Achinicancaninco niꞌton, inaquëntaꞌ yaꞌipi Yosë nanamën shaꞌhuirahuë. Nisha nisha piyapiꞌsaꞌ nani natanpi. Paꞌpiniꞌ yamaninposo pochin yatëpapirinacohuëꞌ, Yosë catahuarinco, chaꞌërahuë.

Santiago 1:5

“¿Maꞌcha ipora niiya?” topatamaꞌ, Yosë nontocoꞌ noya anitochinquëmaꞌ. Onpopiontaꞌ Yosë nontacasoꞌ yaꞌhuërin. Co nosororinpoasoꞌ apiratërinpoahuëꞌ. Inaora nohuanton, catahuarinpoaꞌ. Nontërëhuaso marëꞌ co noꞌhuirinpoahuëꞌ. Catahuarinpoaꞌ noꞌtëquën yonquicaso marëꞌ.